Leksyon 6 Materyal sa Magtutudlo

Ang Basahon ni Mormon—ang Sukaranang Bato sa Atong Relihiyon

Mipahayag si Propeta Joseph Smith nga “ang Basahon ni Mormon mao ang sukaranan sa atong tinuohan” (pasiuna sa Basahon ni Mormon). Kini nga leksyon gihimo aron matabangan ang mga estudyante nga mapasabut ngano nga ang Basahon ni Mormon mao ang sukaranang bato sa atong relihiyon ug sa pagpalig-on sa ilang abilidad sa pagtubag sa mga pagpanaway batok niini.

Mga Sugyot alang sa Pagtudlo

PAGPALAMBO SA ATONG PAGTUDLO UG PAGKAT-ON

Mag-focus sa mga estudyante. Samtang kamo magtudlo, hinumdumi sa pag-focus sa indibidwal nga mga panginahanglan sa mga estudyante. Pagmabinantayon nga ang materyal sa leksyon dili mahimong mas importante pa kay sa mga estudyante diha sa lawak klasehanan. Ipadayon sa pag-assess ang pag-apil sa mga estudyante ug itugot ang pagpailin-ilin sa panaghisgutan sa pagtubag sa ilang mga panginahanglan.

Ang Basahon ni Mormon importante sa Simbahan sa Dios ug sa atong mga pagpamatuod.

Tingali sugdan nimo ang klase pinaagi sa paggunit og kopya sa Basahon ni Mormon ug paghisgot sa makadiyot mahitungod sa mosunod nga pamahayag ug pangutana:

Daghan sa mga pang-ataki nga gikan sa mga kritiko sa Simbahan nagtumong sa Basahon ni Mormon. Ngano kaha nga ingon man niana?

Dapita ang mga estudyante sa pag-abli o pagsusi sa pasiuna nga pahina sa Basahon ni Mormon. Ipasabut nga niadtong Dominggo, sa Nobyembre 28, 1841, si Propeta Joseph Smith migahin sa adlaw sa pagpakigtambag sa Napulog Duha ka mga Apostoles didto sa balay ni Brigham Young, presidente niana nga korum (tan-awa sa History, 1838–1856 [Manuscript History of the Church], volume C-1, 1255, josephsmithpapers.org). Hangyoa ang usa ka estudyante sa pagbasa og kusog sa ikaunom nga parapo sa pasiuna sa Basahon ni Mormon aron masusi unsa ang gisulti ni Joseph sa mga Apostoles. Dapita ang mga estudyante sa pagkonsiderar nga markahan ang mga kamatuoran nga gitudlo ni Joseph.

• Duna bay andam nga mopakigbahin sa ilang mga hunahuna o pagpamatuod sa bisan hain niini nga mga pagtulun-an? (Pahinumdom: Samtang motubag ang mga estudyante, ikonsiderar ang mosunod nga mga ideya sa pagtudlo aron matabangan sila nga makasabut sa mga kamatuoran nga gitudlo ni Joseph sa Napulog Duha.)

Ang Basahon ni Mormon mao ang labing tukma sa bisan hain nga basahon dinhi sa yuta.

Kon gikinahanglan, tabangi ang mga estudyante nga makasabut sa mga pulong nga “ang Basahon ni Mormon mao ang labing tukma sa bisan hain nga basahon dinhi sa yuta” pinaagi sa paggamit sa impormasyon nga makita sa seksyon 2 sa materyal sa pagpangandam.

Mahimo usab nga imong ipasabut ngadto sa mga estudyante nga ang pamahayag ni Joseph Smith wala magpasabut nga ang naimprinta nga mga edisyon sa Basahon ni Mormon wala nay mga sayop. Ang mga koreksyon gihimo sa matag edisyon sa Basahon ni Mormon sukad niadtong 1829. Ang mga koreksyon mao ang gagmay nga mga kausaban sa pulong o mga kausaban sa spelling, punctuation, o pag-capital. Ang paggamit sa pulong nga tukma niini nga pamahayag nagpasabut sa gamhanang mga kamatuoran nga anaa sa Basahon ni Mormon apan wala kana magpasabut nga ang naimprinta nga teksto wala nay sayop.

Ang Basahon ni Mormon mao ang sukaranan sa atong tinuohan.

