Bulago ena noda vanua
A Sureti Ira na Yalododonu mai Taveuni na iApositolo Mera Tu ena Veivanua Tabu
Veisiko o Elder kei Sister Rasband, kei Elder kei Sister Ardern ena Yanuyanu o Taveuni, e Viti.
Ena Sigatabu, 24 ni Noveba, a 300 vakacaca na lewe ni Lotu i Jisu Karisito ni Yalododonu Edaidai era vakaitikotiko ena yanuyanu o Taveuni e Viti era a tiki ni dua na koniferedi vakairogorogo.
A vakatulewa ena koniferedi oqo o Elder Ronald A. Rasband ena Kuoramu ni iApositolo Le Tinikarua ka yaco na nona veisiko mai oqo me isevu ni iApositolo mai na Lotu me sikovi Taveuni. A tomani koya tiko mai na marama watina, o Sister Melanie Rasband.
A tomani Elder kei Sister Rasband tiko mai o Elder Ian S. Ardern, na Peresitedi ni iWasewase ni Pasifika ena Lotu, kei na marama watina, o Sister Paula Ardern, kei na iliuliu eso ni Lotu e Viti.
E a mai cava kina e Taveuni na nodrau veisiko wavoki tiko mai o Elder kei Sister Rasband ena Ceva ni Pasifika. Na veisiko oqo a oka talega kina o Okaladi kei Hamilton, e Niu Siladi; Melbourne, Ositerelia; kei Suva, e Viti.
Era a lagasere ena koniferedi e Taveuni e dua na matasere ni gone, ka totoka dina na nodra lagasere.
Rau a taubeni o Elder kei Sister Rasband ena salusalu rairai totoka na tagimoucia (na salusalu senikau ni vanua) era a vakarautaka na marama Yalododonu Edaidai ni Taveuni.
A bulagoci ira o Elder Rasband ena itukutuku ni loloma kei na vakavinavinaka mai vei Peresitedi Russell M. Nelson, na peresitedi ni Lotu.
A kaya, “Vinaka vakalevu na qaravi ira tiko na luvemuni, vinaka vakalevu na qaravi ira tiko na watimuni, ka vinaka vakalevu na veiqaravi vakai kemuni yadua. Eda sa matavuvale ni Kalou. Eda sa lotu ni dua na matavuvale.”
A vakayaloqaqataki ira na itubutubu mera vakarautaki ira na itabatamata era tubu cake tiko mai mera na laki kaulotu ka gole ki valetabu.
A kaya o Elder Rasband, “Na isolisoli cecere duadua sa bau soli vei kemuni e Viti o ya na kena sa tiko na vale ni Turaga ena nomuni vanua. Oqo na lotu duadua ga e vuravura sa tiko kina na ivakavuvuli sa vakalesuimai ni nodra vakabulai na mate. Sa ka cecere sara oqo ki na lotu. Sa rawa kina vei ira na gone mera semati vei ira na nodra itubutubu ena gauna oqo kei na veigauna tawamudu taucoko.”
A tinia o Elder Rasband, ena nona kaya, “Na nomuni itikotiko sa vanua tabu. Na valenilotu oqo sa vanua tabu, na valetabu sa vanua tabu. Mo tudei tu ena veivanua tabu ko na qai vakalougatataki.”
A vosa talega o Sister Rasband vei ira na lewe ni Lotu kei na itokani era a tiko rawa. A vakaraitaka na nona loloma ka veivakayaloqaqataki vei ira.
A qai vakaraitaka e dua na itukutuku vei ira kece na gone, ni o ira yadua era sa luvena tagane se luvena yalewa lomani na Kalou.
Rau a marautaka sara o Elder kei Sister Ardern na nodrau a mai veisotari tale kei ira na yalododonu e Taveuni. A veiqaravi tu e liu o Elder Ardern, kei na marama watina, ena kena liutaki na Tabana ni Kaulotu e Suva Viti mai na 2005 ki na 2008.
A vakayaloqaqataki ira na lewenilotu o Sister Ardern mera toro voleka vua na Turaga ena nodra wilika ena veisiga na iVola i Momani.
“Ena vaqaqacotaki kemuni yadudua ka vakamatavuvale ni ko ni wilika na iVola i Momani,” a kaya.
A vosa o Elder Ardern me baleta na iyaqa kei ira na iapositolo. A veivakananumi tale vei ira na yalododonu ni dodonu mera vakaiyaqataki vei Karisito; ni dodonu me sa vatu ivakadei o koya ni nodra ivakadinadina. A ivakadinadina o koya ni o Elder Ronald A. Rasband sa dua na iApositolo ni Turaga, talai mai vua na Kalou, me mai vakalougatataka na nodra bula.