Leksyon 23 Materyal sa Magtutudlo

Ang Propetikanhong Misyon ug Pagkamartir ni Joseph Smith

Niadtong Hunyo 27, 1844, sila si Joseph ug Hyrum Smith gimartir didto sa Carthage, Illinois. Ang ilang kamatayon midugang og gamhanan nga silyo sa ilang mga pagpamatuod sa gipahiuli nga ebanghelyo ni Jesukristo (tan-awa sa Doktrina ug mga Pakigsaad 135:1, 3). Kini nga leksyon gihimo aron matabangan nga malig-on ang mga pagpamatuod sa mga estudyante bahin sa mapanagnaong misyon ni Joseph Smith.

Mga Sugyot alang sa Pagtudlo

PAGPALAMBO SA ATONG PAGTUDLO UG PAGKAT-ON

Gamit og mga himno. Ang sagrado nga musika, ilabi na ang mga himno sa Simbahan, makatabang sa mga estudyante nga mobati sa impluwensya samtang sila magtuon sa ebanghelyo. Aron makatabang sa paghatag og dugang nga mga ideya atol sa leksyon, mahimo ka nga mopili og himno nga kantahon sa pagsugod sa klase nga adunay kalabutan sa materyal sa leksyon.

Sila si Joseph ug Hyrum Smith gimartir didto sa Bilanggoan sa Carthage.

Ikonsiderar ang pagkanta sa pipila ka bersikulo (lakip sa bersikulo 7) sa himno “Ang Subo nga Magpapanaw.” Ipasabut nga kini nga himno ug ang mensahe niini mahitungod sa pagserbisyo sa Manluluwas mao ang paborito ni Joseph Smith. Ang Propeta mihangyo ni John Taylor nga kantahon kini diha sa Bilanggoan sa Carthage sa wala pa ang pag-ataki sa manggugubot nga panon.

Hangyoa ang mga estudyante sa pagpasabut unsay ilang nahibaloan mahitungod sa mga panghitabo nga misangpot sa pag-aresto ug pagkabilanggo nila ni Joseph ug Hyrum Smith didto sa Carthage, Illinois. (Awhaga ang mga estudyante sa pagdrowing unsay ilang nakat-unan gikan sa materyal sa pagpangandam.)

• Unsa kaha ang gipasabut sa mga pulong sa “Ang Subo nga Magpapanaw” sa pasalig ni Joseph ngadto sa Manluluwas? (Kon gikinahanglan, mahimo nimong hatagan ang mga estudyante og usa ka minuto sa pagribyu sa mga pulong sa himno samtang motubag sila niini nga pangutana.)

Ipasabut nga si Joseph nasayud nga siya nag-atubang og piho nga kamatayon kon siya moadto sa Carthage aron pagahusayon. Ang miyembro nga si Dan Jones, kinsa uban sa Propeta didto sa Nauvoo samtang siya nangandam sa pagbiyahe ngadto sa Carthage, nahinumdom:

Dili gayud nako makalimtan kadto nga talan-awon sa dihang [ang Propeta] nagbarug … ,ug mitan-aw libut kaniya, dayon diha sa siyudad ug sa mga lumulupyo niini kinsa bililhon kaayo kaniya, miingon siya, “Kon dili ako moadto [sa Carthage], ang resulta mao ang pagkagun-ob niining siyudad ug sa mga lumulupyo niini; ug dili ako makaako sa paghunahuna nga ang akong minahal nga mga kaigsoonan ug ang ilang mga anak mag-antus na usab sa sama nga kahimtang sa Missouri dinhi sa Nauvoo; dili, mas maayo nga ang inyong igsoon, si Joseph, mamatay alang sa iyang kaigsoonan, tungod kay ako andam nga mamatay alang kanila. Ang akong buhat nahuman na.” (Dan Jones, sa Ronald D. Dennis, trans., “The Martyrdom of Joseph Smith and His Brother, Hyrum,” BYU Studies, vol. 24, no. 1 [1984], 85)

• Unsa ang gipadayag sa mga pulong ug mga aksyon sa Propeta mahitungod sa iyang kinaiya?

Mahimo nimong itudlo nga si Joseph Smith misunod sa ehemplo sa Manluluwas sa gugma pinaagi sa iyang pagkaandam sa paghatag sa iyang kinabuhi sa pagpanalipod sa mga Santos (tan-awa sa Juan 15:13).

Ipakita ang imahe sa Bilanggoan sa Carthage. Dapita ang mga estudyante sa pag-istorya unsay ilang nahibaloan mahitungod sa mga panghitabo sa Bilanggoan sa Carthage niadtong Hunyo 27, 1844, sa dihang sila si Joseph ug Hyrum gipatay. (Awhaga ang mga estudyante sa paghinumdom unsay ilang nakat-unan gikan sa materyal sa pagpangandam.)

Ipasabut nga ang pahibalo sa kamatayon sa Propeta, nga karon gilakip sa Doktrina ug mga Pakigsaad 135, gikuha gikan sa mga istorya sa mga nakasaksi nila ni Elder John Taylor ug Willard Richards.

