“Leksyon 24 Materyal sa Pagpangandam sa Klase: Si Propeta Joseph Smith—Usa ka Pinili nga Manalagna,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 24 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 24 Materyal sa Pagpangandam sa Klase
Si Propeta Joseph Smith—Usa ka Pinili nga Manalagna
Gihulagway sa Ginoo si Propeta Joseph Smith isip “usa ka pinili nga manalagna” kinsa modala sa mga katawhan ngadto sa kasayuran sa mga pakigsaad sa Ginoo (2 Nephi 3:7–8). Apan gikan gyud sa sinugdanan sa Pagpahiuli, giangkon ni Joseph Smith ang iyang mga pagbati sa kakulangan. Samtang imong tun-an kini nga materyal, hunahunaa unsaon kaha nimo sa pagtubag uban ang hugot nga pagtuo ngadto sa mga calling gikan sa Ginoo, bisan pa sa imong kahuyang. Hunahunaa usab kon unsaon nimo pagtubag ngadto niadtong kinsa mosaway ni Joseph Smith tungod sa iyang kahuyang.
Seksyon 1
Unsa ang akong makat-unan ni Joseph Smith mahitungod sa akong kaugalingong abilidad sa pagserbisyo sa Ginoo?
Isip usa ka batan-ong lalaki, gibati ni Joseph Smith nga nasanapan sa iyang calling gikan sa Ginoo. Miingon siya sa iyang kaugalingon:
Nagbarug akong nag-inusara, usa ka batan-on nga walay kinaadman, sa pagpakig-away sa kaalam sa kalibutan … uban sa bag-ong pagpadayag. (Mga Pagtulun-an sa mga Presidente sa Simbahan: Joseph Smith [2007], 71–72)
Ako usa ka bata nga wala mailhi, … ug ang [mga] kahigayunan sa kinabuhi ingon sa usa ka bata nga dili inila dinhi sa kalibutan … kansang kapalaran mao ang pagpangita og mga ginagmay nga kabuhian pinaagi sa [akong] inadlaw nga pagtrabaho. (Joseph Smith—Kasaysayan 1:22–23)
Si Joseph naghunahuna nga kini “hilabihan ka katingalahan” nga “mga tawo nga halangdon nakamatikod aron sa pag-ukay sa hunahuna sa katawhan batok kanako, ug naghimo og mapait nga pagpanggukod” (Joseph Smith––Kasaysayan 1:22–23).
Hunahunaa ang mga pagbati nga tingali si Joseph aduna samtang gihubad niya ang 2 Nephi 3 diha sa Basahon ni Mormon ug nakakat-on gikan ni Nephi nga si Jose sa Ehipto nanagna kabahin sa usa ka “pinili nga manalagna” sa ulahing mga adlaw.
Pagtuon agi og Pagpangandam alang sa Klase
Basaha ang 2 Nephi 3:7, 11, 13.
Sa ulahing pagpadayag ang Ginoo mipasabut og usa ka katarungan kon ngano Siya mipili ug mitawag ni Joseph nga mahimong propeta sa Pagpahiuli:
Sa pagkatinuod, sa ingon miingon ang Ginoo nganha kanimo, akong sulugoon Joseph Smith, Ako nahimuot kaayo sa imong halad … ; tungod niini nga katuyoan Ako mipasanay kanimo, aron Ako unta makapakita sa akong kaalam pinaagi sa mga huyang nga mga butang sa yuta. (Doktrina ug mga Pakigsaad 124:1)
Nagkomentaryo sa tudling sa kasulatan gikan sa 2 Nephi 3, gitudlo ni Elder Marcus B. Nash sa Kapitoan:
Ingon og dili makatarunganon nga ang Ginoo motawag sa huyang aron sa pagtuman sa usa ka dakong buhat. Apan kadtong kinsa makaila sa ilang kahuyang mahimong makalihok pinaagi niana nga kahuyang sa pagtinguha sa kalig-on sa Ginoo. Kadtong kinsa sa ingon magpaubos sa ilang kaugalingon diha sa hugot nga pagtuo Iyang pagalig-unon kinsa aduna sa tanang gahum sa langit ug sa yuta (tan-awa sa Mateo 28:18; Mosiah 4:9).
