Leksyon 7 Materyal sa Magtutudllo

Ang Pagpahiuli sa Pagkapari

Human sa panahon sa apostasiya, ang awtoridad sa Dios sa pagkapari gipahiuli sa yuta. Kini nga pagpahiuli nag-andam sa dalan alang sa pag-organisar sa Ang Simbahan ni Jesukristo sa mga Santos sa Ulahing mga Adlaw. Niini nga leksyon ang mga estudyante makakat-on ngano nga ang pagkapari importante sa Simbahan sa Ginoo ug sa unsang paagi nga ang mga ordinansa motugot nato sa paggamit sa gahum sa Manluluwas.

Mga Sugyot alang sa Pagtudlo

PAGPALAMBO SA ATONG PAGTUDLO UG PAGKAT-ON

Tan-awa ang imong mga estudyante kon unsa sila sa umaabut. Si Presidente Thomas S. Monson mitudlo, “Kita dunay responsibilidad sa pagtan-aw sa mga indibidwal dili kon unsa sila karon apan kon unsa sila sa umaabut” (“Tan-awa ang Uban kon Unsa Sila sa Umaabut,” Liahona, Nob. 2012, 70). Pag-ampo aron makita nimo ang imong mga estudyante sama sa pagkakita sa Langitnong Amahan kanila. Ang pagbuhat sa ingon makatabang nimo nga makasabut sa bili sa matag esudyante ug makakita sa gugma ug pag-amping sa Langitnong Amahan alang sa matag usa sa Iyang mga anak.

Ang pagkapari gikinahanglan sa Simbahan sa Ginoo.

Ikonsiderar ang pagpakita sa mosunod nga pangutana sa dili pa moabut ang mga estudyante ug dayon sa paghangyo kanila sa pagpakigbahin sa ilang mga hunahuna mahitungod niini inig sugod sa klase.

• Kanus-a kamo bag-o lang mibati nga napanalanginan tungod sa pagkapari?

Ipakita ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Ang priesthood sa Dios, uban sa mga yawe niini, mga ordinansa niini, ang balaanong sinugdanan ug gahum nga mabugkos didto sa langit unsa ang gibugkos dinhi sa yuta, kinahanglanon kaayo sa tinuod nga Simbahan sa Dios ingon nga kini talagsaon ug kon wala kini wala Ang Simbahan ni Jesukristo sa mga Santos sa Ulahing mga Adlaw. (Jeffrey R. Holland, “Ang Atong Talagsaong Hiyas,”Liahona, Mayo 2005, 43)

• Unsa nga mga pulong ang importante alang nimo sa pamahayag ni Elder Holland? Ngano?

Samtang ikaw mopahigayon sa pagpakigbahin ug panaghisgutan sa estudyante, mahimo nimong gamiton ang pipila sa mosunod nga mga hilisgutan ug mga pangutana aron matabangan ang mga estudyante nga makasabut sa pipila ka elemento sa pamahayag ni Elder Holland. Tingali mas importante ang paghisgot pag-ayo sa usa o duha ka pangutana kay sa sulayan sa paghuman ang tanang mga pangutana. Ang imong hisgutan mahimong mapalambo kon ang mga estudyante mopakigbahin usab sa unsay ilang nakat-unan gikan sa materyal sa pagpangandam.

Pahibalo: Imong hisgutan ang mga ordinansa sa ikaduhang katunga niini nga leksyon. Hinumdumi ang pagbilin og igong panahon alang niana nga panaghisgutan aron ang mga estudyante mas makahibalo ug makasabut sa kaimportante sa mga ordinansa.

Ang pagkapari gikinahanglan sa Simbahan sa Ginoo (tan-awa sa seksyon 1 sa materyal sa pagpangandam).

• Ngano kaha nga ang pagkapari gikinahanglan man sa Simbahan sa Ginoo? Unsa nga kahibalo ug mga yawe ang wala kanato kon ang pagkapari wala napahiuli?

• Sa unsa nga mga paagi ang pagkapari gikinahanglan sa inyong kaugalingong kinabuhi?

Ang pagkapari naggikan sa balaan nga tinubdan (tan-awa sa seksyon 1 sa materyal sa pagpangandam).

• Sa unsa nga paagi napahiuli ang pagkapari?

• Unsa ang gitudlo sa pagpahiuli sa pagkapari nganha ninyo mahitungod sa inyong Langitnong Amahan ug ni Jesukristo?

Ang mga yawe sa pagkapari importante sa Simbahan sa Ginoo (tan-awa sa seksyon 2 sa materyal sa pagpangandam).

• Unsa ang mga yawe sa pagkapari?

• Sa unsa nga paagi nga ang mga yawe sa pagkapari nahimong panalangin sa inyong kinabuhi?

Samtang ang mga estudyante mopakigbahin og mga kasinatian ug mopamatuod sa pagkapari ug sa pagpahiuli, mahimo usab nga imong ipakigbahin ang imong pasalamat ug pagpamatuod kon sa unsa nga paagi nga ang pagpahiuli sa pagkapari nakapanalangin sa inyong kaugalingong kinabuhi.

Ang mga ordinansa ug mga pakigsaad sa pagkapari gikinahanglan alang sa atong kaluwasan.

