Leksyon 21 Materyal sa Magtutudlo

Ang Doktrina sa Mahangturong Kaminyoon ug sa Pamilya

Isip kabahin sa Pagpahiuli, ang Ginoo mipadayag sa Iyang kabubut-on kabahin sa mahangturong kaminyoon ug sa pamilya. Kini nga leksyon gihimo aron matabangan ang mga estudyante nga mas makahimo sa pagpasabut sa doktrina sa mahangturong kaminyoon ug sa pamilya ug sa pagtino unsay ilang mahimo aron makadawat niini nga mga panalangin.

Mga Sugyot alang sa Pagtudlo

Ang kaminyoon tali sa usa ka lalaki ug sa usa ka babaye adunay katuyoan sa plano sa Dios.

Sugdi ang klase pinaagi sa pagpangutana sa mosunod (pahinumdumi ang mga estudyante sa paglikay sa paghimo og mga mahukmanong pamahayag mahitungod sa mga tawo):

• Unsa ang pipila ka mga panglantaw ug mga kinaiya karon nga inyong nakita sa kalibutan mahitungod sa kaminyoon?

Ipasabut nga sama sa atong panahon, ang pipila ka mga tawo sa panahon ni Joseph Smith adunay managlahing mga panglantaw bahin sa kaminyoon. Dapita ang mga estudyante sa paghinumdom gikan sa seksyon 1 sa materyal sa pagpangandam kon unsay ilang nakat-unan mahitungod sa mga gituohan sa mga Shaker mahitungod sa kaminyoon.

Dapita ang usa ka estudyante sa pagbasa og kusog sa Doktrina ug mga Pakigsaad 49:15–17. Hangyoa ang klase sa pagpangita sa doktrina nga gipadayag sa Ginoo mahitungod sa kaminyoon.

• Unsay gitudlo sa Ginoo mahitungod sa kaminyoon niini nga tudling? (Ang mga estudyante mahimong makakita og pipila ka kamatuoran, lakip sa mosunod: Ang kaminyoon giorden sa Dios. Ang mga bana ug mga asawa gisugo sa pagbaton og mga anak. Samtang ang mga lalaki ug mga babaye magminyo ug manganak, nagtabang sila nga matuman ang katuyoan sa Dios sa paglalang sa yuta. Ikonsiderar ang pagpakita o pagsulat diha sa pisara sa pipila o sa tanan niini nga mga ideya.)

Ikonsiderar ang pagpasabut nga ang mga pulong nga “gidaghanon sa mga tawo” sa bersikulo 17 nagpasabut sa espiritu nga mga anak sa Dios nga Iyang giandam aron mopuyo sa yuta. Ipasabut usab nga ang mga pulong “ang kaminyoon gi-orden sa Dios” sa bersikulo 15 nagpasabut nga ang kaminyoon gimando ug giestablisar sa Dios. Niadtong 1995 ang Ginoo mihatag pag-usab og gibug-aton pinaagi sa Iyang mga propeta sa “Ang Pamilya: Usa ka Pamahayag ngadto sa Kalibutan” (ChurchofJesusChrist.org) nga “ang kaminyoon tali sa usa ka lalaki ug usa ka babaye gi-orden sa Dios.”

Dapita ang mga estudyante nga moribyu sa makadiyot sa pamahayag ni Elder David A. Bednar gikan sa seksyon 1 sa materyal sa pagpangandam. Hangyoa ang klase sa pagpangita sa mga rason nga ang kaminyoon tali sa usa ka lalaki ug babaye importante sa plano sa Langitnong Amahan.

• Sa unsa nga paagi nga ang mga pagtulun-an ni Elder Bednar nakapalawom sa inyong pagsabut ngano nga ang kaminyoon tali sa usa ka lalaki ug usa ka babaye importante sa plano sa Dios?

Ang unang mga Santos nakat-on mahitungod sa mga panalangin sa mahangturong kaminyoon.

