Leksyon 9 Materyal sa Magtutudlo

Jesukristo: Atong Balaan nga Manunubos

Isip kabahin sa Pagpahiuli, si Joseph Smith ug ang mga Santos gitudloan og mas tukmang paagi mahitungod sa kinaiya ug misyon ni Jesukristo. Niini nga leksyon, ang mga estudyante adunay mga oportunidad sa pagpalig-on sa ilang pagtuo sa Manluluwas ug sa Iyang Pag-ula ug sa pagtino unsaon nga mas hingpit nga madapit ang Iyang gahum ngadto sa ilang kinabuhi.

Mga Sugyot alang sa Pagtudlo

Si Joseph Smith nakakat-on mahitungod sa kinaiya ni Jesukristo.

Ipakita ang imahe nga nagpakita sa Unang Panan-awon. Pahinumdumi ang mga estudyante nga usa sa mga katuyoan ni Joseph Smith sa pag-ampo niini nga higayon mao ang pagpangutana sa Dios asa nga simbahan ang apilan (tan-awa sa Joseph Smith—Kasaysayan 1:13–19). Sa iyang 1832 nga istorya bahin sa panan-awon, hinoon, si Joseph naghisgot og laing rason sa iyang pag-adto sa kakahoyan aron mag-ampo nianang adlawa.

Dapita ang usa ka estudyante sa pagbasa og kusog sa unang parapo sa seksyon 1 sa materyal sa pagpangandam.

Hatagi ang mga estudyante og mubo nga higayon sa paghunahuna mahitungod sa mga panahon sa ilang kinabuhi sa dihang sila nahasol sa ilang mga sala ug mga kahuyang. Dayon hangyoa ang mga estudyante sa pagbasa og hilom sa ikaduha ug ikatulo nga parapo sa seksyon 1 sa materyal sa pagpangandam.

• Unsay nakat-unan ni Joseph mahitungod sa kinaiya sa Langitnong Amahan ug ni Jesukristo? (Ang Langitnong Amahan ug si Jesukristo maloloy-on ug mapasayloon.)

Ipasabut nga si Joseph ug ang mga Santos nagpadayon sa pagkat-on mahitungod sa kinaiya ni Jesukristo pinaagi sa Iyang mga pagpadayag. Ipakita ang mosunod nga mga pakisayran, o isulat kini sa pisara: Doktrina ug mga Pakigsaad 3:10; 38:14; 58:42; 61:2; 62:1; 64:2–4. Hatagi ang mga estudyante og panahon sa pagbasa sa pipila sa mga tudling, ug hangyoa sila sa pagbasa nga ingon og ang Ginoo ang nakigsulti direkta ngadto kanila. Hangyoa sila sa pagkonsiderar sa unsa nga paagi nga ang mga pulong sa Manluluwas niini nga mga bersikulo makapalawom sa pagsabut sa Iyang maloloy-on ug mapasayloon nga kinaiya. Human sila makabasa, dapita ang mga estudyante sa pagpakigbahin unsay ilang nakat-unan.

• Ngano kaha nga importante alang kanato nga makasabut nga ang Langitnong Amahan ug si Jesukristo maloloy-on ug mapasayloon?

Ipasabut nga ang Unang Panan-awon ni Joseph Smith mao ang usa sa daghang mga kasinatian nga nakapaandam ni Joseph sa pagbarug isip usa ka gamhanang saksi ni Jesukristo. Pahinumdumi ang mga estudyante nga sumala ni Elder D. Todd Christofferson sa Korum sa Napulog Duha ka mga Apostoles, si Joseph Smith mao “ang nag-unang tigpadayag ni Jesukristo sa Iyang tinuod nga kinaiya isip balaan nga Manunubos” (D. Todd Christofferson, “Natawo Pag-usab,” Liahona, Mayo 2008, 79).

• Sa unsa nga paagi nga si Joseph Smith ug ang Pagpahiuli nakaimpluwensya sa inyong pagsabut ug mga pagbati mahitungod ni Jesukristo?

