Eda Tukuni Karisito
O Koya Ena Colata na Nodra iValavala Ca
Ni oti ga e vica na yabaki na neirau sa lesu mai kei Gisèle na watiqu ena kena liutaki na kaulotu mai na Fiji Suva Mission, sa laurai vua na kenisa ni kete. Na dredre e sotavi e wili kina na tolu na veisele dredre sara ka levu na kena vereverea ka vakavuna me kau laivi vakadua na ketena. Ena veta sara e cake ni gauna au dau raici watiqu tu kina ni dau mosi, au sa qai kila vakavinaka kina na yaga ni Veisorovaki i Jisu Karisito
Au nanuma lesu niu vakila niu sa sega sara ga ni taura na bibi ni veika e dau yaco vei Gisèle. Na cava e cakava me mai sotava tiko kina na veivakararawataki oqo? E a sega beka ni qarava na Turaga ena yalodina? E a sega beka ni talairawarawa ki na Vosa ni Vuku? Na cava beka e sega ni tarova kina o Koya na tauvimate oqo? Baleta na cava?
Dua na bogi au a masu ka dolava kina na yaloqu kei na ka au vakila niu sovaraka vua na Turaga na noqu veilecayaki. “Sa sega tale ni qai rawa vei au meu raica tu na nona vosota tiko na mosi o watiqu!”Au tukuna Vua. Au sa qai nanuma meu sa rai mada ki na ivolanikalou. Au raica na veitikina veivakacegui oqo baleti Jisu Karisito ena Alama 7:11–12:
“Ia ena mai vunau voli ko [Jisu], ena vosota na ka rarawa, na veivakararawataki kei na veivakatovolei kecega, a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra i valavala ca na nona tamata.
“Ena soli Koya me mate me sereka kina na i vesu ni mate sa vesuki ira tu na nona tamata; ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma.”
Me yacova mai na gauna oqori au a sega ni bau vakasamataka na bibi ni Nona Veisorovaki na iVakabula. Au sega ni bau vakasamataka ni na colata o Jisu Karisito me Nona na mosi nei Gisèle —se na noqu. Au tokitaka na noqu mosi kei na taqaya vei Koya ka me colata “na nodra mosi kei na cala na nona tamata.” Ni sa mai vakavoui na ka au kila, au vakila ni sa mamada sara mai na noqu icolacola!
Nikua sa vinaka cake sara na bula nei Gisèle, vaka ga e sega ni a tauvi kenisa. Ena veigauna ni dau laki laurai e qai tukuna na nona vuniwai ni e vaka na “cakamana.” Au sa vakavinavinaka sara ga ena nona sa bula vinaka cake tale, ia au sa vakavinavinaka talega ena noqu sa yalo vakacegu. Na yalo vakacegu ka tiko ena vakamuri ni iVakabula e solia vei au na veivakadeitaki ni sa dodonu me sa na daumaka na veika kece.
Oqo niu sa dau sotava na dredre, ena vakanamata noqu vakasama ki na lesoni o ya kei na ka e tukuna na Turaga vei Josefa Simici na Parofita: “Raica na Luve ni Tamata sa vosota rawa na veika e toro sobu sara. Ko nanuma li ni ko sa uasivi cake mai vua?” (V&V 122:8). E dau veivakacegui niu nanuma na solibula i Jisu Karisito.
Au sa na dau vakavinavinaka tu ga vua na iVakabula ena vuku ni Nona lomasoli me sotava na mosi ni veika sa mai vosota. Au vakadinadinataka ni na Nona loloma, Nona loloma veivueti, kei na Nona dau kauwaitaki keda kece na Luvena. O Koya e noda iVakabula, kau lomani Koya.
O My Father, by Simon Dewey, me kakua ni lavetaki