Leksyon 25 Materyal sa Magtutudlo

Pagsunodsunod diha sa Kapangulohan ug ang Panaw sa Kasadpan

Human sa pagpatay ni Joseph ug Hyrum Smith, daghang mga Santos ang nakadawat og balaang pagsaksi nga si Brigham Young ug ang Napulog Duha ka mga Apostoles mao ang mangulo sa Simbahan sa Ginoo. Ubos sa ilang dinasig nga direksyon, mipanaw ang mga Santos ngadto sa Walog sa Salt Lake. Kini nga leksyon gidesenyo sa paglig-on sa pagtuo sa mga estudyante nga ang Unang Kapangulohan ug ang Napulog Duha ka mga Apostoles naghupot sa tanang mga yawe sa pagkapari sa katapusang dispensasyon. Kini nga leksyon motabang usab sa mga estudyante sa pagsalig nga ang Ginoo modirekta sa ilang indibidwal nga mga kinabuhi samtang nagsunod sila sa ilang mga pakigsaad.

Mga Sugyot alang sa Pagtudlo

Ang mga apostoles naghupot sa mga yawe sa gingharian.

Ipakita ang mosunod nga hulagway ni Joseph ug Hyrum Smith.

Ipasabut nga ang managsoong lalaki gipatay sa gabii sa Hunyo 27, 1844. Sa pagkasunod buntag, ang higala sa Propeta nga si Porter Rockwell misakay sa iyang kabayo ngadto sa Nauvoo nagsinggit, “Gipatay si Joseph! Gipatay si Joseph! Ila siyang gipatay!” (Anson Call, Autobiography ug journal, mga 1856–1889, 12, Church History Library, Siyudad sa Salt Lake, Utah).

• Unsa kaha ang gihunahuna sa mga Santos human madungog kini nga balita?

Mahimo nimong pangutan-on ang mga estudyante kon sila nakasinati ba nga nakadungog og balita kabahin sa kamatayon sa usa ka propeta ug unsa kana nga pagbati.

• Unsa nga mga pangutana ug mga kabalaka kaha aduna ang unang mga Santos sa dihang ilang nadungog ang kamatayon ni Joseph Smith?

• Unsa ang reaksyon ni Brigham Young ngadto sa balita kabahin sa kamatayon ni Joseph ug Hyrum Smith? (Kon gikinahanglan, dapita ang mga estudyante sa pagribyu sa reaksyon ni Brigham Young diha sa seksyon 1 sa materyal sa pagpangandam.)

• Bisan pa sa iyang kaguol sa kamatayon sa Propeta, unsa ang mihupay ni Brigham?

Ipakita ang mga hulagway ni Brigham Young ug Sidney Rigdon.

Pahinumdumi ang mga estudyante nga si Brigham Young mao ang nag-unang Apostol sa panahon sa kamatayon sa Propeta. Nakaserbisyo si Sidney Rigdon isip magtatambag ni Joseph Smith diha sa Unang Kapangulohan ug mibati nga siya ang kinahanglan nga mangulo sa Simbahan isip magbalantay niini. Mitawag og espesyal nga miting si Sidney, uban sa paglaum nga ang mga miyembro sa Simbahan motugot sa iyang pangangkon sa pagkapangulo. Si Sidney ug Brigham namulong sa mga Santos.

Dapita ang usa ka estudyante sa pagbasa og kusog sa mga pamahayag ni Presidente Brigham Young diha sa seksyon 1 sa materyal sa pagpangandam.

• Unsa nga kamatuoran ang atong makat-unan gikan sa pamahayag ni Brigham Young mahitungod sa awtoridad niadtong giorden isip mga Apostoles? (Human makatubag ang mga estudyante, isulat ang mosunod nga kamatuoran diha sa pisara: Ang mga Apostoles naghupot sa tanang mga yawe sa pagkapari nga gikinahanglan sa pagdumala sa Simbahan. [Tan-awa sa Doktrina ug mga Pakigsaad 27:12–13; 112:30–32.])

Ipasabut nga sa atong panahon, kon ang matag apostol gi-orden, siya hatagan sa tanang mga yawe sa pagkapari nga gipahiuli sa Ginoo nganhi sa yuta pinaagi ni Joseph Smith. Bisan pa niana, ang Presidente sa Simbahan mao lamang ang adunay awtoridad sa paggamit sa tanan niini nga mga yawe. Ang mga sakop sa Korum sa Napulog Duha ka mga Apostoles naggamit sa ilang mga yawe sa pagkapari ubos sa direksyon sa presidente sa Simbahan.

