Era na Ciqoma na Dauvolivola Na iVolalailai Vou ni Valetabu

Era na ciqoma o ira na dauvolivola ni Liaona kei na Ensign na ivolalailai vou ni Valetabu ni Lotu i Jisu Karisito ni Yalododonu Edaidai me isosomi ni nodra ilavelave ni Okotova 2010.

Na ivolalailai oqo sa ilavelave vou ni kena a tabaki sara ena 50 na yabaki sa oti. A tekivutaki me dua na mekesini ni Lotu na Improvement Era ena 1955. Sa yaco sara me sa dua ga na ivolalailai vakataki koya ka sa vakavoutaki oti vakawalu. Na kena ka vou oqo ena tiko kina na itukutuku kei na itaba vovou ka na tabaki ena 45 na veimataqali vosa.

Era sa mai veivakayaloqaqataki kina na parofita edaidai, oka kina o Peresitedi Thomas S. Monson, vei ira na lewenilotu mera ciqoma na nodra dui cakacakatabu ni valetabu ka lesu tale kina ka vakayacora na nodra cakacaka na nodra qase e liu.

Sa inaki ni ivolalailai oqo me na vakavulica na vunau kei na ivakavuvuli ni sokalou ena valetabu. Era sa vakayaloqaqataki na lewe ni Lotu mera yadua tiko na nodra ivola oqo e vale mera vakayagataka kina na itubutubu ena lotu vakamatavuvale se soqoni tale eso mera vakavulici kina na nodra matavuvale me baleta na valetabu.

Na ivolalailai oqo e ganita na veitabayabaki kece sara ni bula. Na veika vou e tiko ena ivolalailai oqo e oka kina na “Veivakalougatataki ni Valetabu,” mai vei Peresitedi Thomas S. Monson, kei na “Vakavakarau ki na Veivakalougatataki ni Valetabu,” mai vei Elder Russell M. Nelson ena Kuoramu ni iApositolo Le Tinikarua. E tiko talega kina e dua na nodra tikina na itabagone “Na Valetabu Me sa Tiki ni Nomu Bula,” ka rawa vei ira na gone mera vulica kina na veika e baleta na valetabu mai na dua na ulutaga e tiko kina “Na Nomu iLakolako ki Valetabu.” Ko ni na taleitaka na sarava na itaba totoka ni veivaletabu e vuravura taucoko. E tu talega ena ivolalailai oqo na isau ni taro e dau tarogi vakawasoma mera vukei kina na lewenilotu era vakavakarau tiko ki na nodra ilakolako ki valetabu ena imatai ni gauna.

Era sa vakayaloqaqataki na lewenilotu mera wasea na ivolalailai oqo vei ira na lewe ni nodra matavuvale kei ira na nodra itokani ena veimatalotu tale eso. Sa tu na ikuri ni ilavelave ni volalailai oqo ena veisitoa ni Lotu ka vakakina ena LDScatalog.com.

Sa rawa vei ira na peresitedi ni iteki, bisopi, kei ira na qasenivuli ni kalasi ni vakavakarau ki valetabu mera digitaka na ivola oqo me ikuri ni ivurevure vata kei na ivola vakarau ni qasenivuli ni Vakalougatataki mai Lagi Vakavakarau ni Curu ki na Valetabu.

Ke gadrevi, sa rawa vei ira na iliuliu ni matabete mera solia na ivolalailai oqo vei ira na lewenilotu vakaedaumeni me vukea na nodra nanuma tiko na nodra cakacaka ena valetabu. Sa na vukei ira talega kina na lewenilotu era sa lesu tale mai ki na Lotu ka ra sa vakavakarau tiko mera laki vauci e valetabu.

“Na ivolalailai oqo sa na ivurevure totoka sara ki na lewe taucoko ni matavuvale,” a kaya o Elder Yoshihiko Kikuchi ena Vitusagavulu. “Sa dua na veivuke meda nanuma tiko kina na noda cakacaka e valetabu, na noda veiyalayalati kei na veivakalougatataki, kei na nodra itavi yadudua na lewenilotu mera vakayacora na tuva kawa me baleti ira na nodra qase e liu ka vakayacora vakakina na cakacakatabu bibi ni valetabu baleti ira na wekadra ka gumatuataki tikoga na vakaitavi ena cakacaka ni valetabu.”

Ena Okotova era na ciqoma na dauvolivola na ivolalailai vou ni valetabu.