Leksyon 14 Materyal sa Magtutudlo

Ang Ginoo Mipadayag og Dugang nga Kasulatan

Sama sa nanglabay nga mga dispensasyon, nagpadayon ang Ginoo sa pagpadayag og dugang nga kasulatan pinaagi sa Iyang buhi nga mga propeta. Kini nga leksyon naghatag sa mga estudyante og oportunidad sa pagpakigbahin kon giunsa sa kasulatan sa ulahing mga adlaw sa pagpahiuli ug pagtabang sa pagpatin-aw sa mga kamatuoran sa ebanghelyo. Ang mga estudyante mahimo usab nga mas maandam sa pagtubag sa mga pangutana kalabut sa basahon ni Abraham.

Mga Sugyot alang sa Pagtudlo

Ang Ginoo mipadayag og dugang nga kasulatan pinaagi ni Propeta Joseph Smith.

Dapita ang mga estudyante sa paghunahuna nga ang usa ka higala sinsero nga nangutana, “Ngano nga ang inyong simbahan adunay mas daghang mga kasulatan kay sa Biblia? Kaingon nako og ang Biblia naglangkub sa tanang pulong sa Dios.” Hangyoa ang mga estudyante sa pag-isa sa ilang mga kamot kon sila gipangutana ba og susama niini. Dapita ang pipila ka mga estudyante sa pagpakigbahin kon giunsa nila pagtubag (o unsaon nila sa pagtubag).

Ipasabut nga ang Basahon ni Mormon naglangkub og usa ka rekord nga gisulat ni Nephi kabahin sa usa ka panan-awon diin iyang nakita ang mga pulong sa Biblia nga gisangyaw ngadto sa kalibutan. Nakita usab niya nga daghang “yano” ug “bililhon” (1 Nephi 13:26) nga mga bahin sa ebanghelyo sa Manluluwas ang gikuha gikan sa Biblia (tan-awa sa 1 Nephi 13:24–26).

Basaha ang 1 Nephi 13:38–41 isip usa ka klase, mangita alang sa unsa nga mga rekord ang nakita ni Nephi nga maanaa sa mga katawhan sa ulahing mga adlaw. Mahimo kang mohunong og makadiyot human sa matag bersikulo ug hangyoa ang mga estudyante sa pagpasabut kon unsa nga mga rekord ang gipasabut ni Nephi. Sama pananglit, ang “lain nga mga basahon” nga gipasabut sa bersikulo 39 naglakip sa Basahon ni Mormon, Doktrina ug mga Pakigsaad, Perlas nga labing Bililhon, ug Hubad ni Joseph Smith sa Biblia.

• Sumala sa mga bersikulo 40 ug 41, unsa ang mga katuyoan niining dugang nga mga kasulatan nga gipadayag pinaagi ni Joseph Smith? Gamit ang mga tubag sa mga estudyante, pag-ila og usa ka kamatuoran sama, sa mosunod: Pinaagi ni Joseph Smith, mipadayag ang Ginoo og dugang nga kasulatan nga nagmatuod sa mga kamatuoran sa Biblia, nagpahiuli sa yano ug bililhong mga kamatuoran, ug nagtabang sa pagdala sa mga katawhan ngadto ni Jesukristo.)

Aron matabangan ang mga estudyante sa paglig-on sa panabut kabahin niini nga kamatuoran, hunahunaa ang paggamit sa mosunod nga pipila ka mga ideya sa pagtudlo aron mapahigayon ang pagpakigbahin ug paghisgot sa estudyante.

Ang Doktrina ug mga Pakigsaad

Pahinumdumi ang mga estudyante nga diha sa miting sa 1831, mihukom si Joseph Smith ug ang daghang mga elder sa pagmantala sa mga pinadayag nga nadawat niana nga panahon. Atol sa miting, mipadayag ang Ginoo sa Iyang kaugalingong pasiuna sa Basahon sa mga Sugo (karon ang Doktrina ug mga Pakigsaad) pinaagi ni Joseph Smith. Kini nga pasiuna mao ang Doktrina ug mga Pakigsaad 1.