Gikan sa panahon sa iyang pagkabatan-on, miduol si Joseph Smith sa Ginoo niini nga mga kondisyon. …
Gihulagway ni Joseph ang iyang kaugalingon isip usa ka “bata nga wala mailhi … kansang kapalaran mao ang pagpangita sa mga ginagmay nga kabuhian pinaagi sa iyang inadlaw nga pagtrabaho” (Joseph Smith—Kasaysayan 1:23). Natawo siya nga ubos ang sosyal nga kahimtang nga limitado ang pormal nga edukasyon. …
Gibati ni Joseph pag-ayo ang iyang kakulang sa edukasyon nga siya sa makausa nagbangutan nga nabilanggo diha “sa gamay nga prisohan nga hapit wala gyuy [sic] hibangkaagan sa pagsulat ug yabag nga pinulongan.” Bisan pa niini, ang Ginoo mitawag kaniya sa paghubad sa Basahon ni Mormon—ang tanang 588 ka pahina nga orihinal nga gimantala—nga iyang gihimo nga wala kaabut og 90 ka adlaw! …
Oo, usa ka tema sa Basahon ni Mormon—ug sa kinabuhi ni Propeta Joseph—mao nga ang huyang kinsa mapainubsanong magtinguha sa Ginoo pinaagi sa hugot nga pagtuo himoon nga lig-on, gani gamhanan, diha sa buhat sa Ginoo. Kining paglig-on mahitabo bisan sa gagmay nga mga butang. …
… Adunay lain, mas personal nga leksyon: kon kita, sama ni Joseph, makahibalo sa atong kahuyang ug moduol pinaagi sa hugot nga pagtuo ngadto sa Ginoo uban sa atong tibuok kasingkasing, determinado sa pagbuhat sa Iyang kabubut-on, kita usab mahimong lig-on gikan sa kahuyang. Wala kini magpasabut nga ang kahuyang mawala sa mortalidad—apan kini nagpasabut nga ang indibidwal himoong lig-on sa Dios. (“Joseph Smith: Kalig-on Gikan sa Kahuyang,” Liahona, Dis. 2017, 21–24)
Pamalandong agi og Pagpangandam alang sa Klase
Unsa ang imong nakat-unan gikan sa Ginoo nga nagtawag ni Joseph Smith, usa ka tawo nga may kahuyang, ug dayon gipalig-on si Joseph aron sa pagbuhat sa Iyang buluhaton?
Seksyon 2
Unsay gisulti niadtong kinsa nakaila kaayo ni Joseph Smith mahitungod kaniya ug sa iyang kinaiya?
Ang Ginoo mipahayag ngadto ni Jose sa Ehipto nga ang iyang mga kaliwat motahud pag-ayo sa Propeta sa Pagpahiuli (tan-awa sa 2 Nephi 3:7). Si Presidente Dallin H. Oaks sa Unang Kapangulohan mipahayag:
Ang mga tawo kinsa nakaila og maayo ni Joseph ug labing suod kaniya diha sa pagpangulo sa Simbahan nahigugma ug mipaluyo kaniya isip propeta. Ang iyang igsoong lalaki nga si Hyrum mipili nga mamatay diha sa iyang kiliran. Si John Taylor, nga uban usab kaniya sa dihang gipatay siya, miingon: “Mopamatuod ako sa atubangan sa Dios, mga anghel, ug mga tawo, nga siya usa ka maayo, dungganan, mahiyason nga tawo … —nga ang iyang pribado ug publiko nga kinaiya walay masaway—ug nga siya nagpakabuhi ug namatay isip usa ka tawo sa Dios” (The Gospel Kingdom, 1987], 355; tan-awa usab sa D&P 135:3). Si Brigham Young mipahayag: “Wala ako magtuo nga usa ka tawo nga nagpuyo sa yuta mas nakaila ni [Joseph Smith] kay kanako; ug maisugon akong mosulti nga, gawas ni Jesukristo, walay mas maayo nga tawo sukad nakapuyo o karon nagpuyo dinhi sa yuta” (sa Journal of Discourses, 9:332). (Dallin H. Oaks, “Joseph, The Man and the Prophet,” Ensign, Mayo 1996, 71)
Miingon si Jane Snyder Richards kabahin sa personalidad ug kinaiya ni Joseph:
