“Leksyon 8 Materyal sa Pagpangandam sa Klase: Ang Organisasyon sa Simbahan ni Jesukristo,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 8 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 8 Materyal sa Pagpangandam sa Klase
Ang Organisasyon sa Simbahan ni Jesukristo
Unsa ang kahulugan diha ninyo sa inyong pagkamiyembro sa Simbahan ni Jesukristo? Samtang kamo magtuon niini nga leksyon, ikonsiderar kon sa unsa nga paagi nga ang inyong pag-apil sa Simbahan sa Ginoo mosangpot sa mas daghang panalangin alang kaninyo ug sa inyong pamilya, ingon man usab sa uban nga inyong ikahimamat sa inyong tibuok kinabuhi.
Seksyon 1
Sa unsa nga paagi nga Ang Simbahan ni Jesukristo sa mga Santos sa Ulahing mga Adlaw lahi kay sa tanang uban nga simbahan ug relihiyon?
Nagbarug sa daplin sa sapa niadtong Abril 6, 1830, si Joseph Smith “misaksi sa mga bunyag sa iyang inahan ug amahan nganha sa simbahan. Human sa mga katuigan nga magkalahi ang ilang dalan sa pagpangita sa kamatuoran, sila sa katapusan nagkahiusa sa pagtuo. Sa paghaw-as sa iyang amahan gikan sa tubig, gigunitan ni Joseph ang kamot, mitabang kaniya nga mohaw-as ngadto sa daplin, ug migakos kaniya.
“‘Akong Dios,’ miingon siya, miumod sa iyang nawong sa dughan sa iyang amahan, ‘Nabuhi pa ko aron makakita sa akong amahan nga mabunyagan ngadto sa tinuod nga simbahan ni Jesukristo!’” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 97)
Human mahubad ni Joseph Smith ang Basahon ni Mormon ug nakadawat sa awtoridad sa pagkapari gikan sa langitnong mga mensahero, ang Ginoo misugo kaniya “pinaagi sa Espiritu sa Panagna ug pagpadayag … sa pag-organisar sa Simbahan ni [Jesukristo] sa makausa, dinhi sa yuta” (Joseph Smith, sa History, circa Hunyo 1839–circa 1841 [draft 2], 29, josephsmithpapers.org). Niadtong Abril 6, 1830, mga 60 ka tawo ang nagpundok sa panimalay ni Peter Whitmer Sr. sa Fayette, New York, aron sa pagsaksi sa “pagsugod sa Simbahan ni Jesukristo niining katapusang mga adlaw” sumala sa “kabubut-on ug mga sugo sa Dios” (Doktrina ug mga Pakigsaad 20:1).
Sa adlaw nga ang Simbahan naorganisar, ang mga Santos mipaluyo ni Joseph Smith ug Oliver Cowdery isip ilang mga lider, miambit sa sakramento, misaksi sa ordinasyon sa mga lalaki ngadto sa mga katungdanan sa pagkapari, ug nakakita niadtong nabunyagan kaniadto nga midawat sa gasa sa Espiritu Santo ug nakumpirmahan nga mga miyembro sa Simbahan.
Niining adlawa, si Propeta Joseph Smith nakaobserbar:
Human sa malipayon nga higayon nga gigahin sa pagsaksi ug pagbati sa among mga kaugalingon sa mga gahum ug mga panalangin sa Espiritu Santo, pinaagi sa grasya sa Dios nga gitugyan diha kanamo, gitapos namo ang miting uban sa makapahimuot nga kahibalo nga kami karon indibidwal na nga mga miyembro, ug giila sa Dios, “Ang Simbahan ni Jesukristo,” nga gitukod sumala sa mga sugo ug mga pagpadayag nga gihatag Niya. (Mga Pagtulun-an sa mga Presidente sa Simbahan: Joseph Smith [2007], 162)
Ang Ginoo mipili pinaagi sa pagpadayag sa tukma nga adlaw nga i-organisar ang Iyang Simbahan pag-usab dinhi sa yuta (tan-awa sa Doktrina ug mga Pakigsaad 20, ulohan sa seksyon), ug unya mihatag Siya sa ingalan sa Simbahan.
Pagtuon agi og Pagpangandam alang sa Klase
Basaha ang Doktrina ug mga Pakigsaad 115:4–5.
Mga usa ka tuig ug tunga human maorganisar ang Simbahan, ang Ginoo mipahayag nga Siya mihatag og gahum ni Joseph Smith ug sa uban “sa pagpahimutang sa katukuran niini nga simbahan, ug pagdala niini gikan sa kangiub ug gikan sa kangitngit, mao lamang ang tinuod ug buhi nga simbahan diha sa ibabaw sa tibuok yuta, nga Ako, ang Ginoo, nahimuot, namulong ngadto sa tanan sa simbahan ug dili sa tagsa-tagsa” (Doktrina ug mga Pakigsaad 1:30).
