Rai ena Mata Vou, Rogoca ena Daliga Vou, Vosa ena Dua na Yame Vou

Maivei Elder Allistair B. Odgers

Vitusagavulu ni Wasewase

A kaya o Elder Marvin J. Ashton ena Kuoramu ni iApositolo Le Tinikarua, “Na ivakatakilakila vinaka duadua ka matata sara ni da sa toro cake ka lako vata tiko kei Karisito o ya na sala eda sa qaravi ira tiko kina na tamata.”¹

Ni sa tu vei keda na ituvaki i Karisito me keda irairai ka raici ira na tamata ena mata i Karisito, sa na tu vei keda e dua na ituvaki cecere sara meda raica na ituvaki i Karisito ena kedra irairai na tamata. Ena yaco oqo meda gagadre cake meda qaravi ira vakavinaka sara na tamata.

Ena gadrevi meda bula uabaleta yani na veika eda raica—ka bula uabaleta yani na veika eda vakanananutaka kei na nanamaki me rawa ni da raici ira na tamata ena dua na rarama vou.

Ni da sa kila rawa ka vakasamataka e dua na sala vou meda qaravi ira kina na tamata, ena gadrevi beka meda tarogi keda mada ga: eda sa raica tiko beka na noda Koliaci ni sa rui vakaitamera me vakamatei rawa se valuti rawa; se meda rai me vaka a raica o Tevita—me vaka ena mata ni Kalou—ni o Koliaci sa rui vakaitamera ka dredre me calati?

Ena veisureti meda sa ‘maqusa ena vakaitavi’ me vakatorocaketaki na sala ni noda qaravi ira na tamata au nuitaka ni da na sega ni rui yalototolo vakasivia baleta na veivakatorocaketaki eda gadreva meda cakava ki na noda dui bula. Yalovinaka mo ni nanuma tiko, ni levu ga ni noda torocake, ena levu cake na veika vinaka eda na raica vei ira na tamata.

1. Na ivakarau ni noda vosa kei na ka eda cakava vua e dua sa ikoya na sala vata ga eda na vosa ka cakava vei Karisito. E sega na kena duidui.

E duidui na sala eda veitaratara ka veidolei lesu kina ia meda sa qai vakasaqara na sala duidui eso meda ‘raici’ ira kina na tamata kei na sala vinaka cake meda veitaratara kina kei ira.

Mo kakua ni cudru. Kevaka eda sa dodonu, e sega ni gadrevi meda cudru, ia kevaka meda sa cala, ena sega ni vinaka vei keda.

A kaya o Elder Lynn G. Robbins ena Vitusagavulu, “Na cudru e dua na digidigi. E baleta na galala ni digidigi. Me vaka ga noda lewa meda digidigi. Sa na gadrevi meda vakasamataka vakatitobu na lewa ni noda digitaka meda kakua ni cudru. Na taci cudru lailai o loma katakata, o tacina vakacabecabe o yalo veiba se yalo ca, ia na tuakai cudru o cudru katakata.”²

Io, eda caka cala kece, ia ena sala cava eda na walia kina na noda dui cala? E gadrevi sara meda bonata na nodra cala na tiko tikivi keda? Sa gadrevi kina meda bonata na nodra cala era tiko tikivi keda ena kote ni loloma, ni da na rairai gadreva meda bonata na noda ena dua na itutuvi levu cake.

E tukuni ena Maciu 25:40: “Ni kemuni a cakava vua e dua sa lailai vei ira na wekaqu oqo, ni a cakava vei au.”

O koya gona, kevaka eda na cudru se vosa karakara se rogorogo vakatani na noda vosa, se meda sa yalo ca, eda sa sega walega ni itovo vakaoqori vei keda yadua, ia sa vakakina vua na Turaga o Jisu Karisito. Eda sa qai rawa ni kaya ni noda loloma vua na Karisito sa tautauvata ki na noda loloma vua na tamata sa kena e lailai duadua.

2. A duidui vakacava na nodratou itovo o Saimoni, ira na Farisi, vei Jisu Karisito maivei koya na yalewa ena vosa vakatautauvata e tukuni tiko ena Luke wase Vitu?

