ការរៀបចំដើម្បី ចូលក្នុង ដំណាក់ របស់ ព្រះអម្ចាស់
ដោយ អែលឌើរ ខិន អេហ្វ រីឆាតស៍
នៃក្រុមចិតសិបនាក់ និង ជានាយកប្រតិបត្តិនៃការិយាល័យព្រះវិហារបរិសុទ្ធ
ញញឹមពេលអ្នកគិតអំពីព្រះវិហារបរិសុទ្ធ ។ វាជាកន្លែងនៃព្រះចេស្តា និង ពរជ័យ ។
នៅឯពិធីសម្ភោធព្រះវិហារបរិសុទ្ធមួយ ខ្ញុំបានកត់សម្គាល់ថា ក្មេងស្រីមួយចំនួនដើរពីក្រោយឪពុកម្ដាយរបស់ពួកគេឆ្លងកាត់ព្រះវិហារបរិសុទ្ធ ។ ពួកគេញញឹមពេលពួកគេឃើញរូបរបស់ពួកគេនៅក្នុងកញ្ចក់បន្ទប់កូនក្រមុំ ។ លោកយាយរបស់ពួកគេបានខ្សឹបថា « ចូរចាំថា ចៅពិសេសយ៉ាងណា ហើយថាព្រះវរបិតាសួគ៌ស្រឡាញ់ចៅយ៉ាងណា » ។ ក្មេងស្រីម្នាក់ៗបានស្រមៃពីពេលដែលពួកគេនឹងត្រឡប់មកព្រះវិហារបរិសុទ្ធ ជាស្ត្រីម្នាក់នៃសេចក្ដីជំនឿ ជាមួយនឹងសេចក្ដីស្រឡាញ់ និង សមត្ថភាពដែលកាន់តែចាស់ទុំ ដែលត្រៀមរួចជាស្រេចដើម្បីបំពេញបេសកកម្មរបស់នាងនៅលើផែនដីនេះ ។ ក្មេងប្រុសទាំងឡាយដែលបានចូលរួមក្នុងពិធីសម្ភោធ ក៏បានសម្លឹងឃើញពីពរជ័យ និង ទំនួលខុសត្រូវរបស់ពួកគេនាពេលអនាគតដែរ ។
អ្វីដែលកុមារទាំងនេះបានមានក្នុងអារម្មណ៍នៅក្នុងព្រះវិហារបរិសុទ្ធគឺពិត ។ ព្រះវរបិតាសួគ៌មានព្រះទ័យចង់ប្រទានពរដល់អ្នក ។ ពរជ័យដ៏មហិមាបំផុតរបស់ទ្រង់បានមក ពេលដែលអ្នកចូលក្នុងព្រះវិហារបរិសុទ្ធ ដើម្បីទទួលពិធីបរិសុទ្ធទាំងឡាយ ហើយដើម្បីធ្វើ និង រក្សាសេចក្ដីសញ្ញាដ៏ពិសិដ្ឋ ។ អ្នកទទួលខុសត្រូវ ក្នុងការរៀបចំខ្លួន និង ការត្រៀមរួចជាស្រេច ។
ព្រះវិហារបរិសុទ្ធសំខាន់នៅក្នុងជីវិតរបស់អ្នក ជាពិសេសពេលអ្នកនៅក្មេង ៖ « យុវជនត្រូវការកន្លែងរបស់គាត់នៅក្នុងព្រះវិហារបរិសុទ្ធ សូម្បីតែជាងឪពុក និង លោកតារបស់គាត់ផង ជាអ្នកដែលមានជំហររឹងមាំដោយបទពិសោធន៍ទាំងឡាយនៃជីវិត ហើយយុវនារីដែលទើបចាប់ផ្ដើមស្រាវជ្រាវអំពីជីវិត ត្រូវការវិញ្ញាណ ឥទ្ធិពល និង ការណែនាំ ដែលបានមកពីការចូលរួមក្នុងពិធីបរិសុទ្ធនៃព្រះវិហារបរិសុទ្ធ » ។១ សូមចាប់ផ្ដើមឥឡូវនេះ ដើម្បីរៀបចំដួងចិត្ត និង គំនិតអ្នក ដើម្បីអាច ទទួល និង យល់ ពីពរជ័យទាំងនេះឲ្យបានពេញលេញ ( សូមមើល ម៉ាថាយ ១៣:២៣; ម៉ាកុស ៤:២០ ) ។