Si [Joseph Smith] maoy usa sa labing madanihong personalidad nga nahimong maayo nakong swerte sukad nga nakaila. … Isip Manalagna ug Tigpadayag siya walay kahadlok ug prangka, apan mapainubsanon, wala gayud maghunahuna nga siya labaw pa sa tigpama-ba, pinaagi kang kinsa ang Dios nakigsulti. Isip ang lider sa iyang mga katawhan siya kanunay nga aktibo ug mauswagon apan kanunay nga maligdong ug manggihunahunaon kanila ug sa ilang malisud nga mga kahimtang. (Jane Snyder Richards, sa “Joseph Smith, the Prophet,” Young Woman’s Journal, Dis. 1905, 550)
Giasoy ni Edwin Holden nga ang Propeta napuno sa gugma sa Dios, matinguhaon sa pagbayaw ug sa pagpanalangin sa uban:
Kaniadtong 1838 si Joseph ug pipila sa batan-ong mga lalaki nagdula og nagkalainlaing dula sa gawas, usa niini mao ang dula sa bola. Wala madugay misugod sila sa pagkakapoy. Nakita niya kini, ug gitawag silang tanan miingon siya: “Magtukod kita og payag nga troso.” Busa nanlakaw sila, si Joseph ug ang batan-ong mga lalaki, aron sa pagtukod og payag nga troso alang sa usa ka biyuda. Ingon niana ang paagi ni Joseph, kanunay nagtabang sa bisan unsa nga siya makahimo. (The Juvenile Instructor, Mar. 1, 1892, 153)
Misulat si Eliza R. Snow sa pagkamapainubsanon ug sa integridad sa Propeta:
Mipuyo ako sa pamilya ni Joseph Smith, ug gitudloan ang iyang pamilya og edukasyon ug dihay daghang oportunidad sa pagmatikod sa iyang “inadlaw-adlaw nga kinabuhi ug pakigsultihanay,” isip usa ka propeta sa Dios; ug sa nahimo akong mas nakaila kaniya, mas labaw nakong natino nga siya usa ka propeta sa Dios. … Sa iyang pagkadiosnon siya sama ka mapainubsanon sa gamay nga bata. (Eliza R. Snow, “Sketch of My Life,” Relief Society Magazine, Mar. 1944, 136)
Nahinumduman ni Mary Frost Adams ang usa sa maloloy-ong mga buhat ni Joseph:
Samtang si Joseph mao ang mayor sa Nauvoo, usa ka itum nga Santos sa Ulahing mga Adlaw nga ginganlan og Anthony gidakop tungod sa pagbaligya og bino sa Igpapahulay nga supak sa balaod. Nabuhat ni Anthony ang mao aron sa pagtigum og kwarta nga ipalit sa kagawasan sa iyang anak kinsa usa ka ulipon didto sa Habagatan. Napalit na niya ang kagawasan sa iyang asawa ug sa iyang kaugalingon ug karon gusto nga kuhaon ang ilang anak aron maipon kanila. Bisan pa sa katakus sa kawsa ni Anthony, ang Propeta miingon, “Pasayloa ako, Anthony, apan ang balaod kinahanglan gayud tumanon, ug kami kinahanglan nga mopatuman og multa.” Hinoon, “sa pagkasunod adlaw si Brother Joseph mihatag ni Anthony og nindot kaayo nga kabayo, nagsugo kaniya sa pagbaligya niini, ug sa paggamit sa kwarta nga halin alang sa pagpalit sa iyang anak.” (“Joseph Smith, the Prophet,” Young Woman’s Journal, Dis. 1906, 538)
Pamalandong agi og Pagpangandam alang sa Klase
Unsa ang imong nakat-unan mahitungod sa kinaiya ni Joseph Smith gikan sa mga asoy niadtong kinsa nakaila kaniya? Unsa nga mga pagbati ug pagpamatuod ikaw aduna mahitungod ni Propeta Joseph Smith?
Seksyon 3
Unsaon nako pagtubag kon ako makasugat og impormasyon mahitungod ni Propeta Joseph Smith?
