Sa Vakavoutaka na Lotu na Taro ni Veivakatarogi ni iVolatara ni Valetabu

Rumu ni itukutuku

Dina ga ni se dei tikoga na ivakatagedegede ni bula ni kena curumi na valetabu, na veisau oqo ena vakavinakataka cake na nodra vakavakarau na Yalododonu Edaidai mera laki sokalou e valetabu.

A tomana tale o Peresitedi Russell M. Nelson ena Lotu i Jisu Karisito ni Yalododonu Edaidai na nona raicamatuataka ena gagadre me vakatorocaketaki na vakabauta ni sokalou e valetabu ena Sigatabu ena iotioti ni soqoni ni ka 189 ni Koniferedi Raraba. A wilika na taro sa mai vakavoutaki era na tarogi kina na lewe ni Lotu ena gauna mera taura kina na nodra ivolatara ni valetabu.

Sa dau yaco ena gauna eso na kena vakamatatataki ka moici na taro ni ivolatara ni valetabu me sotava na nodra gagadre kei na ituvaki na luve ni Kalou. Sa mai veivakamatatataki ga na veisau vou oqo, ia e sega ni veisautaka, na ilavaki ni bula kilikili ni curu ki valetabu.

Na veisau oqo ki na taro ni ivolatara ni valetabu sa vakamatatataki tiko kina eso na ka e bibi sara ni ra vakavakarau na Yalododonu Edaidai mera curu ki valetabu.

Na ivolatara ni valetabu ena vakadonuya na Yalododonu Edaidai me curu ki na dua na valetabu ni vakabauta. Ena ciqoma e dua na lewe ni Lotu uabula e rua na veivakatarogi me taura kina e dua na ivolatara ni valetabu—imatai maivua e dua na nodra lewe ni matabisopi, ka tarava mai vua e dua na nodra lewe ni mataveiliutaki ni iteki (iliuliu ni iwasewase levu). Na ivolatara oqo ena cakacaka tiko me rua na yabaki.

Na ivolatara vakaiyalayala vei ira na yabaki 11 lako cake ena tauri ni oti na kena veivakatarogi kei bisopi. Sa na rawa kina vei ira na Yalododonu Edaidai, vakabibi vei ira na cauravou kei na goneyalewa, mera laki vakaitavi ena papitaiso e valetabu. Na ivolatara oqo ena cakacaka tiko me dua na yabaki.

“Na usutu cecere ni Veivakalesuimai [na cakacaka ni kena tauyavutaki vakataucoko na Lotu i Jisu Karisito e vuravura] sai koya na valetabu vakalou,” a kaya o Peresitedi Nelson.¹

“Na bula kilikili ni tamata yadua me curu ki na vale ni Turaga sa gadrevi vakalevu kina na vakavakarau vakayalo ni tamata yadua. Ia ena veivuke ni Turaga, ena sega ni dredre e dua na ka. Ena so na gauna, sa rawarawa cake sara na kena tara e dua na valetabu mai na kena tarai cake e dua na kawatamata mera vakavakarau ki na valetabu. Na bula kilikili ni tamata yadua sa gadrevi kina e dua na veisau sa taucoko ena vakasama kei na yalo me vakataka cake sara na Turaga, me lewenivanua daudina, me dauivakaraitaki vinaka cake ka tamata sa bula vakalou cake.”²

Taro ni Veivakatarogi ni iVolatara ni Valetabu

Na taro ni veivakatarogi sa dau vakatakilai raraba yani me rawa vei ira ena veitabayabaki kece sara ni bula mera kila vinaka cake na veika sa gadrevi ena sokalou e valetabu ka vakavakarau mera curu ki valetabu.

Sa toka oqo e ra na taro ni veivakatarogi baleta na ivolatara ni valetabu. Sa mai moici na taro balavu e tiko ena taro 11.