ការទទួលនូវភាពពេញលេញនៃដំណឹងល្អ
ប្រសិនបើអ្នកនឹងរៀបចំខ្លួនអ្នកដើម្បីចូលក្នុងព្រះវិហារបរិសុទ្ធ នោះអ្នកនឹង « បានប្រុងប្រៀប ដើម្បីទទួលភាពពោរពេញនៃដំណឹងល្អ [ របស់ទ្រង់ ] » នៅក្នុងព្រះវិហារបរិសុទ្ធ ( គ. និង ស. ៣៥:១២ ការសង្កត់ន័យត្រូវបានបន្ថែម ) ។ ព្រះវិហារបរិសុទ្ធជាកន្លែងនៃអំណាច និង ពរជ័យ ។ ព្រះអម្ចាស់បានណែនាំដល់ព្យាការី យ៉ូសែប ស្ម៊ីធ និង ពួកបរិសុទ្ធជំនាន់មុនឲ្យប្រមូលផ្ដុំគ្នានៅ ខឺតឡង់ រដ្ឋ អូហៃអូ ស.រ.អា ជាកន្លែងដែលពួកគេសាងសង់ព្រះវិហារបរិសុទ្ធមួយ ។ « នៅទីនោះ អ្នកនឹងត្រូវបាន ទទួលព្រះចេស្ដា មកពីស្ថានលើ » ( គ. និង ស. ៣៨:៣២ ការសង្កត់ន័យត្រូវបានបន្ថែម ) ។
នៅឯពិធីសម្ភោធព្រះវិហារបរិសុទ្ធមួយថ្មីៗនេះ សាវកម្នាក់បានប្រមូលផ្ដុំក្រុមគ្រួសាររបស់លោកជុំវិញអាសនាដ៏បរិសុទ្ធនៅក្នុងបន្ទប់ផ្សារភ្ជាប់ ។ លោកបានបង្រៀនពួកគេថា អ្វីៗគ្រប់យ៉ាងដែលយើងធ្វើនៅក្នុងសាសនាចក្រ — ថ្នាក់រៀន សកម្មភាព កម្មវិធី និង ការប្រជុំនានា — រៀបចំយើងឲ្យមកឯអាសនានៃព្រះវិហារបរិសុទ្ធ ដើម្បីទទួលពិធីបរិសុទ្ធនៃការផ្សារភ្ជាប់ ។ ព្រះវិហារបរិសុទ្ធតំណាងឲ្យខ្លឹមសារដ៏សំខាន់បំផុតនៃផែនការព្រះវរបិតាសួគ៌របស់អ្នក សម្រាប់សុភមង្គល និង ការរីកចម្រើនដ៏អស់កល្បជានិច្ចរបស់អ្នក ។
ការរៀបចំដើម្បីធ្វើសេចក្ដីសញ្ញាទាំងឡាយជាមួយនឹងព្រះ
ការរៀបចំរបស់អ្នក ដើម្បីចូលក្នុងព្រះវិហារបរិសុទ្ធ និង ដើម្បីធ្វើសេចក្ដីសញ្ញាទាំងឡាយ ពុំកើតឡើងភ្លាមៗនោះទេ ។ វាចាប់ផ្ដើមជាមួយនឹងបុណ្យជ្រមុជទឹក និង ពិធីបញ្ជាក់នៃព្រះវិញ្ញាណបរិសុទ្ធរបស់អ្នក ហើយលូតលាស់ឡើងជាមួយនឹងការអធិស្ឋាន ការសិក្សាព្រះគម្ពីរ ការគោរពប្រតិបត្តិ និង ការបម្រើ ។ វាអញ្ជើញឲ្យមានភាពស្អាតស្អំជារៀងរាល់សប្ដាហ៍ ពេលអ្នកចូលរួមក្នុងពិធីសាក្រាម៉ង់ ។ វាកើតឡើង ពេលអ្នករៀនដើម្បីស្វែងរកការអភ័យទោសតាមរយៈការប្រែចិត្ត ពេលអ្នករក្សាបទដ្ឋាន និង ពេលអ្នកកាន់បណ្ឌចូលព្រះវិហារបរិសុទ្ធដែលមានកំណត់ដោយភាពសក្ដិសម ។ កម្មវិធីយុវវ័យនឹងជួយអ្នក ប៉ុន្តែការរៀបចំរបស់អ្នកគឺផ្ទាល់ខ្លួន អ្នកបង្កើតនូវភាពសក្ដិសម របស់អ្នក ទីបន្ទាល់ របស់អ្នក ការប្រែចិត្តជឿ របស់អ្នក ។ ដង្វាយធួនរបស់ព្រះអង្គសង្គ្រោះអនុវត្តចំពោះអ្នកដោយផ្ទាល់ខ្លួន ។
