Leksyon 28 Materyal sa Magtutudlo

Ang Ginoo Nagpadali sa Iyang Buhat

Nagpuyo kita sa usa ka panahon nga ang Ginoo nagpadali sa Iyang buhat sa kaluwasan (tan-awa sa Doktrina ug mga Pakigsaad 88:73). Kini nga leksyon gidesinyo sa paglig-on sa pagtuo sa mga estudyante nga ang buhat sa Ginoo mopadayon sa paglihok bisan pa sa oposisyon ug sa pagtabang sa mga estudyante sa paghimo og usa ka plano aron sa makugihon makatabang sa Ginoo sa papagdali sa Iyang buhat.

Mga Sugyot alang sa Pagtudlo

Gitudlo ni Joseph Smith nga ang buhat sa Ginoo mopadayon sa paglihok bisan pa sa oposisyon.

Ipakita sa mga estudyante ang usa ka hulagway sa balay nga troso ni Peter Whitmer Sr. (tan-awa ang materyal sa pagpangandam) ug hangyoa sila sa pagpakigbahin unsay ilang nahibaloan mahitungod sa pagtubo sa gipahiuli nga Simbahan sa Ginoo sukad sa pagtukod niini sa 1830. (Mahimo nga ang mga estudyante motan-aw ngadto sa seksyon 1 sa materyal sa pagpangandam.)

• Unsa ang gisulti sa mga propeta mahitungod sa umaabut sa Ang Simbahan ni Jesukristo sa mga Santos sa Ulahing mga Adlaw? Ngano kaha nga kini importante nga masabtan ang kapalaran sa Simbahan sa Ginoo?

Ipasabut nga sa Marso 1842, gihulagway ni Joseph Smith ang kapalaran sa ebanghelyo sa Ginoo ug sa Iyang Simbahan sa dihang siya misulat og usa ka sulat agi og tubag ngadto sa usa ka hangyo alang sa impormasyon mahitungod sa mga tinuohan sa Simbahan ni John Wentworth, kinsa mao ang editor sa pahayagan sa Chicago, Illinois. Diha sa sulat, gihulagway sa Propeta ang “pagsaka, pag-uswag, pagpanggukod, ug hugot nga pagtuo sa mga Santos sa Ulahing mga Adlaw” (Mga Pagtulun-an sa mga Presidente sa Simbahan: Joseph Smith [2007], 529).

Ipakita ang mosunod nga bahin sa sulat, ug hangyoa ang usa ka estudyante sa pagbasa niini og kusog:

Ang Sumbanan sa Kamatuoran natukod, walay dili balaan nga kamot ang makapugong sa buhat sa paglambo; mga pagpanggukod mahimong nagkakusog, ang mga manggugubot mahimong maghiusa, mga kasundalohan magpundok, mga pasangil mahimong modaut sa kadungganan, apan ang kamatuoran sa Dios magpadayon nga maisugon, halangdon, ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang katuyoan sa Dios matuman, ug ang Halangdong Jehova moingon nga ang buhat nahuman na. (Mga Pagtulun-an: Joseph Smith, 538)

Kon gikinahanglan, ipasabut nga ang pasangil nagpasabut sa bakak nga mga pamahayag nga gituyo sa pagdaot sa kadungganan sa usa ka tawo.

• Unsa nga mga kamatuoran ang atong makat-unan mahitungod sa buhat sa Dios gikan sa pamahayag ni Joseph Smith ug sa unsay imong nakat-unan diha sa materyal sa pagpangandam? (Human matubag sa mga estudyante, ipakita ang mosunod nga kamatuoran: Bisan pa sa oposisyon, ang buhat sa Dios magpadayon sa paglihok hangtud ang Iyang mga katuyoan matuman.)

Ipasabut nga si Presidente M. Russell Ballard sa Korum sa Napulog Duha ka mga Apostoles mipamatuod nga ang panagna ni Joseph Smith nagpadayon nga matuman sa atong panahon. Ipakita ang mosunod nga pamahayag, ug dapita ang usa ka estudyante sa pagbasa niini og kusog.

