Leksyon 3 Materyal sa Magtutudlo

Pag-angkon og Espirituhanong Kahibalo

Ang Ginoo mipadayag og mga baruganan nga makagiya nato sa atong pagpangita sa kamatuoran (tan-awa sa “Pag-angkon og Espirituhanong Kahibalo [Acquiring Spiritual Knowledge],” Mahinungdanong Dokumento sa Doktrinal Mastery [Doctrinal Mastery Core Document] [2018]). Kini nga leksyon makapadugang sa kapasidad sa mga estudyante sa paggamit sa mga baruganan sa pag-angkon og espirituhanong kahibalo ug pagsusi sa pagkamasaligan sa mga tinubdan.

PAGPALAMBO SA ATONG PAGTUDLO UG PAGKAT-ON

Hisguti ang mga sangputanan sa pagkat-on sa estudyante. Ang mga sangputanan sa pagkat-on mao ang mga pamahayag nga nagtin-aw unsa nga kahibalo ug mga kahanas ang kinahanglang makat-unan sa mga estudyante gikan sa usa ka kasinatian sa edukasyon. Ang mga sangputanan alang sa matag leksyon niini nga kurso gipiho sa pasiuna sa leksyon. Ayaw pagpanagana sa paghisgot niini nga mga sangputanan ngadto sa mga estudyante. Himoa nga ang mga sangputanan sa leksyon mogiya nimo samtang imong ipahaum ang materyal sa leksyon ug susihon ang kalampusan sa mga estudyante bahin sa kasinatian sa pagkat-on.

Mga Sugyot alang sa Pagtudlo

Ang Ginoo mihatag og usa ka sundanan sa pag-angkon og espirituhanong kahibalo.

Ipakita ang mosunod nga mga pangutana: Ok ra ba nga dunay mga pangutana mahitungod sa Simbahan? Ngano o nganong dili man? Dapita ang duha o tulo ka estudyante sa pagpaambit sa ilang mga hunahuna.

Sa tibuok klase, basaha ang Joseph Smith—Kasaysayan 1:8–10, nga mangita sa mga pulong nga gigamit ni Joseph sa paghulagway sa iyang relihiyoso nga mga pangutana ug mga kabalaka. Dapita ang mga estudyante sa pagpakigbahin gikan sa istorya ni Joseph sa unsay ilang nakit-an ug unsay ilang nakat-unan mahitungod sa pagpangutana.

Isulat ang mosunod nga pamahayag diha sa pisara: Ako makaangkon og espirituhanong kahibalo kon ako …

Hangyoa ang mga estudyante sa pagpangita sa tulo ka baruganan gikan sa mga materyal sa pagpangandam nga mokompleto niini nga pamahayag. (Samtang motubag ang mga estudyante, siguroha nga ang mosunod nga mga baruganan mailhan ug mapakita:

1. Molihok inubanan sa pagtuo.

2. Susihon ang mga konsepto ug mga pangutana inubanan sa mahangturong panglantaw.

3. Tinguhaon ang dugang nga panabut pinaagi sa balaanong gitudlo nga mga tinubdan.

Hangyoa ang mga estudyante sa pagpasabut unsay ilang nasabtan mahitungod sa matag usa niini nga mga baruganan. Kon gikinahanglan, hatagi sila og gamay nga panahon sa pagribyu sa materyal sa pagpangandam.

Dapita ang mga estudyante sa pagbasa sa Joseph Smith—Kasaysayan 1:11–14, nga mangita kon sa unsa nga paagi nga ang mga aksyon ni Joseph Smith naghulagway niini nga mga baruganan sa pag-angkon og espirituhanong kahibalo samtang siya nagtinguha og mga tubag sa iyang mga pangutana ug mga kabalaka. Dapita ang mga estudyante sa pagpaambit kon unsay ilang nakat-unan.

Pagpili ug ipakita ang usa o daghan pa sa mga pangutana nga imong nadawat gikan sa mga estudyante diin sila makagamit sa mga baruganan sa pag-angkon og espirituhanong kahibalo (tan-awa ang “Irekord ang Imong mga Hunahuna” nga kalihokan sa seksyon 1 sa materyal sa pagpangandam). Ipasabut nga samtang ikaw makahimo lamang sa paggamit og pipila sa gisumiter nga mga pangutana atol niini nga klase, ikaw mangita og laing mga lugar unya diha sa kurikulum sa kurso sa pagtubag sa ubang mga pangutana nga imong nadawat.

