Leksyon 13 Materyal sa Pagpangandam sa Klase

Ang mga Balaod sa Dios

Hunahunaa ang nakita nimong mga kinaiya sa kalibutan libut kanimo karon mahitungod sa mga balaod ug sa mga sugo sa Dios. Kini ba nga mga kinaiya positibo, negatibo, o walay pagpakabana? Samtang magtuon ka sa mga balaod ug mga sugo nga gipahiuli pinaagi ni Propeta Joseph Smith, pangita og mga paagi diin kini makahatag nimo og kalipay ug panalipod ug makatabang nimo nga mas mahisama sa Manluluwas.

Seksyon 1

Sa unsang paagi nga ang pagsunod sa mga balaod sa Dios makapanalangin sa akong kinabuhi?

Niadtong Disyembre 1830, ang Ginoo misugo nga ang mga Santos nga nagpuyo sa New York magpundok uban sa mga Santos sa Ohio. Misaad ang Ginoo nga kon sila mosunod, Siya mopadayag ngadto kanila sa Iyang balaod ug motuga kanila “sa gahum nga gikan sa kahitas-an” (Doktrina ug mga Pakigsaad 38:32). Wala madugay human nangabut sa Ohio niadtong Pebrero 1831, si Propeta Joseph Smith nakadawat og pagpadayag diin ang Ginoo mipadayag sa Iyang balaod (tan-awa sa Doktrina ug mga Pakigsaad 42). Diha sa pagpadayag, ang Ginoo misubli sa panginahanglan sa pagtuman sa mga sugo nga Iyang gihatag sa Iyang katawhan sa karaang panahon, lakip ang balaod sa kaputli.

Ang Ginoo misugo usab sa mga Santos sa pag-atiman sa mga kabus ug sa pagtukod sa Iyang gingharian pinaagi sa pagsunod sa balaod sa pagpahinungod (tan-awa sa Doktrina ug mga Pakigsaad 42:30–35). Sama sa Iyang pagtudlo sa Iyang karaang mga Apostoles, ang Ginoo mipasabut nga kon ang mga Santos moserbisyo Kaniya ug motuman sa Iyang mga sugo, sila nagpakita sa ilang gugma alang Kaniya (tan-awa sa Juan 14:15; Doktrina ug mga Pakigsaad 42:29).

Sa mga tuig nga misunod, ang Ginoo mipahiuli sa mas daghan pa sa Iyang karaang mga balaod pinaagi ni Joseph Smith, lakip sa balaod sa Igpapahulay (tan-awa sa Doktrina ug mga Pakigsaad 59; 68:29) ug sa balaod sa ikapulo (tan-awa sa Doktrina ug mga Pakigsaad 64:23; 119). Gipadayag usab Niya ang balaod sa kahimsog nga nailhan nga ang Pulong sa Kaalam (tan-awa sa Doktrina ug mga Pakigsaad 89).

Sa pag-andam sa klase, palihug tun-i ang usa o daghan sa mosunod nga mga balaod nga gipamatud-an sa Ginoo o gipadayag sa atong panahon: (1) ang balaod sa kaputli, (2) ang balaod sa pagpahinungod, (3) ang balaod sa Igpapahulay, o (4) ang balaod sa kahimsog, nga nailhan nga ang Pulong sa Kaalam. Gamita ang mga kapanguhaan sa ubos samtang ikaw magtuon sa balaod o mga balaod nga imong napili. Makapangita usab ikaw og dugang nga mga kapanguhaan diha sa ChurchofJesusChrist.org. Moadto sa klase nga andam nga mohisgot sa mosunod nga mga pangutana:

1. Unsa nga kamatuoran o mga kamatuoran ang inyong nakat-unan gikan sa inyong pagtuon?

2. Unsa nga mga hagit ang may kalambigitan sa pagsunod niini nga balaod karon, ug sa unsa nga paagi kini mabuntog?

3. Unsa nga mga panalangin ang personal ninyong nasinati pinaagi sa pagtuman niini nga balaod?

4. Sa unsa nga paagi nga ang pagsunod niini nga balaod makatabang ninyo nga mas mahisama sa inyong Langitnong Amahan ug sa Iyang Anak, nga si Jesukristo?

Seksyon 2

Balaod sa Kaputli

1. Tun-i ang Doktrina ug mga Pakigsaad 42:22–25, nga mangita sa doktrina ug mga baruganan nga gitudlo sa Ginoo mahitungod sa sekswal nga kaputli.

2. Ikonsiderar kon unsa ang gitudlo ni Elder Jeffrey R. Holland sa Korum sa Napulog Duha ka mga Apostoles mahitungod sa gibug-aton sa pagsupak sa balaod sa kaputli ug sa ka sagrado sa sekswal nga kasuod. Tun-i ang mga parapo 9–16 sa iyang pakigpulong “Personal Purity” (Ensign, Nob. 1998, 75–79), nga mangita sa mga rason nga kinahanglan natong bantayan pag-ayo ang atong sekswal nga kaputli.

Gusto pa ba Mo og Dugang? (Opsyonal)

Tun-i ang seksyon nga “Sekswal nga Kaputli” nga makita sa Alang sa Kalig-on sa Kabatan-onan (2011) alang sa mga kasamtangang pagtulun-an sa Simbahan bahin sa balaod sa kaputli.

