iBulubulu Vatu Dregati

Mai vei David L. Frischknecht

Tabacakacaka ni Lewenivuli

Na veika e tukuni ena dua na tikidua ni volivolitaki e vaka ni rawa ni kunei na yaloka ni dilio—e viavia lasa tale—ia era vakananuma vei au e dua na yalayala vakadeitaki ki na tawamudu.

Na siga ni oti na nona sa mai takali o Ta, keitou a lako ki na valeniwawa kei tinaqu, ganequ kei taciqu me laki tuvai na veibulu. Na neitou itavi me keitou digia e dua na kisi ni mate kei na dua na qara me na biu kina na kisi.

Ni keitou vakaraica tiko na veika me keitou digidigi kina, au raica e dua na tikidua ni volivolitaki. E tukuna mai na veika tale eso, ni qara oqo e dregati koya ga vakataki koya, ka vakadeitaka ni drega oqori ena tu me 75 na yabaki. E dina ni vakarau yaco oqo e dua na soqo bibi, au taleitaka na veivakadeitaki o ya.

“O cei ena laki dikeva na drega oqori ni oti e 75 na yabaki?” Au taroga. “Ia kevaka e dua ena vakayacora ka qai sega ni vakakina? Ena rawa beka,” au vakananuma, “me na dregati tu ga na qara o ya?”

Ena gauna ni vakasama oqori, a vagolei na noqu vakanananu ki na dua tale na qara, na kena e vakamacalataki ena Maciu 27. Na qara oqori, e dua na qara vatu mai na dua na gauna makawa toka, e lati na kena katuba ena dua na vatu levu:

“Ia ena mataka, ena siga sa tarava na siga Vakarau, era sa soqoni vata vei Pailato ko ira na bete levu kei ira na Farisi,

“A ra sa kaya, Kemuni na Turaga, keitou nanuma ni sa kaya na dauveivakacalai ko ya, ni sa bula tiko, Me oti mada e tolu na bogi kau na qai tucake tale mai.

“O koya mo ni qai lewa me sogo vakaukauwa na ibulubulu me oti mada na ikatolu ni bogi, de ra lako mai na tisaipeli ka butakoca, ka qai kaya vei ira na tamata, sa tucake tale mai na mate ko koya: ena qai levu cake kina na veivakacalai e muri, ka ca vakalailai ko ya e liu.

“Sa qai kaya vei ira ko Pailato, sa tu ga vei kemudou na ivakatawa eso: dou lako dou vakadeitaka me vaka dou sa rawata.

“Era sa qai lako, a ra sa sogota vakaukauwa na ibulubulu, ka ra sa dregata na vatu, ka lesia eso na sotia me vakatawa” (Maciu 27:62–66).

Ena veiivakaro kece sara e soli ena kedra itukutuku na tui kei na turaganivalu kei ira na iliuliu, na ivakaro a solia o Pailato me vakadeitaki na dregati ni ibulubulu qara vatu, sai koya na kena a maumau duadua beka.

E rawa beka ni na dregati vinaka tu ga na ibulubulu qara vatu o ya? Na ka dina, ni a sega sara ga ni rawa me ratou vakayacora vakavinaka na ivakaro oqori o iratou na sotia ni sega ni rawa me na sega ni rawa ni tadola na ibulubulu qara vatu oqori: “Raica sa tavuki oti vakalevu na vanua; ni sa dua na agilosi ni Turaga sa lako sobu mai lomalagi, a sa lako mai ka vaqiqica tani na vatu, a sa tiko e delana” (Maciu 28:2).

Ena kena sa taluva tani na drega ni ibulubulu qara vatu e duabau ko ya, sa na tadola kina na ibulubulu simede kei na ibulubulu qele kei na qara vatu kece sara era sa dregati tu. Vakadeitaki.

Na Uluvatu ni Noda Veivakabulai sai koya na dauveisereki mai na mate kei eli. Sai Koya “na tucake tale, kei na vunibula” (Joni 11:25). Ena Vukuna “ko eli ena soli ira mai na yalo sa vesuka tu, kei na ibulubulu ena soli ira mai na yago sa vesuka tu, ia erau na cokoti vata tale na yago kei na yalo ni tamata; a sa yaco na ka oqo ena kaukauwa ni nona tucaketale mai na mate na Yalosavasava ni Isireli” (2 Nifai 9:12).