Na Ka Eda Vakabauta
Sa Tucaketale o Koya
Na veivanua au dau lako kina, au dau tovolea meu taleva na kena ibulubulu. Sa dua na gauna ni vakanananu, ni vakaisaisa ena ibalebale ni bula kei na kena na yaco dina mai na mate. Ena ibulubulu lailai ena koro ko Santa Clara e Utah, au nanuma na kedra lewe levu na yaca ni kai Suwitisaladi ka ra volai tu ena vatu ni ibulubulu ka ra sa rairai makawa sara. E lewe levu vei ira oqori era a biuta tu mai na veibuca drokaroka e Suwitisaladi, ka ra rogoca na kaci, “Ni Lako Mai Ki Saioni,” ka mai tawana na veivanua a ra sa mai “kacikaci ni cagi koto kina.” Era vosota na ualuvu ni vula itubutubu, na dravuisiga ni vula ikatakata, lailai ni tatamusuki, kei na cakacaka vaka na bobula. Era sa biuta koto mai e dua na itukutuku ni solibula.
Na ibulubulu lelevu, ka levu sara na gauna na kena dau tara noda vakanananu era dau vakananumi sara vakalevu baleta beka na vanua era a balemate kina me vaka na bucanivalu ni veisei ni ra daramaka tu na unifomu ni nodra matanitu. E dua ena dau vakananuma na tatadra sa mai vorolaki, na lalawa ka sa sega ni vakavotukana, na yalo sa mai mosi wale tu ga kei na bula ka sa mai tini koso baleta na gata ni iyaragi ni ivalu.
Na levu ni vanua e sa tu kina na kauveilatai vulavula ena veikoro lelevu e Varanise kei Belgium sa vakaraitaka na ca ni iMatai ni iValu Levu kei Vuravura. Mai Verdum, Varanise sa bau dua dina na ibulubulu vakaitamera. Ena vula itubutubu ni ra dau cukicuki na dauteitei, era na kunea e dua na isala kaukamea se dua na gusu ni dakai—na ivakananumi ni milioni na tamata ka a dave mai kea na nodra dra.
Mate, Dua na iWase Vou ni Bula
Ena vica na yabaki sa oti au a tucake tu ena yasa ni loga ni dua na cauravou, na tama ni rua na gone, ni vakananuma voli na bula oqo kei na kena ka sa waraki koya tu mai. Taura o koya na ligaqu, rai mai vakadodonu vei au, ka kerea mai, “Bisopi au kila ni sa na vakarau meu mate. Tukuna mai vei au se cava ena yaco ki na yaloqu niu sa mate”.
Au a masuta na veituberi mai lagi. Au sa rai sara ki na iVola i Momani ka davo koto ena teveli lailai e yasa ni nona loga. Au tekivu wiliwili sara vakadomoilevu.
“Ia sa vakaoqo na ka ena yaco ena maliwa ni gauna eda mate kina ki na gauna eda na tucaketale kina— … na gauna sa veibiu kina na yalo kei na yago, … sa kau vua na Kalou ka a buli ira.
“Ia ko ira sai valavala dodonu, era na kune marau kei na vakacegu mai parataisi, ia era na vakacegu kina mai na nodra rarawa kei na oca.
E bobo na matai noqu itokani gone oqo, vakaraitaka mai na nona vakavinavinaka, ka sa naulu yani vakamalua ki na parataisi ka keirau se qai veitalanoataka toka ga.
Qaqa mai na iBulubulu
Meda laivi Luke mada na vuniwai me vakamacalataka na ka e a sotava o Meri kei Meri tale ka dua ni rau sa lako yani ki na ibulubulu:
Aratou sa kunea ni sa vaqiqici tani na vatu. …
“… Ia, ni ratou sa curu eratou sa sega ni kunea na yago ni Turaga ko Jisu.
“… A sa yaco ni ratou sa kurabui vakalevu kina, raica e rua na tamata sa tu voleka vei iratou ena isulu lumilumisa:
“Erau … kaya vei iratou, Ena cava dou sa mai vakasaqarai koya sa bula ena kedra maliwa na mate?
“Sa sega e ke ko koya sa tucake tale”(Luke 24:2–6).
Oqo na kaci ni veiqaravi ni Lotu va-Karisito. Na dina ni Tucaketale ena kauta mai vua e dua kei ira kece na vakacegu ka na ulabaleta kece na veika e kilai rawa. Ena vakacegui ira na wekadra era davo tu mai na rara e Flanders, se o ira era sa tu mai boto ni sauloa se o ira era sa vakacegu koto ena ibulubulu lailai e Santa Clara. O ya na dina raraba.
Niu dua walega na Nona tisaipeli, au vakadinadinataka ni mate sa vakamalumalumutaki, ni sa yaco na qaqa mai na ibulubulu. Meda na kila taucoka sara na ibalebale ni vosa ka vakaloutaki mai vei Koya ka sa vakavotukanataka. Nanumi ira. Vakamenemenei ira. Rokovi ira.Sa Tucaketale o Koya.
-
Eda lako mai ki vuravura meda mai vuli, bula, ka toso yani ena noda ilakolako tawamudu ki na bula sa vinaka sara.
-
Eso ena lekaleka ga na nodra tiko e vuravura, ka so ena balavu sara na nodra bula. Ena sega ni bibi na balavu ni noda bula, ia na ivakarau ni kena bulataki.
-
Sa na qai yaco mai o mate kei na itekivu ni dua tale na iwase vou ni bula.
-
Na iwase vou ni bula o ya ena veikau yani ki na siga ni tucaketale, na gauna me rau na duavata tale kina na yago kei na yalo ka me sa na sega tale ni qai rau veibiu rawa.
Mai na “Sa Tucake Tale o Koya,” Liaona, Epe. 2003, 2–7.
Tukuna na Karisito vei Marica, “Oi au na vu-ni tucaketale, kei na vu-ni- bula, o koya sa vakabauti au, kevaka sa mate ena bula ga, ia ko koya sa bula ka vakabauti au ena sega sara ni mate.” (Joni 11:25–26).
Na Tucaketale i Karisito, e tiki ni Veisorovaki, sa dolava na katuba vei keda kece meda na tucaketale.
Mai na i Mawi: My Redeemer Lives, mai vei Roger Loveless, me kakua ni lavetaki; itaba droini mai vei Matthew Reier, Christina Smith, kei Welden C. Andersen; Behold My Hands and Feet, mai vai Harry Anderson; Lasarusa, mai vei Carl Heinrich Bloch