Bulago ena noda vanua
Era Kidavaki na iLiuliu ni Lotu Maivei Ira na Marama ni Viti
Rau a mai vakacavara o Sister Sharon Eubank kei Sister Becky Craven na nodrau siko wavoki ena Pasifika ena nodrau a mai veisiko e Nadi kei Suva.
Rau a veisiko mai ki Viti o Sister Sharon Eubank kei Sister Becky Craven mai na Vakaraubuka na 25 ni Okotova ki na Sigatabu na 27 ni Okotova.
Ena gauna ni nodrau veisiko oqo rau a sotavi ira kina na marama ni Lotu i Jisu Karisito ni Yalododonu Edaidai.
A tomani rau tiko mai o Elder Kazuhiko Yamashita ena Mataveiliutaki ni iWasewase ena Pasifika kei na marama watina, o Sister Tazuko Yamashita. A veitomani mai o Brother Ronald Craven vei Sister Craven.
O Sister Eubank e lewe ni mataveiliutaki raraba ni iSoqosoqo ni Veivukei ni Lotu i Jisu Karisito ni Yalododonu Edaidai kei Sister Craven e dua na lewe ni mataveiliutaki raraba ni Goneyalewa ni Lotu.
Ni bera nodrau veisiko mai ki Viti rau a sotavi ira na lewenilotu kei na itokani ni Lotu mai Papua New Guinea, Ositerelia kei Niu Siladi.
A vakayacori e dua na nodra lotu na marama kei na goneyalewa taucoko yabaki 12 lako cake e Nadi, ena baravi ni ra ni vanua.
A veiqaravi o Suva, na koro turaga kei Viti ka tiko kina na nodra valetabu na Yalododonu Edaidai vei ira na iliuliu ena kena vakayacori kina e rua na nodra soqoni ni vuli na iliuliu ni iSoqosoqo ni Veivukei kei na Goneyalewa. Ena kena yakavi a vakayacori e dua na lotu me baleti ira na marama kei na goneyalewa yabaki 12 lako cake.
A vakayacori na veisiko ni veiqaravi ena siga ki na nodra matavuvale na goneyalewa kei ira na marama ni iSoqosoqo ni Veivukei.
A vakaraitaka o Sister Eubank kivei ira na marama na nodratou sa loloma tu mai na Mataveiliutaki Taumada ni Lotu i Jisu Karisito ni Yalododonu Edaidai ka kaya vei ira na marama ni ra “sa liga i Jisu.”
A vakaraitaka o Sister Craven na nona marautaka na soqoni vata kei ira na marama ka veivakananumi vei ira ni “ivakaro ni Kalou eda na taqomaki ka bula marau kina.”
“Sa veivakalougatataki dina na nodrau veisiko mai vei keimami na Marama ki Viti; ka vakila na nodrau loloma kei na kauwai vei keimami,” a kaya e dua a tiko kina.