Au Kila Vakacava
iOvi ni Loloma vaka-Tama
A leqa na tamaqu ena noqu se yabaki vitu. Na vakatitiqa au sotava e voleka sara ga me oti kina na noqu veivakabauti vua na Tamaqu Vakalomalagi.
Sa voleka sara ga me ratou biuta na pati na noqu matavuvale, ia au se vinakata tikoga meu lako ki Rollerblading. A ovici au o tamaqu ka taroga kevaka au vinakata meu tikoga mai me rawa ni na kauti au ki Rollerblading.
“Sega!”Au kaya ena cudru.
“E rawa mo vakabauti au,” a kaya.
O ira tale eso era sa via lako, ka keitou sa vodo sara ena motoka. Ni oti ga e tini na miniti keitou sotava e dua na vakacalaka ni motoka. E veivakurabuitaki, niu bula, ia a mate o tamaqu. Na “sega” o ya! sa ikoya na iotioti ni ka au kaya vua, ka sa ikoya na iotioti ni tamata au na mokota me vuqa na yabaki.
Ena 11 na yabaki e tarava, noqu bula sa toka ena dua na veilecayaki torosobu. Sa yali noqu vakabauti au vakai au ka sa tekivu noqu sega ni vakabauti ira na tamata kecega. Sa sega niu marautaka noqu bula ni dua na siga ena noqu sa yabaki 18, au a kunea niu sa sasaga tiko ena ruku ni vakanuinuikara vakaitamera, kau masuta na Kalou me vakaraitaka vei au na sala ki na dua na bula marau.
Ni oti e dua na macawa erau sotavi au e rua na daukaulotu. Erau vakaraitaka vei au e dua na ivola ka tukuna vei au ni dodonu meu masulaka me vakadinadinataki na kena dina. Na ka erau kereya e rairai lailai sara, ia e titobu sara na mavoa e biuta toka mai na mate nei tamaqu, kau vakasamataka kina na noqu sotavi rau na daukaulotu me dua na ka ni sota vata tu ga ka sega ni isaunitaro mai vua e dua na Kalou ka lomani au.
Ia, au a wilika na iVola i Momani ka masulaka meu ciqoma e dua na isaunitaro— ia e sega ni mai yaloqu dina. Ni oti kece, e kena ibalebale o ya meu na vakabauta na Kalou, meu ciqomi Koya kei na Nona isaunitaro. A rawarawa sara na ciqomi ni vakalelewa ni Lotu ka ra sa vakarautaki oti tu. Kau a qai kidava talega ni vuqa sara na iliuliu levu ena itukutuku makawa ka ra a vakatakilai kivei au e koronivuli era sega ni taucoko. E vakacava kevaka me a tautauvata kei ira o Josefa Simici?
Ia, na kena itinitini, au a qai papitaiso ka vakadeitaki. Au kila niu gadreva eso na veiliutaki ena noqu bula, kau taleitaka na Lotu kei ira na lewenilotu. Ia ena gauna oqo au kila niu a curu ena lotu ka sega ni dua na ivakadinadina dina, e dua me vakatakatara na loma. Na vakabauta a tu vei au a yaco mai ena noqu kila ni veiba era cakava o ira na vakacacana na Lotu era sega ni dina. Ia e sega tikoga na veivakabauti, au a yacova na vanua e maroroi tu kina na vakabauta o ya ka vakilai na kena vakamalumalumutaki. Sa tekivu noqu vakaveikilaitaki ki na Lotu baleta na lailai ni veivakabauti kei na noqu rarawa, kau sa vakalailaitaki tale ena itutu vata ga o ya.
Au a mani cakava e dua na vakatulewa bibi: Au na dau masu, ia ena gauna oqo au na cakava me vaka a vakamamasu o Moronai, vata kei na “vakabauta na Karisito,” “yalodina,” kei na “lomamudou taucoko” (Moronai 10:4). Ena siga au sa digitaka, au a lolo ka masulaka na veidusimaki. Au vakayagataka na siga ena noqu vakanananutaka na veika kece a yaco.
Ena bogi o ya au a tekiduri ena noqu idavodavo. Noqu cuva sobu, au kereya na Tamada Vakalomalagi me baleta na dina ni iVola i Momani. A tekivu meu nanuma na noqu vakatitiqa kece sara. Au bobo, qumia matua na ligaqu, ka kerea tale—ena yalodina, ena lomaqu taucoko, vata kei na vakabauta na noda iVakabula.
E rairai me sa mudu na vuravura. Au vakila na katakata ka ologi ena rarama. E 11 na yabaki na kena balavu ni noqu gadreva lo tu na ka oqo, qai kena itinitini nona mokoti au tale e dua na tama—e dua na Tamada Vakalomalagi. Kena itinitini au sa qai kunea e dua meu vakabauta. “Io,” au kaya, ena tuturu ni wainimataqu, “Au vakabauti Kemuni.”
Droini mai vei Doug Fakkel