Kon ikaw adunay estudyante nga naminyo sa templo, ikonsiderar ang pagpangutana unsa sa iyang pagsabut ang pagminyo alang sa kahangturan. Ipasabut nga sa wala pa mahuman ang Templo sa Nauvoo, si Joseph mitudlo sa doktrina sa mahangturong kaminyoon ngadto sa pipila ka matinud-anong mga miyembro sa Simbahan ug gibugkos sila. Dapita ang usa ka estudyante sa pagbasa og kusog sa Doktrina ug mga Pakigsaad 131:1–4. Hangyoa ang klase sa pagsunod, nga mangita kon unsay gitudlo sa Propeta.

• Unsa nga kamatuoran ang atong makat-unan mahitungod sa mahangturong kaminyoon gikan niini nga mga bersikulo? (Human motubag ang mga estudyante, ipakita ang mosunod nga baruganan: Aron makaangkon sa labing taas nga ang-ang sa celestial nga gingharian, kinahanglan gayud kitang mosulod sa bag-o ug walay katapusan nga pakigsaad sa kaminyoon. Mahimo nimong ipasabut nga sa kinatas-ang ang-ang sa celestial nga gigharian lamang kita makadawat og kahimayaan.)

Itudlo sa mga estudyante nga sa Doktrina ug mga Pakigsaad 132:19, ang Ginoo dugang mitudlo nga kita kinahanglang “mosunod sa [Iyang] pakigsaad” aron modawat sa panalangin sa kahimayaan.

• Unsay gipasabut niini nganha kaninyo nga “mosunod sa [Iyang] pakigsaad” samtang kini may kalabutan sa mahangturong kaminyoon?

Mahimo usab nga imong hatagan og gibug-aton nga dili igo nga mabugkos lamang diha sa templo. Ang managtiayon kinahanglan nga magkugi sa ilang mga paningkamot sa pagtuman sa ilang mga pakigsaad sa templo ug sa pagtukod og lig-on ug malungtarong relasyon.

Idugang ang “ug mosunod sa” diha sa gipakita nga baruganan aron mabasa kini nga, “… kita kinahanglan nga mosulod ngadto ug mosunod sa bag-o ug walay katapusan nga pakigsaad sa kaminyoon.”

Hangyoa ang mga estudyante sa paglista diha sa pisara sa ubang mga panalangin sa mahangturong kaminyoon. (Dapita ang mga estudyante sa pagdrowing unsay ilang nakat-unan gikan sa seksyon 2 sa materyal sa pagpangandam.)

• Hain niini nga mga panalangin ang labing importante nganha kaninyo? Ngano?

PAGPALAMBO SA ATONG PAGTUDLO UG PAGKAT-ON

Tabangi ang mga estudyante nga makaandam alang sa klase. Ang mga estudyante kinsa nangandam sa ilang kaugalingon alang sa klase nagpakita sa ilang hugot nga pagtuo sa Ginoo ug sa Iyang katakus sa pagtabang kanila nga makabaton og mas lawom nga kasinatian sa pagkat-on. Pahinumdumi ang mga estudyante nga sila makatuman sa ilang tahas sa proseso sa pagkat-on pinaagi sa pagtuon sa materyal sa pagpangandam ug pagkompleto sa mga kalihokan sa pagkat-on. Mahimong motan-aw ka sa umaabut nga leksyon o mga leksyon aron pahibaloon ang mga estudyante unsay ilang mabuhat aron maandam alang sa sunod nga klase.

Pahinumdumi ang mga estudyante nga sila gihangyo diha sa materyal sa pagpangandam nga makigsulti sa usa ka minyo nga magtiayon nga ilang nailhan kinsa adunay lig-on ug mahigugmaong kaminyoon. Sila gidapit sa paghisgot unsa ang gihimo sa magtiayon sa paglig-on sa mahangturong kaminyoon ug sa unsa nga paagi nga ang ilang kaminyoon nakapabuhong sa ilang kinabuhi. Hangyoa ang pipila ka estudyante sa pagpakigbahin unsay ilang nakat-unan gikan sa ilang panag-istoryahanay.