A vakavulica o Elder James E. Talmage: “E a ivakarau ni veigauna me vakayacori e dua na itovo vua e dua na vulagi dokai ena veivakaturagataki; me na ciqomi ena dua na iregu ni veikidavaki, me vakarautaki na wai me savati tani na kuvu ni soso mai yavana, kei na waiwai me lumuti na drauni uluna kei na kumina.”³

O Saimoni e Farisi; e lewe ni dua na ilawalawa vakalotu e vakabibitaki sara kina na kena vakamuri na lawa i Mosese. O Saimoni na tamata a dinautaka e 50 na peni ena vosa vakatautauvata (Luke 7:41–47).

A sega ni vakarautaka o Saimoni vei Jisu na wai me savata kina na yavai Jisu, a sega mada ga ni reguci Koya, a sega talega ni lumuti Koya ena waiwai. A lomani Koya ga vakalailai o Saimoni. Ia, meda sa qai nanuma tiko ni o Saimoni sa gadreva talega me na vosoti, me vakataki keda kece sara.

Na yalewa, a valavala ca, a dinautaka tu e 500 na peni ena vosa vakatautauvata oqo. A savata na yava ni iVakabula ena wai ni matana ka vakamamacataka ena drauniuluna; a reguca tikoga na yavana ka lumuta na yavana ena ilumu. A lomani Koya sara vakalevu.

Ni sa vakaraitaka na noda loloma kei na noda dina vua na Turaga o Jisu Karisito, eda rawa ni vakila na Nona veivosoti. Ni da sa ciqoma na veivosoti ni Turaga, eda sa vakasinaiti ena gagadre meda lomana ka qaravi Koya vakalevu cake. A vosota vakataucoko na yalewa o ya na Karisito ka a lomani koya vakataucoko talega. Na nona ivalavala ca, a vuqa sara, sa vosoti kina (tikina e 48).

Kevaka meda sa veivosoti ga vakalailai oi keda na tamata, eda sa qai loloma ga vakalailai.

3. Kevaka eda na sega ni vulica rawa meda vosoti ira na tamata ena sega ni vosoti keda na Kalou (Marika 11:24–26).

Na veivosoti e ka dredre, rerevaki ka veivakamarautaki.

E ka dredre baleta ni da sa keda ituvaki tiko vakatamata,
E rerevaki baleta e vakaukauwataki keda meda taura na ilesilesi ni noda toro cake ena veisiga ni mataka, ka
Veivakamarautaki baleta e sereki keda meda yacova na keda ituvaki vinaka duadua.

E dau tukuni tu: ni sega na veivosoti sa vaka ni da culai keda’ ena poisoni ka waraka me mate o koya na tamata o ya.

Ia—me cava meda qai cakava lesu ni dua e cakava mai e dua na ka cala?

Na Vunau kei na Veiyalayalati 121:43–44 e vakarautaka na veikalawa me vakamuri ni kena qaravi na cala ni dua tale na tamata?

Walia na ituvaki o ya [ivalavala ca] vakatotolo ka vakamatata. Sa ka bibi meda tudei ka dodonu ena yasana kece.
Dolea lesu ena vakayagataki na kaukauwa ni Yalo Tabu; sega ena nomu cudru.
Vakaraitaka na loloma e levu cake.
Sa noda lalawa meda kakua ni laki ravuta e dua, mokuti koya se vakamavoataki koya. Ia meda sa yalodina tikoga vua na Kalou; ka meda dinata ka veitaqomaki vei koya a caka cala.

Na veivosoti e sega walega ni da vosota e dua sa ivalavala ca se vakamavoataka na yaloda, ia eda sa vosoti ira talega era sega ni vakayacora se cakava na veika eda nanuma ni dodonu mera cakava.

O ira na tamata, itokani, kei na matavuvale era na vakararawataki keda ka buturaki keda sobu ena veigauna eso, ia na ituvaki ni yaloda baleti ira, kei na ka eda na cakava vei ira, ena tautauvata ki na noda nanuma ka cakava vei Jisu Karisito. Sa gauna talega ni noda vakatovolei dina o cei oi keda dina.

Kemuni na taciqu kei na ganequ, sa sega vei au na siliva kei na koula ia ena yaca i Jisu Karisito au sa sureti keda taucoko meda sa tucake ka raici ira na luve ni Kalou ena mata vou . . . rogo ena daliga vou . . . ka vosa ena yame vou, me rawa kina meda vakaraitaka ena ivakarau ni noda vosa ka qaravi ira na tamata ni da sa saumaki vou dina vei Karisito.