Leksyon 4 Materyal sa Magtutudlo

Ang Doktrina sa Pagpadayag

Ang Ginoo mipadayag sa importante nga mga kamatuoran mahitungod sa doktrina sa pagpadayag ngadto ni Joseph Smith ug sa uban sa unang mga adlaw sa Pagpahiuli. Kini nga leksyon gihimo aron matabangan ang mga estudyante nga madugangan ang ilang abilidad sa pagdawat og pagpadayag ug mas makahibalo kon ang Espiritu Santo makigsulti kanila.

Mga Sugyot alang sa Pagtudlo

Ang Ginoo mipadayag og mga baruganan sa pagpadayag ngadto nila ni Joseph Smith ug Oliver Cowdery.

PAGPALAMBO SA ATONG PAGTUDLO UG PAGKAT-ON

Mag-ugmad og kahimtang sa pagkat-on uban sa gugma, pagtahud, ug katuyoan. Kon mahibalo ang mga estudyante nga sila gihigugma ug gitahud sa ilang magtutudlo ug sa ubang mga estudyante, mas ganahan silang motambong sa klase nga andam sa pagkat-on. Ang gibati sa mga estudyante nga sila gidawat sa usag usa makapahumok sa ilang mga kasingkasing, makapakunhod sa kahadlok, ug makadapit sa pagpakigbahin sa mga kasinatian ug mga pagbati uban sa klase.

Ipakita ang mosunod nga pangutana: Unsa ang sitwasyon, desisyon, o pangutana karon nga gusto kamong mahatagan og giya ug pagpadayag gikan sa inyong Langitnong Amahan?

Dapita ang mga estudyante sa paghunahuna mahitungod sa pangutana ug sa pagsulat sa ilang mga hunahuna. Human sa igong panahon, hangyoa ang pipila ka mga estudyante sa pagpakigbahin unsay ilang gisulat uban sa klase kon kini dili kaayo personal.

Aron matabangan ang mga estudyante nga makasabut sa kaimportante niini nga leksyon sa ilang kinabuhi, ipasabut ang gitinguhang mga sangputanan nga gihulagway sa pasiuna niini nga leksyon.

Ipakita ang mosunod nga imahe, ug pangutana:

• Unsa nga mga sirkumstansya ang migiya ni Oliver Cowdery sa pagtabang ni Joseph Smith sa paghubad sa Basahon ni Mormon? (Dapita ang mga estudyante sa paggamit unsay ilang nakat-unan gikan sa seksyon 1 sa ilang materyal sa pagpangandam kon gikinahanglan.)

• Sa unsa nga paagi nga ang pagpadayag nakaimpluwensya sa desisyon ni Oliver sa pagtabang ni Joseph?

Pahinumdumi ang mga estudyante nga agig tubag sa tinguha ni Oliver nga motabang sa paghubad sa Basahon ni Mormon, ang Ginoo mitudlo kaniya mahitungod sa pagdawat og pagpadayag. Dapita ang usa ka estudyante sa pagbasa og kusog sa Doktrina ug mga Pakigsaad 8:1–3. Hangyoa ang klase sa pagsunod, mangita sa mga kamatuoran nga kinahanglan nga masabtan ni Oliver aron makadawat og pagpadayag sa paghubad.

PAGPALAMBO SA ATONG PAGTUDLO UG PAGKAT-ON

Pag-ila sa mga baruganan ug doktrina. Ang mga baruganan ug doktrina nga klarong giila makatabang sa mga estudyante nga makakita sa kamatuoran sa paagi nga yano ug importante. Kon posible, awhaga ang mga estudyante sa pagdiskobre ug pagpakigbahin sa mga baruganan ug doktrina gikan sa unsay ilang gitun-an. Ang pagsulat ug pagpakita sa mga baruganan, o pagpasulat og mubo nga pahinumdom sa mga estudyante sa mga kamatuoran diha sa ilang mga kasulatan, makatabang sa mga estudyante sa pagpamalandong niini pag-ayo ug pagdawat og pagpadayag kon unsaon nila kini paggamit.