Ang Pag-ula ni Jesukristo parehong walay kinutuban ug personal.

Ipasabut sa mga estudyante nga ang pag-abut sa Basahon ni Mormon pinaagi ni Propeta Joseph Smith nagtugot sa kalibutan nga makasabut ni Jesukristo ug sa Iyang Pag-ula sa paagi nga wala mahimong posible sulod sa gatusan ka tuig. Apil sa daghang mga tudling nga nagtudlo nato bahin sa sakripisyo sa Manluluwas alang sa katawhan mao ang mga pagtulun-an ni Alma ug Amulek. Dapita ang mga estudyante sa pagbasa sa hilom sa Alma 34:10, 12, ug 14, nga mangita kon giunsa paghulagway ni Amulek ang maulaong sakripisyo sa Manluluwas. Hangyoa sila sa pagpaambit sa ilang nakit-an.

Drowinga o ipakita ang mosunod nga diagram:

• Sa unsa nga mga paagi nga ang Pag-ula sa Manluluwas “walay kinutuban ug walay katapusan”? (Awhaga ang mga estudyante sa paggamit kon unsay ilang nakat-unan gikan sa seksyon 2 sa materyal sa pagpangandam.)

Dapita ang mga estudyante sa pagbasa og kusog sa mosunod nga pamahayag ni Elder Cecil O. Samuelson Jr., kinsa miserbisyo sa Kapangulohan sa Seventy, ug hangyoa ang klase sa pagpaminaw sa mga pulong nga iyang gigamit sa paghulagway sa Pag-ula sa Manluluwas:

Ang Iyang Pag-ula sa tinuod milukop sa kalibutan ug sa tanan nga mga tawo gikan sa sinugdanan hangtud sa katapusan. Dili nato kalimtan, hinoon, nga sa iyang pagkamalukpanon ug pagkahingpit kini usab hilabihan ka personal ug walay sama nga gihulma aron hingpit nga mohaum ug hingpit nga gipatunong alang sa matag usa nato nga kaugalingong indibidwal nga mga kahimtang. Ang Amahan ug ang Anak mas nasayud sa matag usa kanato kaysa atong pagkasayud sa atong mga kaugalingon ug miandam sa Pag-ula alang kanato nga nahiangay gayud sa atong mga panginahanglan, mga hagit, ug mga kalagmitan.

Salamat ngadto sa Dios alang sa gasa sa Iyang Anak, ug salamat ngadto sa Manluluwas alang sa Iyang Pag-ula. Kini tinuod ug kini miepekto na ug modala kanato kon asa nato kinahanglan ug gustong moadto. (Cecil O. Samuelson Jr., “Unsa ang Kahulugan sa Pag-ula alang Kanimo?” Liahona, Abr. 2009, 51)

• Unsa nga mga pulong ang gigamit ni Elder Samuelson sa paghulagway sa Pag-ula sa Manluluwas?

Idugang diha sa diagram ang personal ug ang ubang mga pulong nga giila sa mga estudyante:

• Ngano kaha nga importante ang paghinumdom nga samtang ang maulaong sakripisyo sa Manluluwas moabut ngadto sa walay kinutuban nga gidaghanon sa mga tawo ug mga kalibutan, kini usab hilabihan ang ka personal?

Pahinumdumi ang mga estudyante nga sa seksyon 2 sa materyal sa pagpangandam, sila gidapit sa pagmarka sa mga kamatuoran nga importante ngadto kanila. Kon gikinahanglan, hatagi ang mga estudyante og panahon sa pagribyu sa mga tudling sa kasulatan ug sa mapanagnaong mga pagtulun-an nga ilang gimarkahan niini nga seksyon.

• Unsa nga mga kamatuoran ang importante kaninyo, ug ngano? (Ipakita kini nga mga kamatuoran o isulat kini diha sa pisara.)

