Leksyon 15 Materyal sa Magtutudlo

Ang Plano sa Langitnong Amahan ug ang Atong Balaang Potensyal

Gipadayag sa Ginoo ngadto ni Joseph Smith ang himaya sa Langitnong Amahan sa plano sa kaluwasan ug sa atong balaang potensyal nga mahisama Kaniya. Kini nga leksyon motabang sa mga estudyante sa paglig-on sa ilang pagpasalamat alang sa plano sa Amahan ug sa pagsabut pa og mas maayo kon kinsa sila ug unsa ang ilang mahimo sa pagkab-ut sa ilang balaang potensyal.

Mga Sugyot alang sa Pagtudlo

Nadawat ni Joseph Smith ang importanting mga kamatuoran kalabut sa plano sa kaluwasan.

Dapita ang mga estudyante sa pagpasabut unsay nasabtan sa kadaghanan sa mga Kristiyanos ug sa unang mga kinabig ngadto sa Simbahan mahitungod sa Dios ug sa kinabuhi human mamatay sa wala pa ihatag sa Ginoo ang mga pagpadayag mahitungod niini nga mga hisgutanan pinaagi ni Joseph Smith. (Mahimong gusto moribyu ang mga estudyante sa mga seksyon 1 ug 3 sa materyal nga pagpangandam.)

• Gikan sa imong nakat-unan diha sa materyal nga pagpangandam, kanus-a ug giunsa sa Ginoo sa pagpadayag og mga kamatuoran mahitungod sa plano sa kaluwasan ngadto ni Joseph Smith?

• Unsa ang pipila ka gipahiuli nga mga kamatuoran mahitungod sa plano nga sa imong hunahuna mahimo unta nga labing makapausab sa kinabuhi sa unang mga Santos? Hain narekord kini nga mga kamatuoran? (Tan-awa sa mga seksyon 1 ug 3 sa materyal nga pagpangandam.)

Samtang nagtubag ang mga estudyante sa nag-unang mga pangutana, mahimo nimo silang pabalikon sa pipila ka mga tudling sa kasulatan nga gihisgutan diha sa materyal nga pagpangandam, sama sa Moises 1:39 ug Abraham 3:22–26. Tabangi ang mga estudyante sa pag-ila ug pagpasabut sa mga kamatuoran sama sa mosunod: Ang buhat ug himaya sa Dios mao ang pagpahinabo sa pagkaimortal ug kinabuhing dayon sa tawo (tan-awa sa Moises 1:39). Mipuyo kita uban sa Langitnong Amahan isip mga espiritu sa wala pa kita matawo (tan-awa sa Abraham 3:22–23). Gilalang sa Ginoo ang yuta isip usa ka dapit diin kita makapili kon mosunod ba o dili sa Dios (tan-awa sa Abraham 3:24–25).

• Hunahunaa kon unsa kalahi ang imong kinabuhi kon ikaw wala makahibalo mahitungod sa plano sa Langitnong Amahan. Giunsa nimo pagkahibalo mahitungod sa plano nga nakaapekto sa paagi nga ikaw naghunahuna, naghimo og mga desisyon, ug naglihok?

Gitudlo ni Joseph Smith ang mahitungod sa atong balaang potensyal.

Ipasabut nga sa “Abril 7, 1844, mibarug si Joseph Smith aron sa pagpamulong nga mao ang iyang katapusan komperensya sa wala pa siya mamatay. Human naghangyo sa mga Santos alang sa ilang ‘kinasingkasing nga pagpaminaw,’ … mitudlo si Joseph mahitungod sa balaang kinaiyahan ug sa mahangturong pag-uswag” (“Pakigpulong ni King Follett,” Mga Hisgutanan sa Kasaysayan sa Simbahan, ChurchofJesusChrist.org/study/church-history).

Dapita ang usa ka estudyante sa pagbasa og kusog sa pamahayag ni Joseph Smith gikan sa iyang Pakigpulong ni King Follett nga makaplagan diha sa sinugdanan sa seksyon 2 sa materyal sa pagpangandam.

• Unsa ang imong makat-unan gikan sa mga pagtulun-an ni Joseph mahitungod sa imong relasyon ngadto sa Dios?