Pahibalo: Ang katuyoan niini nga kalihokan mao ang paghatag sa mga estudyante og kahigayunan sa pagsulti mahitungod kon unsaon nila sa paggamit ang mga baruganan sa pag-angkon og espirituhanong kahibalo ngadto sa nagkalain-laing mga pangutana. Dili tuyo niini ang paghatag og mga tubag ngadto sa piho nga mga pangutana. Pagmatngon nga dili mogahin og daghang oras sa mga detalye sa usa ka pangutana o isyu.

Hisguti kon unsaon sa mga estudyante paggamit ang mga baruganan nga gipakita diha sa pisara sa pagpangita og mga tubag ngadto sa pinili nga pangutana o mga pangutana. Ang follow-up nga mga pangutana sa ubos mamahimo nga kabahin sa imong panaghisgutan:

• Sa unsa nga paagi kita molihok inubanan sa pagtuo samtang kita magtinguha og tubag niini nga pangutana?

• Sa unsa nga paagi nga ang mahangturong panglantaw makatabang nato sa pagtubag niini nga pangutana? Unsay atong nahibaloan mahitungod sa Langitnong Amahan ug sa Iyang plano sa kaluwasan nga makatabang nato sa pagtan-aw niini nga pangutana gikan sa usa ka mahangturong panglantaw?

• Unsa nga mga tinubdan nga balaanong gipili ang makatabang nato nga mas makasabut niini nga hilisgutan? Unsa ang ubang kasaligan nga mga tinubdan ang makatabang? (Pahinumdom: Tingali makaayo ang pagdala sa mga estudyante ngadto sa Gospel Topics nga pahina sa ChurchofJesusChrist.org sa pagpakita og kasaligan nga tinubdan nga nagtudlo usab ngadto sa mga link sa kasulatan ug mapanagnaon nga mga pakigpulong.)

Dapita ang usa o duha ka estudyante sa pagpakigbahin kon sa unsa nga paagi nga ang tulo ka baruganan sa pag-angkon og espirituhanong kahibalo nakapanalangin kanila sa ilang pagpangita og espirituhanong kahibalo.

Atong matimbang-timbang ang pagkamasaligan sa mga tinubdan.

Ipatan-aw ang usa ka bahin sa video “Balaanon nga Pinili nga mga Tinubdan” (mga time code 0:00 hangtud sa 4:19).

Dapita ang mga estudyante sa pagtan-aw alang sa unsa nga mga matang sa tinubdan sa impormasyon ang labing kasaligan ug kon hain ang adunay potensyal nga makadaot sa atong pagsabot sa kamatuoran.

Human nimo hunungon ang video, ikonsiderar ang pagpangutana sa pipila ka mga pangutana sama sa mosunod aron matabangan ang mga estudyante sa pagkonsiderar sa mga kalainan tali sa balaanong mga tinubdan, kasaligan nga mga tinubdan, ug dili kasaligan o gani makadaot nga mga tinubdan:

• Unsa ang labing lunsay nga mga tinubdan diin kita makapangita og mga tubag?

• Unsaon ninyo sa pag-ila kon ang tinubdan sa impormasyon kasaligan ba o dili?

• Unsay inyong buhaton kon kamo makasugat og mga tinubdan sa impormasyon nga gitumong sa pagdaot sa pagtuo?

Sa pagpakita sa kaimportante sa paggamit sa kasaligan nga mga tinubdan kon magtuon sa kasaysayan sa Simbahan, dapita ang mga estudyante sa paghunahuna sa mosunod nga sitwasyon: Kamo nangita og dugang nga impormasyon mahitungod sa Tulo ka mga Saksi sa Basahon ni Mormon. Sa inyong pagpangita kamo nakasugat sa mosunod nga pamahayag ni Stephen Burnett, kinsa nagpuyo sa samang panahon ni Martin Harris, ug kamo wala makasiguro kon ang pamahayag tinuod ba o dili:

Ako sulod sa dugay nga panahon ug uban sa katuyoan namalandong sa kasaysayan niini nga simbahan ug misusi sa ebidensya alang ug batok niini. … Apan sa dihang ako nakadungog nga si Martin Harris namulong sa publiko nga siya wala gayud makakita sa mga palid sa iyang natural nga mga mata, sa panan-awon o imahinasyon lang, [ni] si Oliver ni David … ang katapusang bahin sa akong pagpamatuod naguba. (Stephen Burnett, sa Richard Lloyd Anderson, Investigating the Book of Mormon Witnesses [1981], 155)

• Unsa nga mga lakang ang inyong himoon sa dili pa mohukom kon dawaton ba o dili ang pangangkon ni Stephen Burnett mahitungod ni Martin Harris?

