ចូរមកតាមខ្ញុំ ៖ ព្រះគម្ពីរមរមន
តើខ្ញុំអាចស្វែងរកអំណោយទានខាងវិញ្ញាណរបៀបណា ?
( ថ្ងៃទី ១៤–២០ ខែ ធ្នូ )
អំណោយទានខាងវិញ្ញាណ គឺត្រូវបានប្រទានមកពីព្រះតាមរយៈព្រះវិញ្ញាណបរិសុទ្ធសម្រាប់ជាប្រយោជន៍ដល់យើង ( សូមមើល មរ៉ូណៃ ១០:៨ ) ។ យើងម្នាក់ៗត្រូវបានប្រទានពរជាមួយនឹងអំណោយទានខាងវិញ្ញាណមកពីព្រះ ហើយមានអំណោយទានជាច្រើនដែលយើងអាចទទួល ។
អំណោយទានខាងវិញ្ញាណមួយចំនួន បានបើកបង្ហាញនៅក្នុងព្រះគម្ពីរ ( សូមមើល មរ៉ូណៃ ១០:៩–១៦; គោលលទ្ធិ និង សេចក្តីសញ្ញា ៤៦:១៣–២៥ ) ហើយមួយចំនួនទៀតមិនបានបើកបង្ហាញទេ ។ តើបងប្អូនអាចស្គាល់ និងអភិវឌ្ឍអំណោយទានខាងវិញ្ញាណ ដែលព្រះបានប្រទានដល់បងប្អូនរបៀបណា ។ តើបងប្អូនអាចអភិវឌ្ឍអំណោយទានផ្សេងៗទៀតរបៀបណា ? នេះគឺជាគំនិតមួយចំនួនដើម្បីជួយបងប្អូន ៖
សូមសួរ
អធិស្ឋាន ហើយទូលសួរដល់ព្រះ តើអំណោយទានខាងវិញ្ញាណអ្វី ដែលទ្រង់ប្រទានដល់បងប្អូន ឬអំណោយទានមួយណា ដែលបងប្អូនគួរខិតខំដើម្បីបានវា ។ ទ្រង់នឹងជួយបងប្អូន ។ ពរជ័យនៃលោកអយ្យកោរបស់បងប្អូនក៏អាចបើកសម្តែងអំពីអំណោយទានខាងវិញ្ញាណរបស់បងប្អូនផងដែរ ។ ប្រសិនបើបងប្អូនមិនទាន់បានទទួលពរជ័យនៃលោកអយ្យកោរបស់បងប្អូនទេ សូមពិចារណាទៅជួបជាមួយប៊ីស្សព ឬប្រធានសាខារបស់បងប្អូន ដើម្បីទទួលបានមួយ ។
សិក្សា
អំណោយទានខាងវិញ្ញាណតម្រូវឲ្យមានការខិតខំដើម្បី ទទួលបានវា ។ អំឡុងពេលដែលខិតខំដើម្បីទទួលបានអំណោយទានជាក់លាក់មួយ សូមពិចារណារៀនបន្ថែមអំពីវាពី ព្រះគម្ពីរ ពីពររបស់លោកអយ្យកោរបស់បងប្អូន ឬពីសុន្ទរកថាសន្និសីទទូទៅ ។ បងប្អូនក៏អាចសួរអ្នកដទៃអំពីបទពិសោធន៍របស់ពួកគេផងដែរ ។
អនុវត្ត
ការរៀនអំពីអំណោយទានខាងវិញ្ញាណគឺមានប្រយោជន៍ ប៉ុន្តែបងប្អូនត្រូវយកចំណេះដឹងនោះមកប្រើប្រាស់ ។ នៅពេលបងប្អូនអនុវត្តសេចក្ដីជំនឿលើព្រះយេស៊ូវគ្រីស្ទ ប្រែចិត្ត ហើយរក្សាសេចក្តីសញ្ញារបស់បងប្អូន នោះបងប្អូនមានលក្ខណៈសម្បត្តិគ្រប់គ្រាន់ដើម្បីទទួលអំណោយទាននៃព្រះវិញ្ញាណ ។ ហើយស្វែងរកស្ថានភាពដែលបងប្អូនអាចប្រើប្រាស់អំណោយទានខាងវិញ្ញណរបស់បងប្អូនផងដែរ ។ សូមចាំថាអំណោយទាននេះមិនមែនជាប្រយោជន៍ សម្រាប់តែបងប្អូនប៉ុណ្ណោះទេ ប៉ុន្តែវាក៏ជាប្រយោជន៍សម្រាប់អ្នកដទៃផងដែរ ( សូមមើល គោលលទ្ធិ និង សេចក្តីសញ្ញា ៤៦:២៦ ) ។ តើអ្នកអាចប្រើអំណោយទានខាងវិញ្ញាណដើម្បីជួយអ្នកដទៃរបៀបណា ?