Ipasabut nga sa 1995, ang Unang Kapangulohan ug ang Korum sa Napulog Duha ka mga Apostoles miisyu og dokumento nga gitawag og “Ang Pamilya: Usa ka Pamahayag ngadto sa Kalibutan.” Diha niini sila mipahayag:

Ang tanan nga mga tawo—lalaki ug babaye—gilalang sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug padulngan. …

Sa kinabuhi nga wala pa dinhi sa yuta, ang espiritu nga mga anak nga lalaki ug mga babaye nakaila ug nagsimba sa Dios ingon nga ilang Amahan sa Kahangturan ug midawat sa Iyang plano diin ang Iyang mga anak makabaton og pisikal nga lawas ug makaangkon og yutan-on nga kasinatian sa pag-uswag ngadto sa kahingpitan ug sa katapusan makakab-ot sa ilang balaang padulngan ingon nga mga manununod sa kinabuhing dayon. (“Ang Pamilya: Usa ka Pamahayag ngadto sa Kalibutan,” ChurchofJesusChrist.org)

• Isip anak nga mga lalaki ug mga babaye sa Dios, unsa ang atong mahangturon nga potensyal? (Tabangi ang mga estudyante sa pag-ila og baruganan nga susama sa mosunod: Isip espiritu nga mga anak nga lalaki ug babaye sa Langitnong Amahan, kita adunay potensyal nga mahimong sama Kaniya.)

Ipakita o ipangutana ang mga mosunod, ug hatagi ang mga estudyante og usa o duha ka minuto sa pagpamalandong niini ug sa pagsulat og mga panghunahuna nga mahimong moabut diha kanila.

• Sa unsang paagi kini nga kamatuoran nag-impluwensya sa paagi sa imong pagtan-aw sa imong relasyon ngadto sa Langitnong Amahan? Sa unsang paagi kini nag-impluwensya sa paagi sa imong pagtan-aw sa imong kaugalingon ug niadtong nagpalibut kanimo? Sa unsa nga paagi kini nag-impluwensya sa paagi sa imong pagpuyo sa imong kinabuhi?

Gipakita ni Jesukristo kanato kon unsaon nga kita makadawat og kahingpitan sa himaya sa Dios diha sa celestial nga gingharian.

Isulat diha sa pisara o ipakita ang mga pulong Langit ug Impyerno, ug pangutan-a ang mga estudyante unsa ang labing kasagarang gituohan sa mga Kristiyanos sa ika-19 nga siglo mahitungod sa kinsa ang moadto sa matag usa.

Dapita ang mga estudyante sa paghinumdom kon unsay ilang nakat-unan gikan sa Doktrina ug mga Pakigsaad 76 mahitungod sa kinabuhi human sa kamatayon ug sa pag-angkon og celestial nga himaya. (Ang mga estudyante tingali nagkinahanglan nga moribyu sa Doktrina ug mga Pakigsaad 76:50–54.) Ikaw mahimo usab nga mangutana sa mga estudyante kon unsay ilang nakat-unan mahitungod sa Langitnong Amahan ug ni Jesukristo gikan sa mga kamatuoran nga gipadayag diha sa seksyon 76.

Ipakita ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Sa Simbahan makadungog ko og daghan nga nanglimbasug niini nga isyu: “Dili igo ang akong kamaayo.” “Daghan kaayo ko og mga kakulangan.” “Dili gayud igo ang akong katakus.” Makadungog ko niini gikan sa mga tin-edyer. Makadungog ko niini gikan sa mga misyonaryo. Makadungog ko niini gikan sa mga bag-ong kinabig. Makadungog ko niini gikan sa karaang mga miyembro. (Jeffrey R. Holland, “Busa, Kamo Kinahanglan Magmahingpit—sa Katapusan,” Liahona, Nob. 2017, 40)

Mahimong dapiton nimo ang mga estudyante sa paghunahuna og mga panahon sa ilang mga kinabuhi nga sila mibati og ingon niini nga paagi.

Dapita ang mga estudyante sa pagbasa sa Doktrina ug mga Pakigsaad 76:40–42, 69, mangita sa labing importanting tahas nga gihimo ni Jesukristo sa atong kaluwasan.

• Unsa ang tahas nga gihimo ni Jesukristo sa atong pagpaningkamot nga makabaton og kinabuhing dayon? (Tabangi ang mga estudyante sa pag-ila sa mosunod nga kamatuoran: Mahimo kita nga hingpit pinaagi lamang ni Jesukristo.)

• Ngano kaha nga importante ang paghinumdom nga ang kahingpitan ug kahimayaan moabut lamang pinaagi ni Jesukristo?

