“Pasiuna sa Materyal sa Magtutudlo alang sa Mga Pundasyon sa Pagpahiuli (Religion 225),” Materyal sa Magtutudlo alang sa Mga Pundasyon sa Pagpahiuli (2019)
“Pasiuna sa Materyal sa Magtutudlo alang sa Mga Pundasyon sa Pagpahiuli (Religion 225),” Materyal sa Magtutudlo alang sa Mga Pundasyon sa Pagpahiuli
Pasiuna sa Materyal sa Magtutudlo alang sa Mga Pundasyon sa Pagpahiuli (Religion 225)
Pasiuna sa Materyal sa Magtutudlo alang sa Mga Pundasyon sa Pagpahiuli (Religion 225)
Welcome sa Mga Pundasyon sa Pagpahiuli! Salamat sa pagdawat sa oportunidad sa pagtabang sa imong mga estudyante nga mas mapalambo ang ilang pagkakabig ngadto ni Jesukristo ug sa Iyang gipahiuli nga ebanghelyo.
Ang Tumong sa Seminaries and Institutes of Religion namahayag:
Ang atong katuyoan mao ang pagtabang sa kabatan-onan ug mga young adult nga makasabut ug makasalig sa mga pagtulun-an ug Pag-ula ni Jesukristo, makasarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit. (Pagtudlo ug Pagkat-on sa Ebanghelyo: Usa ka Handbook alang sa mga Magtutudlo ug sa mga Lider sa Seminaries and Institutes of Religion [2012], 1)
Unsa ang mga katuyoan niini nga kurso?
Kini nga kurso gihimo aron sa pagtabang sa mga estudyante nga:
-
Mapalig-on ang ilang pagpamatuod kang Jesukristo ug sa Iyang gipahiuli nga ebanghelyo.
-
Mapalambo ang ilang tinguha ug paningkamot sa pagsunod sa mga baruganan ug doktrina sa ebanghelyo ug mas mahisama sa Langitnong Amahan ug ni Jesukristo.
-
Makagamit sa mga baruganan sa pag-angkon og espirituhanong kahibalo ug makabaton og kasinatian sa pagtimbang-timbang sa mga tinubdan sa impormasyon.
-
Makaila ug makapasabut sa sukaranang doktrina, pagpadayag, ug makasaysayanong mga panghitabo sa Pagpahiuli.
Giunsa man paghimo kini nga manwal?
Ang mga sulod [content] niini nga manwal gihimo aron sa pagtabang sa mga estudyante nga makabaton og makahuluganon, makapalig-on nga mga kasinatian sa gawas ug sa sulod sa klasehanan. Ang matag leksyon gilangkuban sa materyal sa pagpangandam ug materyal sa magtutudlo.
Materyal sa Pagpangandam
Ang materyal sa pagpangandam gituyo aron tun-an nimo ug sa imong mga estudyante agig pagpangandam alang sa klase. Naglakip kini sa may kalabutan nga makasaysayanong konteksto ug mga hulagway, mga pagtulun-an gikan sa mga kasulatan ug mga lider sa Simbahan, ug usa ka “Gusto pa ba Mo og Dugang?” nga seksyon nga nagtino sa dugang nga mga kapanguhaan nga may kalabutan sa leksyon.
Ang materyal sa pagpangandam naglangkob usab og mga pangutana ug mga kalihokan nga gitumong aron sa pagtabang nga mapalambo ang mga kasinatian sa pagkat-on sa mga estudyante diha sa klase. Pananglitan, diha sa materyal sa pagpangandam alang sa leksyon 6, “Ang Basahon ni Mormon—ang Sukaranang Bato sa Atong Relihiyon,” ikaw ug ang imong mga estudyante hatagan og oportunidad nga tun-an ang mga pagtulun-an gikan sa mga lider sa Simbahan kalabut kon sa unsang paagi nga ang Basahon ni Mormon nakatabang kanato nga mas mapaduol sa Dios ug nakapanalangin sa atong kinabuhi sa dugang nga mga paagi:
Sa unsang paagi nga ang pagtuon ug pagsunod sa mga pagtulun-an nga makita diha sa Basahon ni Mormon nakatabang nimo nga mas mapaduol sa Dios? Unsa ang pipila ka mga tudling sa kasulatan gikan sa Basahon ni Mormon nga nakatabang nimo nga mas mahisama Kaniya? Irekord ang imong mga tubag niining mga pangutana diha sa luna nga giandam. Adto sa klase nga andam mopaambit sa imong mga hunahuna.