Pamalandong agi og Pagpangandam alang sa Klase
Sa unsa nga paagi nga ang pagkamiyembro sa Simbahan ni Jesukristo nakaimpluwensya sa inyong kinabuhi?
Seksyon 2
Unsa ang pipila ka mga rason nga gipahayag sa Ginoo nga kini mao “lamang ang bugtong tinuod ug buhi nga simbahan”?
Si Presidente Dallin H. Oaks sa Unang Kapangulohan mitudlo:
Tulo ka feature—(1) kahingpitan sa doktrina, (2) gahum sa priesthood, ug (3) pagpamatuod ni Jesukristo—mopasabut ngano ang Dios mideklarar ug nganong kita isip Iyang mga sulugoon mihupot nga kini lamang ang tinuod ug buhi nga Simbahan sa ibabaw sa tibuok yuta. …
Tungod kay daghan kaayo ang nawala panahon sa Apostasiya, kinahanglan nga ang Ginoo mopahiuli sa kahingpitan sa Iyang doktrina. …
Ang doktrina ni Jesukristo, masabtan sa kahingpitan, mao ang plano diin kita mamahimo kon unsa gayud ang anak sa Dios. …
Ang ikaduha ug sigurado nga kinahanglanon nga aspeto … mao ang katungod sa priesthood. …
Isip resulta sa atong pagbaton sa gahum sa priesthood, ang mga lider ug ang tinugutan nga mga miyembro … gihatagan og gahum sa pagbuhat sa gikinahanglang mga ordinansa sa priesthood. …
Ang ikatulo nga rason nganong kita lamang ang tinuod nga Simbahan mao nga anaa kanato ang gipadayag nga kamatuoran kabahin sa kinaiya sa Dios ug sa atong relasyon Kaniya, ug busa kita adunay talagsaon nga pagpamatuod ni Jesukristo. Makahuluganon, ang atong pagtuo sa kinaiya sa Dios mao ang nakapalahi kanato gikan sa pormal nga tinuohan sa kadaghanang Kristiyano nga mga denominasyon. (Dallin H. Oaks, “Mao Lamang ang Tinuod ug Buhi nga Simbahan,” Liahona, Ago. 2011, 49–51)
Si Elder David A. Bednar sa Korum sa Napulog Duha ka mga Apostoles dugang nga mipasabut nga Ang Simbahan ni Jesukristo sa mga Santos sa Ulahing mga Adlaw “mao ang buhi nga simbahan tungod sa mga buhat ug mga gasa sa Espiritu Santo” (“Dawata ang Espiritu Santo,” Liahona, Nob. 2010, 97).
Si Brother Tad R. Callister, kanhi Kinatibuk-ang Presidente sa Sunday School, mitudlo:
[Ang pamahayag sa Ginoo sa Doktrina ug mga Pakigsaad 1:30] wala kini magpasabut nga ang ubang simbahan walay mga kamatuoran, kay aduna gayud sila. Wala kini magpasabut nga ang ubang simbahan walay gihimong maayo, kay sila naghimo og daghang kaayohan. Ang ipasabut niini mao nga kini lang ang simbahan nga aduna sa tanang kamatuoran nga gipadayag niini nga dispensasyon—mao lang ang simbahan nga dunay mga ordinansa nga gikinahanglan alang sa kahimayaan ug mao lang ang simbahan nga dunay priesthood sa Dios aron mapahigayon kana nga mga ordinansa nga may balaanong katungod. Unsay atong ebidensya mahitungod niini nga pamahayag? …
Kon dunay motandi sa blueprint sa orihinal nga Simbahan ni Kristo ngadto sa matag simbahan sa kalibutan karon, iyang masayran nga … usa ra ang motukma niini—Ang Simbahan ni Jesukristo sa mga Santos sa Ulahing mga Adlaw. (Tad R. Callister, “Unsa ang Blueprint sa Simbahan ni Kristo?” [Church Educational System nga debosyunal para sa mga young adult, Ene. 12, 2014], ChurchofJesusChrist.org)
Importante nga masabtan nga ang pagkamiyembro sa “mao lamang ang tinuod ug buhi nga simbahan” ni Jesukristo wala magpasabut nga kita nagtuo nga kita mas maayo kay sa ubang mga tawo. Apan ang atong pagkamiyembro naglakip sa responsibilidad sa paghigugma sa uban ug sa pagdapit kanila sa pagduol ni Kristo ug sa pagdawat sa mga panalangin sa Iyang gipahiuli nga ebanghelyo.
Pamalandong agi og Pagpangandam alang sa Klase
Unsa nga mga kasinatian ang nakatabang ninyo aron mahibalo nga Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga Simbahan?