Seksyon 3

Balaod sa Pagpahinungod

Pagkat-on pa og dugang mahitungod sa balaod sa pagpahinungod pinaagi sa pagbuhat sa mosunod:

1. Basaha unsa ang gitudlo sa Giya ngadto sa mga Kasulatan mahitungod sa balaod sa pagpahinungod.

2. Ribyuha giunsa sa pagsunod sa pipila ka nag-unang mga Santos ang balaod sa pagpahinungod. Sa wala pa ang pag-abut si Joseph Smith sa Kirtland, Ohio, niadtong Pebrero 1831, daghang mga Santos sa Kirtland naningkamot sa pagsunod sa ehemplo sa mga Santos sa Bag-ong Tugon kinsa “gipanag-usahan sa pag-ambit ang tanang butang” (tan-awa sa Mga Buhat 4:32) pinaagi sa pagsulay sa pagpakigbahin sa ilang mga butang ug kabtangan ngadto sa usag usa isip usa ka dako nga pamilya. Tun-i ang Doktrina ug mga Pakigsaad 42:30–35, ug pangitaa ang mga instruksyon sa Ginoo nga miklaro kon unsaon sa mga Santos sa pag-atiman sa usag usa ubos sa balaod sa pagpahinungod.

Gusto pa ba Mo og Dugang? (Opsyonal)

Basaha ang pakigpulong ni Elder D. Todd Christofferson “Mga Hulagway sa Gipahinungod nga Kinabuhi” (Liahona, Nob. 2010, 16–19). Sa iyang pakigpulong si Elder Christofferson sa Korum sa Napulog Duha ka mga Apostoles mipasabut kon sa unsang paagi ang mga Santos sa Ulahing mga Adlaw makapadayon og usa ka gipahinungod nga kinabuhi.

Seksyon 4

Balaod sa Igpapahulay

1. Samtang ang mga miyembro sa Simbahan nanimuyo sa Lalawigan sa Jackson, Missouri, sa ting-init sa 1831, nagsagubang sila og usa ka komunidad diin ang pagsugal, pagkapalahubog, kagubot, ug dili pagbalaan sa adlawng Igpapahulay komon kaayo. Tun-i ang Doktrina ug mga Pakigsaad 59:9–19, nga mangita kon unsay gisugo sa Ginoo nga buhaton sa mga Santos sa pagtabang nila nga makabatok sa impluwensya sa pagkadautan sa kalibutan.

2. Si Presidente Russell M. Nelson mitudlo mahitungod sa kaimportante sa adlaw nga Igpapahulay. Basaha ang mga parapo 3–16 sa iyang pakigpulong “Ang Igpapahulay Usa ka Kahimut-an” (Liahona, Mayo 2015, 129–30). Pangitaa ang tambag nga makatabang nimo sa paghimo sa Igpapahulay nga usa ka kahimut-an.

Gusto pa ba Mo og Dugang? (Opsyonal)

Seksyon 5

Balaod sa Kahimsog

1. Ang Tulunghaan sa mga Propeta, nga naorganisar niadtong Enero 1833, nagsugod sa regular nga miting sa ibabaw nga kwarto sa tindahan ni Newel K. Whitney sa Kirtland, Ohio. Atol niini nga mga miting, ang kaigsoonan sa kasagaran manabako. Human ang iyang asawa, si Emma, misulti sa iyang pagpakabana, si Joseph Smith nangutana sa Ginoo ug nakadawat sa pagpadayag nga nailhan nga ang Pulong sa Kaalam (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 167–68). Tun-i ang Doktrina ug mga Pakigsaad 89:1–14, 18–21, ug ikonsiderar ang pagmarka sa mga instruksyon ug mga saad sa Ginoo ngadto sa mga Santos.

2. Ang pipila ka mga Santos sa Ulahing mga Adlaw naghunahuna ngano nga ang Pulong sa Kaalam wala mopiho sa pagdili sa ubang makadaut nga mga butang. Si Presidente Boyd K. Packer sa Korum sa Napulog Duha ka mga Apostoles mitubag niini nga pangutana ug miklaro sa gisaad nga mga panalangin sa pagtuman sa Pulong sa Kaalam. Basaha ang mga parapo 10–12 ug 23–34 sa iyang pakigpulong “The Word of Wisdom: The Principle and the Promises” (Ensign, Mayo 1996, 17–19).

Gusto pa ba Mo og Dugang? (Opsyonal)

Tun-i ang seksyon nga “Pisikal ug Emosyonal nga Kahimsog” nga makita sa Alang sa Kalig-on sa Kabatan-onan (2011) alang sa kasamtangan nga mga pagtulun-an sa Simbahan bahin sa Pulong sa Kaalam.

Ang Pulong sa Kaalam miabut pinaagi sa pagpadayag, apan sa sinugdanan dili kini usa ka “sugo o pagpugos” (Doktrina ug mga Pakigsaad 89:2). Basaha ang artikulo nga “Pulong sa Kaalam (D&P 89)” sa ChurchofJesusChrist.org. Pangitaa kon sa unsa nga paagi nga ang pagsunod sa Pulong sa Kaalam nausab paglabay sa panahon.