Si Elder Kim B. Clark sa Seventy nagtudlo mahitungod sa pagpangandam ug sa sinsero nga paningkamot nga gikinahanglan aron makat-on og maayo:
Kon tinud-anay kamong magtinguha nga makat-on og maayo, kon ang inyong kasingkasing ug hunahuna andam modawat sa pagkat-on, ug kon lihukon ninyo kana nga tinguha, ang Ginoo mopanalangin kaninyo. Kon buhaton ninyo ang inyong bahin—mag-ampo diha sa hugot nga pagtuo, mangandam, magtuon, aktibong moapil, ug mobuhat sa inyong labing maayo—ang Espiritu Santo motudlo kaninyo, mopalambo sa inyong kapasidad sa pagbuhat sa unsay inyong nakat-unan, ug motabang kaninyo nga mamahimo kon unsay gusto sa Ginoo nga kamo mamahimo. (“Pagkat-on alang sa Tibuok Kalag,” Liahona, Ago. 2017, 32)
Materyal sa Magtutudlo
Ang materyal sa magtutudlo gihimo aron sa pagtabang sa mga magtutudlo sa pagdapit sa mga estudyante nga hisgutan kon unsay ilang nakat-unan sa ilang pagpangandam ug sa pagtabang sa mga estudyante nga mapalambo ang ilang panabut ug pagpamatuod bahin sa Ginoo ug sa Iyang gipahiuli nga ebanghelyo. Diha sa pasiuna alang sa matag leksyon imong makita ang usa ka deskripsyon sa gitinguha nga mga resulta sa leksyon. Gisundan kini sa gisugyot nga mga ideya sa pagtudlo nga naghatag og estruktura sa leksyon, sulod [content], mga tabang sa panaghisgutan, ug mga ideya sa paggamit.
Ang mosunod maoy usa ka ehemplo kon sa unsang paagi nga ang materyal sa magtutudlo migamit sa impormasyon gikan sa pagpangandam sa mga estudyante, usab gikan sa leksyon 6:
Bahina ang mga estudyante ngadto sa gagmay nga mga grupo, ug dapita sila nga mopaambit ug mopasabut sa mga tudling sa Basahon ni Mormon nga nakatabang kanila nga mas mapaduol sa Dios. (Ang mga estudyante nga nagtuon sa materyal sa pagpangandam makatan-aw sa unsay ilang gisulat sa katapusan sa seksyon 4.) Mahimo usab nimong dapiton ang mga estudyante sa paghisgot diha sa ilang mga grupo kon sa unsang paagi nga ang pagsunod sa mga pagtulun-an nga narekord diha sa mga tudling nga ilang gipili nakatabang kanila nga mas mahisama ni Jesukristo.
Samtang magbasa ka sa mga leksyon niini nga manwal, bantayi kon sa unsang paagi nga ang materyal sa magtutudlo kanunay nga magamit sa impormasyon gikan sa pagpangandam sa estudyante. Ang padayon nga pagsalig sa pagpangandam sa mga estudyante makatabang kanila nga mobati sa kaimportante sa pagpangandam alang sa matag klase.
Ang materyal sa magtutudlo nagpakita usab sa mga sukaranan sa pagtudlo ug pagkat-on sa ebanghelyo (tan-awa sa Pagtudlo ug Pagkat-on sa Ebanghelyo [Gospel Teaching and Learning], 10, 23–31, 38–41). Naglakip kini sa pagtabang sa mga estudyante nga makaila, makasabut, ug mobati sa kamatuoran ug sa kaimportante sa doktrina ug mga baruganan sa ebanghelyo ni Jesukristo, ingon man usab sa pagdapit kanila nga mopasabut, mopaambit, ug mopamatuod.
Pamalandong agig Pagpangandam sa Pagtudlo Niini nga Kurso
Paggahin og mubo nga higayon nga motan-aw sa usa o duha ka leksyon aron mapamilyar kon giunsa ang pagpangandam ug ang materyal sa magtutudlo paghimo aron dungan nga magamit samtang mangandam ka sa pagtudlo. Unsa ang pipila ka mga paagi nga mahimo kang makatabang sa mga estudyante nga maandam aron makabaton sila og mas buhong nga kasinatian diha sa klase?
Unsaon nako pagpokus sa mga estudyante ug pagtabang kanila nga makabaton og makahuluganon nga kasinatian niini nga kurso?
Mapanalanginan nimo ang imong mga estudyante pinaagi sa paglaum ug pag-awhag kanila nga motuman sa ilang tahas isip mga tigkat-on diha sa gawas ug sa sulod sa klasehanan. Ang pipila ka mga paagi nga imo kining mahimo mao ang pagsalig sa pagpangandam sa mga estudyante, pagdapit kanila nga mangutana mahitungod sa materyal sa pagpangandam o sa hilisgutan sa leksyon, paghatag kanila og mga oportunidad sa pagpasabut sa doktrina ug mga baruganan sa ilang kaugalingong mga pulong ug sa pagpaambit og may kalabutan nga mga kasinatian ug pagpamatuod, ug pagdapit kanila nga mas hingpit nga motuman sa mga kamatuoran sa gipahiuli nga ebanghelyo.