Basaha ang Doktrina ug mga Pakigsaad 135:1–2, 4–6 uban sa klase.

• Unsa ang inyong mga hunahuna ug mga pagbati samtang inyong ikonsiderar ang sakripisyo nga andam nga himoon nila ni Joseph ug Hyrum Smith alang sa ilang mga pagpamatuod sa gipahiuli nga ebanghelyo?

Dapita ang mga estudyante sa pagbasa sa katapusang duha ka mga sentence sa Doktrina ug mga Pakigsaad 135:3 (sugod sa “Siya nagpuyo nga bantugan …”) ug sa Doktrina ug mga Pakigsaad 136:39, nga mangita unsay atong makat-unan mahitungod sa kamatayon nila ni Joseph ug Hyrum.

• Unsa ang matudlo niini nga mga bersikulo kanato mahitungod sa kaimportante sa kamatayon nila ni Joseph ug Hyrum? (Ang mga estudyante mahimong mangita og kamatuoran nga susama sa mosunod: Sila si Joseph ug Hyrum Smith misilyo sa ilang mga pagpamatuod sa gipahiuli nga ebanghelyo pinaagi sa ilang dugo.)

Ipasabut nga kini nga buhat sa pagsilyo sa ilang mga pagpamatuod pinaagi sa ilang dugo permanenting nakaestablisar sa ilang mga pagpamatuod ug sa ilang balaan nga mga misyon kalabut sa Pagpahiuli sa ebanghelyo.

Dapita ang mga estudyante sa paghunahuna mahitungod sa walay pagduha-duha nga pasalig nila ni Joseph ug Hyrum nga makita diha sa ilang mga pagpamatuod sa gipahiuli nga ebanghelyo bisan atubangan sa kamatayon.

• Sa unsa nga paagi nga ang pagkaandam ni Joseph Smith sa paghatag sa iyang kinabuhi alang sa gipahiuli nga ebanghelyo makapalig-on sa inyong pagpamatuod kaniya isip ang Propeta sa Ginoo?

Balaan nga mga panalangin giandam ngadto sa mga anak sa Langitnong Amahan pinaagi sa mapanagnaong pangalagad ni Joseph Smith.

Dapita ang mga estudyante sa pagbasa sa unang sentence sa Doktrina ug mga Pakigsaad 135:3, nga nagtudlo nga si Joseph Smith nakahimo og daghan pa alang sa kaluwasan sa katawhan niini nga kalibutan kay ni bisan kinsa nga laing mga tawo gawas ni Jesukristo. (Mahimo nimong awhagon ang mga estudyante sa pagmarka niini nga kamatuoran sa ilang mga kasulatan.)

Ikonsiderar ang paghangyo sa mga estudyante sa pagpakigbahin unsaon nila sa pagpasabut niini nga kamatuoran ngadto sa usa ka higala sa laing Kristiyano nga tinuohan.

Dapita ang mga estudyante sa pagbasa sa nahibilin sa Doktrina ug mga Pakigsaad 135:3, nga mangita sa mga kontribusyon nga nahimo ni Propeta Joseph Smith sa pagtabang sa mga anak sa Langitnong Amahan nga makaangkon og kaluwasan. Ipareport sa mga estudyante kon unsay ilang nakit-an. Mahimo nimong ilista ang ilang mga tubag diha sa pisara.

• Unsa pa ang inyong idugang sa lista sa mga kontribusyon nga nahimo ni Propeta Joseph Smith alang sa kaluwasan sa kalibutan?

Dapita ang mga estudyante sa pagpili og usa sa mosunod nga mga pangutana nga tubagon. Hatagi ang mga estudyante og panahon sa pagrekord sa ilang mga hunahuna.

• Unsa nga mga kasinatian ang inyong nasinati nga nakatabang kaninyo nga makaangkon og pagpamatuod ni Propeta Joseph Smith?

• Sa unsa nga paagi nga ang inyong kinabuhi naimpluwensyahan ug napanalanginan tungod kay si Joseph Smith mituman sa iyang mapanagnaon nga misyon?

Human sa igong panahon, dapita ang pipila ka mga estudyante sa pagpakigbahin diha sa klase kon unsa ang ilang nasulat. Tapusa pinaagi sa pagpakigbahin sa imong pagpamatuod kabahin ni Propeta Joseph Smith.

Alang sa Sunod nga Higayon

Hangyoa ang mga estudyante sa paghunahuna kon sama sa unsa kaha nga tawagon sa paggiya sa Simbahan nga gamay ra og kasinatian ug daghan og mga kahuyang. Dapita sila sa pagpamalandong kon sila aduna bay hugot nga pagtuo o wala ug pagsalig nga ang Ginoo motabang kanila sa mao nga tawag. Awhaga ang mga estudyante sa pagtuon sa materyal sa pagpangandam alang sa sunod nga leksyon uban niini nga pangutana diha sa hunahuna.