Leksyon 27 Materyal sa Magtutudlo

Ang Pagpadayag bahin sa Pagkapari

Sa Hunyo 1, 1978, nadawat ni President Spencer W. Kimball ang usa ka pagpadayag gikan sa Ginoo nga mihunong sa mga pagdili bahin sa mga ordinasyon sa pagkapari ug mga ordinansa sa templo alang sa mga miyembro sa Simbahan nga kaliwat sa itum nga Afrikano. Kini nga leksyon motabang sa mga estudyante sa pagpasabut sa mga sitwasyon ug mga kamatuoran kalabut ngadto niini nga pagpadayag, sa paglihok diha sa hugot nga pagtuo samtang ilang masugatan ang malisud nga mga pangutana o mga sitwasyon, ug makaangkon og mas dako nga pagsabut nga ang Dios mao ang naggiya sa Iyang Simbahan pinaagi sa pagpadayag ngadto sa Iyang buhing mga propeta.

Mga Sugyot alang sa Pagtudlo

Kita makatubag og mga pangutana mahitungod sa pagkapari ug templo nga mga pagdili gikan sa panan-aw sa hugot nga pagtuo.

PAGPALAMBO SA ATONG PAGTUDLO UG PAGKAT-ON

Ang mga istorya makalig-on sa hugot nga pagtuo. “Ang mga istorya makatabang og tukod sa hugot nga pagtuo sa mga estudyante diha sa ebanghelyo ni Jesukristo. Kini makamugna og interes ug makatabang sa mga estudyante nga makasabut sa ebanghelyo pinaagi sa mga kasinatian sa uban. Ang mga istorya mahimo usab nga epektibo sa pagtabang sa mga estudyante sa pagsabut sa mga baruganan sa ebanghelyo nga nailhan na sulod sa usa ka han-ay sa kasulatan [scripture block]. Pinaagi sa paghulagway og baruganan sa ebanghelyo sa usa ka modernong konteksto, agi og dugang ngadto sa konteksto sa mga kasulatan, ang mga istorya makatabang sa mga estudyante nga masabtan kon unsay kalabutan sa baruganan sa ebanghelyo ngadto sa ilang mga kinabuhi ingon man sa pagtabang kanila nga mabati ang usa ka tinguha sa paggamit niini” (Gospel Teaching and Learning Handbook [2012], 5.5).

Ipakita ang kauban nga hulagway ni Brother George Rickford:

Dapita ang usa ka estudyante sa pagbasa og kusog sa mosunod nga asoy sa usa ka tawo nga ginganlan og George Rickford:

Niadtong 1969, si George Rickford, usa ka hamtong nga nagpuyo sa Leicester, England, nakasugat og mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw. Sa sinugdanan si George misalikway sa ilang mensahe, apan sa kadugayan misugod siya sa pagpakigkita sa mga misyonaryo. Human sa tulo ka mga bulan sa mainitong pagsusi, nahigmata si George usa ka buntag nga may lig-ong pagtuo nga ang Simbahan tinuod.

Naghinam-hinam si George sa pagpakigbahin sa iyang bag-ong nakaplagan nga pagpamatuod ngadto sa mga elder, apan sa wala pa siya makahimo sa mao, ilang gipahibalo siya nga dili siya mahimong makadawat sa pagkapari kon siya mopasakop sa Simbahan tungod sa iyang nagsagol nga panulundong kaliwat, diin milakip og mga katigulangan nga kaliwat sa itum nga mga Afrikano.

Nahugno si George sa balita. Nahinumduman niya, “ako dihay kasukulon nga reaksyon. Nahimo akong agresibo kaayo ug human sa pipila ka init nga paghisgot ako silang gipapahawa. … Gihatagan ko sila og tinud-anay nga hait nga pangasaba mahitungod sa diskriminasyon ug ubos nga pagtan-aw sa kaliwatan ug tanan niadtong matang sa mga pulong.”

Sa dihang nawala na ang mga misyonaryo, mihilak si George. (Tan-awa sa Elizabeth Maki, “I Will Take It In Faith,” history.ChurchofJesusChrist.org.)

Patan-awa ang mga estudyante sa seksyon 1 sa materyal sa pagpangandam. Pangutan-a sila sa mosunod nga pangutana, naghatag kanila og pipila ka panahon sa paghunahuna kon unsaon nila sa pagtubag:

• Kon usa ka tawo mangutana kaninyo ngano nga adunay pagkapari ug templo nga mga pagdili, unsa ang labing mahinungdanon nga mga punto ang inyong gusto nga hisgutan? (Hunahunaa ang pagsulat sa mga tubag sa mga estudyante diha sa pisara.)

Dapita ang mga estudyante sa pagpamalandong sa mga pangutana nga tingali sila aduna kabahin sa pagkapari ug templo nga mga pagdili. Awhaga sila sa pagbutang niadto nga mga pangutana diha sa hunahuna atol sa leksyon ug sa paghatag og atensyon ngadto sa mga panaghisgutan ug inspirasyon gikan sa Espiritu Santo nga mahimong motabang sa pagtubag niadtong mga pangutana.