Samtang ang mga estudyante mohisgot nga ang Basahon ni Mormon mao “ang sukaranang bato sa atong relihiyon,” mahimo kang mopakita og litrato sa usa ka sukaranang bato, sama nianang anaa sa materyal sa pagpangandam. Dapita ang mga estudyante sa pagpasabut ngano kaha nga ang sukaranang bato usa ka maayong simbolo alang sa Basahon ni Mormon.

Dapita ang mga estudyante sa pagbasa o pag-summarize sa pamahayag ni Presidente Ezra Taft Benson diha sa seksyon 3 sa materyal sa pagpangandam. (Kini nga pamahayag nagpasabut og tulo ka paagi nga ang Basahon ni Mormon mao ang sukaranang bato sa atong relihiyon.) Ikonsiderar ang pagpangutana sa pipila o sa tanan sa mosunod nga mga pangutana aron matabangan ang mga estudyante nga mapalawman ang ilang pagsabut sa mga pagtulun-an ni Presidente Benson mahitungod sa Basahon ni Mormon nga mao ang sukaranang bato.

• Sa unsang paagi nga ang Basahon ni Mormon nakapalig-on sa inyong pagpamatuod sa Manluluwas nga si Jesukristo?

• Sa unsa nga mga paagi nga ang Simbahan mobarug o mapukan uban sa kamatuoran sa Basahon ni Mormon?

• Sa unsang paagi ang inyong pagpamatuod sa Basahon ni Mormon nakapalig-on sa inyong pagpamatuod sa ubang doktrina ug mga pagtulun-an sa Simbahan?

• Ang Basahon ni Mormon nahimo bang sukaranang bato sa inyong kaugalingon nga pagpamatuod? Kon mao, giunsa man?

Kita makapaduol ngadto sa Dios pinaagi sa pagsunod sa mga pagtulun-an sa Basahon ni Mormon.

Bahina ang mga estudyante ngadto sa gagmay nga mga grupo, ug dapita sila sa pagpakigbahin ug pagpasabut sa mga tudling sa Basahon ni Mormon nga nakatabang nila nga mahiduol sa Dios. (Ang mga estudyante nga nakatuon sa materyal sa pagpangandam mahimong mogamit sa unsay ilang gisulat sa katapusan sa seksyon 4.) Mahimo usab nga imong dapiton ang mga estudyante sa paghisgot diha sa ilang grupo kon sa unsa nga paagi nga ang pagsunod sa mga pagtulun-an nga narekord diha sa mga tudling nga ilang napili nakatabang nila nga mas mahisama ni Jesukristo.

Ang mga kaaway sa Simbahan misulay sa pagdaot sa Basahon ni Mormon.

Ipakita ang mosunod nga pamahayag ni Brother Tad R. Callister, kanhi Kinatibuk-ang Presidente sa Sunday School, ug dapita ang usa ka estudyante sa pagbasa niini og kusog:

[Ang Basahon ni Mormon] mao ang kabug-aton sa usa ka bahin sa timbangan sa kamatuoran nga labaw pa sa gihiusang kabug-aton sa mga argumento sa mga kritiko. Ngano? Tungod kay kon kini tinuod, nan si Joseph Smith usa ka propeta ug mao kini ang gipahiuli nga Simbahan ni Jesukristo, dili igsapayan ang bisan unsa pa nga historikal o ubang mga argumento nga sukwahi niini. Tungod niini nga rason, ang mga kritiko nagtinguha sa paghimakak sa Basahon ni Mormon, apan ang mga babag nga ilang giatubang hilabihan ka dako, tungod kay kining basahon tinuod. (“Gamhanang Saksi sa Dios: Ang Basahon ni Mormon,” Liahona, Nob 2017, 107)

Tabangi ang mga estudyante sa pagsusi sa mosunod nga kasaligan nga mga kapanguhaan sa elektronik nga paagi, o hatagi sila og mga kopya nga papel alang kanila kon gikinahanglan. Bahina ang mga kapanguhaan ngadto sa mga estudyante, ug hangyoa sila sa paghunahuna ug pagpangita sa pipila sa mga argumento nga gihimo sa mga kritiko batok sa Basahon ni Mormon ug sa pagkonsiderar kon unsaon nato sa paggamit ang mosunod nga mga kapanguhaan sa pagtubag sa maong mga pagpanaway samtang kita magtinguha sa pag-angkon og espirituhanong kahibalo ug pagpalambo sa pagpamatuod. Hangyoa ang mga estudyante sa pag-report sa pipila sa unsay ilang makit-an. Mahimo nila kining himoon sa gagmay nga mga grupo o isip usa ka klase.

