Leksyon 18 Materyal sa Magtutudlo

Kababayen-an nga mga Santos sa Ulahing mga Adlaw ug ang Relief Society

Ang Relief Society mao ang usa sa labing dugay ug, dunay sobra sa 7.1 ka milyon ka mga sakop, usa sa labing dako nga mga organisasyon sa mga kababayen-an sa kalibutan. Ang Relief Society usa ka mahinungdanong bahin sa gipahiuli nga Simbahan ni Jesukristo. Kini nga leksyon makatabang sa mga estudyante nga makahimo sa pagpakigbahin kon sa unsang paagi nga ang talagsaong mga abilidad ug mga kontribusyon sa kababayen-an nga Santos sa Ulahing mga Adlaw importante sa buhat sa Ginoo. Ang mga estudyante motino usab kon unsaon nila nga mas hingpit nga makaapil o makasuporta sa Relief Society sa pagtuman sa mga katuyoan niini.

Mga Sugyot alang sa Pagtudlo

Ang kababayen-an nga nagtuman sa pakigsaad makahimo og talagsaon ug importante nga kontribusyon sa pagtukod sa gingharian sa Dios.

Ipakita ang usa ka litrato o ihulagway ang usa ka matarung nga babaye sa imong kinabuhi. Ipakigbahin og kadali diha sa klase unsa ang nakapahimo niya nga maayong ehemplo nga babaye ug sa unsa nga paagi siya nakasalmot sa pagtukod sa gingharian sa Dios.

Dapita ang mga estudyante sa pagpakigbahin sa ilang mga hunahuna mahitungod sa usa ka matarung nga babaye nga ilang nailhan ug sa unsa nga paagi nga siya usa ka impluwensya alang sa kaayohan sa pagtukod sa gingharian sa Dios. (Mao kini ang butang nga gidapit nga pamalandungan sa mga estudyante sa materyal sa pagpangandam.)

Ipakita ang mosunod nga pamahayag ni Presidente Russell M. Nelson. Dapita ang usa ka estudyante sa pagbasa niini og kusog ug hangyoa ang klase sa pagsunod ug sa pagpangita unsa ang gitudlo ni Presidente Nelson mahitungod sa matarung nga kababayen-an sa Simbahan.

Minahal kong mga sister, kamo … maoy among mahinungdanong mga kauban niining katapusang mga adlaw. … Ang inyong hiyas, kahayag, gugma, kahibalo, kaisug, kinaiya, hugot nga pagtuo, ug matarung nga kinabuhi mopaduol sa maayo nga mga babaye sa kalibutan, uban sa ilang mga banay, ngadto sa Simbahan sa dili ordinaryong gidaghanon!

Kami, ang inyong mga kaigsoonan, nagkinahanglan sa inyong kalig-on, sa inyong pagkakabig, sa inyong konbiksyon, sa inyong abilidad sa pagpangulo, sa inyong kaalam, ug sa inyong mga tingog. Ang gingharian sa Dios dili kompleto ug dili mahimong makompleto kon wala ang mga babaye kinsa naghimo og sagradong mga pakigsaad ug dayon sundon kini, mga babaye nga makasulti uban sa gahum ug awtoridad sa Dios! (Russell M. Nelson, “Usa ka Hangyo ngadto sa Akong mga Sister,” Liahona, Nob. 2015, 96)

• Unsa ang labing importante kaninyo niini nga pamahayag?

• Unsaon ninyo sa pag-summarize ang kamatuoran nga atong nakat-unan gikan sa mga pagtulun-an ni Presidente Nelson mahitungod sa kabayen-an nga nagtuman sa pakigsaad diha sa Simbahan? (Gamit ang mga pulong sa mga estudyante, isulat sa pisara o ipakita ang kamatuoran nga susama sa mosunod: Ang mga hiyas, pagkapangulo, ug mga tingog sa kabayen-an nga nagtuman sa pakigsaad importante sa pagtukod sa gingharian sa Dios.)

• Ngano kaha nga ang gingharian sa Dios “dili mahimong kompleto” kon wala ang mga tingog ug mga kontribusyon sa kabayen-an nga nagtuman sa pakigsaad?

Ipasabut nga sumala sa narekord sa Doktrina ug mga Pakigsaad 25, ang Ginoo mitawag ni Emma Smith sa paggamit sa iyang tingog, mga talento, ug mga abilidad sa pagtabang sa pagtukod sa Iyang gingharian. Dapita ang mga estudyante sa pagribyu sa Doktrina ug mga Pakigsaad 25:5–7, 10–16, nga ilang gitun-an sa seksyon 1 sa materyal sa pagpangandam, ug hangyoa sila sa pag-ila sa tambag ug mga responsibilidad nga gihatag sa Ginoo ngadto ni Emma.

Hangyoa ang mga estudyante sa pagpaambit kon unsay labing importante ngadto kanila gikan niini nga mga bersikulo ug ngano. Hatagi ang mga estudyante og usa ka minuto sa pagkonsiderar unsa nga mga punto sa tambag nga gusto sa Ginoo nga ilang dawaton ug sundon sa hingpit.

Ang Ginoo miorganisar sa Relief Society pinaagi ni Propeta Joseph Smith.

Ipakita ang imahe sa Red Brick Store ni Joseph Smith sa Nauvoo, Illinois, ug ipasabut nga dinhi ang Relief Society naorganisar niadtong Marso 1842.

Hangyoa ang mga estudyante sa pag-istorya gikan sa seksyon 2 sa materyal sa pagpangandam (o pagdapit og usa ka estudyante sa sinugdanan sa klase sa pag-andam sa pagbuhat niini) sa mga sirkumstansya nga misangpot sa pagkatukod sa Relief Society.

