រួចរាល់ជាស្រេច ដើម្បីទទួល បព្វជិតភាពមិលគីស្សាដែក ?
« អស់អ្នកទាំងនោះដែលទទួលបព្វជិតភាព ឈ្មោះថាទទួលសម្បថ និង សេចក្ដីសញ្ញានេះពីព្រះវរបិតាយើង ដែលទ្រង់ពុំអាចបណ្ដាច់ ឬ អាចរើបានឡើយ » ( គ. និង ស. ៨៤:៤០ ) ។
រចនារូបភាពដោយ ចន ខាឈិក
មិនដូចជាបព្វជិតភាពអើរ៉ុននោះទេ ដែលត្រូវទទួលដោយមិនមានសម្បថ តែបព្វជិតភាពមិលគីស្សាដែកគឺត្រូវទទួលដោយសម្បថ ដែលត្រូវបានធ្វើឡើងដោយព្រះវរបិតាសួគ៌ ព្រមទាំងសេចក្ដីសញ្ញាដែលត្រូវបានធ្វើឡើងរវាងអ្នក និង ទ្រង់ ។ គំនិតដូចតទៅនេះ នឹងជួយអ្នកយល់ពីឃ្លាសំខាន់ៗនៅក្នុង គោលលទ្ធិ និង សេចក្ដីសញ្ញា ៨៤:៣៣–៤៤ ពេលដែលព្រះអម្ចាស់បានបើកសម្ដែងសម្បថ និង សេចក្ដីសញ្ញានៃបព្វជិតភាព ។
តើអ្វីទៅជាសម្បថដែលត្រូវបានធ្វើឡើងដោយព្រះវរបិតាសួគ៌របស់យើង ?
« ការខិតខំឲ្យមានភាពសក្ដិសមទៅនឹងទំនួលខុសត្រូវទាំងឡាយនៃសម្បថ និង សេចក្ដីសញ្ញា នាំមកនូវអំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ ៖ គឺជាជីវិតដ៏នៅអស់កល្បជានិច្ច ។ នោះជាគោលបំណងមួយនៃបព្វជិតភាពមិលគីស្សាដែក ។ តាមរយៈការរក្សាសេចក្ដីសញ្ញាទាំងឡាយ កាលដែលយើងទទួលបព្វជិតភាព និង ការរំលឹកវាឡើងវិញនៅក្នុងពិធីទាំងឡាយក្នុងព្រះវិហារបរិសុទ្ធ នោះយើងសន្យាដោយនូវសម្បថដែលត្រូវបានធ្វើឡើងដោយព្រះអេឡូហិម ជាព្រះវរបិតាសួគ៌របស់យើង ថាយើងនឹងទទួលបាននូវភាពពេញលេញនៃសិរីល្អរបស់ទ្រង់ និង រស់នៅដូចជាទ្រង់រស់នៅ » ។
ប្រធាន ហិនរី ប៊ី អាវរិង ជាទីប្រឹក្សាទីមួយក្នុងគណៈប្រធានទីមួយ « សេចក្តីជំនឿ និង សម្បថ និង សេចក្តីសញ្ញានៃបព្វជិតភាព » លីអាហូណា ខែ ឧសភា ឆ្នាំ ២០០៨ ទំព័រ ៦១ ។
តើអ្វីជាផ្នែករបស់អ្នកនៅក្នុងសេចក្ដីសញ្ញានោះ ?
« សេចក្ដីសញ្ញានៅលើផ្នែករបស់បុរស គឺថា គាត់នឹងត្រូវតម្កើងដល់ការហៅរបស់គាត់នៅក្នុងបព្វជិតភាព [ សូមមើល គ. និង ស. ៨៤:៣៣ ] ហើយថា គាត់នឹងរស់នៅតាមព្រះបន្ទូលទាំងអស់ដែលចេញពីព្រះឱស្ឋរបស់ព្រះ ហើយថា គាត់នឹងរក្សាព្រះបញ្ញត្តិទាំងឡាយ » ។
ប្រធាន យ៉ូសែប ហ៊្វីលឌីង ស៊្មីធ ( ឆ្នាំ ១៨៧៦–១៩៧២ ) “Magnifying Our Callings in the Priesthood,” នៅក្នុង Conference Report ខែ មេសា ឆ្នាំ ១៩៧០ ទំព័រ ៥៩ ។
តើវាមានន័យយ៉ាងណាដែលថា ត្រូវសាងរូបកាយរបស់អ្នកជាថ្មីនោះ ?
