Nanumi na Bula Yaga
Peresitedi Spencer W. Kimball (1895–1985)
E a vulica o Spencer W. Kimball ena nona tubu cake tiko mai Arizona ni se gone me dau cakacaka vakaukauwa. Me vaka ni o Spencer e makubui Heber C. Kimball (1801–68) na iApositolo, ka luvena e dua na peresitedi ni iteki, e a vakatorocaketaka na nona ivakadinadina ka yalodina ki na kosipeli.
Ni a se gonetagane e dau itavi nei Spencer me dau vodo tu ena dela ni qiqi ni co madu ka butuka sobu na co ena gauna eratou dau vakavodoka yani kina na tuakana. O ya na cakacaka ena draki katakata qai dredre ia e cakava rawa —vakavo ni sa qiri mai na lali ni lotu me tekivu na soqoni ni Lalai, ka dau vakayacori ena gauna o ya ena loma ni macawa. E sega vakadua ni dau calata na soqoni o ya. E duatani toka nodratou vakasama na tuakana ka tekivu vakatotolotaka na vakavodoki ni co ki na qiqi. Ni ratou qai kidava ni sa rewa icake na co, sa yaco veimama tu o Spencer ki na Lalai.
O Spencer W. Kimball e a qai laki kaulotu, veiqaravi vaka-bisopi, peresitedi ni iteki, ni bera ni kacivi me sa iapositolo ena 1943. Sa idivi tu ni nona bula na ivakarau ni nona cakacaka, dina ga ni a tauvi mate ni uto kei na kenisa ni itilotilo. E vakauqeti ira na lewe ni Lotu me ra vakabalavutaka nodra ikalawa ka sa nona ibole tu na “Cakava.” Ni sa vakatu o ya na nona bula, eso sa qai nanuma ni o Spencer W. Kimball ena sega ni dede nona veiliutaki. Ia e qai veiliutaki ena Lotu me 12 na yabaki, ka yaco kina me vakaruataki na tosocake ni iwiliwili ni valetabu e, toso cake ena 50 na pasede na iwiliwili ni daukaulotu, ka soli talega na matabete vei ira kece sara na turaga era sa buladodonu.
Na nona yalodina sega ni yavalati vakarawarawa ki na kosipeli kei na nona dau cakacaka vagumatua e kauti Spencer W. Kimball mai na lomanivanua o Arizona ki na veiliutaki sara e cake ni matabose ni Lotu. Na nona veiliutaki me Peresitedi ni Lotu e vakaraitaki ena tosocake ni valetabu era tara kei na cakacaka ni Veivakalotutaki. Ena imawi: Vata kei Camilla, na watina (1894–1987).