Si Elder Jeffrey R. Holland sa Korum sa Napulog Duha ka mga Apostoles nagtudlo:
Mahimo kitang mas gamhanan nga mga magtutudlo kay sa kon unsa kita usahay. Sa pag-atubang sa ingon ka lisud nga tahas, palihug … hinumdumi nga ang usa ka estudyante dili usa ka sudlanan nga pun-on; ang usa ka estudyante usa ka kalayo nga pasigahon. (Jeffrey R. Holland, “Angels and Astonishment” [Church Educational System Training Broadcast, Hunyo 12, 2019], ChurchofJesusChrist.org/broadcasts/article/article/2019/06/14holland)
Ang estruktura sa leksyon nga gisugyot diha sa materyal sa magtutudlo kinahanglang makatabang nimo sa paghatag og igong panahon diha sa klase aron ang mga estudyante makaila ug makasunod sa espirituhanong mga pag-aghat. Ang mga materyal kinahanglang makatabang usab nimo sa pagdapit sa mga estudyante nga gamiton ang unsay ilang nakat-unan ug mas mahisama sa atong Langitnong Amahan ug ni Jesukristo. Ikonsiderar kini nga ehemplo gikan sa leksyon 19, “Katubsanan sa mga Patay”:
Mahimo nimong dapiton ang mga estudyante sa paghunahuna og usa ka tawo nga ilang mahangyo sa pagtudlo nila sa paghimo sa family history. Kon ang pipila ka mga estudyante hanas na sa paghimo sa family history, dapita sila sa pagtudlo sa ilang kauban diha sa klase. Kon itugot sa panahon, mahimo usab nga ipakita nimo sa mga estudyante ang website sa family history sa ChurchofJesusChrist.org/family-history ug awhaga sila sa pagsusi niini nga site alang sa dugang nga mga ideya kon unsaon aron mas malambigit sa family history.
Ipaambit ang mosunod nga pamahayag ni Presidente Russell M. Nelson:
Imbitaron ko kamo sa pagkonsiderar sa mainampuong paagi unsa nga matang sa sakripisyo, ug ilabi na sa sakripisyo sa panahon, ang inyong mahimo aron makatrabaho pa og dugang sa buhat sa family history ug sa templo niining tuiga. (Russell M. Nelson, RootsTech Family Discovery Day—Opening Session 2017, ChurchofJesusChrist.org)
Tapusa pinaagi sa pagdapit sa mga estudyante nga mainampuong mamalandong ug dayon isulat kon unsang piho nga mga sakripisyo ang ilang pagahimoon o piho nga mga lakang nga ilang pagabuhaton aron mas hingpit nga makaapil sa family history ug tulumanon sa templo.
Kini nga kurso gihimo nga molungtad og usa ka semester nga kurso nga adunay 28 ka mga leksyon nga gisulat alang sa 50 ka minuto nga mga panahon sa klase [class period]. Kon ang inyong klase mag-abut kausa lamang matag semana sulod sa 90 ngadto sa 100 ka minutos, ihiusa ug itudlo ang duha ka leksyon sa matag panahon sa klase. Imbis nga mabalaka unsaon nga matudlo ang tanang sulod [content] sa materyal sa magtutudlo, pag-focus hinoon sa pagtabang sa mga estudyante nga mapalambo ang ilang panabut sa doktrina o mga baruganan nga may kalabutan gayud ngadto nila ug sa pagtabang nila nga mas hingpit nga mosunod nianang mga kamatuoran.
Pamalandong agig Pagpangandam sa Pagtudlo Niini nga Kurso
Unsa ang pipila ka mga paagi nga ikaw makaawhag sa mga estudyante nga mopaambit diha sa klase sa unsay ilang nakat-unan gikan sa ilang pagpangandam? Unsay imong mabuhat aron maapil ang mga estudyante nga wala magtuon sa materyal sa pagpangandam?
Unsaon nako aron epektibong makapangandam sa pagtudlo?
Ang Langitnong Amahan motabang nimo samtang mangandam ka ug magtudlo sa Iyang mga anak. Ang imong mga paningkamot nga makugihong mosunod sa ebanghelyo makatabang nimo aron mahimong kwalipikado alang sa Espiritu diha sa imong pagpangandam sa pagtudlo.