« ខ្ញុំបានឃើញការសន្យានោះត្រូវបានបំពេញ នៅក្នុងជីវិតរបស់ខ្ញុំផ្ទាល់ និង នៅក្នុងជីវិតរបស់អ្នកដទៃទៀត ។ មិត្តរបស់ខ្ញុំម្នាក់ បានបម្រើជាប្រធានបេសកកម្ម ។ គាត់បានប្រាប់ខ្ញុំថា នៅចុងបញ្ចប់នៃថ្ងៃនីមួយៗ ខណៈគាត់កំពុងបម្រើ គាត់ស្ទើរតែមិនអាចឡើងជណ្តើរទៅជាន់ខាងលើ ដើម្បីទៅដេកនៅពេលយប់បាន ដោយមិនបានគិតថា បើគាត់នឹងមានកម្លាំងដើម្បីប្រឈមនឹងថ្ងៃស្អែកដែរឬទេ ។ ហើយនៅព្រឹកឡើង គាត់នឹងបានឃើញថា កម្លាំងរបស់គាត់ ហើយនិងសេចក្ដីក្លាហានរបស់គាត់ត្រូវបានស្ដារឡើងវិញ ។ អ្នកបានឃើញវានៅក្នុងជីវិតរបស់ពួកព្យាការីដែលមានអាយុច្រើន ដែលហាក់ដូចជាត្រូវបានសាងឡើងជាថ្មី នៅរាល់ដងដែលពួកលោកបានឈរថ្លែងទីបន្ទាល់អំពីព្រះអម្ចាស់ព្រះយេស៊ូវគ្រីស្ទ និង ដំណឹងល្អដែលបានស្ដារឡើងវិញ ។ នោះគឺជាការសន្យាមួយសម្រាប់ពួកអ្នកទាំងឡាយណា ដែលឈានឆ្ពោះទៅមុខដោយសេចក្ដីជំនឿក្នុងការបម្រើបព្វជិតភាពរបស់ពួកគេ » ។
ប្រធាន ហិនរី ប៊ី អាវរិង « សេចក្តីជំនឿ និង សម្បថ និង សេចក្តីសញ្ញានៃបព្វជិតភាព » លីអាហូណា ខែ ឧសភា ឆ្នាំ ២០០៨ ទំព័រ ៦២ ។
តើការទទួលព្រះអម្ចាស់មានន័យដូចម្ដេច ?
« បុរសទាំងឡាយដែលទទួលបព្វជិតភាពដោយភាពសក្ដិសម គឺទទួលព្រះអម្ចាស់ព្រះយេស៊ូវគ្រីស្ទ ហើយអ្នកទាំងឡាយណាដែលទទួលព្រះអម្ចាស់ ក៏ទទួលព្រះជាព្រះវរបិតាផងដែរ ។ ហើយអ្នកទាំងឡាយណាដែលទទួលព្រះវរបិតា គឺទទួលអ្វីៗទាំងអស់ដែលទ្រង់មាន ។ ពរជ័យដ៏មហិមាទំាងឡាយ ហូរចេញមកពីសម្បថ និង សេចក្តីសញ្ញានេះទៅដល់បុរស ស្ត្រី និង កូនក្មេងទំាងឡាយដែលសក្តិសមនៅលើពិភពលោកនេះ » ។
អែលឌើរ រ័សុល អិម. ណិលសុន នៃកូរ៉ុមនៃពួកសាវកដប់ពីរនាក់ “Covenants,” លីអាហូណា, ខែ វិច្ឆិកា ឆ្នាំ ២០១១ ទំព័រ ៨៨ ។
ច្រវាក់បទគម្ពីរ ៖ ការទទួលព្រះអម្ចាស់
ការទទួលបព្វជិតភាពគឺជារបៀបមួយដើម្បីទទួលព្រះអម្ចាស់ ។ សូមអានខទាំងនេះ ដើម្បីរៀនពីរបៀបពីរទៀត ៖ យ៉ូហាន ១៣:២០ និង គោលលទ្ធិ និង សេចក្ដីសញ្ញា ១១២:២០ ។
មេរៀនទាំងឡាយនៅថ្ងៃអាទិត្យ
ប្រធានបទសម្រាប់ខែនេះ ៖
ពិធីបរិសុទ្ធ និង សេចក្តីសញ្ញាទំាងឡាយ