Dapita ang mga estudyante sa pagreport unsay ilang nakat-unan mahitungod sa pagtimbang-timbang sa mga tinubdan gikan sa seksyon sa materyal sa pagpangandam nga gitawag og “Mga Pangutana alang sa Pagtimbang-timbang sa mga Tinubdan.”

Uban niini nga mga sumbanan sa pagtimbang-timbang sa mga tinubdan nga anaa sa hunahuna, ihatag sa mga estudyante ang handout nga “Historical Background on Stephen Burnett’s Statement,” ug dapita ang mga estudyante (isip tibuok klase o sa gagmay nga mga grupo) sa pagpangita og impormasyon nga makatabang nila sa pagsusi sa kredibilidad sa akusasyon ni Stephen Burnett nga si Martin Harris wala makakita sa bulawan nga mga palid.

Makasaysayanong Background sa Pamahayag ni Stephen Burnett

Si Stephen Burnett mipasakop sa Simbahan niadtong 1830 ug naordinahan nga elder niadtong 1831. Nag-alagad siya og mga misyon sa Silangang Estados Unidos tali sa tuig 1832 ug 1834 (tan-awa sa “Burnett, Stephen,” The Joseph Smith Papers, interim content). Pagka-1838 mibiya siya sa Simbahan ug naghunahuna nga kini usa ka “organisasyon nga gibase sa pagpamakak ug pagpangilad.”

Samtang si Burnett personal nga nakaila ni Martin Harris, siya dili usa sa Tulo ka mga Saksi o Walo ka mga Saksi.

Niadtong 1838, si Burnett mihimo og sulat diin siya miingon nga si Martin Harris miingon nga “siya wala gayud makakita sa mga palid sa iyang natural nga mga mata, sa panan-awon o imahinasyon lang.” Si Burnett misulat nga laing tulo ka tawo “miuyon” sa iyang istorya. Kining tulo ka tawo mibiya usab sa Simbahan.

Kusganong misupak si Martin Harris kon giunsa paghulagway ni Burnett ang iyang pagpamatuod ug mipadayon sa pagsaksi sa katinuod sa Basahon ni Mormon sa iyang tibuok kinabuhi.

Sa pagtandi sa istorya ni Burnett, ang “pagkatukma sa daghang mga interbyu ni Martin Harris nagmatuod nga ang iyang [Harris] kasigurado wala gayud molahi gikan sa iyang panan-awon sa anghel ug sa mga palid niadtong 1829 hangtud sa gutlo sa iyang kamatayon niadtong 1875.” Sa usa ka pribado nga sulat nga gisulat niadtong 1871, si Harris mipahayag, “Walay tawo nga nakadungog nako sa bisan unsang paagi nga milimud sa kamatuoran sa Basahon ni Mormon, sa pagpangalagad sa anghel nga mipakita nako sa mga palid, ni sa organisasyon sa Simbahan ni Jesukristo sa mga Santos sa Ulahing mga Adlaw” (Richard Lloyd Anderson, Investigating the Book of Mormon Witnesses [1981], 107–20, 155–57).

Makasaysayanong Background sa Pamahayag ni Stephen Burnett

Human ang mga estudyante dunay igong panahon sa pagbasa ug paghisgot sa handout, ipangutana ang mosunod nga mga pangutana:

• Unsa nga impormasyon nga gikan niini nga handout nga nagkwestyon sa katinuod sa pamahayag ni Stephen Burnett?

• Agig dugang sa pagtesting sa kredibilidad sa mga tinubdan, unsa pay laing paagi nga inyong masusi nga tinuod ang pagpamatuod sa Tulo ka mga Saksi?

Dapita ang mga estudyante sa pagpakigbahin sa unsay ilang nakat-unan gikan niini nga kasinatian. Ikonsiderar ang pagtapos sa klase pinaagi sa pagpakita sa nahibilin sa video “Balaanon nga Pinili nga mga Tinubdan” (mga time code 4:20 hangtud sa 9:16) ug sa pagpaambit sa imong pagpamatuod sa bili sa paggamit sa mga baruganan sa pag-angkon og espiritwal nga kahibalo.

Alang sa Sunod nga Higayon

Pangutan-a ang mga estudyante kon nakasulay ba silang naglisud sa pag-ila sa dihang ang Ginoo nakigsulti kanila o kon sila gusto ba gayud nga makahibalo kon unsaon mas makadawat og personal nga pagpadayag ug giya sa ilang kinabuhi. Dapita sila nga tun-an pag-ayo ang materyal sa pagpangandam alang sa sunod nga leksyon sa doktrina sa pagpadayag ug moabut nga andam nga mopakigbahin sa klase unsay ilang nadiskobrehan.