Ipakita ang mosunod nga pamahayag, ug dapita ang usa ka estudyante sa pagbasa niini og kusog:

Karon, ang Simbahan misalikway sa mga teyoriya nga gipakatap kaniadto nga ang itum nga panit usa ka timailhan sa balaang pagkawala magustuhi o gitunglo, o nga kini nagpakita sa dili matarung nga mga binuhatan didto sa kinabuhi nga wala pa dinhi sa yuta; nga ang nagsagol nga mga kaminyoon sa laing kaliwatan usa ka sala; o ang mga itum o mga katawhan sa ubang kaliwatan o kultura ubos sa bisan unsang paagi ngadto ni bisan kinsa pa. Ang mga lider sa Simbahan karon klarong nanghimaraut sa tanang diskriminasyon sa kaliwatan [racism], kaniadto ug karon, sa bisan unsang matang. (“Race and the Priesthood [Ang Kaliwatan ug ang Pagkapari],” Gospel Topics, topics.ChurchofJesusChrist.org)

• Ngano kaha nga importanting likayan ang pagpangagpas mahitungod sa gihatag nga mga rason kaniadto kon nganong adunay pagkapari ug templo nga mga pagdili?

Dapita ang mga estudyante sa pag-asoy unsay ilang nahibaloan mahitungod sa mga sitwasyon nga migiya ngadto sa pagpadayag gikan sa Ginoo nga mikuha sa pagkapari ug templo nga mga pagdili.

Ipasabut nga ang Opisyal nga Pahayag 2 diha sa Doktrina ug mga Pakigsaad naglangkub sa opisyal nga pahibalo kabahin sa pagpadayag nga nadawat ni Presidente Spencer W. Kimball ug gidawat ug giaprobahan sa iyang mga magtatambag sa Unang Kapangulohan ug sa mga sakop sa Korum sa Napulog Duha ka mga Apostoles kaniadtong Hunyo 1978.

Dapita ang mga estudyante sa pagbasa og hilum sa unang duha ka mga parapo sa Opisyal nga Pahayag 2 ubos sa mga pulong “Minahal kong mga Kaigsoonan.” Dapita sila sa pagpangita sa unsay gisulti sa mga lider sa Simbahan nga ilang nasaksihan ug sa pag-report unsay ilang nakit-an.

Sunod, dapita ang mga estudyante sa pag-asoy sa istorya ni Brother Billy Johnson ug sa iyang kongregasyon sa Ghana gikan sa seksyon 2 sa materyal sa pagpangandam.

• Giunsa niini nga mga indibidwal sa paghulagway “sa pagkamatinud-anon niadtong gikan kang kinsa ang pagkapari wala pa ihatag”?

Hangyoa ang usa ka estudyante sa pagbasa pa gikan sa asoy ni George Rickford, ug dapita ang klase sa pagpaminaw kon giunsa ni George pagpili sa paglihok diha sa hugot nga pagtuo human niya nahibaloan ang pagkapari nga pagdili:

Usa ka adlaw, nakigsulti si George uban sa usa ka suod nga higala mahitungod sa iyang mga kasinatian uban sa mga misyonaryo ug misugod sa pagtudlo sa iyang higala mahitungod ni Propeta Joseph Smith. Gihinumduman niya, “Samtang ako nag-asoy niana nga istorya, naabtik ako ug may usa ka butang nga mipuli ug ako nagmalipayon.”

Ang kasinatian nanghimatuod sa pagpamatuod ni George, apan ang iyang mga kabalaka mahitungod sa pagkapari nga pagdili sa gihapon mipabilin. Samtang nag-ampo siya alang sa dugang nga pagsabut, kini nga mensahe miabut diha kaniya: “Dili ka kinahanglan nga makasabut sa tanan mahitungod sa akong ebanghelyo sa dili ka pa mopasalig sa imong kaugalingon ngadto niini. Ngano nga dili nimo ipakita ang imong hugot nga pagtuo pinaagi sa pagdawat sa unsay imong nadungog ug isalig ang nahibilin ngari sa akong mga kamot?”

Nahupay pinaagi sa mensahe, si George mainampuong mitubag, “Oo, Ginoo, akong buhaton. Ako mo dawat niini sa hugot nga pagtuo. Ug salamat kanimo, diay, salamat kanimo.” Duha ka bulan ang milabay, si George nabunyagan ug nahimong usa ka matinud-anon nga miyembro sa Simbahan.