Basaha ang Doktrina ug mga Pakigsaad 93:12–13 uban sa klase, mangita alang sa unsay gitudlo sa tudling mahitungod sa dalan sa Manluluwas ngadto sa pagkahimong sama sa Langitnong Amahan.

• Unsa kaha ang gipasabut nga ang Manluluwas “nagpadayon sa pag-angkon og grasya ug dugang pa nga grasya hangtud siya nakadawat sa kahingpitan”?

• Sa unsa nga paagi ang ehemplo sa Manluluwas nagtabang kanimo sa pagbuntog sa mga pagbati nga nawad-an og kadasig samtang ikaw naningkamot alang sa kinabuhing dayon?

Ipakita ug basaha ang mosunod nga pamahayag ni Elder Holland:

Mopamatuod ko nianang maanindot nga padulngan, nga maanaa kanato pinaagi sa Pag-ula ni Ginoong Jesukristo, kinsa Mismo nakaangkon og “grasya og dugang pa nga grasya” [Doktrina ug mga Pakigsaad 93:13] hangtud nga diha sa Iyang pagka-imortal [tan-awa sa Lucas 13:32] nadawat Niya ang perpekto nga kahingpitan sa celestial nga himaya. Mopamatuod ko nga niini nga oras ug sa matag oras Siya, uban sa nalansangan nga mga kamot, nagtanyag kanato sa samang grasya, naggunit kanato ug nag-awhag kanato, nagdumili sa pagbuhi kanato hangtud nga luwas kita nga makauli diha sa paggakos sa atong Langitnon nga mga Ginikanan. Alang sa ingon ka hingpit nga panahon, padayon ko nga naningkamot, bisan unsa pa ka salikwaut. Alang sa ingon ka hingpit nga gasa, padayon ko nga nagpasalamat, bisan unsa pa ka kulang. Gibuhat ko kini sa ngalan mismo sa Kahingpitan, Kaniya kinsa dili gayud salikwaut o nagkulang apan nahigugma kanatong tanan, gani si Ginoong Jesukristo. (Jeffery R. Holland, “Busa, Kamo Kinahanglan Magmahingpit—sa Katapusan,” Liahona, Nob. 2017, 42)

Dapita ang mga estudyante sa pagpamalandong sulod sa usa ka minuto kon unsa ang labing makatabang kanila sa pag-uswag sa espiritwal nga paagi ngadto sa kinabuhing dayon niini nga panahon. Tapusa pinaagi sa pakigbahin sa imong pagpamatuod nga pinaagi sa grasya sa Manluluwas ug pinaagi sa pagsunod sa Iyang ehemplo makadawat kita og kinabuhing dayon ug makasulod sa celestial nga gingharian.

PAGPALAMBO SA ATONG PAGTUDLO UG PAGKAT-ON

Padayon sa pag-awhag sa pagpangandam sa estudyante. Karon nga ang mga estudyante labaw na sa katunga niini nga kurso, mahimo nimong dapiton sila sa pagpakigbahin kon giunsa sa ilang pagpangandam alang sa klase pag-apekto ang ilang kasinatian niini nga kurso. Hunahunaa ang pagpakigbahin sa mosunod nga pag-awhag gikan ni Elder Kim B. Clark sa Kapitoan: “Kon buhaton ninyo ang inyong bahin––mag-ampo diha sa hugot nga pagtuo, mangandam, magtuon, aktibong moapil, ug mobuhat sa inyong labing maayo––ang Espiritu Santo motudlo kaninyo, mopalambo sa inyong kapasidad sa pagbuhat sa unsay inyong nakat-unan, ug motabang kaninyo nga mamahimo kon unsay gusto sa Ginoo nga kamo mamahimo” (“Pagkat-on alang sa Tibuok Kalag,” Liahona Ago. 2017, 33–34).

Alang sa Sunod nga Higayon

Hangyoa ang mga estudyante sa paghunahuna kon unsa ka lahi ang ilang mga kinabuhi tungod sa mga templo ug mga ordinansa sa templo. Ipasabut nga sa sunod nga klase, makakat-on sila kon nganong ang karaang mga propeta mipakita ngadto ni Joseph Smith ug Oliver Cowdery diha sa Templo sa Kirtland. Awhaga sila sa pagtuon sa materyal nga pagpangandam alang sa leksyon 16 aron sila moanha nga andam sa paghisgot og mga baruganan nga motabang sa paghimo sa templo nga usa ka makahuluganong bahin sa ilang kinabuhi.