• Unsa ang mahitabo karon kon ang Presidente sa Simbahan mamatay?

Kon kinahanglan, ipakita ang mosunod nga pamahayag ug dapita ang usa ka estudyante sa pagbasa niini og kusog:

Kon ang Presidente sa Simbahan mamatay, ang Unang Kapangulohan dihadiha dayon mabungkag. Ang kalalakin-an nga kanhi nagserbisyo isip mga magtatambag mobalik sa ilang mga pwesto sa Korum sa Napulog Duha ka mga Apostoles, ug kana nga korum mopadayon nga mamuno sa Simbahan, nga diin ang senyor nga Apostol ang mangulo. … Sa tibuok natong kasaysayan, ang senyor [kinaunahan nga nahimong] Apostol mao ang kanunay nga mosunod nga Presidente sa Simbahan. (“A Message from the First Presidency,” Ene. 16, 2018, ChurchofJesusChrist.org)

Balika og tan-aw ang mga hulagway ni Brigham ug Sidney, ug pangutana:

• Unsa ang nasinati sa daghang mga Santos samtang sila nanan-aw ug naminaw ngadto ni Brigham Young nga namulong? Sa unsa nga paagi kana nakaapekto kanila? (Awhaga ang mga estudyante sa paghinumdom unsay ilang nakat-unan sa seksyon 1 sa materyal sa pagpangandam.)

Basaha ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles. Ipasabut nga si Elder Andersen namulong niini nga mga pulong sa adlaw nga si Presidente Russell M. Nelson gipaluyohan isip ang bag-o nga Presidente sa Simbahan:

Kita adunay pribilehiyo isip mga Santos sa Ulahing mga Adlaw nga makadawat og personal nga pagsaksi nga ang tawag ni Presidente Nelson gikan sa Dios. (“Ang Propeta sa Dios,” Liahona, Mayo 2018, 26)

Dapita ang pipila ka mga estudyante sa pagpakigbahin sa ilang pagpamatuod nga ang propeta karon gitawag sa Dios ug tingali giunsa nila pagdawat kana nga pagpamatuod. Awhaga ang mga estudyante sa pagpaninguha sa ilang mga kaugalingong saksi nga ang mga lider sa Simbahan gitawag pinaagi sa inspirasyon.

Brigham Young ug ang Napulog Duha naggiya sa mga Santos ngadto sa Walog sa Salt Lake.

Pagpakita og hulagway sa Templo sa Nauvoo, ug pangutan-a ang mga estudyante ngano nga ang mga Santos mitrabaho og maayo aron sa paghuman sa templo sa dili pa sila mobiya sa ilang mga panimalay ug mobalhin sa kasadpan. (Mahimo nimong dapiton ang mga estudyante sa pagbasa sa pamahayag ni Sarah Rich diha sa seksyon 2 sa materyal sa pagpangandam.)

Ipasabut nga sa dihang ang mga Santos mibiya sa Nauvoo aron sa pagbiyahe sa kasadpan, sila adunay gamay nga kahibalo kon unsa ang nag-una kanila. Dapita ang usa ka estudyante sa pagbasa sa mosunod nga pamahayag ni Elder Erastus Snow, usa ka unang pioneer ug sa kaulahian usa ka sakop sa Korum sa Napulog Duha ka mga Apostoles:

Sa dihang mibiya ang mga pioneer [alang sa Kasadpan] … nangita kami og usa ka nasud nga gitudlo ni Propeta Joseph Smith taliwala diha sa Rocky Mountains. … Ang pundok sa mga pioneer nanglakaw, wala mahibalo asa sila moadto, lamang … nga sila gimandoan sa Dios sa pag-adto ngadto sa usa ka yuta nga iyang ipakita kanila. Ug bisan kanus-a si Propeta Brigham Young … pangutan-on—“Asa kamo moadto?” ang tubag nga mao lamang iyang mahatag mao––“Akong ipakita kaninyo kon kita moabut niini.” Ang mga pag-ampo niana nga pundok sa mga pioneer, gihalad adlaw ug gabii, sa walay paghunong ngadto sa Dios, mao nga giyahan kami, ingon nga siya misaad, ngadto sa usa ka yuta … nga iyang gipahayag nga ihatag kanamo. (Journal of Discourses, 16:207)

• Unsa ang imong namatikdan gikan niini nga pamahayag mahitungod sa hugot nga pagtuo sa mga pioneer?

Hangyoa ang mga estudyante sa paghunahuna og makadiyut sa panaw sa kinabuhi nga ilang giatubang ug unsa nga paggiya gikan sa langit ang ilang gilauman nga madawat.

