តើខ្ញុំអាចនិយាយទៅកាន់កូនៗរបស់ខ្ញុំអំពីដំណឹងល្អតាមរបៀបនានា ជារៀងរាល់ថ្ងៃដោយរបៀបណា ?

ក្នុងនាមជាឪពុកម្ដាយ វាជាកិច្ចការរបស់យើងដើម្បីបង្រៀនកូនៗអំពីដំណឹងល្អ ។ ប៉ុន្តែការពិភាក្សាពីដំណឹងល្អមិនចាំបាច់មានការតានតឹង និងផ្លូវការនោះទេ ! នេះជាយោបល់មួយចំនួនសម្រាប់ការបញ្ចូលការពិភាក្សាដំណឹងល្អនៅក្នុងជីវិតប្រចាំថ្ងៃ ។

របៀប ៧ យ៉ាងដើម្បីចាប់ផ្ដើមការសន្ទនាមួយ

តើមានមិត្តភក្ដិណាម្នាក់របស់កូនបានសួរអំពីរឿងសាសនាទេ ?
តើកូនបានអានអ្វីខ្លះនៅក្នុងព្រះគម្ពីរមួយរយៈក្រោយនេះ ? តើកូនមានសំណួរអ្វីទេ ?
តើការហៅបម្រើរបស់កូនដំណើរការយ៉ាងណាដែរ ( ឬការចាត់តាំងផ្សេងៗទៀតខាងសាសនាចក្រ ) ? តើអ្វីនឹងជួយកូន ?
ម៉ាក់/ប៉ាបានគិតពីខគម្ពីរនេះថ្មីៗនេះ ។ តើកូនមានគំនិតអ្វីខ្លះពីវា ?
តើមានអ្វីនៅព្រះវិហារនៅថ្ងៃនេះដែលកូនមានសំណួរទេ ?
តើមានអ្វីដែលយើងបានអាននៅក្នុង ចូរមកតាមខ្ញុំ មួយរយៈក្រោយនេះ ដែលកូននៅតែគិតដល់ទេ ?
តើកូនគិតដូចម្ដេចពីសុន្ទរកថាសន្និសីទទូទៅទាំងនោះដែលយើងបានមើល ?

ពេលវេលានិយាយមិនផ្លូវការ ៧ យ៉ាង

ពេលញ៉ាំអាហាររួមគ្នា ឬពេលចូលគេង
ពេលកូនរបស់អ្នកកំពុងឆ្លងកាត់គ្រាលំបាកមួយ
អំឡុងគម្រោងបម្រើមួយ ឬពេលកំពុងជួយអ្នកផ្សេងទៀត
មុន និងបន្ទាប់ពីការប្រជុំ ឬសកម្មភាពសាសនាចក្រ
ពេលប្រាប់ដំណើររឿងគ្រួសារ ឬនិយាយពីបុព្វការីជន
ពេលណាក៏ដោយដែលអ្នកកត់សម្គាល់ឃើញពីអ្វីដែលទាក់ទងនឹងសារខាងវិញ្ញាណ
ពេលណាក៏បាន—ប្រសិនបើអ្នកចូលទៅកាន់ការសន្ទនាដោយបើកចំហរ ដោយសេចក្ដីស្រឡាញ់ក្នុងចិត្ត និងដោយបំណងប្រាថ្នាដើម្បីស្ដាប់ និងយល់

គំនិត និងព័ត៌មានជំនួយ

បង្រៀនកូនរបស់អ្នកថា ការមានសំណួរអំពីដំណឹងល្អគឺមិនថ្វីទេ ។ បន្ទាប់ពីអ្វីៗទាំងអស់ វាគឺជាសំណួរដែលបានបំផុស យ៉ូសែប ស៊្មីធ ឲ្យអធិស្ឋានសូមជំនួយ ដែលនាំឲ្យមានការនិមិត្តដំបូង ! សូមជួយពួកគេឲ្យដឹងថា ពួកគេនៅតែអាចចិញ្ចឹមបីបាច់ទីបន្ទាល់មួយដោយមិនបាច់មានចម្លើយទាំងអស់ ។
សូមចង្អុលបង្ហាញពេលអ្នកទទួលអារម្មណ៍ពីព្រះវិញ្ញាណ មិនថាវាអំឡុងពេលរាត្រីក្រុមគ្រួសារ នៅព្រះវិហារ ឬនៅថ្ងៃលិចដ៏ស្រស់ស្អាតមួយ ។ ការណ៍នេះអាចជួយពួកគេឲ្យចាប់ផ្ដើមស្គាល់ពីរបៀបដែលព្រះវិញ្ញាណបរិសុទ្ធមានបន្ទូលមកយើង ។ សូមពន្យល់ថា ព្រះវិញ្ញាណបានទាក់ទងមកយើងតាមរយៈរបៀបខុសៗគ្នាជាច្រើន ដូចជាអារម្មណ៍កក់ក្ដៅ ឬស្រាលៗ គំនិតច្បាស់លាស់ អារម្មណ៍សុខសាន្ត ជាដើម ។
ធ្វើឲ្យសារដំណឹងល្អងាយស្រួលរកបាន ។ កូនៗវ័យជំទង់របស់អ្នកប្រហែលជាមិនមើលអត្ថបទទស្សនាវដ្ដីសាសនាចក្រនៅក្នុងទូរសព្ទរបស់ពួកគេទេ តែពួកគេប្រហែលជាបើកមើល លីអាហូណា ដែលនៅលើតុ ។ ពួកគេប្រហែលជាមិនស្ដាប់សុន្ទរកថាសន្និសីទទូទៅនៅពេលទំនេររបស់ពួកគេទេ ប៉ុន្តែពួកគេប្រហែលជាចាប់បានពាក្យមួយចំនួនពេលអ្នកកំពុងស្ដាប់វាពេលអ្នកធ្វើអាហារពេលល្ងាច ។
សំខាន់បំផុត សូមបន្តព្យាយាម សូម្បីវាហាក់ដូចជាមិនដំណើរការក្ដី ! ព្រះគម្ពីរមានដំណើររឿងជាច្រើនអំពីកូនៗដែលមិនស្ដាប់ពីដំបូង ដូចជា អាលម៉ាជាកូន ។ សូមទុកចិត្តថា ថ្ងៃមួយសេចក្ដីពិតខាងវិញ្ញាណនឹងជ្រាបចូលទៅក្នុងដួងចិត្តរបស់ពួកគេ ។