អង្គការសប្បុរសធម៌ អិល.ឌី.អេស ៖ រយៈពេល ៣០ ឆ្នាំនៃការបម្រើ
គោលការណ៍នៃការបម្រើមនុស្សទូទៅរបស់យើងគឺមិនមែនជាអ្វីដែលថ្មីនោះទេ ។ នៅគ្រប់សម័យកាន់កាប់ត្រួតត្រាទាំងអស់ សាសនាចក្របានលះបង់ជួយដល់ជនក្រីក្រ និងខ្វះខាត ។
សាមសិបឆ្នាំមុន នៅថ្ងៃទី ២៧ ខែ មករា ឆ្នាំ ១៩៨៥ ការលះបង់នោះត្រូវបានបង្ហាញអំឡុងពេលការតមអាហារពិសេសមួយ ដែលសមាជិកសាសនាចក្របានបរិច្ចាគប្រាក់ចំនួន ៦ លាន ដុល្លារអាមេរិក ដើម្បីជួយដល់ជនរងគ្រោះនៃគ្រោះទុរភិក្សនៅក្នុងប្រទេស អេត្យូពី ។ ការណ៍នេះបានបង្កើតឲ្យមានការចាប់ផ្ដើមចំពោះអ្វីដែលហៅថា អង្គការសប្បុរសធម៌ អិល.ឌី.អេស ។ នៅឆ្នាំដដែលនោះការតមអាហារនៅក្នុងខែ វិច្ឆិកា រកប្រាក់ បាន ៥ លានដុល្លារអាមេរិកផ្សេងទៀតសម្រាប់សង្គ្រោះដល់ភាពអត់ឃ្លាន ។ ការតមអាហារទាំងពីរលើកនោះបានពន្លឿនកិច្ចការយ៉ាងខ្លាំងក្លាក្នុងជំនាន់របស់យើងនេះ ។
នៅរយៈពេល ៣០ ឆ្នាំ ចាប់តាំងពីការតមអាហារនោះមក សាសនាចក្របានផ្តល់ប្រាក់ ១.២ ពាន់លានដុល្លារអាមេរិក ជួយប្រជាជនដែលកំពុងរងការឈឺចាប់ ។ ជំនួយនោះរួមមាន អាហារ ទីជម្រក គ្រឿងបរិក្ខារពេទ្យ សម្លៀកបំពាក់ និង សម្ភារសង្គ្រោះផ្សេងៗទៀត ។ លើសពីនេះទៅទៀត អង្គការសប្បុរសធម៌អិល.ឌី. អេស បានផ្តល់ជំនួយយូរអង្វែងតាមរយៈការចាប់ផ្តើមចែកចាយកៅអីរទះរុញជនពិការ ការចាក់ថ្នាំបង្ការ ទឹកស្អាត អាហារបំប៉នគ្រួសារ ថែរក្សាភ្នែក និង ការគាំពារមាតា និង ទារកទើបកើត ។ សាសនាចក្រមានដៃគូជាមួយអង្គការសប្បុរសធម៌ដែលមានកេរ្តិ៍ឈ្មោះបោះសំឡេងផ្សេងទៀត ដើម្បីធ្វើការបរិច្ចាគទាំងអស់ ។
ប្រធាន ថូម៉ាស អេស ម៉នសុន បានបង្រៀនជាញយៗថា ក្នុងនាមជាសមាជិកសាសនាចក្រ យើងមានទំនួលខុសត្រូវដើម្បីជួយជនដែលស្រេកឃ្លាន ជនអនាថា និង ជនដែលត្រូវគេឈ្លានពាន ។ សមាជិកសាសនាចក្របានក្រោកឡើងដើម្បីធ្វើតាមការអញ្ជើញនោះ ។ សមាជិកបានបរិច្ចាគពេលវេលានៃការបម្រើរាប់រយលានម៉ោង និង ទឹកប្រាក់រាប់រយលានដុល្លារដោយស្ងៀមស្ងាត់ ដោយគ្មានភាពគគ្រឹកគគ្រេង ឬ ការថ្លែងអំណរគុណជាផ្លូវការអ្វីឡើយ ។ ក្រៅពីការបរិច្ចាគដល់មូលនិធិសប្បុរសធម៌នៅលើក្រដាសបរិច្ចាគ សមាជិកបានផ្តល់នូវក្តីស្រឡាញ់ បម្រើបេសកកម្ម ធ្វើជាមិត្តភក្តិ និង ជាអ្នកជិតខាងល្អ អ្នកស្ម័គ្រចិត្តបម្រើការងារនៅក្នុងអគារសុខុមាលភាព ឬ សហគមន៍នានា ហើយចំណាយពេលរបស់ពួកគេ និង ក្តីស្រឡាញ់ចំពោះអង្គការដែលគួរឲ្យទុកចិត្តរាប់រយពាន់ផ្សេងទៀត ។
នៅពេលពួកគេធ្វើដូច្នេះ នោះពួកគេចាប់ផ្តើមបំពេញនូវអ្វីដែលព្រះអង្គសង្គ្រោះបានបង្រៀនអំពីការមើលថែដល់ជនក្រីក្រ និង ជនខ្វះខាត ។
« ពីព្រោះយើងបានឃ្លានហើយអ្នករាល់គ្នាបានឲ្យបរិភោគ យើងបានស្រេក ហើយអ្នករាល់គ្នាបានឲ្យផឹក យើងជាអ្នកដទៃ ហើយអ្នករាល់គ្នាបានទទួលយើង ៖ …
« ដែលអ្នករាល់គ្នាធ្វើការទាំងនោះ ដល់អ្នកតូចបំផុតក្នុងពួកបងប្អូនយើងនេះ នោះឈ្មោះថាបានធ្វើដល់យើងដែរ » ។ ( ម៉ាថាយ ២៥:៣៥, ៤០ ) ។