Leksyon 13 Materyal sa Magtutudlo

Ang mga Balaod sa Dios

Ang Ginoo mipadayag sa Iyang mga balaod ug mga sugo pag-usab niini nga dispensasyon pinaagi ni Joseph Smith ug sa misunod nga mga propeta. Kini nga leksyon moandam sa mga estudyante sa pagpasabut sa balaan nga mga katuyoan sa Dios sa paghatag og mga sugo sa Iyang mga anak. Ang mga estudyante pagadapiton usab sa pagtino unsay ilang mahimo aron mas matinud-anong motuman sa mga sugo sa Ginoo.

Mga Sugyot alang sa Pagtudlo

Ang Ginoo mihatag kanato og mga balaod ug mga sugo alang sa atong kaluwasan.

• Unsa kaha ang wala masabti sa pipila ka tawo kinsa mikonsiderar sa balaod sa Dios nga usa ka pagpugong?

Ipasabut nga adunay mas importante nga mga katuyoan ang mga balaod sa Dios kay sa pisikal lamang nga panalipod o mortal nga pagsulay. Sa Iyang mga pagpadayag ngadto ni Propeta Joseph Smith, ang Ginoo mitudlo sa mga Santos sa pipila ka mas importante nga mga rason nga ang Dios mihatag sa Iyang mga anak sa mga balaod ug mga sugo. Dapita ang katunga sa klase sa pagbasa sa hilom sa Doktrina ug mga Pakigsaad 93:19–20 ug ang laing katunga sa pagbasa sa hilom sa Doktrina ug mga Pakigsaad 130:20–21. Hangyoa ang mga estudyante sa pagpangita sa mga saad sa Ginoo niadtong kinsa motuman sa mga balaod ug mga sugo sa Dios. Ipareport sa mga estudyante kon unsay ilang nakit-an.

Ipasabut nga ang “kahingpitan” sa Dios nga gihisgutan sa Doktrina ug mga Pakigsaad 93:19–20 mao ang saad sa kinabuhing dayon—sa pagsulod sa presensya sa Dios ug mahimong sama sa Amahan ug sa Anak (tan-awa sa Doktrina ug mga Pakigsaad 76:94).

• Unsaon ninyo sa pag-summarize ang kamatuoran gikan niini nga mga tudling sa kasulatan mahitungod kon ngano nga ang Langitnong Amahan mihatag sa Iyang mga anak og mga sugo? (Gamit ang mga pulong sa mga estudyante, isulat sa pisara o ipakita ang usa ka pamahayag sa doktrina nga susama sa mosunod: Ang Langitnong Amahan mihatag sa Iyang mga anak og mga sugo aron Siya makapanalangin kanila ug makatabang kanila nga mahimong sama Kaniya.)

Aron mapalawman ang pagsabut sa mga estudyante niini nga kamatuoran, ipakita ang mosunod nga pamahayag ni Elder Dale G. Renlund sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

Ang plano sa Dios naglakip og mga direksyon alang kanato, nga gitawag diha sa mga kasulatan isip mga sugo. Kini nga mga sugo dili panglingaw-lingaw nga pundok ni pinasulagma nga koleksyon sa ipatuman nga mga lagda aron sa pagbansay kanato nga magmasulundon. Konektado kini sa atong pagpalambo og mga kinaiya sa pagkadiosnon, pagbalik ngadto sa atong Langitnong Amahan, ug pagdawat og malungtarong kalipay. (“Magpili Kamo Niining Adlawa,” Liahona, Nob. 2018, 105)

• Sa unsa nga paagi nga ang mga sugo usa ka timailhan sa gugma sa atong Langitnong Amahan ug sa Manluluwas alang kanato?

• Unsa ang mahimo nga kalainan niini sa atong kinabuhi nga makita ang mga sugo isip mahigugmaong mga instruksyon nga makatabang kanato nga makaangkon og mga hiyas sa pagkadiosnon ug makadawat og kalipay?

Ang Ginoo mihatag sa mga Santos sa Iyang balaod.

Pahinumdumi ang mga estudyante nga sa wala madugay human si Propeta Joseph Smith mibalhin ngadto sa Kirtland, Ohio, siya nakadawat og pagpadayag nga naglakip sa balaod sa Ginoo alang sa Iyang Simbahan (tan-awa sa Doktrina ug mga Pakigsaad 42). Sa mga tuig nga misunod, ang Ginoo mitudlo sa mga Santos og daghan pa sa Iyang balaod.

• Unsa ang pipila ka karaang mga balaod ug mga sugo ang gipanghimatuod sa Ginoo sa atong dispensasyon?

Pahinumdumi ang mga estudyante sa buluhaton nga gihatag kanila diha sa materyal sa pagpangandam. Hatagi ang mga estudyante og pipila ka minuto sa pagribyu sa balaod o mga balaod nga ilang gitun-an. Dapita ang mga estudyante kinsa tingali wala makatuon sa usa sa mga balaod nga gilatid diha sa materyal sa pagpangandam sa pagbuhat niini karon.

