Mataka Lailai ni Sigatabu
O ira na cauravou oqo e Viti era dau yadra vakamataka ka taubale vakabalavu, ia era dau vakayacora ena yalo nanamaki na nodra itavi.
Sa bogi ni Vakarauwai ena Tabanalevu ko Waila ena iTeki na Nausori e Viti. Sa qaravi oti na itavi ni dua na siga, ka ra sa vakavakarau na Matabete i Eroni ki na Siga ni Vakacecegu ena nodra soqoni vata ki na nodrau vale o Baraca kei Sisita Maiwiriwiri. Oqo e dua na gauna vinaka me ra vakayagataka e dua na ivakayakavi lailai ni bera ni qai tekivu na nodra lolo—ka muria na nodra moce ena ibe ena nodratou vale na Maiwiriwiri.
E yaco totolo mai na mataka vei ira na cauravou oqo ni Matabete i Eroni. Ni se bera sara ni kacabote na rarama, era duri mai vakatotolo, daramaka na nodra sote vulavula kei na neketai kei na nodra tarausese balavu loaloa, qai 6 na kaloko era sa biuta yarurua mai na nodratou itikotiko na Maiwiriwiri —me vakataki ira na daukaulotu. E dui tu na sala me ra muria na veitokani yadua oqo me rawa ni ra yaco yani kina ki valenilotu ni se bera na 10 ena mataka, na gauna e dau tekivu kina na soqoni ni matabete. Na nodra itavi me ra curu ena nodra veivale yadua na lewenilotu ka sureti ira me ra cau mai ki na isolisoli ni lolo.
Era taubaletaka na cauravou oqo e tolu na maile (5km) mai na nodratou itikotiko na Maiwiriwiri ena mua ni tabanalevu kadua ki valenilotu ena muana kadua. Oqo na gauna vinaka me ra qarava kina na nodra itavi ka sureti ira na lewe ni Lotu me ra vakaitavi ena cakacaka cecere ni nodra kauwaitaki na yada kei na tacidra kei na ganedra ena nodra cau ki na isolisoli ni lolo. E kaya kina o Peresitedi Alipate Tagidugu ena vuku ni sasaga oqo mai vei ira na Matabete i Eroni, sa tubu cake kina na isolisoli ni lolo ena 20 na pasede.
E tautauvata na kena bibi, ena kena basika e dua na gauna vinaka vei ira na cauravou me ra qarava na nodra itavi ka vukei ira na lewenilotu ena tabanalevu me ra rokova tiko na nodra veiyalayalati ka a vakayacori ena gauna ni papitaiso:
“Ia me vaka dou sa gadreva mo dou curu ki na lomanibai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina;
“Ia ni sa lomamudou mo dou tagi vata kei ira sa tagi, ka vakacegui ira sa rarawa, ka vakadinadinataka na Kalou ena veigauna kecega, ena veika kecega kei na veivanua kecega dou sa tiko kina me yacova na mate, io me vakabulai kemudou na Kalou ka okati kemudou vata kei ira ena imatai ni tucake tale mai na mate, me nomudou kina na bula tawamudu” (Mosaia 18:8–9).
Vei ira na cauravou uasivi oqo, na kumuni isolisoli ni lolo e sega ni icolacola ia e veivakalougatataki. Era daramaka na nodra sote vulavula kei na neketai ena marau, era yadra vakamataka ena marau, ka tukituki ena lomadina ena nodra veikatuba na lewenilotu ena mataka lailai ka sureti ira me ra vakaivotavota ena veivakalougatataki e dau yaco mai ni soli ena yalogalala na isolisoli ni lolo.
Niu saravi ira toka na cauravou oqo ena nodra vakavakarau ka qarava na nodra itavi vakamatabete, au nanuma ni sa dua na veivakalougatataki vakasakiti vei ira ena nodra bula taucoko me ra kila na bibi ni nodra sasaga ena nodra sureti ira na lewe ni Lotu me ra toro voleka mai vua na iVakabula ena nodra solia na isolisoli ni lolo. Sa na vakaevei na kena uasivi na nodra sa na laki kaulotu, kei na uasivi ni ra sa na vakawati ka tama io na vua ni nodra sasaga ni matabete.
Era na kila vakavinaka cake na ivolanikalou oqo me baleti ira na tamata ni Turaga: “A sa vakatokai ira na nona tamata na Turaga me ra lewei Saioni, ni ra sa yalovata ka duavata ka ra kitaka na ivalavala dodonu; a sa sega vei ira sa dravudravua” (Mosese 7:18).
Sa dua dina na veivakalougatataki vei ira na matabete oqo me ra kila ni ra sa sureti ira na lewenilotu me ra voleka yani vua na iVakabula.
E tekivu vakamataka lailai na nodra veiqaravi, ia ena matadredredre era taubale kina na cauravou oqo mai na dua na mua ni tabanalevu ki na dua tale, ka ra kumuni isolisoli ni lolo ena nodra ilakolako.
Viti
Niu Siladi
Ositerelia
iYalayala ni vanua: veitaba na © Dynamic Graphics, Inc.; veitaba o Talat Mehmood; veisautaki na mape mai na iVurevure Eso ni Mape