Samtang mangandam ka, ikonsiderar ang mga paagi nga tukma nimong mapahiangay ang materyal sa magtutudlo aron matubag ang mga panginahanglan ug mga kahimtang sa imong mga estudyante. Sunda kining tambag gikan ni Presidente Dallin H. Oaks sa Unang Kapangulohan sa paghimo og mga pagpahiangay:
“Si Presidente [Boyd K.] Packer kanunay nakong nadungog nga nagtudlo, nga una hangupon nato, dayon atong ipahiangay. Kon hingpit kita nga pamilyar sa gitakda nga leksyon nga atong ihatag, nan makasunod kita sa Espiritu aron sa pagpahiangay niini. Apan adunay tintasyon, kon maghisgot kita kabahin niini nga pagpailin-ilin,pinaagi sa pagsugod diha sa pagpahiangay imbis nga mohangup. Usa kini ka pagbalanse. Usa kini ka nagpadayon nga hagit. Apan maayong paagi kon himoon og una ang paghangup ug dayon pagpahiangay aron magpabilin diha sa lig-on nga sukaranan. (Dallin H. Oaks, “A Panel Discussion with Elder Dallin H. Oaks” [sibya sa satellite sa Seminaries and Institutes of Religion, Ago. 7, 2012], broadcasts.ChurchofJesusChrist.org)
Tingali makatabang kanimo ang pagpangutana sa imong kaugalingon sa mosunod nga mga pangutana isip kabahin sa imong pagpangandam sa pagtudlo:
-
Nag-ampo ba ko aron makadawat sa giya sa Espiritu Santo?
-
Nagtuon ba ko sa materyal sa pagpangandam?
-
Mibati ba ko nga andam sa pagtudlo base sa materyal sa magtutudlo? Aduna bay bisan unsang butang nga kinahanglan nakong ipahiangay aron matubag ang mga panginahanglan sa akong mga estudyante?
-
Unsaon nato aron epektibong makakat-on gikan sa mga kasulatan diha sa klase?
-
Unsaon nako pagtabang ang mga estudyante aron makapokus sa Manluluwas ug makakat-on gikan sa Espiritu Santo niini nga leksyon?
-
Unsaon nako aron epektibo gayud nga makatabang sa akong mga estudyante nga makakat-on, makasabut, ug molambo sa ilang pagpamatuod bahin sa mga baruganan kalabut niining mga aspeto sa ebanghelyo?
-
Unsay akong mabuhat aron makahuluganong maapil ang unsay nakat-unan sa mga estudyante gikan sa ilang pagpangandam sa klase ug sa ilang kasinatian sa kinabuhi?
-
Unsaon nako sa pagtabang ang matag usa sa akong mga estudyante aron mapuno gayud sa kadasig sa pagsalmot sa leksyon?
-
Unsaon nako paglain-lain ang mga kalihokan sa pagkat-on ug mga pamaagi nga akong gamiton sa matag klase?
-
Unsaon nato pagmugna og kahimtang sa pagkat-on nga makadapit sa Espiritu ug makahatag sa mga estudyante sa pribilehiyo ug responsibilidad sa pagtudlo ug pagkat-on gikan sa usag usa? (Tan-awa sa Doktrina ug mga Pakigsaad 88:78, 122.)
Unsaon nako sa pagpahiangay sa mga leksyon alang niadtong may mga kakulangan?
Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga gilaumang mahitabo aron maapil sila ug matabangan sila nga molampus (tan-awa sa Disability Resources nga page sa disabilities.ChurchofJesusChrist.org).
Irekord ang Imong mga Hunahuna
Ikonsiderar ang matang sa kasinatian nga imong gilauman nga mabatunan sa imong mga estudyante niini nga kurso. Ilista ang pipila sa imong mga hunahuna kon sa unsang paagi nga nagplano ka nga makatabang nila nga makabaton og makahuluganon nga kasinatian sa pagkat-on.
Unsa ang gilauman gikan sa mga estudyante aron makadawat og credit?
Aron makadawat og credit ngadto na sa paggradwar sa institute, ang mga estudyante gikinahanglan nga:
-
Magtuon sa materyal sa pagpangandam sa dili mominos sa 75 porsyento sa mga leksyon.
-
Motambong og 75 porsyento sa mga klase nga gipahigayon.
-
Mokompleto sa usa sa tulo ka mga kasinatian sa pagkat-on: pagtipig og study journal, pagsulat og mga tubag sa tulo ka mga pangutana nga essay, o mohimo ug mokompleto og usa ka kaugalingon nilang proyekto sa pagkat-on [learning project] (nga adunay pagtugot sa magtutudlo) nga may kalabutan sa sulod [content] sa kurso. Pangita og dugang nga mga detalye dinhi: ChurchofJesusChrist.org/si/institute/learning-experiences.
Kon ang mga estudyante morekord sa mga tubag sa tanang mga pangutana ug mga kalihokan diha sa materyal sa pagpangandam, matuman usab niini ang gikinahanglan nga kasinatian sa pagkat-on. Wala kinahanglana nga isumiter sa mga estudyante ang ilang mga tubag nganha nimo. Sa katapusan sa semester kinahanglan lamang nila nga ipakita kon unsay ilang nakompleto.