Seksyon 3
Unsa kaha ang akong ipakigbahin sa usa ka tawo nga mibati nga siya mahimong relihiyoso o espirituhanon bisan og dili moapil diha sa Simbahan sa Ginoo?
Si Elder D. Todd Christofferson sa Korum sa Napulog Duha ka mga Apostoles mitudlo:
Dunay mga tawo nga nagkonsiderar sa ilang kaugalingon nga relihiyuso o espirituhanon apan misalikway sa pag-apil sa simbahan o bisan sa panginahanglan alang niana nga institusyon. Ang relihiyusong buhat alang kanila pangpersonal lamang. Apan ang Simbahan gihimo Niya nga maoy sentro sa atong espiritwalidad—si Jesukristo. …
… Ang karaang katuyoan nagpabilin: nga, isangyaw ang maayong balita sa ebanghelyo ni Jesukristo ug ipahigayon ang mga ordinansa sa kaluwasan—sa laing pagkasulti, pagdala sa mga katawhan ngadto kang Kristo. …
… Importante nga masabtan nga ang labing mahinungdanong katuyoan sa Dios mao ang atong pag-uswag. Ang Iyang tinguha mao nga kita makaangkon og “grasya ug dugang pa nga grasya, hangtud nga [kita makadawat] sa kahingpitan” [Doktrina ug mga Pakigsaad 93:13] sa tanan Niya nga mahatag. Nagkinahanglan kana og labaw pa kay sa pagminaayo lang o mobati og pagkaespirituhanon. Nagkinahanglan kana og pagtuo kang Jesukristo, paghinulsol, pagbunyag sa tubig ug sa Espiritu, ug paglahutay inubanan sa hugot nga pagtuo hangtud sa katapusan [tan-awa sa 2 Nephi 31:17–20]. Dili kini hingpit nga makab-ot kon mag-inusara, mao nga usa ka dakong rason nga ang Ginoo adunay usa ka simbahan mao ang pagmugna og usa ka komunidad sa mga Santos nga mosuporta sa usag usa diha sa “higpit ug pig-ot nga dalan nga padulong sa kinabuhing dayon” [2 Nephi 31:18]. …
Kon ang tawo nagtuo nga ang tanang dalan mopadulong sa langit, o nga walay gikinahanglang buhaton alang sa kaluwasan, dili niya makita ang panginahanglan sa pagsangyaw sa ebanghelyo o sa mga ordinansa ug mga pakigsaad sa pagtubos sa mga buhi o patay. Apan wala lang kita mamulong kabahin sa pagka-imortal apan usab sa kinabuhi nga dayon, ug mahinungdanon alang niana ang dalan sa ebanghelyo ug mga pakigsaad sa ebanghelyo. Ug ang Manluluwas nagkinahanglan og usa ka simbahan aron anaa kana nga magamit sa tanang anak sa Dios—sa mga buhi ug ang mga patay. (D. Todd Christofferson, “Nganong Anaa ang Simbahan,” Liahona, Nob. 2015, 108, 110)
Si Sister Bonnie L. Oscarson, kinsa mialagad isip Kinatibuk-ang Presidente sa Young Women, mitudlo nga ang pag-apil sa Simbahan nagtabang usab nato nga mahimong mas sama sa Manluluwas pinaagi sa paghatag nato og mga oportunidad sa pagserbisyo ug pagpangalagad sa uban:
Tinuod nga mitambong kita sa atong senimana nga mga miting sa Simbahan sa pag-apil sa mga ordinansa, pagkat-on sa doktrina, ug madasig, apan ang laing importante kaayong rason sa pagtambong mao nga, isip ward family ug isip mga disipulo sa Manluluwas nga si Jesukristo, nagbantay ta sa usag usa, nag-awhag sa usag usa, ug nangita og paagi nga makaserbisyo ug makalig-on sa matag usa. Dili lang ta mga tigdawat ug tigkuha sa unsay gitanyag sa simbahan; gikinahanglan kita nga mahimong mga tighatag ug tigsangkap. …
Hangyoa ang imong Langitnong Amahan sa pagpakita diha kanimo niadtong mga anaa sa imong palibut nga nanginahanglan sa imong tabang ug pagdasig kon unsay pinakamaayong ikaserbisyo nimo kanila. Hinumdumi nga ang Manluluwas kasagaran moalagad ngadto sa usa ka tawo usa sa matag higayon. (Bonnie L. Oscarson, “Ang mga Panginahanglan nga atong Giatubang,” Liahona, Nob. 2017, 26)
Pamalandong agi og Pagpangandam alang sa Klase
Sa unsa nga paagi nga ang aktibong pag-apil sa Simbahan sa Ginoo makatabang kaninyo nga mas mahisama Kaniya ug sa Langitnong Amahan? Unsa may imong mabuhat aron mas hingpit nga makaapil diha sa Simbahan ni Jesukristo?