• Sigun sa gisulti ni Joseph Smith sa unsa nga sundanan naorganisar ang Relief Society? (Ang Relief Society naorganisar sunod sa sundanan sa pagkapari.)

• Unsa ang gipasabut nga ang Relief Society naorganisar sunod sa sundanan sa pagkapari? Ngano nga importante alang kanato nga makahibalo? (Kon gikinahanglan, dapita ang mga estudyante sa paghinumdom unsay ilang nakat-unan sa seksyon 2 sa materyal sa pagpangandam.)

• Unsaon ninyo sa pag-summarize ang mga katuyoan sa Relief Society? (Mahimo nimong dapiton ang mga estudyante sa pagribyu sa mga pamahayag ni Sister Zina D. H. Young ug Sister Julie B. Beck sa seksyon 3 sa materyal sa pagpangandam aron matabangan sila nga makakita sa kamatuoran susama sa mosunod: Ang Relief Society naorganisar sa paghatag og kahupayan ngadto sa kabus ug sa pagtabang sa pagluwas og mga kalag.)

• Unsa ang imong nakita nga mga paagi sa kababayen-an sa Relief Society nga matuman kini nga mga katuyoan? (Mahimo usab nga ikaw mopakigbahin og makahuluganon nga ehemplo o imong kaugalingon nga kasinatian.)

Paghatag og panahon alang sa duha ka sister diha sa klase sa pagpakigbahin sa ilang mga pagbati mahitungod sa mga panalangin sa Relief Society.

Hangyoa ang pipila ka estudyante sa pagpakigbahin sa ilang mga tubag sa mosunod nga pangutana diin sila gidapit nga ilang pamalandungan diha sa materyal sa pagpangandam:

• Unsa ang mabuhat sa kababayen-an ug kalalakin-an aron mobati sila og kahinam sa panan-awon sa Relief Society ug magtambayayong sa pagtabang aron matuman ang mga katuyoan niini?

Ipakita ang mosunod nga mga pangutana, ug dapita ang mga estudyante sa paghunahuna sa mainampoong paagi ug dayon sa pagsulat og tumong diha sa ilang journal o notebook:

• Mga sister, unsaon ninyo nga hingpit nga makaapil sa pagtuman sa mga katuyoan sa Relief Society pinaagi sa inyong mga abilidad, hugot nga pagtuo, tingog, ug pagpangulo?

• Mga igsoong lalaki, unsay inyong buhaton aron mas makasuporta, makaawhag, ug makatambayayong sa kababayen-an sa pagtukod sa gingharian sa Dios?

Kon itugot sa panahon, ikonsiderar ang pagdapit sa pipila ka estudyante sa pagpakigbahin unsay ilang gisulat.

PAGPALAMBO SA ATONG PAGTUDLO UG PAGKAT-ON

Pagpahiangay sa mga sugyot sa pagtudlo. Mahimo kang mopili nga gamiton ang tanan o pipila sa mga sugyot sa pagtudlo diha sa matag leksyon, ug mahimo nimong ipahiangay ang mga sugyot sumala sa giya sa Espiritu ug sa mga panginahanglan ug sa mga kahimtang sa mga estudyante. Kon mopahiangay sa mga sugyot sa pagtudlo o mopuli niini og kaugalingon nimong mga ideya, ikonsiderar ang gitinguha nga mga resulta sa pagkat-on sa estudyante, ug pagpili og alternatibong ideya sa pagtudlo aron makab-ot ang gitinguha nga resulta.

Sa pagtapos sa leksyon, ikonsiderar ang paghimo sa usa o daghan sa mosunod:

1. Pangutan-a ang mga estudyante unsaon nila sa pagtubag sa usa ka tawo kinsa nangangkon nga ang kababayen-an wala isipa nga importante ug wala hatagi og importanting mga responsibilidad diha sa Ang Simbahan ni Jesukristo sa mga Santos sa Ulahing mga Adlaw.

2. Ipamatuod ang mga kamatuoran nga nakita niini nga leksyon.

3. Dapita ang usa ka estudyante sa pagbasa sa mosunod nga pamahayag gikan ni Presidente Russell M. Nelson:

Ang nakabig nga mga babaye nga nagtuman sa pakigsaad … kansang matarung nga kinabuhi mao angmopatigbabaw sa nagkabati nga kalibutan ug sa ingon makita nga buwag ug lahi diha sa labing malipayon nga mga paagi.

… Naghangyo ko sa akong mga sister sa Ang Simbahan ni Jesukristo sa mga Santos sa Ulahing mga Adlaw sa pag-abante! Angkuna ang inyong tukma ug importanteng dapit diha sa inyong panimalay, diha sa inyong komunidad, ug diha sa gingharian sa Dios—labaw pa kay sa inyong nabuhat sukad. (Russell M. Nelson, “Usa ka Hangyo ngadto sa Akong mga Sister,” Liahona, Nob. 2015, 97)

Alang sa Sunod nga Higayon

Ipasabut ngadto sa mga estudyante nga sa sunod higayon nga sila magkita, tutukan nila ang usa ka aspeto sa gipahiuli nga ebanghelyo nga gipasabut ni Propeta Joseph Smith nga usa sa labing dako nga mga responsibilidad niini nga kalibutan nga gihatag sa Dios ngadto sa mga Santos sa Ulahing mga Adlaw (tan-awa sa Mga Pagtulun-an sa mga Presidente sa Simbahan: Joseph Smith [2007], 575). Dapita ang mga estudyante nga tun-an pag-ayo ang materyal sa pagpangandam alang sa leksyon 19 ug moanha nga andam nga mohisgot sa talagsaong mapanagnaong mga saad nga gihimo niadtong kinsa motabang nga matuman ang buhat sa templo alang sa mga patay.