ពេលអ្នកបង្កើនកម្រិតនៃភាពចាស់ទុំខាងវិញ្ញាណរបស់អ្នក នោះអ្នកនឹងមានបំណងប្រាថ្នាដើម្បីរៀបចំសម្រាប់ និង ចូលទៅក្នុងព្រះវិហារបរិសុទ្ធ ។ នៅទីនោះ អ្នកនឹងទទួលពិធីបរិសុទ្ធ និង ធ្វើសេចក្ដីសញ្ញាទាំងឡាយ ដែលជាជំហានចាំបាច់ដើម្បីខិតកាន់តែជិតព្រះវរបិតាសួគ៌របស់អ្នក ។ ពិធីបរិសុទ្ធនៃព្រះវិហារបរិសុទ្ធគឺ « ពិធីបរិសុទ្ធ … ដែលលើកតម្កើងបំផុត ដែលត្រូវបានបើកសម្ដែងដល់មនុស្សលោក » ។២
ពេលអ្នកទទួលពិធីបរិសុទ្ធនៃព្រះវិហារបរិសុទ្ធ អ្នកធ្វើនូវសេចក្ដីសញ្ញាដ៏ឧឡារិកជាមួយនឹងព្រះវរបិតារបស់អ្នកតែម្ដងប៉ុណ្ណោះសម្រាប់ខ្លួនអ្នកផ្ទាល់ ហើយបន្ទាប់ពីនោះ អ្នកនឹងពុះពារព្យាយាមរស់នៅតាមសេចក្ដីសញ្ញាទាំងនោះអស់មួយជីវិតអ្នក ។ រាល់លើកដែលអ្នកចូលក្នុងព្រះវិហារបរិសុទ្ធ អ្នកអាចទទួលអារម្មណ៍ពីព្រះវិញ្ញាណរបស់ទ្រង់ ហើយទទួលនូវវិវរណៈ និង ការយល់ដឹងបន្ថែមទៀត ខណៈពេលកំពុងផ្ដល់នូវពិធីបរិសុទ្ធចាំបាច់នានាដល់អ្នកដទៃទៀត ។ អ្នកនឹងយល់ដឹង និង ទទួលការបញ្ជាក់អំពីការមានជីវិតដ៏នៅអស់កល្បរបស់អ្នក និង អំណាចដ៏គ្មានទីបញ្ចប់នៃសេចក្ដីសញ្ញារបស់អ្នក ។ ប្រសិនបើអ្នកមិនមែនជាតួអង្គដ៏នៅអស់កល្បទេ នោះព្រះវិហារបរិសុទ្ធនឹងពុំមានការចាំបាច់អ្វីឡើយ ។ អ្នកចូលក្នុងព្រះវិហារបរិសុទ្ធ ហើយធ្វើសេចក្ដីសញ្ញាទាំងឡាយ ព្រោះ អ្នកនឹងនៅរស់រានអស់កល្បជានិច្ច ហើយចង់រស់នៅជាមួយនឹងព្រះវរបិតាសួគ៌របស់អ្នក និង ក្រុមគ្រួសាររបស់អ្នកនៅក្នុង « សុភមង្គលដ៏មិនចេះចប់មិនចេះហើយ » ( ម៉ូសាយ ២:៤១ ) ។ ការបញ្ជាក់នេះរីកលូតលាស់ឡើងនៅក្នុងព្រលឹងអ្នកផ្ទាល់ ហើយត្រូវបានបញ្ជាក់ដោយព្រះវិញ្ញាណបរិសុទ្ធ ។
ការមានភាពសក្ដិសម
តួនាទីរបស់ព្រះវិញ្ញាណបរិសុទ្ធគឺពិត ។ ទ្រង់បង្រៀនអ្នក ធ្វើឲ្យអ្នកបរិសុទ្ធ និង ផ្ទេរដល់អ្នកនូវសេចក្ដីស្រឡាញ់របស់ព្រះវរបិតា ( សូមមើល រ៉ូម ៥:៥ ) ។ ព្រះវិញ្ញាណបរិសុទ្ធនៃការសន្យា គឺជាអំណាចដ៏សច្ចានុមិតនៃព្រះវិញ្ញាណបរិសុទ្ធ ដែលធ្វើឲ្យសេចក្ដីសញ្ញានីមួយៗមានសុពលភាពអស់កល្បជានិច្ច ។
