Lalai Dau nipiano

Mai vei Jan Pinborough

Mekesini ni Lotu

“Sega ni rawa!”

“Kua ni veiwali tiko!”

“Ena sega ni rawa ni yaco oqori!”

Oqori na ka eratou na tukuna o Andrea, Erick, Kristofer, Suzett, kei Yuridia mai Provo, e Utah, kevaka mo a tukuna vei iratou ni ratou na tabapiano ena soqoni ni sakaramede ka tarava era na vakaitavi kina na Lalai. E dua ga vei iratou e sa bau taba piano oti!

Ia a bolei iratou kina na nodratou daunipiano ena Lalai, o Sisita Perry,—ka ratou tu vakarau me ratou ciqoma.

Vakadua e veimacawa, eratou na tauri lesoni yadua vei Sisita Perry, vakavo ga vua e dua ka sa dua tiko na nona qasenivuli. Eratou dau vakatovotovo mai vale ena vavaniki livaliva. Sega ni dede eratou sa vulica tiko na ivakadewa rawarawa ni veisere ka na lagati ena soqoni ni sakaramede era na vakaitavi kina na Lalai. Eratou dau vakatovotovo talega ena Lalai ni ra lagasere tiko na vo ni gone.

Ni sa yaco mai na kena siga. Eratou dui vakatagitaka e dua se rua na sere. Eratou a rere beka me ratou vakatagi e matadra na lewe ni tabanalevu taucoko? Io sara! Ia a sega ga ni tarovi iratou.

“Au sa rui ririko,” e kaya ko Kristofer, “ia au vakabauta tikoga.”

Vinaka vakalevu na nodratou vakabauta kei na cakacaka vakaukauwa, a vinaka taucoko na veika eratou rawata ena siga ko ya. Kei na ka vinaka duadua?

“Sa dua na ka vinaka ni rawa ni da veivuke ena lotu,” e kaya o Andrea. “Sa dua na veivakalougatataki cecere vei au.”

Oqo sa rawa ni ra vakatagi na gone ena lotu vakamatavuvale, ena gauna ni papitaiso, kei na gauna e lagasere kina na nodra matavuvale ena soqoni ni sakaramede. Daumaka dina!

E Dua na Qasenivuli Digitaki

Na nodratou qasenivuli na gone oqo, o Sisita Janice Kapp Perry, e dua na dau buli sere. A vola o koya na “I Love to See the Temple” kei na sere tale eso ena Nodra iVolanisere na Lalai. “O ira na gone sai ira na vunilagi ni ivakatagi,” e kaya o Sisita Perry.

E Rawa Talega ni o Vuli!

Eratou a vuli na gone oqo mai na dua na ivola ka vakatokai na Vulici ni Vavaniki. E rawa ni o wilika se tabaka mai na initaneti enawww.lds.org/churchmusic (ena vosa Vakavalagi, Varanise, Potukali, kei na vaka-Sipeni). Kiliki ena iYaya ni Vuli, Veitomani Vei Ira Eso, kei na Vuli ni Vavaniki iVola kei na Rorogo. E Amerika kei Kenada, e rawa ni o otataka ena nodrau veivakadonui na nomu itubutubu kei na veivuke mai na ldscatalog.com.

Na vavaniki me vaka eratou a vakayagataka na gone oqo era tu talega ena Sitoa ni Lotu.

Ia vakacava kevaka e sega na nomu qasenivuli ni tabapiano? Ena kila beka e dua me vakavulici iko na nomu peresitedi ni Lalai se nomu bisopi se peresitedi ni tabana. Kevaka e yalomu dina, o na kunea e dua na sala. Vakasamataka na nomu marau ni rawa mo qaravi ira na tani ena isolisoli ni ivakatagi.

O na vinakata beka mo na tekivu ena nomu vulica na “Come, Follow Me” ena tabana e 62 ni ivola oqo. Oqo e dua na sere era na lagata beka na nomu Lalai ena soqoni ni sakaramede era na vakaitavi kina ena yabaki oqo.

iVakasala ni Vakatovotovo

“Vakatagitaka mada e liu na sere o dau taleitaka duadua. Au dau vakatovotovo ena dua ni oti na vuli ka vakakina ni oti na vakayakavi.”

Kristofer P., yabaki 8

“Tekivu vakamalua. Ni o sa kila vinaka na sere, sa rawa ni o vakatagitaka vakatotolo.”

Yuridia M., yabaki 11

“Ni o vakatovotovo, e sega ni veitarogi. Kevaka o cala, kua ni leqataka o vuli tiko oqori. Yalodei, ka vakabauta tikoga.”

Andrea C., yabaki 11

“Au dau vakatovotovo ni se bera na vuli ka vakakina ni sa oti. Vakatovotovo tikoga me yacova ni o sa taura rawa. Na taba piano e dua na ka cecere. E rawa ni o vukea e levu sara na tamata.”

Erick V., yabaki 10

“Nanuma me veve tiko na nomu iqaqalo. Ni o sa yaloca mai, kua ni soreva. Tovolea tikoga!”

Suzett M., yabaki 10

Veitaba o Christina Smith