• Unsa ang pipila ka mga hagit ang nasinati sa mga Santos sa ilang pagbiya sa Nauvoo ug sa pagsugod sa ilang panaw sa kasadpan? (Kon gikinahanglan, ipatan-aw sa mga estudyante ngadto sa seksyon 2 sa materyal sa pagpangandam.)

Pahinumdumi ang mga estudyante nga atol sa malisud nga tingtugnaw sa 1846–47 samtang nagdasok ang mga Santos diha sa temporaryong pamuy-anan sa Winter Quarters, Nebraska, si Brigham Young nakadawat og pagpadayag nga girekord diha sa Doktrina ug mga Pakigsaad 136. Dapita ang mga estudyante sa pagbasa sa Doktrina ug mga Pakigsaad 136:22, mangita sa saad sa Ginoo ngadto sa mga Santos nga makahatag kanato og kahupayan samtang kita naningkamot sa pagdiskubre ug pagsunod sa kabubut-on sa Dios alang kanato diha sa atong mga kinabuhi.

Mahimo nga imong ipasabut nga ang hugpong sa mga pulong nga “akong bukton ilugway sa katapusan nga adlaw” nagrepresentar sa gahum ug paggiya sa Ginoo nga gilugway ngadto sa Iyang mga katawhan.

• Unsa ang atong makat-unan gikan niini nga bersikulo mahitungod sa unsay tinguha sa Ginoo alang sa Iyang katawhan? Human matubag sa mga estudyante, ipakita o isulat ang mosunod nga kamatuoran diha sa pisara: Ang Ginoo nagtinguha sa paggiya ug pagtabang kanato sa atong mga kinabuhi.)

• Unsa ang pipila ka mga paagi ang Ginoo naggiya kanato sa atong kinabuhi? Unsa ang kinahanglan natong buhaton aron sa pagdawat sa mao nga paggiya? (Ribyuha uban sa mga estudyante ang pamahayag ni Presidente Oaks diha sa seksyon 2 sa materyal sa pagpangandam.)

Isulat ang mosunod diha sa pisara: Ako makadawat sa paggiya ug pagtabang gikan sa Ginoo samtang ako …

Dapita ang mga estudyante sa pagbasa sa Doktrina ug mga Pakigsaad 136:2–4, 7–11, 19–24, mangita sa unsa nga matang sa mga katawhan ang mga Santos kinahanglan nga mahimo sa pagbaton sa paggiya sa Ginoo. Hunahunaa ang pagdapit sa mga estudyante sa paglista sa ilang mga tubag diha sa pisara aron sa pagkompleto sa baruganan.

• Ngano kaha nga ang pagpaningkamot nga mahimong matang sa mga katawhan nga gihulagway dinhi niini nga mga bersikulo nagtabang kanato sa pagdawat sa paggiya ug pagtabang sa Ginoo?

Dapita ang mga estudyante sa paghinumdom unsay gisulti ni Brigham Young sa dihang una niyang nakita ang Walog sa Salt Lake (tan-awa sa seksyon 2 sa materyal sa pagpangandam). Pangutan-a ang mga estudyante kon sila diha bay mga higayon sa ilang mga kinabuhi nga ang Ginoo nanghimatuod ngadto kanila nga sila nagbuhat sa matarung nga butang o anaa sa husto nga dapit. Hunahunaa ang pagdapit sa pipila ka mga estudyante sa pagpaambit sa ilang mga kasinatian.

Hatagi ang mga estudyante og pipila ka mga minuto sa pagpamalandong nga mainampuon sa mosunod nga pangutana ug sa pagrekord sa bisan unsa nga mga hunahuna ug mga pagbati nga ilang madawat:

• Unsa ang imong gibati nga imong kinahanglan nga hatagan og gibug-aton aron madawat ang paggiya gikan sa Ginoo nga imong gilauman?

Taposa pinaagi sa pag-awhag sa mga estudyante sa paglihok diha sa mga pagbati nga ilang nadawat ug sa pagpakigbahin sa imong pagpamatuod sa mga kamatuoran nga gitudlo diha sa leksyon.

Alang sa Sunod nga Higayon

Ipasabut ngadto sa mga estudyante nga diha sa materyal sa pagpangandam alang sa sunod nga klase, ilang tun-an ang usa sa labing makalilisang nga mga hitabo sa kasaysayan sa Simbahan, ang Masaker sa Mountain Meadows. Dapita sila sa pag-anha sa klase nga andam sa paghisgot sa mga leksyon nga atong makat-unan gikan niini nga kasinatian.