ដើម្បីទទួលបានព្រះវិញ្ញាណ អ្នកត្រូវតែចូលក្នុងព្រះវិហារបរិសុទ្ធដោយស្អាតស្អំ និង បរិសុទ្ធ ដោយឥតមានការរំលងណាដែលពុំទាន់ត្រូវបានអភ័យទោសឡើយ ។ ប្រសិនបើមារសត្រូវអាចមានជោគជ័យនៅក្នុងការយកឈ្នះលើអ្នកបានដោយតាមវិធីណាក៏ដោយនោះ វានឹងរារាំងអ្នកពីព្រះវិហារបរិសុទ្ធ ឬ វានឹងបញ្ឆោតចិត្តអ្នកឲ្យទៅទីនោះទាំងមិនមានភាពសក្ដិសម ។
សម្រាប់ហេតុផលនេះ អ្នកនឹងត្រូវបានអញ្ជើញឲ្យអង្គុយនៅក្នុងការសម្ភាសន៍ផ្ទាល់ខ្លួនមួយ ជាមួយនឹងប៊ីស្សព ឬ ប្រធានសាខារបស់អ្នក ដើម្បីពិចារណាពីភាពសក្ដិសម និង ភាពរួចរាល់របស់អ្នក ក្នុងការទទួលបណ្ឌចូលព្រះវិហារបរិសុទ្ធ ។ សូមស្មោះត្រង់ ហើយទុកចិត្តគាត់ដើម្បីជួយអ្នក ។ នៅក្នុងភាពពិត អ្នកត្រូវកំណត់ពីជំហររបស់អ្នកផ្ទាល់នៅចំពោះព្រះអម្ចាស់ ( សូមមើល គ. និង ស. ១០៩:២៤ ) ។ អ្នកនឹងចុះហត្ថលេខាលើបណ្ឌចូលព្រះវិហារបរិសុទ្ធរបស់អ្នកផ្ទាល់ ។ អ្នកនឹងធ្វើជាសាក្សីពីភាពសក្ដិសមរបស់អ្នកនៅចំពោះព្រះអម្ចាស់ ។៣
ដើម្បីមានភាពសក្ដិសម ពុំមែនមានន័យថា អ្នកល្អឥតខ្ចោះនោះទេ ។ វាមានន័យថា ដួងចិត្តរបស់អ្នកគឺត្រឹមត្រូវ ថាអ្នកកំពុងរស់នៅតាមព្រះបញ្ញត្តិទាំងឡាយ ហើយថា អ្នកមានបំណងប្រាថ្នាដើម្បីប្រព្រឹត្តិឲ្យបានល្អប្រសើរឡើងជារៀងរាល់ថ្ងៃ ។
ការរៀនពីនិមិត្តរូបទាំងឡាយ
ដូចនៅក្នុងព្រះគម្ពីរ នៅក្នុងព្រះវិហារបរិសុទ្ធ ព្រះអម្ចាស់បង្រៀនដោយប្រើប្រាស់និមិត្តរូបទាំងឡាយ ។ អ្នកអាចរកឃើញនិមិត្តរូបជាច្រើននៅក្នុងព្រះគម្ពីរ ដូចជា សិលា គ្រាប់ពូជ ផ្លែឈើ ដើមឈើនៃជីវិត និង នំប៉័ង និង ទឹកនៃពិធីសាក្រាម៉ង់ ( សូមមើល ឧទាហរណ៍ នីហ្វៃទី១ ១១; អាលម៉ា ៣២; ហេលេមិន ៥:១២ ) ។ បុណ្យជ្រមុជទឹកដោយពន្លិច ជានិមិត្តរូបឲ្យជីវិតថ្មី កើតជាថ្មី និង ភាពជ្រះស្អាត ( សូមមើល រ៉ូម ៦:៣–៥ ) ។ នៅក្នុងព្រះវិហារបរិសុទ្ធ យើងទាំងអស់គ្នាស្លៀកពាក់ពណ៌ស ជានិមិត្តរូបនៃភាពបរិសុទ្ធ ភាពពិសិដ្ឋ ពន្លឺ និង ភាពស្មើគ្នា ។
