U-Alima 46–50

Isibonakaliso seNkululeko

Ukuvikela ilungelo lokukholelwa kuNkulunkulu

U-Amalikiya wayengumNefi omkhulu, onamandla. Wayefuna ukuba yinkosi. Wathembisa ukunika abantu abamsizayo amandla. Abantu abaningi babemthanda futhi bezama ukwenza abanye ukuba bamlandele. U-Amalikiya wahola abantu ukuthi benze izinto ezimbi. Yena nabalandeli bakhe babefuna ukubulala abantu ababefundisa ngoJesu Kristu.

U-Alima 45:23–24; 46:1–10

UKapteni uMoroni, umholi wamabutho amaNefi, wayekholelwa kuJesu. Wayazi ukuthi amaNefi ayebusisiwe ngoba ayegcina imiyalelo kaNkulunkulu. Wayethukuthele kakhulu ngokuthi u-Amalikiya wayehola abantu kude noNkulunkulu, ezama ukuba yinkosi futhi ezama ukulimaza abantu.

U-Alima 46:9–11, 13–15, 18

UMoroni waklebhula ibhantshi lakhe. Wabhala kulo ukuthi abantu kufanele bakhumbule uNkulunkulu wabo, inkululeko yabo nemindeni yabo. Wabe eselibophela esigxotsheni walibiza ngesibonakaliso senkululeko. UMoroni wakhulekela isibusiso sikaNkulunkulu. Wabonisa amaNefi isibonakaliso senkululeko futhi wawacela ukuthi ahlanganyele naye ekulweni no-Amalikiya.

U-Alima 46:12–20, 23–24, 28

Abantu bagqoka izivikelo zabo futhi bagijimela kuMoroni. Babekulungele ukulwela uNkulunkulu namakhaya abo, imindeni yabo, nenkululeko. Benza isivumelwano, noma isithembiso esikhethekile, noNkulunkulu ukuthi bayomlandele njalo. Base belungela ukulwa no-Amalikiya.

U-Alima 46:21–22, 28

Ibutho likaMoroni lalilikhulu. U-Amalikiya wayesaba. Wazama ukubaleka nabalandeli bakhe. Kodwa abaningi babo babekhathazekile ngokuthi u-Amalikiya wayelwela izizathu ezingalungile. Abaningi babengeke besamlandela. Ibutho likaMoroni labamisa labo ababesalandela u-Amalikiya, kodwa u-Amalikiya kanye nabanye abambalwa babaleka.

U-Alima 46:29–33

U-Amalikiya waya ezweni lamaLamani. Wayefuna amaLamani amsize alwe namaNefi. Lapho wayezoba nebutho elikhulu, elinamandla. Wenza amaLamani amaningi ukuba athukuthelele amaNefi. Inkosi yamaLamani yatshela wonke amaLamani ukuthi azilungiselele ukulwa namaNefi.

U-Alima 47:1

Inkosi yamuthanda u-Amalikiya. Yenza u-Amalikiya omunye wabaholi phezu kwebutho lamaLamani. Kodwa u-Amalikiya wayefuna amandla engeziwe.

U-Alima 47:1–3

U-Amalikiya wenza isu lokubusa phezu kwamaLamani. Walithatha lonke ibutho lamaLamani. Ngemva kwalokho wayala izinceku zakhe ukuba zibulale inkosi futhi ziqambe amanga ngokuthi ubani okwenzile lokho.

U-Alima 47:4–26

U-Amalikiya wenza sengathi uthukuthele ngokubulalwa kwenkosi. AmaLamani ayemthanda u-Amalikiya. Washada nendlovukazi futhi waba inkosi entsha. Wayefuna ukubusa phezu kwamaNefi futhi. Wakhuluma kabi ngamaNefi ukuze amaLamani awathukuthelele. Ngokushesha, amaLamani amaningi afuna ukulwa nabo.

U-Alima 47:25–35; 48:1–4

Ngenkathi u-Amalikiya ethola amandla ngokuqamba amanga, uMoroni walungiselela amaNefi ukuthi athembele kuNkulunkulu. Wabeka isibonakaliso senkululeko kuyo yonke imibhoshongo yezwe ukuze abakhumbuze ngesithembiso sabo. Amabutho kaMoroni nawo ayilungiselela impi amadolobha amaNefi. Bakha izindonga, bagumbha nemisele ukuze amadolobha avikeleke, abe namandla.

U-Alima 46:36; 48:7–18

Ngenkathi amaLamani eza ezolwa, awakwazanga ukungena emadolobheni amaNefi. Bavinjwa izindonga kanye nemisele amabutho kaMoroni ayeyakhile. AmaLamani amaningi afa ngesikhathi ehlasela amaNefi. U-Amalikiya wathukuthela kakhulu. Wathembisa ukubulala uMoroni.

U-Alima 49:1–27

AmaNefi abonga uNkulunkulu ngokuwasiza nokubavikela. Benza amadolobha abo aphephe nakakhulu futhi bakha amadolobha engeziwe. Impi namaLamani yaqhubeka, kodwa uNkulunkulu wamsiza uMoroni kanye namabutho akhe ukuthi bagcine amaNefi ephephile. AmaNefi ayejabule. Balalela uNkulunkulu futhi bahlala bethembekile kuYe.

U-Alima 49:28–30; 50:1–24