Leksyon 17 Materyal sa Magtutudlo

Pagpabiling Matinud-anon taliwala sa Pagsupak ug Kalisdanan

Taliwala sa tuig 1837 hangtud 1839, ang mga Santos nakasinati og makahadlok nga matang sa apostasiya didto sa Kirtland, Ohio, ug mapintas nga pagpanggukod didto sa Missouri. Kini nga leksyon makatabang sa mga estudyante sa pagtino unsaon nila nga sa hingpit makadangup, ug makasalig sa Langitnong Amahan ug ni Jesukristo sa mga panahon sa kalisud ug pagsupak.

Mga Sugyot alang sa Pagtudlo

Ang pipila ka mga miyembro sa Kirtland, Ohio, mibiya sa Simbahan, samtang ang uban nagpabilin nga matinud-anon.

Sugdi ang klase pinaagi sa paghangyo sa mga estudyante sa paghulagway kon sa unsang paagi nga ang mga tawo nga ilang nailhan misanong sa malisud nga mga pagsulay sa ilang mga kinabuhi. Mahimo usab nimong ipangutana unsay ilang nakat-unan gikan sa maong mga ehemplo.

Dapita ang mga estudyante sa pagpamalandong sa mga pagsulay nga nasinati ug sa ilang mga minahal karon ug sa paghunahuna unsa kaha ang gitudlo sa Ginoo kanila karon mahitungod sa pagsanong sa maong mga pagsulay.

• Unsa ang pipila ka mga hagit ug mga pagsulay nga nasinati sa unang mga Santos sa Ohio? (Mahimo nimong ipagamit sa mga estudyante ang materyal sa pagpangandam aron matabangan sila nga makahinumdom.) Unsay atong makat-unan gikan niadtong naapektuhan sa mga pagsulay sa Ohio?

Pahinumdumi ang mga estudyante nga niadtong ting-init sa 1837, si Thomas B. Marsh, ang Presidente sa Korum sa Napulog Duha ka mga Apostoles, mibiyahe gikan sa Missouri padulong sa Kirtland aron makigkita sa mga miyembro niana nga korum ug ni Propeta Joseph Smith.

• Unsa ang pipila ka mga hagit ug mga kabalaka nga giatubang ni Thomas B. Marsh sa wala pa siya moabut sa Kirtland?

Ipasabut nga human si Thomas B. Marsh ug si Joseph Smith nagkakita ug nasulbad ang ilang mga panagsumpaki, ang Propeta nakadawat og pagpadayag gikan sa Ginoo nga alang ni Thomas. Dapita ang mga estudyante nga mobasa o moribyu sa hilom sa Doktrina ug mga Pakigsaad 112:10–15, mangita sa tambag ug mga baruganan nga gitudlo sa Ginoo ngadto ni Thomas B. Marsh ug sa ubang mga sakop sa Korum sa Napulog Duha. Dapita ang mga estudyante sa pagpakigbahin sa unsay ilang nakit-an.

Kon gikinahanglan, tabangi ang mga estudyante sa pagpangita ug paghisgot og baruganan gikan sa bersikulo 13 pinaagi sa pagpangutana sa pipila sa mosunod nga mga pangutana:

• Unsa ang gisaad sa Ginoo nga Iyang buhaton alang niadtong Napulog Duha nga mopili nga dili magpatig-a sa mga kasingkasing sa higayon nga masulayan ang ilang pagtuo? (Human makatubag ang mga estudyante, ipakita ang mosunod nga baruganan o isulat kini sa pisara: Kon dili kita magpatig-a sa atong mga kasingkasing sa higayon nga sulayan ang atong pagtuo, ang Ginoo magauban kanato ug motabang sa pagpalig-on sa atong pagkakabig.)

• Sa unsa nga paagi nga ang pipila ka tawo mipatig-a sa ilang mga kasingkasing sa dihang gisulayan ang ilang hugot nga pagtuo? Unsa ang mga kakuyaw sa paghimo sa ingon?

• Kanus-a kamo nakakita og tawo nga mitubag sa usa ka pagsulay sa hugot nga pagtuo uban sa malumo nga kasingkasing ug bukas nga hunahuna? Unsa ang inyong namatikdan nga nanghitabo sa tawo samtang siya misanong niining paagiha?

Si Propeta Joseph Smith gipanalanginan tungod sa iyang pagkamatinud-anon panahon sa iyang mga pagsulay didto sa Bilanggoan sa Liberty.

Ipakita ang mosunod nga pangutana: Ngano nga ang Dios motugot nga ang dili maayo nga mga butang mahitabo ngadto sa maayo nga mga tawo?

Pangutan-a ang mga estudyante kon sila nakahunahuna ba niini o napangutana na niini nga pangutana. Ipasabut nga si Joseph Smith nangutana sa susama nga pangutana human gibilanggo didto sa Liberty, Missouri sa dili makiangayon nga paagi. Samtang ang mga estudyante maghisgot sa kasinatian ni Joseph, dapita sila sa paghunahuna unsaon nila sa pagtubag kon ang usa ka higala mangutana nila niana nga pangutana.

Ipakita ang mosunod nga mga imahe sa Bilanggoan sa Liberty:

Hangyoa ang mga estudyante sa pagsulti sa mga hitabo nga misangpot sa pagkabilanggo ni Joseph Smith didto sa Bilanggoan sa Liberty. (Kon gikinahanglan, sultihi ang mga estudyante sa pagribyu sa seksyon 3 sa materyal sa pagpangandam.)

• Unsa ang mga kahimtang ni Joseph Smith ug sa uban didto sa Bilanggoan sa Liberty?