Mga pagpanggukod nagkakusog. Pasangil ug mga bakak ug sayop nga paghunahuna nagsulay sa pagdaot sa kadungganan. Apan sa matag dekada gikan sa panahon sa Pagpahiuli ngadto sa unahan, ang kamatuoran sa Dios magpadayon “nga maisugon, halangdon ug gawasnon.” Ang gamay nga Simbahan nga misugod sa 1830 uban sa diyutay kaayo nga mga miyembro mitubo ngadto sa [minilyon nga] mga Santos sa Ulahing mga Adlaw diha sa daghang nagkalainlaing mga nasud sa tibuok kalibutan, ug kita naghimo og maayong pag-uswag nga makasulod sa matag yuta, makabisita sa matag dapit, molukop sa matag nasud, ug makasulti sa matag dunggan.

Kini buhat sa Dios, ug ang buhat sa Dios dili gayud makawang. (M.Russell Ballard, “Ang Kamatuoran sa Dios Mopadayon,” Liahona, Nob. 2008, 83)

Ipakita ang mosunod nga mga pangutana, ug hatagi ang mga estudyante og minuto sa pagpamalandong niini sa dili pa nila tubagon:

• Unsa ang pipila ka mga ehemplo gikan sa kasaysayan sa Simbahan o sa atong panahon karon nga nagpakita nga bisan pa sa oposisyon, ang buhat sa Dios magpadayon sa paglihok?

• Sa unsa nga paagi ang pagkahibalo nga ang buhat sa Dios dili mahunong nagtabang sa pag-andam kanimo sa pag-atubang sa oposisyon sa imong mga tinuohan?

Ang Ginoo nagpadali sa Iyang buhat.

Ipakita ang mosunod nga pamahayag gikan ni Presidente Dieter F. Uchtdorf, diin iyang gihimo samtang nagserbisyo isip Ikaduhang Magtatambag sa Unang Kapangulohan:

Usahay maghunahuna kita sa Pagpahiuli sa ebanghelyo ingon nga kompleto, butang nga nahitabo na—si Joseph Smith mihubad sa Basahon ni Mormon, nadawat niya ang mga yawe sa priesthood, ang Simbahan naorganisar. Apan sa tinuod lang, ang Pagpahiuli usa ka nagpadayon nga proseso; nagpuyo kita niini karon mismo. (Dieter F. Uchtdorf, “Wala Ba Kamo Nalambigit sa Buhat sa Pagpahiuli?” Liahona, Mayo 2014, 59)

• Ngano kahang importante nga mahibalo nga ang Pagpahiuli nagpadayon?

Ipasabut nga sa hinapos sa Disyembre 1832, gimandoan sa Ginoo ang mga elder sa Kirtland, Ohio, sa pagpangandam sa “paglakaw diha sa mga Hentil alang sa katapusan nga higayon” (Doktrina ug mga Pakigsaad 88:84).

Basaha ang Doktrina ug mga Pakigsaad 88:73–74, 80–81 uban sa mga estudyante, ug dapita sila sa paghunahuna og marka sa saad sa Ginoo ug sa kalabut nga mga sugo.

Aron sa pagtabang sa mga estudyante sa pagsabut niini nga saad, dapita sila sa pagbasa sa mosunod nga pamahayag ni Presidente Russell M. Nelson nga makita diha sa pasiuna sa pagpangandam sa materyal alang niini nga leksyon:

Kulba-hinam kini nga mga panahon. Ang Ginoo nagpadali sa Iyang buhat nga kita mga saksi niini. Kini kulba-hinam. Kini malisud. Daghan pa ang gikinahanglan gikan sa matag usa kanato––labaw pa kay sa gikinahanglan kaniadto. Ug daghan pa ang gihatag. (Russell M. Nelson, “Personal Invitation,” ChurchofJesusChrist.org)

• Unsa ang atong makat-unan gikan niini nga mga bersikulo sa Doktrina ug mga Pakigsaad 88 ug gikan sa pamahayag ni Presidente Nelson mahitungod sa atong tahas sa pagpadali sa buhat sa Ginoo? (Mahimong makigbahin ang mga estudyante og ideya nga susama sa mosunod nga kamatuoran: Kita adunay responsibilidad sa pag-apil sa pagpadali sa buhat sa Ginoo.)