Human motubag ang mga estudyante, ikonsiderar ang paghangyo kanila sa pagsulti pag-usab (ug pagsulat pag-usab) sa mga baruganan sa personal nga paagi, gamit ang first-person nga mga pronoun sama sa ako, kanako, ug akong. Ang mga kamatuoran tingali mabasa susama sa mosunod: Gidala ni Jesukristo Mismo ang akong mga sala, mga kasakit, mga sakit, ug mga tintasyon aron Siya makahibalo unsaon sa pagtabang kanako. Ang bili sa akong kalag dako kaayo nga si Jesukristo nag-antus ug nagpakamatay aron ako makahinulsol. Si Jesukristo nag-antus alang sa akong mga sala aron ako makahinulsol ug dili mag-antus sama Kaniya.

• Sa unsa nga paagi nga ang pagsabut ug pagtuo niini nga mga kamatuoran makatabang ninyo nga makabaton og mas dako nga pagtuo kang Jesukristo?

• Unsa nga mga hunahuna ug mga pagbati ang moabut ninyo samtang inyong ikonsiderar unsa ang giantus sa Manluluwas alang kaninyo ug ngano nga Siya mibuhat sa ingon?

Ipakita ang mosunod nga pangutana: Unsay akong buhaton aron mas hingpit nga madapit ang gahum ni Jesukristo sa akong kinabuhi?

Hatagi og panahon ang mga estudyante nga magmainampoong mamalandong niini nga pangutana ug mosulat og tubag diha sa ilang mga journal o mga notebook. Samtang sila mamalandong, ikonsiderar ang pagpakita sa mosunod nga pamahayag ni Presidente Russell M. Nelson. Dapita ang mga estudyante sa pagpangita sa tambag nga makatabang nila sa pagdapit sa gahum sa Manluluwas ngadto sa ilang kinabuhi:

Sugdan nato pinaagi sa pagkat-on mahitungod ni [Jesukristo]. “Malisud alang [kanato] nga maluwas diha sa pagkawalay alamag” [Doktrina ug mga Pakigsaad 131:6]. Kon mas masayud kita sa pangalagad ug misyon sa Manluluwas [tan-awa sa Doktrina ug mga Pakigsaad 76:40–41]—kon mas masabtan nato ang Iyang doktrina [tan-awa sa 2 Nephi 31:2–21] ug unsay Iyang gibuhat alang kanato—mas masayud kita nga Siya makahatag og gahum nga atong gikinahanglan sa atong kinabuhi. …

Samtang kita mopundar og panahon sa pagkat-on mahitungod sa Manluluwas ug sa Iyang maulaong sakripisyo, maagni kita sa pag-apil sa laing importanting elemento sa pag-access sa Iyang gahum: mopili kita sa pagbaton og pagtuo diha Kaniya ug mosunod Kaniya. …

Madugangan usab nato ang gahum sa Manluluwas sa atong kinabuhi kon mohimo kita og sagradong mga pakigsaad ug tukma nga motuman niana nga mga pakigsaad. Ang atong mga pakigsaad mobugkos kanato ngadto Kaniya ug mohatag kanato og diosnong gahum. …

Kon ang Manluluwas masayud nga gusto gayud ninyong modangup Kaniya—kon Iyang mabati nga ang inyong labing dakong tinguha mao ang pagdawat sa Iyang gahum nganha sa inyong kinabuhi—magiyahan kamo sa Espiritu Santo aron masayud kon unsa gayud ang kinahanglan ninyong buhaton [tan-awa sa Doktrina ug mga Pakigsaad 88:63]. (Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 39–42)

Tapusa pinaagi sa pagpamatuod nga tungod sa Iyang Pag-ula, si Jesukristo adunay gahum sa paglig-on, paghupay, pag-ayo, ug paghatag og kalooy ug pagpasaylo kanato.

Alang sa Sunod nga Higayon

Dapita ang mga estudyante sa paghunahuna mahitungod kon sa unsa nga paagi nga ang ilang kinabuhi lahi kon walay buhi nga mga propeta. Hangyoa ang mga estudyante sa pagtuon sa materyal sa pagpangandam alang sa sunod nga leksyon ug moabut nga andam nga mohisgot sa mga panalangin nga gigiyahan sa buhi nga mga propeta.