Pahinumdumi ang mga estudyante nga si Propeta Joseph Smith migahin og kapin sa upat ka bulan didto sa Bilanggoan sa Liberty panahon sa grabe nga kabugnaw sa tingtugnaw. Dapita ang usa ka estudyante sa pagbasa og kusog sa Doktrina ug mga Pakigsaad 121:1–3. Hangyoa ang klase sa pagsunod, nga mangita sa mga pangutana nga gipangutana sa Propeta niining sulat sa pag-ampo.

• Unsa ang gipadayag niini nga mga pangutana mahitungod sa unsay gibati ni Joseph Smith nianang higayona?

• Sa unsang paagi nga kining panahona mao ang pagsulay sa hugot nga pagtuo ni Joseph?

Pahinumdumi ang mga estudyante nga samtang didto sa bilanggoan, si Joseph Smith mipadala og duha ka sulat ngadto sa Simbahan. Bahina ang mga estudyante ngadto sa ginagmay nga mga grupo. Dapita sila sa pagribyu o pagbasa sa Doktrina ug mga Pakigsaad 121:7–10; 122:7–9 ug dayon ipakigbahin ang mga pulong ug mga baruganan nga importante kanila.

Human sa igong panahon, dapita ang pipila ka estudyante nga mopakigbahin og mga pulong o baruganan nga ilang gihisgutan sa ilang mga grupo. Ikonsiderar ang pagpakita niini nga mga baruganan o mga pulong o sa pagsulat niini diha sa pisara. Ang pipila ka baruganan nga nakit-an sa mga estudyante mahimong ipadayag o i-summarize sa mosunod nga mga paagi: Kon kita moduol sa Ginoo ug mosalig Kaniya panahon sa atong mga pagsulay, Siya mopanalangin kanato og pagpadayag, paghupay, ug pag-awhag. Kon magpabilin kita nga matinud-anon, ang kalisdanan ug kalisud makahatag nato og kasinatian ug alang sa atong kaayohan.

• Sa unsa nga paagi nga ang mga baruganan ug mga pulong nga inyong nakit-an makatabang og usa ka tawo nga nakasinati og kalisud o pagsulay sa hugot nga pagtuo?

Isip kabahin sa inyong panaghisgot, mahimo nimong ipakita ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug modapit og usa ka estudyante sa pagbasa niini og kusog.

Mahimo kamong makabaton og sagrado, mapadayagon, tiunay nga matulon-anong kasinatian uban sa Ginoo diha sa labing pait nga mga kasinatian sa inyong kinabuhi—diha sa labing grabe nga mga sitwasyon, samtang nag-antus sa labing sakit nga inhustisya, samtang nag-atubang sa labing lisud nga mga problema ug oposisyon nga inyong naatubang sukad. …

… Apan ang leksyon sa tingtugnaw sa 1838–39 nagtudlo kanato nga ang matag kasinatian mahimong usa ka makaayo nga kasinatian kon kita magpabilin nga matinud-anon ngadto sa atong Amahan sa Langit pinaagi niana nga kalisud. Kining malisud nga mga leksyon nagtudlo kanato nga ang kalisud sa tawo mao ang oportunidad sa Ginoo, ug kon kita magmapainubsanon ug magmatinud-anon, kon kita magmatuohon ug dili mamalikas sa Dios tungod sa atong mga problema, pwede Niyang himoong mga templo ang dili makiangayon ug dili tawhanon ug dili maagwanta nga mga prisohan sa atong mga kinabuhi—o sa labing minos usa ka sirkumstansya nga makahatag og kahupayan ug pagpadayag, balaang pakig-uban ug kalinaw. (Jeffrey R. Holland, “Lessons from Liberty Jail,” Ensign, Sept. 2009, 28)

• Unsa kaha ang gipasabut nga ang mga pagsulay mahimong “makaayo” nga mga kasinatian?

• Sa unsa nga paagi nga ang matinud-anong paglahutay sa mga pagsulay sa kinabuhi makatabang kanato nga mas mahisama sa atong Langitnong Amahan ug sa atong Manluluwas, nga si Jesukristo?

• Unsa ang pipila ka paagi nga kamo miduol ug mas misalig sa hingpit sa Langitnong Amahan ug ni Jesukristo panahon sa mga pagsulay nga misulay sa inyong hugot nga pagtuo? Unsa ang inyong nakat-unan sa pagbuhat sa ingon?

Dapita ang mga estudyante sa pagpakigbahin uban sa usa ka kauban sa klase unsaon nila sa pagtubag ang pangutana nga imong gipakita mahitungod kon ngano nga ang Dios mitugot sa dili maayo nga mga butang nga mahitabo sa Iyang mga anak.

Dayon dapita ang mga estudyante sa pagkonsiderar sa pagpakita sa mga pulong nga ilang napilian gikan sa tudling sa mga kasulatan nga una nilang nahisgutan sa mga dapit diin ila kining makita o sa pagsag-ulo niini o sa pag-share niini sa social media. Ipamatuod nga kon kita moduol ngadto sa Manluluwas sa atong mga pagsulay, Siya mohatag kanato sa kalinaw, mohupay kanato, ug molig-on sa atong pagkakabig.

Alang sa Sunod nga Higayon

Sa inyong pagtapos sa klase, ikonsiderar ang pagpasabut nga ang usa sa labing dako nga mga organisasyon sa mga babaye sa kalibutan karon, ang Relief Society, nga natukod niadtong 1842 ni Propeta Joseph Smith. Pahibaloa ang mga estudyante nga samtang sila mag-andam alang sa sunod nga klase sila adunay oportunidad nga makat-on og dugang mahitungod kon sa unsa nga paagi ug ngano nga kining tibuok kalibutan nga organisasyon natukod. Awhaga ang mga estudyante nga moanha nga andam nga mopakigbahin unsay ilang nakat-unan.