Bisan og ang buhat ni Joseph Smith sa pagpahiuli sa ebanghelyo wala pa kaayo magsugod, kini gipanagna nga daghan ang mosulti batok kaniya ug mopasangil kaniya og dautang mga buhat ug mga tuyo. Girekord ni Joseph Smith diha sa iyang kasaysayan ang usa ka panagna nga gihatag ni anghel Moroni sa dihang siya mipakita ngadto ni Joseph kaniadtong 1823. Niana nga panahon, si Joseph 17 anyos pa lamang ang panuigon.
Pagtuon agi og Pagpangandam alang sa Klase
Tun-i ang Joseph Smith—Kasaysayan 1:33.
Si Elder Neil L. Andersen sa Korum sa Napulog Duha Ka mga Apostoles misugyot og mga paagi nga ang mga Santos sa Ulahing mga Adlaw mahimong motubag ngadto sa mga pagsaway batok ni Propeta Joseph:
Angay ba kitang makurat sa dautang gisulti batok ni [Joseph Smith]? Si Apostol Pablo gitawag og buang ug nagsalimoang [tan-awa sa Mga Buhat 26:24]. Ang atong Pinalanggang Manluluwas, ang Anak sa Dios, gitawag nga ulitan, palahubog, ug giyawaan.[tan-awa sa Mateo 11:19; Juan 10:20]. …
Daghan niadtong misalikway sa buhat sa Pagpahiuli wala motuo nga ang langitnong mga binuhat nakig-istorya sa katawhan dinhi sa yuta. Imposible, moingon sila, nga bulawang mga palid gihatag sa usa ka anghel ug gihubad pinaagi sa gahum sa Dios. Tungod nianang kawalay pagtuo, dali nilang gisalikway ang pagpamatuod ni Joseph, ug ang pipila nakahimo gani sa pagpawalay-bili sa kinabuhi sa Propeta ug sa pagbutang-butang sa iyang pagkatawo. …
Sa mga pangutana bahin sa kinaiya ni Joseph, atong ipaambit ang mga pulong sa liboan nga personal nga nakaila niya ug mitugyan sa ilang kinabuhi alang sa buhat nga gitabangan niya og establisar. …
Mahimong atong pahinumduman ang sinserong nangutana nga ang impormasyon sa Internet walay salaan sa “kamatuoran”. Ang ubang impormasyon, bisan unsa pa ka makakumbinsir, dili gayud tinuod. …
Mahimong atong pahinumduman ang nangutana nga ang ubang impormasyon bahin ni Joseph, bisan tinuod, mahimong ipresentar nga lahi og kahulugan sa iyang panahon ug sitwasyon. …
Ang matag tumutuo nagkinahanglan og espirituhanong pagmatuod sa balaanong misyon ug kinaiya ni Propeta Joseph Smith. Kini tinuod sa tanang henerasyon. Ang espirituhanong mga pangutana nagkinahanglan og espirituhanong mga tubag gikan sa Dios. …
Ang pagpamatuod bahin ni Propeta Joseph Smith moabut nga lahi sa matag usa nato. Mahimong moabut kini samtang nagluhod kamo sa pag-ampo, naghangyo sa Dios sa pagmatuod nga siya tinuod nga propeta. Mahimong moabut kini samtang nagbasa kamo sa asoy sa Propeta bahin sa Unang Panan-awon. Usa ka pagpamatuod mahimong motuhop diha sa inyong kalag samtang magbalik-balik kamo og basa sa Basahon ni Mormon. … Uban sa hugot nga pagtuo ug tinuod nga katuyoan, ang inyong pagpamatuod kang Propeta Joseph Smith malig-on. (Neil L. Andersen, “Joseph Smith,” Liahona, Nob. 2014, 28–30)
Pamalandong agi og Pagpangandam alang sa Klase
Ngano kaha nga kini importante sa paglakip og usa ka pagtuon sa kasaligang tinubdan uban ang pag-ampo kon nagtinguha sa pagtubag sa mga pangutana mahitungod ni Joseph Smith ug sa iyang propetikanhong misyon? Ngano kaha nga ang mga pangutana mahitungod ni Joseph Smith ug sa iyang propetikanhong misyon angay sa espiritwal nga mga tubag gikan sa Dios?