Leksyon 2 Materyal sa Magtutudlo

Ang Unang Panan-awon

Ang Dios nga Amahan ug ang Iyang Anak, si Jesukristo, nagpakita ngadto ni Joseph Smith niadtong 1820. Kini nga leksyon gihimo aron matabangan ang mga estudyante nga makapamilyar sa mga istorya ni Joseph sa iyang Unang Panan-awon, makahibalo sa doktrina ug mga baruganan nga ilang makat-unan gikan sa iyang panan-awon, ug makapalig-on sa ilang mga pagpamatuod nga si Joseph Smith nakakita sa Amahan ug sa Anak.

Pahinumdom: Ang pagpangita ni Joseph Smith sa kamatuoran sumala sa gisaysay sa Joseph Smith—Kasaysayan 1:5–13 hisgutan sa mas detalyadong paagi sa leksyon 3 niini nga kurso.

Mga Sugyot alang sa Pagtudlo

Ang Langitnong Amahan ug si Jesukristo nagpakita ngadto ni Joseph Smith.

Ipakita ang mosunod nga pamahayag gikan sa Joseph Smith—Kasaysayan 1:21:

“Kuno wala [na] kanang mga butanga sama sa mga panan-awon o mga pagpadayag niini nga mga adlaw.”

• Unsa ang inyong mga pagbati mahitungod niini nga pamahayag?

• Unsa kaha ang kalainan sa inyong kinabuhi kon kamo mituo niini nga pamahayag?

Ipasabut nga kini nga pamahayag gihimo sa usa ka tigsangyaw nga Methodist sa dihang ang batan-ong si Joseph Smith misulti kaniya mahitungod sa iyang Unang Panan-awon. Dapita ang mga estudyante sa pagbasa sa Joseph Smith—Kasaysayan 1:15–19, ug hangyoa sila sa paghunahuna mahitungod sa kon sa unsang paagi ang paghulagway ni Joseph sa iyang nasinati nagprubar nga sayop ang pangangkon niini nga tigsangyaw. Human nila mabasa, dapita ang mga estudyante sa pagpakigbahin unsay ilang gihunahuna.

PAGPALAMBO SA ATONG PAGTUDLO UG PAGKAT-ON

Dapita ang mga estudyante sa pagbasa diha sa klase. Ang pagbasa diha sa klase mahimong himoon sa daghang paagi, sama sa hilom nga pagpabasa sa mga estudyante sa ilang kaugalingong mga kasulatan, pagpabasa og kusog sa usa ka estudaynte, pagpuli-puli sa pagpabasa og kusog sa mga estudyante sa mga bersikulo, dungan nga pagpabasa og kusog sa mga estudyante, ug uban pa.

Isulat ang mosunod nga kamatuoran diha sa pisara: Ang Dios nga Amahan ug si Jesukristo nagpakita ngadto ni Joseph Smith ug namulong kaniya.

Dapita ang pipila ka mga estudyante kinsa gustong mopamatuod sa Unang Panan-awon ni Joseph sa pagtubag sa mosunod nga pangutana:

• Sa unsang paagi ang imong espirituhanon nga pagsaksi sa Unang Panan-awon miabut kanimo?

Makakat-on kita og importante nga mga kamatuoran gikan sa mga istorya sa Unang Panan-awon.