PAGPALAMBO SA ATONG PAGTUDLO UG PAGKAT-ON

Ang mga panaghisgot diha sa ginagmay nga mga grupo ug ang mga assignment makatabang sa mga estudyante nga makat-on pa og maayo. Ang pagbahin sa klase nga magpares-pares o ginagmay nga mga grupo makatugot og mas daghang mga estudyante nga mopadayag sa ilang mga hunahuna ug mga pagbati ug sa pagtudlo sa usag usa. Aron matabangan ang mga estudyante nga dungan nga makabaton og makahuluganong kasinatian, siguroha nga sila makasabut sa tuyo ug kaimportante sa unsay ilang gihisgutan sa dili pa sila magsugod. Mahimo usab nga mag-assign ka og lider sa diskusyon o magpili og usa ka estudyante nga mouna sa pagpakigbahin.

Human sa igong panahon, bahina ang klase ngadto sa ginagmay nga mga grupo (duha ngadto sa lima ka estudyante kada grupo) sumala sa balaod nga ilang mapili nga tun-an. Pananglitan, duha ngadto sa lima ka estudyante kinsa mopili sa pagtuon sa balaod sa pagpahinungod magporma og usa ka grupo. Tingali gikinahanglan nga daghang grupo ang maghisgot sa samang balaod kon sobra sa lima ka estudyante ang mopili sa pagtuon sa samang balaod. (Kon ang imong klase gamay o kon usa lang ka estudyante ang mopili sa pagtuon sa usa ka piho nga balaod, nan i-adjust kini nga kalihokan aron makatubag sa mga panginahanglan sa imong klase. Pananglitan, mahimo nimong dapiton ang usa ka estudyante sa pagpakigbahin unsay iyang nakat-unan uban nimo o uban sa usa ka grupo kinsa nagtuon og lahi nga hilisgutan.)

Hangyoa ang mga estudyante sa pagpili og usa ka sakop sa grupo isip lider. Hatagi ang matag lider sa grupo og kopya sa gisukip nga handout “Ang mga Balaod sa Dios.”

Ang mga Balaod sa Dios

Mga instruksyon sa lider sa grupo: Palihug giyahi ang inyong grupo sa usa ka makahuluganong panaghisgot sa mosunod nga mga pangutana. Siguroha nga maapil ang matag sakop sa grupo sa inyong panaghisgot.

1. Unsa nga kamatuoran o mga kamatuoran ang inyong nakat-unan gikan sa inyong pagtuon?

2. Unsa nga mga hagit ang may kalambigitan sa pagsunod niini nga balaod karon, ug sa unsa nga paagi kini mabuntog?

3. Unsa nga mga panalangin ang nadawat ninyo o sa inyong pamilya pinaagi sa pagtuman niini nga balaod?

4. Sa unsa nga paagi nga ang pagsunod niini nga balaod makatabang ninyo nga mas mahisama sa Langitnong Amahan?

Sa inyong pagtapos, pagpili og usa ka tawo nga mopakigbahin sa klase og pipila ka importanting butang gikan sa inyong panaghisgot sa grupo.

Ang mga Balaod sa Dios

Hatagi ang mga grupo og 10 ka minuto, o igong panahon aron makahimo og makahuluganong panaghisgot. Human sa igong panahon, dapita ang mga representante gikan sa matag grupo sa pagpakigbahin diha sa tibuok klase og pipila ka importanting mga butang gikan sa ilang panaghisgot. Ikonsiderar ang pag-awhag sa matag representante sa pagpakigbahin kon sa unsa nga paagi nga ang pagsunod sa balaod nga iyang gitun-an makatabang kanato nga mas mahisama sa atong Langitnong Amahan.

Ipakigbahin ang imong pagpamatuod ug kasinatian kon sa unsa nga paagi nga ang pagsunod sa mga balaod ug mga sugo sa Dios nakapanalangin sa imong kinabuhi ug nakatabang nimo nga mas mahisama sa Langitnong Amahan.

Ipakita ang mosunod nga mga pangutana. Hatagi ang mga estudyante og panahon sa pagpamalandong sa mga pangutana, pagsulat sa ilang mga impresyon, ug pagtino sa mga aksyon diin gidasig sila nga buhaton. Awhaga ang mga estudyante nga magmainampoon sa pagpangayo og tabang ug giya sa Langitnong Amahan sa paghimo sa mga impresyon nga ilang nadawat. Mahimo usab nga imong dapiton sila sa pagtino og usa ka panahon sa pag-follow up sa unsay gipasalig nga ilang buhaton.

• Hain sa mga sugo sa Ginoo nga nahisgutan karon ang akong matuman sa matinud-anong paagi?

• Unsa ang kinahanglan nakong usbon, sugdan sa pagbuhat, o hunungon sa pagbuhat aron mas hingpit nga matuman kini nga sugo?

• Unsa nga mga panalangin, mga hiyas sa pagkadiosnon, ug kalipay ang moabut sa akong kinabuhi gumikan sa higpit nga pagsunod niini nga sugo ug uban sa dugang nga kasinsero?

Alang sa Sunod nga Higayon

Ipasabut nga usa sa lahi nga mga gituohan sa Ang Simbahan ni Jesukristo sa mga Santos sa Ulahing mga Adlaw mao nga ang Dios nagpadayon sa paggiya sa Iyang mga anak pinaagi sa paghatag og dugang nga kasulatan. Dapita ang mga estudyante sa pagtuon sa materyal sa pagpangandam alang sa sunod nga leksyon ug moanha nga andam sa paghisgot kon sa unsa nga paagi nga ang dugang nga kasulatan miklaro ug mipalawom sa atong pagsabut sa ebanghelyo sa Manluluwas.