• Mormon 8:14–22. Gitapos ni Moroni ang rekord sa iyang amahan nga si Mormon uban sa pasidaan ngadto niadtong kinsa mosaway sa Basahon ni Mormon sa katapusang mga adlaw.

• Ether 12:23–29. Mipadayag si Moroni og kabalaka nga ang pipila mosaway sa kahuyang sa iyang pagsulat ug mapakyas sa pagsabut sa gahum sa mensahe sa Basahon ni Mormon.

• Tad R. Callister, “Gamhanang Saksi sa Dios: Ang Basahon ni Mormon,” Liahona, Nob. 2017, 107–9. (Mahimo nimong gamiton ang unang katunga lang sa pakigpulong ni Brother Callister.)

• “Mga Kritiko sa Basahon ni Mormon,” Mga Hisgutanan sa Kasaysayan sa Simbahan, history.ChurchofJesusChrist.org.

• Jeffrey R. Holland, “Kasiguroan alang sa Kalag,”Liahona, Nob. 2009, 88–90. (Mahimo nimong tun-an ang ikaduhang katunga lang sa pakigpulong ni Elder Holland.)

Human maghisgot ang mga estudyante unsay ilang nakit-an, ipangutana ang usa o daghan sa mosunod nga mga pangutana:

• Ngano kaha nga ang Dios dili man basta lang mohatag og kompleto nga pisikal nga ebidensya nga ang Basahon ni Mormon tinuod?

• Unsa nga tambag ang inyong ihatag sa usa ka higala o sakop sa pamilya kinsa motug-an kaninyo nga siya nakigbisog sa mga pagpanaway sa Basahon ni Mormon? Unsa pay inyong mahimo sa pagtabang?

• Unsay inyong buhaton (o unsay inyong mahimo) kon daw wala pay maayong tubag sa pagpanaway nga inyong nadunggan?

Hatagi og pipila ka minuto ang mga estudyante sa pagkonsiderar sa kaepektibo sa ilang personal nga pagtuon sa Basahon ni Mormon ug sa paghimo og mga plano alang sa mga kausaban nga giaghat sa Espiritu. Awhaga ang mga estudyante nga ilakip diha sa ilang mga plano ang tumong sa pagtuon ug pag-ampo kon gikinahanglan aron sa pagsiguro nga ang Basahon ni Mormon maoy sukaranang bato sa ilang pagpamatuod. Samtang sila mamalandong, mahimo nimong ipakita ang mosunod nga pamahayag ni Elder Kevin W. Pearson sa Seventy:

Kon kamo nanlimbasug, naglibug, o espirituhahong nawala, moawhag ko ninyo sa pagbuhat sa butang nga akong nahibaloan nga makapabalik ninyo. Sugdi pag-usab sa mainampoong paagi ang pagtuon sa Basahon ni Mormon ug sunda ang mga pagtulun-an niini kada adlaw, kada adlaw, kada adlaw! Mopamatuod ko sa dakong gahum sa Basahon ni Mormon nga makausab sa inyong kinabuhi ug makalig-on sa inyong tinguha sa pagsunod ni Kristo. Ang Espiritu Santo mousab sa inyong kasingkasing ug motabang ninyo nga makakita sa “mga butang ingon nga sila gayud mao” [Jacob 4:13]. Mopakita Siya ninyo unsay inyong sunod nga buhaton. (Kevin W. Pearson, “Pagpabilin diha sa Ebanghelyo,” Liahona, Mayo 2015, 116)

Dapita ang pipila ka estudyante kinsa gusto nga mopakigbahin og mubo nga pagpamatuod sa Basahon ni Mormon sa pagbuhat niini. Mahimo ka usab nga mopakigbahin sa imong pagpamatuod.

Alang sa Sunod nga Higayon

Hangyoa ang mga estudyante sa pagkonsiderar kon makapila sila makasinati sa mga panalangin sa awtoridad sa pagkapari ug mga yawe sa pagkapari matag semana. Awhaga sila sa pagtuon sa materyal sa pagpangandam alang sa sunod nga leksyon sa pagpahiuli sa pagkapari ug sa pagpangita kon sa unsa nga paagi nga ang pagkapari makahatag nila og access sa makaluwas nga mga gahum ni Jesukristo.