Hatagi ang mga estudyante og minuto sa pagribyu sa Doktrina ug mga Pakigsaad 1:17, 21–23, 37 gikan sa materyal sa pagpangandam. Dapita sila sa pagpangita alang sa unsay gitudlo sa Ginoo mahitungod sa mga pagpadayag (nagpasabut ngadto sa “mga sugo” diha sa teksto). Dapita ang mga estudyante sa pagpakigbahin sa unsay ilang nakaplagan.

Sa seksyon 2 sa materyal sa pagpangandam, gihangyo ang mga estudyante sa pagpangita og usa ka tudling sa kasulatan gikan sa Doktrina ug mga Pakigsaad nga nakapalig-on sa ilang pagtuo diha ni Jesukristo. Hatagi og panahon ang mga estudyante sa pagpakigbahin sa ilang mga tudling ngadto sa usag usa. Mahimo nimong buhaton kini nga kalihokan sa gagmay nga mga grupo o isip usa ka klase. Makahimo usab sila sa pagpakigbahin sa ilang mga tubag sa mosunod nga pangutana ngadto sa usag usa:

• Sa unsang mga paagi nga kini nga mga tudling nagmatuod sa kamatuoran sa Biblia, nagpahiuli sa yano ug bililhon nga mga kamatuoran, o nagdala kanato nga mas maduol ngadto ni Jesukristo?

Ang Hubad ni Joseph Smith sa Biblia ug ang Perlas nga Labing Bililhon

Dapita ang usa ka estudyante sa pagbasa og kusog sa pahayag ni Joseph Smith mahitungod sa Biblia nga makita sa seksyon 3 sa materyal sa pagpangandam. Ipasabut nga pinaagi sa hubad ni Joseph Smith sa Biblia gipahiuli sa Ginoo ang daghan nga yano ug bililhong mga kamatuoran nga nawala.

Isip bahin sa ilang pagpangandam sa klase, nagtuon ang mga estudyante og mga pagpasabut kon unsa ang mga Hubad ni Joseph Smith ug ang Perlas nga Labing Bililhon. Hangyoa ang pipila ka mga estudyante sa pag-summarize unsay ilang nakat-unan mahitungod sa matag basahon.

Kon gikinahanglan, pahinumdumi ang mga estudyante nga ang mga porsyon sa Hubad ni Joseph Smith gilakip diha sa Perlas nga Labing Bililhon isip ang mga basahon ni Moises ug Joseph Smith––Mateo. Ang ubang dinasig nga mga pag-usab makaplagan diha sa mga footnote ug appendix sa pipila ka mga edisyon sa Biblia, diha sa Giya ngadto sa mga Kasulatan, ug sa scriptures.ChurchofJesusChrist.org. Hunahunaa ang paghangyo sa mga estudyante sa pag-abli ngadto sa bisan unsa nga kapanguhaan nga anaa diha kanila aron sa pagsiguro nga sila pamilyar kon unsaon pagkuha niini nga mga kasulatan.

Ipakita ang lista sa mga tudling sa kasulatan gikan sa mga basahon ni Moises ug Abraham ug ang Hubad ni Joseph Smith nga makaplagan sa seksyon 3 sa materyal sa pagpangandam. Hangyoa ang mga estudyante sa pagribyu og daklit sa mga tudling sa kasulatan nga kaugalingon nilang gipili o gikan sa lista.

Human nimong gihatagan sila og usa ka minuto sa pagribyu, dapita ang mga estudyante sa pagpakigbahin ngadto sa usa ka pares unsa nga yano ug bililhong mga kamatuoran gitudlo niini nga mga kasulatan o giunsa sa paglig-on ang ilang kahibalo kabahin ni Jesukristo ug sa Iyang ebanghelyo. Mahimo usab ka nga makigbahin ngadto sa klase sa imong pagpamatuod sa kasulatan sa ulahing mga adlaw ug ang epekto niini sa imong kinabuhi.

Makalihok kita uban sa hugot nga pagtuo samtang nagtubag kita sa mga pangutana mahitungod sa hubad sa basahon ni Abraham.

