Leksyon 26 Materyal sa Magtutudlo

Ang Simbahan sa Kasadpan

Ang pagtukod sa Simbahan didto sa kasadpang Estados Unidos usa ka talagsaong istorya sa hugot nga pagtuo. Kini nga leksyon mohatag sa mga estudyante og oportunidad sa pagkat-on og mga leksyon gikan sa matinud-anong mga Santos kinsa mitukod sa ilang pundasyon diha ni Jesukristo ug mihalad sa ilang mga kinabuhi ngadto sa pagtukod sa Iyang gingharian. Motabang usab kini sa mga estudyante nga mas makasabut sa usa ka makalilisang nga hitabo diha sa kasaysayan sa Simbahan gikan niini nga panahon nga mipakita og seryosong pagbiya gikan sa mga pagtulun-an sa ebanghelyo sa Manluluwas: ang Masaker sa Mountain Meadows.

Mga Sugyot alang sa Pagtudlo

Mipadayon ang mga Santos sa Pagtukod sa gingharian sa Ginoo pinaagi sa hugot nga pagtuo ug sakripisyo.

Ipakita ang kauban nga imahe sa usa ka tabil, o pagdala og usa nga imong kaugalingon ngadto sa klase. Siguroha nga ang mga estudyante makasabut nga ang usa ka tabil gihimo pinaagi sa paglala og dungan sa daghang mga hilo sa malisud ug makuti nga mga kombinasyon aron sa paghimo og usa ka nindot nga hulagway o desinyo.

Dapita ang usa ka estudyante sa pagbasa sa mosunod nga pamahayag ni Elder Steven E. Snow sa Kapitoan, kinsa kaniadto miserbisyo isip ang Magsusulat sa Kasaysayan ug Tigrekord sa Simbahan.

Kon ikaw maghunahuna kabahin sa kasaysayan sa Simbahan isip usa ka hapin [quilt] o usa ka tabil, kini mao ang labing mahal ug nindot nga butang nga sukad akong namatikdan. Kon imo kining tukion og maayo, imong makita ang pipila ka katingad-ang mga hilo diha nianang matahum nga kutson o tabil, ug kon imong bitaron kini ug hatagan og importansya ang mga hilo, imong malaktawan ang nindot kaayo nga mensahe sa atong kasaysayan. Kon ikaw moatras ug motan-aw sa tibuok kutson o tabil, kini nindot. (Steven E. Snow, “Start with Faith: A Conversation with Elder Steven E. Snow,” Religious Educator, nu. 3 [2013], 11)

Ipasabut nga sa unang kasaysayan sa Simbahan sa Kasadpan, dihay liboan ka mga istorya sa matinud-anong mga Santos kansang mga paningkamot sa pagsunod ni Jesukristo ug sa pagtukod sa Simbahan sa Ginoo mihimo og usa ka maanindot nga tabil sa hugot nga pagtuo.

Tan-awa hain nga mga estudyante ang nagbasa sa unsa nga mga asoy gikan sa seksyon 1 sa materyal sa pagpangandam. Alang sa matag asoy, dapita ang usa ka estudyante sa pagbuhat sa mosunod:

1. Ipa-summarize ang asoy nga iyang gibasa.

2. Ipasabut giunsa sa Santos o mga Santos sa Ulahing mga Adlaw diha sa asoy pagpakita sa ilang hugot nga pagtuo diha ni Jesukristo ug sa Iyang gipahiuli nga ebanghelyo.

3. Pakigbahin og mga leksyon o mga baruganan nga iyang nakat-unan gikan sa asoy.

Tuguti ang ubang mga estudyante kinsa mibasa sa samang asoy sa pagdugang sa ilang mga panabut sa dili pa moadto sa sunod nga asoy.

Ang pipila sa unang mga miyembro sa Simbahan miplano ug mipahinabo sa Masaker sa Mountain Meadows.

Ipakita ang kaubang hulagway, ug ipasabut ngadto sa mga estudyante nga kini usa ka hulagway sa monumento sa dapit nga gilubngan sa Masaker sa Mountain Meadows nga gitukod sa Simbahan sa habagatan sa Utah. Ipasabut nga, sa kasubo, ang makalilisang nga hitabo sa Mountain Meadows usa ka kabasulan nga hitabo nga gilala ngadto sa kasaysayan sa mga Santos.

Pangutan-a ang mga estudyante unsay ilang nakat-unan gikan sa ilang pagbasa mahitungod sa Masaker sa Mountain Meadows. Siguroha nga nasabtan sa mga estudyante nga sa Septyembre 11, 1857, mga 50 ngadto sa 60 ka lokal nga militia nga mga lalaki sa habagatang Utah, gitabangan sa pipila ka mga kaanib nga American Indian, gimasaker ang mga 120 ka mga langyaw kinsa nagbiyahe pinaagi sa karomata ngadto sa California. 17 lamang ka mga bata ang naluwas.

• Unsa ang pipila ka mga hitabo ug mga pagpili ang migiya ngadto sa makalilisang nga hitabo didto sa Mountain Meadows? (Kon gikinahanglan, hatagi ang mga estudyante og pipila ka mga minuto sa pagribyu sa seksyon 2 sa materyal sa pagpangadam.)

Hunahunaa ang paghangyo sa mga estudyante sa pagpakigbahin og mga baruganan ug mga kamatuoran gikan sa kasulatan nga makatabang unta niini nga mga lumulupyo sa paghimo og lain nga mga pagpili. (Pipila ka mga ehemplo mahimong maglakip sa Mga Proverbio 28:13; 3 Nephi 12:24–25, 43–44; Doktrina ug mga Pakigsaad 64:9–11.)