និមិត្តរូបមួយចំនួននៅក្នុងព្រះវិហារបរិសុទ្ធ គឺទាំងខាងរូបកាយផង និង ខាងវិញ្ញាណផង ។ ឧទាហរណ៍ ការស្លៀកពាក់សំលៀកបំពាក់បរិសុទ្ធ គឺជាការរំឭកខាងរូបកាយប្រចាំថ្ងៃ អំពីសេចក្ដីសញ្ញាក្នុងព្រះវិហារបរិសុទ្ធ និង ពរជ័យដែលបានសន្យា ។ បើគោរព និង អនុវត្ត នោះសំលៀកបំពាក់បរិសុទ្ធការពារយើងពីការល្បួង និង ឥទ្ធិពលដែលឥតសុចរិតនានា ។
ពិធីបរិសុទ្ធនីមួយៗនៃព្រះវិហារបរិសុទ្ធគឺជានិមិត្តរូប ។ « នៅក្នុងពិធីដ៏ពិសិដ្ឋ បុគ្គលមួយរូបអាចត្រូវបានលាង និង តាំងប្រេង »៤ ដែលជាការរំឭកដល់ពួកស្ដេច និង សង្ឃនៃពួកអ៊ីស្រាអែលពីបុរាណ ដែលត្រូវបានរៀបចំឲ្យទទួលតំណែងទាំងឡាយរបស់ពួកគេ ( សូមមើល សាំយ៉ូអែល ទី១ ១០:១; ១៦:១៣ ) ។ សេចក្ដីណែនាំ និង សេចក្ដីសញ្ញានៅក្នុងពិធីអំណោយទានពិសិដ្ឋ ជាសញ្ញាប្រាប់ពីការដែលត្រូវបានបំពាក់ ឬ ត្រូវបានប្រគល់ឲ្យនូវអំណាច និង ការសន្យាបន្ថែមទៀតពីព្រះ ( សូមមើល លូកា ២៤:៤៩ ) ។ ប្រហែល និមិត្តរូបដ៏ស្រស់ស្អាតបំផុត គឺពិធីបរិសុទ្ធនៃការផ្សារភ្ជាប់ ដែលគូស្វាមីភរិយាត្រូវបានរួបរួមគ្នានៅក្នុងចំណងមួយដែលមិនអាចផ្ដាច់បាន ដែលអាចស្ថិតស្ថេរនៅអស់កល្បអស់កាលជានិច្ច ។
ការសន្យាទាំងឡាយនៅក្នុងព្រះវិហារបរិសុទ្ធ គឺបរិបូរ និង ឧត្ដុង្គឧត្ដម ។ ការសន្យាទាំងនោះគឺ « ការប្រោសប្រណីដ៏ធំ » និង « ព្រះពរដ៏ធំទាំងឡាយ » ( នីហ្វៃទី៣ ១០:១៨ ) ដែលព្រះវរបិតារបស់យើងបានរក្សាទុកសម្រាប់អ្នកដោយអង្គទ្រង់ផ្ទាល់ ។ ដូច្នេះ សូមញញឹមឡើង ពេលអ្នកគិតអំពីព្រះវិហារបរិសុទ្ធ ។
មិនថាអ្នកមានអាយុប៉ុណ្ណាទេ សូមធ្វើអ្វីៗដែលចាំបាច់ដើម្បីត្រៀមរួចជាស្រេច ដើម្បីទទួលពរជ័យដ៏អស្ចារ្យបំផុត ដែលព្រះវរបិតារបស់អ្នកដែលទ្រង់គង់នៅស្ថានសួគ៌ ប្រទានដល់អ្នក ។ សូមទុកចិត្តចំពោះអារម្មណ៍ដែលអ្នកធ្លាប់មាន ពេលអ្នកនៅជាកុមារ ហើយច្រៀងថា « ខ្ញុំចូលចិត្តវិហារបរិសុទ្ធ ។ ខ្ញុំទៅទីនោះថ្ងៃមួយ ។ … ខ្ញុំនឹងរៀបចំខ្លួន កាលខ្ញុំនៅក្មេង ។ នេះជាកិច្ចការពិសិដ្ឋខ្ញុំ ។ » ។៥ វាអាចពិតសម្រាប់អ្នក ។
រូបថតនៃព្រះវិហារបរិសុទ្ធរ៉េចប៊ើក អៃដាហូ
ក្បាច់រចនាបង្អួចនៅព្រះវិហារបរិសុទ្ធ លៃ រដ្ឋហាវៃ