E tiko beka nomu vakabauta ka vakadinadinataka na Kalou, na Tamada Tawamudu, o Jisu Karisito; kei na Yalo Tabu?
E tiko beka na nomu ivakadinadina baleta na Veisorovaki i Jisu Karisito kei na Nona ilesilesi ni sa nomu iVakabula ka Dauveivueti?
E tiko beka na nomu ivakadinadina baleta na Vakalesuimai ni kosipeli i Jisu Karisito?
O sa tokona tiko beka na Peresitedi ni Lotu i Jisu Karisito ni Yalododonu Edaidai ni sa parofita, daurairai, ka daunivakatakila ka sai koya duadua ga ena vuravura oqo sa vakadonui me cakacaka ena idola ni matabete taucoko?

O sa tokoni iratou tiko beka na Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai, ka daunivakatakila?

O sa tokoni ira tiko beka na Vakaitutu Raraba tale eso kei ira na iliuliu ni Lotu eke?
E kaya na Turaga ni veika kece sa dodonu mera “caka vakasavasava” e Matana (Vunau kei na Veiyalayalati 42:41).

O sa gumatua tiko beka me savasava vakayalo na nomu vakanananu kei na nomu itovo?

O sa muria tiko beka na lawa ni tiko savasava?
O sa muria tiko beka na ivakavuvuli ni Lotu i Jisu Karisito ni Yalododonu Edaidai ena nomu ivakarau ni bula ni ko tiko duadua kei na gauna kei ira na lewevuqa vata kei ira na lewe ni nomu vuvale kei ira tale eso?
O tokona se vunautaka tiko beka na ivakavuvuli, ivakarau, se ivunau e veisaqasaqa ki na kena ena Lotu i Jisu Karisito ni Yalododonu Edaidai?
O sa gumatua tiko beka mo maroroya ka vakatabuya na siga ni Vakacecegu, ena nomu itikotiko vakakina ena lotu; tiko ena nomu soqoni; vakavakarau ka bula kilikili mo kania na sakaramede; ka bula voli ena lawa kei na ivakaro ni kosipeli?
O sa gumatua tiko beka mo dau dina ena veika kece o cakava?
O sa sauma vakataucoko tiko beka na nomu ikatini?
O sa kila vinaka tiko beka ka talairawarawa ki na Vosa ni Vuku?
E tiko beka e dua na nomu veidinadinati vakailavo kei na so tale vua e dua na watimu e liu se ira na gone? Ke io, o sa dinata tiko beka na veidinadinati oqori?
O sa maroroya tiko beka na nomu veiyalayalati o a vakayacora e valetabu, oka kina na nomu dara tiko na qameni me vaka a vakasalataki ena edaumeni?
E tiko beka eso na ivalavala ca bibi ena nomu bula e gadrevi me vakadonutaki maivei ira na vakailesilesi ni matabete me tiki tiko ni nomu veivutuni?
O sa rawa beka mo kaya ni ko sa bula kilikili mo curuma kina na vale ni Turaga ka vakaitavi ena cakacaka vakalotu ni valetabu?

A veivakananumi o Peresitedi Nelson vei ira na Yalododonu Edaidai ni dolavi raraba ni valetabu sa roro tiko mai baleti ira na veivaletabu era sa kacivaki raraba se sa tara tiko ena nodra dui vanua sa madigi bibi tiko mera na tuberi kina na lewenivanua e kea me baleta tiko na cava mada kei na vuna e vakayacori kina na sokalou e valetabu.

“E vuqa na itokani era sega ni da lotu vata era na mai vakaitavi ena kena saravi na taudaku kei na loma ni valetabu oqori ka ra na vulica eso na ka baleta na veivakalougatataki ni valetabu. Ka na so vei ira na vulagi oqo ena tarai na yalodra mera kila vakalevu cake,” a kaya. “Eso era na taroga mai na yalodra dina na sala mera na rawata kina na veivakalougatataki ni valetabu. Oi keda na lewe ni Lotu, ena gadrevi meda tu vakarau meda sauma na nodra vakatataro. Eda rawa ni vakamacalataka ni veivakalougatataki ni valetabu sa vakarautaki tu kivei ira na tamata yadua kei na tamata kecega era na vakarautaki ira.”³