Leksyon 10 Materyal sa Magtutudlo

Pagsunod sa Buhi nga mga Propeta sa Ginoo

Ang pasiunang kamatuoran sa gipahiuli nga ebanghelyo mao nga ang Ginoo nagpadayon sa pagtawag og buhi nga mga propeta sa pagpadayag sa Iyang kabubut-on ug doktrina ngadto sa Iyang katawhan. Kini nga leksyon gihimo aron matabangan nga malig-on ang pasalig sa mga estudyante sa pagsunod sa mga propeta sa Ginoo sa pagpailub ug pagtuo.

Mga Sugyot alang sa Pagtudlo

Ang Ginoo misugo sa mga Santos sa pagpatalinghug sa mga pulong sa Iyang propeta.

Pagpakita og imahe sa Presidente sa Simbahan, ug pangutan-a ang mga estudyante unsay ilang hunahuna ug pagbati kon sila makakita niini nga litrato.

Ipakita ang mosunod nga pamahayag ni Elder Ulisses Soares sa Korum sa Napulog Duha ka mga Apostoles nga gilakip sa materyal sa pagpangandam:

Elder Ulisses Soares

Ang pagkaadunay mga propeta usa ka timaan sa gugma sa Dios alang sa Iyang mga anak. (Ulisses Soares, “Ang mga Propeta Mamulong pinaagi sa Gahum sa Balaang Espiritu,” Liahona, Mayo 2018, 99)

• Sa unsa nga mga paagi nga ang buhi nga mga propeta usa ka timailhan sa gugma sa Dios alang sa Iyang mga anak? (Awhaga ang mga estudyante sa paghinumdom unsay ilang gitun-an sa seksyon 1 sa materyal sa pagpangandam.)

Ipasabut nga sa adlaw nga ang Simbahan naorganisar, si Propeta Joseph Smith nakadawat og pagpadayag gikan sa Ginoo uban sa sugo ug saad ngadto sa mga miyembro sa Iyang Simbahan. Basaha uban sa mga estudyante ang Doktrina ug mga Pakigsaad 21:4–5, nga mangita unsay gisugo sa Ginoo nga buhaton sa mga miyembro sa Simbahan.

• Unsa nga kamatuoran ang atong makita gikan sa sugo sa Ginoo ngadto sa mga Santos? (Gamit ang mga pulong sa mga estudyante, pangitaa ang kamatuoran nga susama sa mosunod: Ang Ginoo misugo nato sa pagdawat sa mga pulong sa propeta nga sama og gikan sa Iyang kaugalingong ba-ba pinaagi sa pagpailub ug pagtuo.)

• Ngano kaha nga usahay nagkinahanglan og pagpailub ug pagtuo ang pagdawat ug ang pagpatalinghug sa mga pulong sa propeta?

Isip usa ka klase o gagmay nga mga grupo, dapita ang mga estudyante sa pagbasa sa mosunod nga senaryo ug paghisgot sa mga pangutana nga nagsunod:

Samtang nakigsulti sa usa ka higala mahitungod sa bag-ong kinatibuk-ang komperensya, ang imong higala misulti nimo sa iyang pakigbisog sa pagdawat og usa ka butang nga gitudlo sa usa sa mga lider sa Simbahan. “Unsay angay nakong buhaton kon ako dili mouyon sa usa ka butang nga gitudlo sa propeta?” nangutana siya.

• Ngano nga mahagiton man kini nga problema alang sa usa ka miyembro sa Simbahan?

• Unsa kaha ang inyong ipakigbahin sa inyong higala sa pag-awhag kaniya sa paglihok inubanan sa pailub ug pagtuo samtang siya magtinguha sa pagsulbad sa iyang problema? (Awhaga ang mga estudyante sa paghunahuna o pagribyu kon gikinahanglan sa unsay ilang nakat-unan sa seksyon 2 diha sa materyal sa pagpangandam.)

• Unsay nakatabang kaninyo sa pagsunod sa mga propeta sa Ginoo pinaagi sa pagpailub ug pagtuo? O unsay inyong nakat-unan gikan sa usa ka sakop sa pamilya o higala nga inyong gihisgutan mahitungod niini nga pangutana (sumala sa gisugyot sa seksyon 2 sa materyal sa pagpangandam)?

Isulat sa pisara (o ipakita) ang mosunod nga dili kompleto nga baruganan: Samtang mopatalinghug kita sa mga pulong sa mga propeta sa Ginoo pinaagi sa pagpailub ug pagtuo …

Basaha uban sa mga estudyante ang Doktrina ug mga Pakigsaad 21:6, nga mangita sa gisaad nga mga panalangin sa Ginoo sa pagsunod sa Iyang mga propeta pinaagi sa pagpailub ug pagtuo.

• Unsa kaha ang gipasabut nga “ang mga ganghaan sa impyerno dili makabuntog batok kanimo”? nga ang Ginoo “mopatibulaag sa mga gahum sa kangitngit gikan sa imong atubangan”? nga ang mga langit “mouyog alang sa imong kaayohan”? (Isulat sa pisara ang mga tubag sa mga estudyante ubos sa dili kompleto nga pamahayag sa baruganan.)

• Unsa ang pipila ka bag-ong mga pagtulun-an gikan sa mga propeta sa Ginoo nga makatabang sa pagpanalipod nato batok sa mga gahum sa kangitngit ug makapauyog sa kalangitan alang sa atong kaayohan? (Ikonsiderar ang pag-andam og pipila ka ehemplo nga ipakigbahin.)