Pahinumdumi ang mga estudyante nga si Joseph Smith mihatag og upat ka lain-laing mga istorya sa Unang Panan-awon nga atong nahibaloan. Kita adunay lima ka dugang nga mga istorya niini nga panan-awon nga girekord niadtong kinsa nakadungog ni Joseph nga naghisgot niini. Sama nga adunay mga kalainan sa mga istorya sa kinabuhi sa Manluluwas nga girekord ni Mateo, Marcos, Lucas, ug Juan, ang matag istorya sa Unang Panan-awon ni Joseph naghatag og gibug-aton sa lahi nga mga aspeto sa iyang kasinatian. Apan kining tanan adunay importante nga mga elemento sa unsay nakita ug nadungog ni Joseph. Ang pipila ka tawo mosulay sa pagbaliwala sa Unang Panan-awon tungod sa mga kalainan sa nagkalain-laing mga istorya. (Pananglitan, ang 1832 nga istorya naghatag og gibug-aton nga si Joseph nagtinguha og kapasayloan sa iyang mga sala ug naggamit usab sa titulo nga “ang Ginoo” imbis magpasabut sa Langitnong Amahan ug ni Jesukristo nga managlahi. Ang 1835 nga istorya naghulagway nga ang Langitnong Amahan una nga mipakita, gisundan sa Manluluwas.)

Aron matabangan ang pagpasabut ngano nga adunay mga kalainan niini nga mga istorya, hangyoa ang mga estudyante sa paghunahuna og importante o makahuluganong kasinatian nga ilang nasinati sa ilang kinabuhi.

• Sa unsang paagi kaha nga ang inyong pagsulti niana nga kasinatian magkalahi depende kon kinsa ang naminaw ninyo? Sa unsang paagi kini mausab depende kon kanus-a o nganong naghisgot kamo mahitungod sa kasinatian?

• Unsaon ninyo sa pagtubag sa usa ka tawo kinsa makiglalis nga ang nagkalain-laing mga istorya sa Unang Panan-awon makapaduha-duha sa katinuod sa kasinatian ni Joseph? (Kon gikinahanglan, awhaga ang mga estudyante sa paghunahuna unsa ang ilang nakat-unan gikan sa seksyon 2 sa materyal sa pagpangandam.)

Ipakita ang mosunod nga dili kompleto nga pamahayag: Nakat-unan nato gikan sa Unang Panan-awon nga …

Ipasabut nga kita makakat-on og talagsaong mga kamatuoran gikan sa tanang mga istorya ni Joseph sa Unang Panan-awon. Pahinumdumi ang mga estudyante nga sila gidapit sa pag-andam alang niini nga klase pinaagi sa paghimo og lista sa mga kamatuoran nga ilang nakita gikan niini nga mga istorya sa Unang Panan-awon. Kon gikinahanglan, hatagi og panahon ang mga estudyante sa pagribyu unsay ilang gimarkahan ug sa mga kamatuoran nga ilang nakita. (Ikaw mahimong mohatag og panahon sa mga estudyante sa pagtuon sa mga istorya diha sa klase kon imong gitingob sa pagtudlo ang unang duha ka leksyon ug ang mga estudyante wala makaandam alang sa klase.)

Dapita ang mga estudyante sa pagpakigbahin sa pipila sa mga kamatuoran nga ilang nakita ug usab sa bersikulo, mga bersikulo, o porsyon sa istorya nga nagtudlo niadto nga mga kamatuoran. Isulat ang mga tubag sa estudyante ubos sa dili kompleto nga pamahayag nga bag-o lang nimong gipakita.

Pahinumdom: Pananglitan sa mga kamatuoran nga atong makat-unan gikan sa Unang Panan-awon ni Joseph Smith, tan-awa ang pakigpulong nga “Ang Unang Panan-awon: Yawe sa Kamatuoran” (Liahona, Hunyo 2017, 27–31) ni Elder Richard J. Maynes sa Seventy, nga gihimong pakisayran sa “Gusto pa ba Mo og Dugang?” nga seksyon sa materyal sa pagpangandam.

Samtang ang mga estudyante mopakigbahin sa mga kamatuoran nga ilang nakita, ikonsiderar ang pagpangutana nila sa usa o daghan pa niining mga follow-up nga pangutana:

• Ngano kaha nga kini nga kamatuoran importante nga mahibaloan ug masabtan?

• Sa unsang paagi nga ang pagkahibalo niana nga kamatuoran nakapanalangin ninyo?