• Unsa ang pipila ka mga leksyon ang atong makat-unan gikan sa makalilisang nga hitabo sa Masaker sa Mountain Meadows? (Hunahunaa ang pagsulat sa mga tubag sa mga estudyante diha sa pisara.)

Mahimo nimong hatagan ang mga estudyante og usa ka minuto o duha sa pagsulat o pagpakigbahin kon giunsa niining mga baruganan sa pagpugong og walay hinungdan nga kaguol diha sa ilang kaugalingon nga mga kinabuhi.

Ipasabut nga tungod kay pipila ka lokal nga mga miyembro ug mga lider sa Simbahan ang responsable sa pagplano ug pagpahinabo sa Masaker sa Mountain Meadows, pipila ka mga tawo mitugot niining panghitabo nga negatibong nakaapekto sa ilang pagtan-aw sa Simbahan.

• Unsa kaha ang imong isulti ngadto sa usa ka tawo kinsa negatibong naghunahuna mahitungod sa Simbahan tungod sa Masaker sa Mountain Meadows? (Dapita ang mga estudyante sa paggamit kon unsay ilang nakat-unan gikan sa seksyon 2 sa materyal sa pagpangandam.)

Dapita ang mga estudyante sa pagbasa ug pag-ila og usa ka baruganan gikan sa Helaman 5:12. Ipakita ang mosunod nga mga pamahayag. Dapita ang usa ka estudyante sa pagbasa og kusog ug hangyoa ang klase sa pagpangita kon giunsa paghulagway niini ang baruganan nga gitudlo diha sa Helaman 5:12.

Si James Sanders usa ka miyembro sa Ang Simbahan ni Jesukristo sa mga Santos sa Ulahing mga Adlaw ug usa ka apo nga lalaki sa tuhod ni Nancy Saphrona Huff, usa sa mga bata kinsa nabuhi sa masaker. Gipakigbahin ni Brother Sanders kini nga mga pagbati mahitungod sa masaker: “Sa gihapon gibati ko ang kasakit; gibati ko ang kasuko ug kaguol nga nahitabo ang masaker. … Apan nahibalo ako nga ang mga tawo kinsa mihimo niini manubag sa atubangan sa Ginoo, ug kana nagdala kanako og kalinaw.” Si Brother Sanders miingon nga ang “pagkasayud nga [usa] ka katigulangan ang namatay diha sa masaker ‘wala makaapekto sa akong hugot nga pagtuo tungod kay kini nakabase diha ni Jesukristo, dili ni bisan kinsa nga tawo diha sa Simbahan’” (sa Richard E. Turley Jr., “The Mountain Meadows Massacre,” Ensign, Sept. 2007, 21).

• Giunsa pagtudlo ang baruganan sa Helaman 5:12 pagpakita diha sa pamahayag ni James Sanders? (Human sa tubag sa mga estudyante, isulat ang mosunod nga baruganan diha sa pisara: Ang pagtukod sa atong hugot nga pagtuo diha sa pundasyon ni Jesukristo ug sa Iyang ebanghelyo makatabang kanato sa pagpabilin nga lig-on bisan pa sa tawhanong mga kahuyang sa mga miyembro sa Simbahan.)

• Sa unsang paagi ang pagbase sa atong pagtuo diha ni Jesukristo nagtabang kanato kon kita nakakita o nakahibalo og mga higayon nga ang mga miyembro sa Simbahan napakyas sa pagpuyo sumala sa mga pagtulun-an sa ebanghelyo?

• Unsa ang imong buhaton nga makatabang kanimo sa pagtukod sa imong hugot nga pagtuo diha sa pundasyon ni Jesukristo?

Hatagi ang mga estudyante og panahon sa paghunahuna ug sa pagsulat mahitungod sa unsay ilang pagabuhaton aron sa pagpabilin ug paglig-on sa ilang pagtuo diha ni Jesukristo ug sa Iyang ebanghelyo.

Pagpamatuod sa ka importante sa pagsunod sa mga pagtulun-an sa Manluluwas ug sa pagbase sa atong hugot nga pagtuo diha Kaniya ug sa Iyang ebanghelyo, sa walay pagsapayan sa tawhanong mga kahuyang sa mga miyembro sa Simbahan. Samtang kita nagbuhat sa mao, kita makatabang sa pagpadayon sa gingharian ni Kristo sa unahan sama sa gibuhat sa matinud-anong pioneer nga mga Santos.

Alang sa Sunod nga Higayon

Pangutan-a ang mga estudyante kon sila napangutana ba sukad mahitungod kon ngano nga ang Simbahan wala mohatag og awtoridad sa pagkapari ug pipila ka mga ordinansa sa templo ngadto sa kaliwat sa mga sakop sa itum nga Afrikano sulod sa pipila ka panahon. Ipasabut nga agi og pagpangandam alang sa sunod nga klase, ang mga estudyante makabaton og oportunidad sa pagkat-on mahitungod niini nga hilisgutan ug ang kalabut nga pagpadayag diha sa Opisyal nga Pahayag 2 nga gipaabut sa mga propeta sulod sa daghang mga katuigan. Dapita ang mga estudyante sa pag-anha sa klase nga andam sa paghisgot sa unsay ilang nakat-unan ug bisan unsa nga mga pangutana nga sila aduna mahitungod sa hilisgutan.