PAGPALAMBO SA ATONG PAGTUDLO UG PAGKAT-ON

Lig-una ang pagtuo samtang nagtudlo sa kasaysayan sa Simbahan. Sa panahon nga magtudlo ka sa kasaysayan sa Simbahan, buhata ang mao sa paagi nga mapalig-on ang pagtuo sa mga estudyante nga si Jesukristo mipahiuli sa Iyang Simbahan nganhi sa yuta sa katapusang mga adlaw. Tabangi ang mga estudyante nga makakita kon sa unsa nga paagi nga si Joseph Smith matinud-anong mituman sa iyang misyon isip propeta sa Pagpahiuli. Gamit og balaang gitudlo nga mga kapanguhaan (sama sa mga kasulatan ug mga pulong sa mga propeta), ang gihatag nga mga materyal sa kurso, ug ang ubang kasaligan nga mga kapanguhaan aron matabangan ang mga estudyante nga makakita sa nagpadayong kauswagan sa Pagpahiuli gikan sa baruganan sa hugot nga pagtuo.

Ipakita ang mosunod nga imahe, ug ipasabut nga kini usa ka tipik sa Ehiptohanong papyri nga kaniadto aduna si Joseph Smith.

Dapita ang mga estudyante sa pagpasabut unsay ilang nahibaloan mahitungod sa pag-angkon ug kasaysayan sa papyri (tan-awa sa seksyon 3 ug 4 sa materyal sa pagpangandam).

• Unsa nga mga pangutana ang miabut gikan sa pagtuon sa nahibiling mga tipik sa papyri? (Dapita ang mga estudyante sa paghinumdom unsay ilang nakat-unan gikan sa seksyon 4 sa materyal sa pagpangandam.)

• Unsa ang imong ipakigbahin ngadto sa usa ka tawo kinsa adunay kinatibuk-ang mga kabalaka mahitungod sa hubad sa basahon ni Abraham?

Samtang nagtubag ang mga estudyante sa nag-una nga pangutana, mahimong mogamit ka og usa o sobra pa sa mosunod nga mga pangutana sa ubos aron sa pagpadayon sa panaghisgutan. Isip bahin sa panaghisgutan, paghatag og oportunidad alang sa mga estudyante sa paghunahuna unsay ilang nabasa diha sa materyal sa pagpangandam ug sa pagpangutana bisan unsa nga sila aduna mahitungod sa basahon ni Abraham.

• Unsa ang imong buhaton kon ikaw dili makakaplag og piho nga mga tubag sa ebanghelyo nga mga pangutana, sama niadtong mahitungod sa basahon ni Abraham?

• Unsa ang pipila ka mga ebidensya nga nadiskubrehan sukad sa pagmantala sa basahon ni Abraham nga nagsuporta sa katinuod niini? (Tan-awa sa “The Book of Abraham and the Ancient World” sa section 4 diha sa materyal sa pagpangandam.)

• Unsa ang imong isugyot ngadto sa usa ka tawo isip ang labing kasaligan nga paagi sa paghukom sa katinuod sa basahon ni Abraham? Ngano?

Taposa pinaagi sa paghatag sa mga estudyante og oportunidad sa pagpakigbahin sa ilang paboritong mga tudling sa kasulatan gikan sa basahon ni Abraham ug sa pagpamatuod kabahin niana nga basahon ug sa ubang kasulatan sa Pagpahiuli.

Alang sa Sunod nga Higayon

Hangyoa ang mga estudyante sa paghunahuna kon unsaon nga mohilig sila ngadto sa paghunahuna mahitungod sa ilang mga kaugalingon. Dapita usab sila sa paghunahuna sa ilang potensyal nga impluwensya dinhi niini nga kinabuhi ug sa mga kahangturan. Awhaga ang mga estudyante sa pag-anha sa sunod nga higayon nga andam sa paghisgot sa gipahiuli nga mga kamatuoran mahitungod sa plano sa Dios alang kanila ug sa ilang mga umaabut.