• Kanus-a ang imong pagkaandam sa pagsunod sa tambag sa mga propeta pinaagi sa pagpailub ug pagtuo misangpot ngadto sa pipila niini nga mga panalangin?

Hatagi og panahon ang mga estudyante nga mainampoong mamalandong unsay ilang mahimo sa pagsunod sa mga propeta sa Ginoo uban sa mas dakong pagpailub ug pagtuo. Kini mahimong maglakip sa paghunahuna kon unsaon nga mas mahingpit nila ang ilang paglihok sa bag-o nga mapanagnaong mga imbitasyon ug tambag. Dapita ang mga estudyante sa pagrekord sa mga hunahuna ug mga impresyon nga moabut kanila. Awhaga sila sa pagsunod sa mga pag-aghat nga ilang nadawat gikan sa Espiritu Santo.

Ang mga propeta sa Ginoo makadawat og pagpadayag ug mopahayag sa doktrina alang sa tibuok Simbahan.

Hangyoa ang mga estudyante sa paghinumdom sa kasinatian uban ni Hiram Page ug sa iyang bato gikan sa ilang pagtuon sa materyal sa pagpangandam.

• Unsay epekto sa giingon nga pagpadayag ni Hiram Page alang sa mga miyembro sa Simbahan?

Pahinumdumi ang mga estudyante nga si Hiram Page wala lamang mangangkon nga nakadawat og pagpadayag alang sa Simbahan, apan ang iyang giingon nga ang mga pagpadayag misukwahi sa doktrina nga gitudlo sa mga kasulatan ug sa mga pagpadayag nga nadawat kaniadto ni Joseph Smith. Kadtong mga midawat sa mga pagpadayag ni Hiram Page naglakip sa mga sakop sa pamilyang Whitmer ug ni Oliver Cowdery.

Basaha ang Doktrina ug mga Pakigsaad 28:1–7, nga mangita sa mga pagtulun-an sa Ginoo ngadto ni Oliver Cowdery ug sa mga miyembro sa Simbahan. Ipasabut nga ang “mga misteryo” nga gihisgutan sa bersikulo 7 nagpasabut sa “espirituhanong mga kamatuoran nga nahibaloan lamang pinaagi sa pagpadayag” (Giya ngadto sa mga Kasulatan, “Misteryo sa Dios, Mga,” scriptures.ChurchofJesusChrist.org).

• Unsa nga mga kamatuoran ang atong makat-unan gikan niini nga mga bersikulo mahitungod kon si kinsa ang makadawat og pagpadayag alang sa tibuok Simbahan? (Ang mga estudyante pweding motino og lain-laing mga kamatuoran, lakip sa mosunod: Kadto lamang kinsa naghupot sa mga yawe sa pagdumala sa Simbahan ang gitugutan nga modawat og pagpadayag ug pag-establisar sa doktrina alang sa tibuok Simbahan.)

• Sa unsa nga paagi nga ang pagsabut niini nga kamatuoran makatabang nga kita malikay sa pagkailad?

Ipasabut nga dunay dakong pagkatukma sa doktrina nga gitudlo sa gipili nga mga propeta sa Ginoo sa tibuok kasaysayan sa Simbahan. Hinoon, ang pipila ka mga miyembro naghunahuna unsay buhaton kon sila makakita og pamahayag nga gihimo kaniadto sa usa ka lider sa Simbahan nga ingon og dili tukma sa doktrina nga gitudlo karon.

• Unsa nga mga baruganan ang makagiya nato sa pag-ila sa doktrina sa Ginoo sumala sa gitudlo sa Iyang buhi nga mga propeta? (Mahimo nimong dapiton ang mga estudyante sa pagribyu sa mga pamahayag nila ni Elder D. Todd Christofferson ug Neil L. Andersen sa seksyon 3 sa materyal sa pagpangandam.)

Isip kabahin sa diskusyon, mahimo nimong ipakigbahin ang mosunod nga pamahayag ni Presidente Russell M. Nelson:

Presidente Russell M. Nelson

Kamo dili kanunay makasabut sa matag pahayag sa buhi nga propeta. Apan kon kamo nasayud nga ang propeta usa ka propeta, kamo makaduol sa Ginoo sa kamapainubsanon ug hugot nga pagtuo ug mangayo alang sa inyong kaugalingong saksi kabahin sa bisan unsa nga giproklamar sa Iyang propeta. (Russell M. Nelson, “Barug isip Tinuod nga mga Milenyal,” Liahona, Okt. 2016, 53)

Ikonsiderar ang pagtapos sa leksyon pinaagi sa pagpakigbahin sa imong pagpamatuod sa buhi nga mga propeta ug sa mga panalangin sa pagsunod kanila pinaagi sa pagpailub ug pagtuo.

Alang sa Sunod nga Higayon

Ipasabut nga ang sunod nga klase magtutok sa hilisgutan nga gipasabut ni Presidente Russell M. Nelson nga “ang dakong hagit, ang labing dakong kawsa, ug ang labing dako nga buhat sa yuta karon” (“Paglaum sa Israel” [tibuok kalibutan nga debosyonal, Hunyo 3, 2018], dugang ngadto sa New Era ug Ensign, 4–5, ChurchofJesusChrist.org; italics sa original). Dapita ang mga estudyante sa pagtuon sa materyal sa pagpangandam alang sa sunod nga klase ug moabut nga andam nga mohisgot sa mga katuyoan ug mga panalangin sa pag-apil sa dakong kawsa ug buhat sa pagpundok sa Israel.