• Unsay inyong nakat-unan mahitungod sa Langitnong Amahan ug ni Jesukristo gikan sa inyong natun-an mahitungod sa Unang Panan-awon?

Atong mapalawman ang atong pagpamatuod sa Unang Panan-awon.

Ipasabut nga daghang mga tawo sa komunidad ni Joseph ang misalikway sa iyang pagpamatuod sa unsay iyang nakita ug nadungog ug nga daghan ang migukod kaniya tungod niini (tan-awa sa Joseph Smith—Kasaysayan 1:21–23).

Dapita ang mga estudyante sa pagbasa sa Joseph Smith—Kasaysayan 1:24–25, nga mangita kon giunsa ni Propeta Joseph Smith pagtubag niadtong kinsa mibiay-biay sa iyang pagpamatuod sa panan-awon.

• Unsa nga mga pulong gikan sa pagpamatuod ni Joseph Smith ang labing importante kaninyo? Ngano?

• Sa unsa nga paagi nga ang ehemplo ni Joseph Smith makatabang ninyo kon kamo makasugat og pagbiay-biay o mga hagit sa inyong pagpamatuod sa Unang Panan-awon ug sa gipahiuli nga ebanghelyo ni Jesukristo?

Ipakita o ipanghatag ang mosunod nga pamahayag ni Presidente Gordon B. Hinckley, ug dapita ang usa ka estudyante sa pagbasa niini og kusog:

Sulod sa kapin sa usa ka siglo ug tunga, ang mga kaaway, mga kritiko, ug pipila nga mga eskolar migahin sa ilang kinabuhi nga naningkamot sa pagsupak sa pagkabalido niana nga panan-awon. Siyempre wala sila makasabut niini. Ang mga butang sa Dios masabtan pinaagi sa Espiritu sa Dios. Walay laing ikatandi sa gidak-on sukad ang Anak sa Dios nakalakaw sa yuta panahon sa pagkamortal. Kon wala kini isip pundasyon nga bato sa atong tinuhoan ug organisasyon, wala kitay bisan unsa. Uban niini, naa nato ang tanan.

Daghan na ang nahisulat, daghan pa ang isulat, sa paningkamot sa pagpasabut niini. … Apan ang pagpamatuod sa Balaan nga Espiritu, nga nasinati sa daghang dili maihap nga mga tawo sa milabayng katuigan sukad kini nahitabo, nagsaksi nga kini tinuod, nga kini nahitabo sama sa gisulti ni Joseph Smith nga kini nahitabo. (Gordon B. Hinckley, “Four Cornerstones of Faith,” Ensign, Peb. 2004, 5)

Awhaga ang mga estudyante kinsa magtinguha og mas lig-on nga pagpamatuod ni Joseph Smith ug sa Unang Panan-awon sa pagsunod sa ehemplo ni Joseph sa pagpangita sa kamatuoran pinaagi sa padayon nga pagtuon niini nga mga istorya ug mohangyo sa Dios sa pagkumpirmar sa katinuod sa Unang Panan-awon ngadto kanila pinaagi sa Espiritu Santo. Mahimo nimong tapuson ang klase pinaagi sa pagpakigbahin sa imong pagpamatuod mahitungod sa Unang Panan-awon ug sa Pagpahiuli sa ebanghelyo pinaagi ni Propeta Joseph Smith.

Alang sa Sunod nga Higayon

Hangyoa ang mga estudyante sa paghunahuna mahitungod sa ilang mahagitong mga pangutana o sa uban mahitungod sa mga pagtulun-an, mga praktis, o kasaysayan sa Simbahan. Ipasabut nga sa sunod nga klase, makakat-on sila unsay buhaton kon moabut ang lisud nga mga pangutana o mga isyu. Awhaga ang mga estudyante sa pagtuon sa materyal sa pagpangandam alang sa leksyon 3 aron sila moabut nga andam sa paghisgot sa mga baruganan nga makatabang nila nga makaangkon og mas dako nga espirituhanong kahibalo.