Ipasabut nga niadtong Septyembre 1832, mga duha ka tuig human madawat ang Melchizedek nga Pagkapari gikan nila ni Pedro, Santiago, ug Juan, si Joseph Smith nakadawat og pagpadayag nga nakatabang nato nga mas makasabut sa pagkapari. Kini naglakip sa kamatuoran nga ang makaluwas nga mga ordinansa nga gipangalagad pinaagi sa awtoridad sa pagkapari makatabang sa pag-andam nato nga makabalik ngadto sa presensya sa Dios. Dapita ang mga estudyante sa pagtuon sa Doktrina ug mga Pakigsaad 84:18–22, nga mangita kon sa unsa nga paagi nga ang mga ordinansa makaandam nato sa pagbalik ngadto sa presensya sa Dios.

• Sumala niini nga mga bersikulo, unsa ang importante nga panalangin ang madawat pinaagi sa mga ordinansa sa pagkapari?

• Unsa ang pipila ka posible nga mga kahulugan sa mga pulong “gahum sa pagka-diosnon”? (Human makatubag ang mga estudyante, ikaw mahimong mosugyot nga ang “pagkadios” nagpasabut nga “sama sa dios.” Ang gahum sa pagka-diosnon naglakip sa gahum sa Dios aron sa pagtabang nato nga mahimong sama Kaniya.)

Ipakita ug basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug dapita ang mga estudyante sa pagpangita sa posible nga mga kahulugan sa mga pulong nga “gahum sa pagka-diosnon”:

Ang mga ordinansa sa pagkapari nagbukas sa pultahan ug naghatag og access sa gahum sa pagka-diosnon. … Ang hunanahuna sa tawo ug ang mortal nga mga pinulongan dili gayud makahatag og sakto o igo nga kahulugan sa pulong sa kasulatan nga, “ang gahum sa pagka-diosnon.” Apan sa kahingpitan sa mga panalangin sa Pag-ula—katubsanan gikan sa sala; ang kalig-on sa pagbuhat ug mahimong maayo; ang espirituhanon nga gasa sa personal nga kalinaw; ang magantihon nga mga kapasidad nga makatabang nato sa pag-atubang sa kasagmuyo, sa inhustisya, sa walay kaangayan, pagka-dili matarung, ug daghan pa—sa tinuod naglangkob og porsyon sa gahum sa pagka-diosnon. … Sa pagduol ngadto sa Manluluwas, ang usa ka indibidwal kinahanglan gayud unang moagi sa ganghaan sa bunyag ug modawat sa gasa sa Espiritu Santo—ug dayon magpadayon sa unahan subay sa dalan sa mga pakigsaad ug mga ordinansa nga modala ngadto sa Manluluwas ug sa mga panalangin sa Iyang Pag-ula (tan-awa sa 2 Nephi 31). Ang mga ordinansa sa pagkapari importante aron hingpit nga “[maka]duol ngadto ni Kristo, ug paghingpit diha Kaniya” (Moroni 10:32; tan-awa usab sa mga bersikulo. 30–33). Kon wala ang mga ordinansa, ang usa ka indibidwal dili makadawat sa tanang mga panalangin nga nahimong posible pinaagi sa walay kinutuban ug walay katapusan nga maulaong sakripisyo (tan-awa sa Alma 34:10–14)—bisan ang gahum sa pagka-diosnon. (David A. Bednar, Power to Become [2014], 75–77)

• Unsay atong makat-unan gikan sa pamahayag ni Elder Bednar mahitungod sa “gahum sa pagka-diosnon”? Unsay atong makat-unan mahitungod sa tumong sa mga ordinansa sa pagkapari? (Gamit ang mga pulong sa estudyante, isulat o ipakita ang kamatuoran susama sa mosunod: Pinaagi sa mga ordinansa ug mga pakigsaad sa pagpakapari, kita makaangkon sa mga panalangin sa Pag-ula sa Ginoo, nga maghatag nato og gahum nga mahimong sama sa Dios.)

• Sa unsa nga mga paagi kaha ang piho nga mga ordinansa sa Aaronic ug Melchizedek nga Pagkapari mokonektar nato sa mga panalangin sa Pag-ula sa Manluluwas? (Kon gikinahanglan, hatagi ang mga estudyante og panahon sa pagribyu sa mga pamahayag sa seksyon 3 sa materyal sa pagpangandam.)

Hatagi ang mga estudyante og pipila ka minuto sa pagpamalandong sa mga ordinansa sa pagkapari nga bag-o nilang naapilan. Hangyoa sila sa paghunahuna unsay ilang gibati ug unsa ang kahulugan niadto nga mga ordinansa sa ilang mahangturong kauswagan. Dayon ipakita ang mosunod nga mga pangutana para mahunahuna sa mga estudyante:

• Unsa nga ordinansa ang tingali mahimong mas makahuluganon kaninyo pinaagi sa paggamit sa unsay inyong nakat-unan karon? (Awhaga ang mga estudyante sa pagrekord ug pagsunod sa ilang mga pag-aghat.)

• Unsay inyong nakat-unan ug gibati karon nga nakapadugang sa inyong tinguha sa pag-apil sa mga ordinansa sa pagkapari?

Kon angay, dapita ang mga estudyante sa pagpakigbahin sa ilang pagpamatuod kon sa unsa nga paagi nga ang awtoridad, mga yawe, ug mga ordinansa sa pagkapari nakatabang nila nga mobati sa gugma sa Langitnong Amahan.

Alang sa Sunod nga Higayon

Dapita ang mga estudyante sa pagkonsiderar unsa nga tahas ang gidala sa Simbahan diha sa ilang kinabuhi. Samtang sila magtuon sa materyal sa pagpangandam alang sa sunod nga leksyon, awhaga sila sa pagpangita sa mga panalangin nga gihimo sa Ginoo nga madawat sa matinud-anong mga miyembro sa Ang Simbahan ni Jesukristo sa mga Santos sa Ulahing mga Adlaw.