• Unsa nga mga kamatuoran ang atong makat-unan gikan niini nga mga bersikulo mahitungod sa pagtinguha ug pagdawat og pagpadayag? (Ang mga estudyante mahimong moila sa pipila ka kamatuoran, lakip sa mosunod: Ang Ginoo mamulong sa atong mga hunahuna ug mga kasingkasing pinaagi sa gahum sa Espiritu Santo.)

• Base sa inyong personal nga pagtuon ug kasinatian, unsa ang pipila ka paagi nga ang Ginoo mamulong sa atong mga hunahuna? sa atong mga kasingkasing? (Ilista sa pisara ang mga tubag sa mga estudyante. Kon gikinahanglan, dapita ang mga estudyante sa pagribyu sa mga tudling sa kasulatan ug komentaryo nga ilang gitun-an sa seksyon 1 sa materyal sa pagpangandam.)

• Ngano kaha ang Ginoo mipili sa pagpakigsulti kanato sa atong mga hunahuna ug sa atong mga kasingkasing? (Awhaga ang mga estudyante sa paggamit sa unsay ilang nakat-unan ug gipamalandongan atol sa ilang personal nga pagtuon ug pagpangandam.)

Ipasabut nga sa dihang si Oliver misulay sa paghubad, naglisud siya sa pagdawat sa pagpadayag nga iyang gikinahanglan aron mopadayon. Sila si Joseph ug Oliver nangutana sa Ginoo ngano nga si Oliver naglisud. Dapita ang mga estudyante sa pagbasa og hilum sa Doktrina ug mga Pakigsaad 9:7–9, nga mangita sa sundanan nga gitudlo sa Ginoo ni Oliver mahitungod kon unsaon sa pagdawat og pagpadayag.

• Unsa nga sundanan ang gipadayag sa Ginoo ngadto ni Oliver nga makatabang nato sa pagdawat ug pag-ila og pagpadayag? (Ang pagpadayag sa kasagaran moabut human magtuon sa mga pangutana ug sa mga butang diha sa atong hunahuna, sa pagkab-ot og hukom, ug dayon pagpangutana sa Dios kon ang atong hukom sakto ba.)

Ipasabut nga si Presidente Dallin H. Oaks sa Unang Kapangulohan miingon nga ang usa ka “kainit sa dughan” nagpaila og “usa ka pagbati sa kahupay ug kalinaw” (“Teaching and Learning by the Spirit,” Ensign, Mar. 1997, 13).

Dapita ang mga estudyante sa pagpakigbahin sa ilang mga hunahuna mahitungod sa mosunod nga mga pangutana ug imbitasyon gikan sa ilang materyal sa pagpangandam:

• Ngano kaha nga ang Ginoo nagdahom nga tun-an nato ang mga butang sa atong hunahuna isip kabahin sa pagtinguha og pagpadayag?

• Unsa ang gitudlo sa usa ka higala o sakop sa pamilya kaninyo mahitungod sa pagdapit ug pagdawat og pagpadayag? Unsay inyong nakat-unan gikan sa inyong kaugalingong mga kasinatian mahitungod sa pagdapit ug pagdawat og pagpadayag?

Pahinumdom: Ang mosunod nga kalihokan gitumong sa paghatag sa mga estudyante og igong panahon sa pagkonsiderar unsa ang ilang nakat-unan ug sa paggamit niini. I-adjust ang leskyon kon gikinahanglan aron sa paghatag sa mga estudyante og daghang panahon sa pagpamalandong, pagsulat, pagbasa, o pag-ampo.