Dapita ang mga estudyante sa paghunahuna mahitungod sa mga bahin sa buhat sa Ginoo sa kaluwasan nga ilang nakat-unan dinhi niini nga kurso. Kamo mahimo nga moribyu sa syllabus sa kurso o sa lista sa mga ulohan sa leksyon aron sa pagtabang sa mga estudyante nga mahinumdom sa importanting mga hilisgutan. Mahimo usab nga imong hangyoon ang mga estudyante sa pagpakigbahin kon unsa ang nakapadani kanila mahitungod sa mga tudling sa kasulatan ug mga pagdapit sa mga lider sa Simbahan nga makaplagan diha sa seksyon 2 sa materyal sa pagpangandam.

• Unsa ang pipila ka mga bahin sa buhat sa Ginoo sa kaluwasan nga kita adunay responsibilidad sa pag-apil? (Ilista diha sa pisara ang mga tubag sa mga estudyante. Kini mahimong mag-apil sa pagpundok sa Israel, pagsangyaw sa ebanghelyo, pagtubos sa mga patay, pagsunod sa mga propeta, pagsakripisyo alang sa uban, pagpangalagad, paghatag og kahupayan ngadto sa nagkinahanglan, pagsimba diha sa templo, pagbalaan sa Igpapahulay.)

• Sa unsang piho nga mga paagi imong nakita ang Ginoo nga nagdali sa Iyang buhat diha sa mga dapit nga atong gilista?

Dapita ang mga estudyante sa paggahin og mga minuto sa paghunahuna nga mainampoon kon sa unsang paagi ang Ginoo gusto kanila nga personal moapil sa pagpadali sa Iyang buhat. Hatagi sila og panahon sa pagsulat og plano sa unsay ilang mabuhat sa pagtabang sa Ginoo. Samtang sila naghimo sa ilang mga plano, mahimo ka nga mosugyot nga ilang iapil ang piho nga mga impormasyon mahitungod sa unsaon ug mga kanus-a sila molihok.

Hunahunaa ang pagsulat sa imong personal nga plano sa atubangan sa klase, diin imong ihulagway ang pipila ka mga butang nga imong buhaton (o ipadayon sa pagbuhat) aron sa pag-apil sa pagpadali sa buhat sa Ginoo. Sa dili pa mosulat ang mga estudyante sa ilang plano, hunahunaa ang pagpakigbahin sa imo isip usa ka ehemplo.

Human sa igo nga panahon, dapita ang mga estudyante sa pagpamatuod kabahin sa unsay ilang nakat-unan ug nabati samtang sila nag-apil niini nga kurso. Sa daklit pakigbahin sa imong pagpamatuod ug panghimatuod kabahin sa mga panalangin nga madawat sa mga estudyante samtang sila nagpadayon nga aktibong mga tig-apil sa pagpadali sa buhat sa Ginoo.

PAGPALAMBO SA ATONG PAGTUDLO UG PAGKAT-ON

Awhaga ang mga estudyante sa pagpadayon ngadto sa gradwasyon sa Institute. Si Presidente Russell M. Nelson nag-ingon, “Ang paghuman sa … institute mopatubo sa imong abilidad nga mohawod diha sa labing importanting mga butang nga imong pagabuhaton sukad sa kinabuhi” (“A Personal Invitation to Participate in Seminary and Institute,” Peb. 4, 2019, ChurchofJesusChrist.org). Tabangi ug awhaga ang mga estudyante sa pagkompleto sa mga panginahanglanon sa kurso. Awhaga sila sa pagpadayon sa pag-eskwela sa institute.