Alima 20; 22–23

INkosi yawoWonke amaLamani

Ukufuna ukufunda mayelana neNkosi

AmaLamani ayenenkosi eyayibusa ngaphezu kwamanye amakhosi. Yayingubaba weNkosi uLamoni. Yayicabanga ukuthi amaNefi ayeyizitha. Ngolunye usuku, yabona uLamoni eno-Amoni. Inkosi yambuza uLamoni ukuthi wayenzani nomNefi. ULamoni watshela inkosi ukuthi babeyokhulula abafowabo ba-Amoni etilongweni.

Mosiya 10:11–17; Alima 20:1–12

Inkosi yayithukuthele. Yayicabanga ukuthi amaNefi ayeqamba amanga khona ezozama ukutshontshela amaLamani. Yatshela uLamoni ukuba abulale u-Amoni futhi ahambe naye.

Alima 20:13–14

ULamoni wayengeke ambulale u-Amoni. Watshela inkosi ukuthi u-Amoni nabafowabo babengabaprofethi baNkulunkulu. Wathi wayezobasiza abafowabo ba-Amoni.

Alima 20:15

Inkosi yakhipha insabule yayo ukuba ilimaze uLamoni, kepha u-Amoni wamuvimba. Inkosi yahlasela u-Amoni esikhundleni. U-Amoni wazivikela. Walimaza ingalo yenkosi ukuze inkosi ingakwazi ukulwa. Inkosi yayithukile ngenxa yendlela u-Amoni ayenamandla ngayo. Yathembisa ukunikeza u-Amoni ingxenye yombuso wayo uma u-Amoni emudedela ukuba aphile.

Alima 20:16–23

U-Amoni wayengawufuni umbuso. Esikhundleni salokho, wacela inkosi ukuba ikhulule abafowabo etilongweni. Waphinde wacela inkosi ukuba iyeke ukuthukuthelela uLamoni. U-Amoni wathi inkosi kufanele idedele uLamoni ukuba ahole ngendlela ayecabanga kuyiyona enhle.

Alima 20:24

Inkosi yamangazwa indlela u-Amoni ayethanda ngayo uLamoni. Yavuma ukwenza konke okwacelwa u-Amoni.

Alima 20:25–27

Inkosi yayifuna ukufunda kabanzi ngalokho eyakutshelwa ngu-Amoni noLamoni mayelana ngoNkulunkulu. Yacela u-Amoni nabafowabo ukuba baze bazoyifundisa.

Alima 20:27

U-Amoni noLamoni bahamba baya ezweni likaMidoni. Abafowabo ba-Amoni babesetilongweni laphaya. Babeboshwe ngezintambo futhi babenganikwanga ukudla noma amanzi. ULamoni waqinisekisa umbusi waseMidoni ukuba akhulule abafowabo ba-Amoni.

Alima 20:28–30

Kwathi bekhululwa, abafowabo ba-Amoni bahamba baya kubaba kaLamoni. Bakhothama enkosini futhi bacela ukuba ngabasizi bayo. Inkosi yanqaba. Kunalokho, yayifuna bamfundise ngevangeli. Omunye wabafowabo wayebizwa ngo-Aroni. Wafundela inkosi imibhalo engcwele futhi wayifundisa ngoNkulunkulu noJesu Kristu.

Alima 22:1–14

Inkosi yamkholwa u-Aroni. Yathi izodela umbuso wayo wonke ukuba yazi uNkulunkulu. Yabuza u-Aroni ukuthi yini eyayiyidinga ukuba iyenze. U-Aroni watshela inkosi ukuba iguquke futhi ikhuleke kuNkulunkulu ngokholo. Inkosi yaphenduka kuzozonke izono zayo futhi yakhuleka.

Alima 22:15–18

Inkosi yawela phansi. Abasizi benkosi bagijima batshela indlovukazi.

Alima 22:18–19

Indlovukazi yafika yabona inkosi ilele phansi. Yacabanga ukuthi u-Aroni nabafowabo babeyibulele inkosi. Indlovukazi yayithukuthele.

Alima 22:19

Indlovukazi yatshela abasizi ukuba babulale u-Aroni nabafowabo. Kepha abasizi babesaba. Bathi u-Aroni nabafowabo babenamandla kakhulu. Manje indlovukazi yayesaba. Yathumela abasizi ukuba batshele abantu basedolobheni ngalokhu okwenzekile. Wayenethemba lokuthi abantu babezobulala u-Aroni nabafowabo.

Alima 22:19–21

U-Aroni wayazi ukuthi abantu babezothukuthela. Wayazi futhi ukuthi inkosi yayingafanga. Wasiza inkosi ukuba isukume. Inkosi yabuyelwa amandla yase ima. Indlovukazi kanye nabasizi babemangele.

Alima 22:22–23

Inkosi yafundisa indlovukazi nabasizi ngoJesu. Bonke bakholelwa kuJesu. Inkosi yayifuna bonke abantu bayo ukuba bafunde ngoJesu. Yenza umthetho othi u-Aroni nabafowabo bangafundisa nomayikuphi embusweni wayo. Bafundisa abantu futhi babiza abapristi nabafundisi ezweni.

Alima 22:23–27; 23:1–4