Dapita ang mga estudyante sa pagpamalandong ug pagsulat sulod sa pipila ka minuto mahitungod sa unsay ilang nakat-unan kabahin sa pagpadayag ug unsay kalabutan niini sa mga hunahuna nga ilang gisulat sa sinugdanan sa klase. O sila makaampo sa hilom alang sa giya sa unsay ilang gisulat. Mahimo nimong ipakita ang mosunod nga pahayag ni Presidente Russell M. Nelson ug dapita ang mga estudyante sa pagbasa niini sa hilom, mangita og dugang nga mga paagi nga sila makadapit og pagpadayag.

Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, ang mga tinguha sa inyong kasingkasing. Ug dayon maminaw! Isulat ang mga ideya nga mosulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balik-balikon kini nga proseso matag adlaw, matag bulan, matag tuig, kamo “molambo ngadto sa baruganan sa pagpadayag” (Mga Pagtulun-an sa mga Presidente sa Simbahan: Joseph Smith [2007], 155). …

Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag. …

Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

Ang Pagpahiuli sa ebanghelyo naglakip sa sundanan sa pagdawat og pagpadayag.

Itudlo nga ang mga baruganan sa pagpadayag nga nakat-unan nila ni Joseph Smith ug Oliver Cowdery gipadayag ngadto nila sumala sa mga sirkumstansya nga miabut ug sa ilang mga pangutana. Kini naghulagway og importante nga kamatuoran nga gitudlo sa Ginoo sa daghang mga pagpadayag.

Dapita ang tulo ka mga estudyante nga magpuli-puli sa pagbasa og kusog sa Doktrina ug mga Pakigsaad 42:61; 50:24; 98:12. Hangyoa ang klase sa pagsunod, nga mangita sa unsa ang gitudlo niini nga mga tudling mahitungod kon sa unsa nga paagi ipadayag sa Ginoo ang Iyang kamatuoran ug kabubut-on kanato.

• Unsaon ninyo sa pag-summarize ang kamatuoran nga gitudlo niini nga mga bersikulo mahitungod sa pagdawat og pagpadayag gikan sa Ginoo? (Gamit ang mga pulong sa mga estudyante, ipakita o isulat ang kamatuoran diha sa pisara nga susama sa mosunod: Ang Ginoo mopadayag sa kamatuoran ngari nato “pagtulun-an human sa laing pagtulun-an, lagda human sa laing lagda.”)

Pahinumdumi ang mga estudyante nga sa seksyon 3 sa materyal sa pagpangandam, sila nakat-on mahitungod sa mga sundanan sa pagdawat og pagpadayag gikan ni Elder David A. Bednar sa Korum sa Napulog Duha ka mga Apostoles. Dapita ang mga estudyante sa pagpakigbahin unsa ang importante ngadto kanila gikan sa iyang mga pagtulun-an. Mahimo kang mangutana kanila kon sa unsa nga paagi nga ang iyang mga sambingay kalabut sa pagpadayag makatabang nato nga mas makasabut sa kamatuoran nga gipakita o gisulat diha sa pisara.

• Sa unsa nga paagi nga ang pagsabut niini nga kamatuoran makatabang sa usa ka tawo kinsa mibati nga ingon og siya wala makadawat og mga tubag o giya gikan sa Ginoo?

• Unsa nga kasinatian ang inyong nasinati nga ang mga tubag og giya miabut sa hinay-hinay paglabay sa panahon?

Tapusa pinaagi sa pagpamatuod o pagdapit ni bisan kinsa nga estudyante nga gustong mopamatuod sa mga kamatuoran mahitungod sa pagpadayag nga gitudlo sa leksyon.

Alang sa Sunod nga Higayon

Pangutan-a ang mga estudyante unsa kaha ang labing dako nga mga milagro sa Pagpahiuli. Dapita sila sa pagtuon sa materyal sa pagpangandam alang sa sunod nga leksyon mahitungod sa pag-abut sa Basahon ni Mormon ug sa pagkonsiderar sa mga milagro nga may kalabutan sa pagpreserbar, paghubad, ug pagmantala sa Basahon ni Mormon.