Dapita ang mga estudyante nga mainampoong mamalandong unsa nga mga hiyas, mga kinaiya, o mga aksyon ang makatabang kanila nga mosunod sa pakigsaad sa kaminyoon ug makahimo og mahigugmaon, matarung nga mga kaminyoon. Hatagi og panahon ang mga estudyante sa pagrekord ug paghimo og plano sa pagsunod sa mga aghat nga ilang nadawat.

Gusto sa Dios nga kita manalipod sa doktrina sa kaminyoon ug sa pamilya.

Ipangutana ang mosunod:

• Ngano nga importante alang kanato ang pagpanalipod sa doktrina sa kaminyoon ug sa pamilya? (Ang mga estudyante makaribyu sa seksyon 3 diha sa materyal sa pagpangandam aron matabangan sila nga makatubag niini nga pangutana.)

• Nakapanalipod na ba kamo sa doktrina sa kaminyoon o sa pamilya? Kon mao, unsa ang inyong nasinati?

Ipakita ang mosunod nga teksto alang sa mga estudyante, ug hangyoa sila sa pagkonsiderar kon sila nakadungog ba og butang nga nagpakita sa mosunod nga kinaiya:

“Nganong gusto kamo nga magminyo karon? Kamo duna pa may daghang umaabut nga kahigayunan sa kinabuhi. Nganong dili ninyo gamiton kining panahona sa paglingaw-lingaw ug pagpauswag sa inyong kinabuhi?”

Pahinumdumi ang mga estudyante nga usa sa mga baruganan sa pag-angkon og espirituhanong kahibalo mao ang pagsusi sa mga konsepto ug mga pangutana uban sa mahangturong panglantaw. Ang mosunod nga kalihokan makatabang sa mga estudyante sa pagbansay niini nga baruganan samtang kini may kalabutan sa mga pangutana mahitungod sa kaminyoon.

Bahina ang mga estudyante ngadto sa ginagmay nga mga grupo, ug dapita sila sa paghisgot unsaon nila sa pagtubag sa usa ka tawo kinsa anaa niini nga panglantaw. Hatagi og kopya ang mga estudyante sa mosunod nga mga pangutana (o ipakita kini) aron makatabang sa paggiya sa ilang panaghisgot:

• Unsa kaha ang pangagpas niining tawhana nga nagpugong sa iyang panglantaw sa kaimportante sa kaminyoon ug sa pamilya?

• Sa unsa nga paagi nga ang pagsabut sa kaminyoon ug pamilya gikan sa panglantaw sa plano sa Dios sa kaluwasan makatabang sa pagtubag sa panglantaw niining tawhana?

• Unsa nga doktrina, mga kasulatan, o mapanagnaong mga pagtulun-an ang imong ipaambit aron matabangan kini nga tawo nga motan-aw sa kaminyoon ug sa pamilya gikan sa mahangturong panglantaw?

Human sa igong panahon, hangyoa ang pipila ka estudyante sa pagpakigbahin unsay nahisgutan sa ilang grupo.

Tapusa ang klase pinaagi sa pagpakigbahin sa imong pagpamatuod sa mga kamatuoran nga nakita niini nga leksyon.

Alang sa Sunod nga Higayon

Sa imong pagtapos sa klase, pahinumdumi ang mga estudyante nga ang Ginoo mipadayag usab sa doktrina sa dinaghan nga kaminyoon ngadto ni Propeta Joseph Smith. Awhaga ang mga estudyante nga basahon pag-ayo ang ilang materyal sa pagpangandam alang sa leksyon 22 ug moanha nga andam nga mohisgot ngano nga ang unang mga Santos nagbuhat sa dinaghan nga kaminyoon.