Misulat si George kaniadtong 1975 (tulo ka mga tuig sa wala pa ang pagpadayag bahin sa pagkapari) nga iyang gidawat ang pagdili sa pagkapari “diha sa hugot nga pagtuo, nga walay bisan unsa nga pagpanagana” ug mipahayag sa iyang pagtuo nga, bisan unsa ang iyang kahimtang kaniadto, ang Dios makiangayon. “Ako mapasalamaton lamang nga ang pagkapari sa Ginoo sa makausa pa anaa sa yuta, uban sa tanan niining kauban nga mga panalangin, awtoridad, ug responsibilidad. Kini wala kaayoy sapayan kanako kinsa ang aduna niini ug kinsa ang wala niini, apan ang mas importante unsaon kini paggamit.” (Sa Maki, “I Will Take It in Faith,” history.ChurchofJesusChrist.org)

• Unsa ang atong makat-unan gikan sa ehemplo ni George Rickford nga makatabang kanato kon kita adunay dili matubag nga mga pangutana mahitungod sa ebanghelyo? (Human ang mga estudyante mipakigbahin, isulat ang mosunod nga mga kamatuoran diha sa pisara: Kon kita adunay dili matubag nga mga pangutana, makapadayon kita diha sa hugot nga pagtuo samtang nagsalig sa kahayag ug kahibalo nga gihatag sa Dios kanato.)

• Sa unsa nga paagi ang tataw nga mga kamatuoran magtabang sa usa ka tawo kinsa tingali nakigbisog uban sa iyang hugot nga pagtuo tungod sa dili matubag nga mga pangutana mahitungod sa ebanghelyo?

Dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

Ang pagtuo dili gayud mangayo og tubag sa matag pangutana apan magtinguha sa kasiguroan ug kaisug sa pagpadayon, usahay sa pag-ila nga, “Wala ko masayud sa tanan, apan nasayud ko og igo aron magpadayon diha sa dalan sa pagkadisipulo.” (Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 66)

• Sa unsa nga paagi ang kahayag ug kahibalo nga gihatag sa Dios kanimo mitabang kanimo sa pagpadayon diha sa hugot nga pagtuo sa dihang ikaw nag-atubang og dili matubag nga mga pangutana o walay kasigurohan nga mga sitwasyon?

• Unsaon kaha nato sa pagtabang ang usa ka tawo kinsa nakigbisog sa dili matubag nga mga pangutana sa pagpadayon diha sa hugot nga pagtuo?

Hatagi ang mga estudyante og panahon sa pagpamalandong kon unsaon nila sa paggamit ang baruganan sa paglihok diha sa hugot nga pagtuo diha sa ilang kaugalingon nga kinabuhi o sa paggamit niini aron sa pagtabang sa usa ka tawo nga ilang kaila. Dapita ang mga estudyante sa paghunahuna nga irekord ang ilang plano diha sa ilang mga journal.

Ang mga panalangin sa pagkapari ug templo gitanyag ngadto sa matag takus nga miyembro sa Simbahan.

Dapita ang usa ka estudyante sa pagbasa og kusog sa ikatulo ug ikaupat nga parapo [paragraph] ubos sa “Minahal kong mga Kaigsoonan:” Opisyal nga Pahayag 2, magsugod sa “Siya nakadungog sa atong mga pag-ampo.”

• Unsa ang atong makat-unan gikan niini nga mga parapo mahitungod sa unsaon paggiya sa Ginoo ang Iyang Simbahan? (Human makatubag ang mga estudyante, isulat ang mosunod nga kamatuoran diha sa pisara: Ang Ginoo naggiya sa Iyang Simbahan pinaagi sa pagpadayag ngadto sa Iyang mga propeta.)

• Kanus-a ka nakasaksi sa Ginoo nga naggiya sa Iyang Simbahan pinaagi sa pagpadayag ngadto sa Iyang mga propeta diha sa tibuok nimong kinabuhi?

Ipasabut nga sa adlaw human ang pagpadayag bahin sa pagkapari nadawat, si George Rickford gi-orden isip usa ka pari diha sa Aaronic nga Pagkapari ug nakadawat sa Melchizedek nga Pagkapari wala madugay pagkahuman. Sa Oktubre 1978, si George ug ang iyang asawa, si June, nabugkos uban sa ilang upat ka mga anak isip usa ka mahangturon nga pamilya didto sa Templo sa London England (tan-awa sa Maki, “I Will Take It in Faith,” history.ChurchofJesusChrist.org).

• Unsa ang epekto sa pagpadayag diha sa Simbahan, sa mga miyembro niini, ug sa mga katawhan sa tibuok kalibutan?

Ipakita ang mosunod nga pamahayag, ug dapita ang usa ka estudyante sa pagbasa niini og kusog:

Ang ebanghelyo ni Jesukristo alang sa tanan. Ang Basahon ni Mormon namahayag, ‘itum ug puti, ulipon ug gawasnon, lalaki ug babaye; … ang tanan managsama ngadto sa Dios’ (2 Nephi 26:33). Kini mao ang opisyal nga pagtulun-an sa Simbahan. (“Race and the Church: All Are Alike Unto God,” Peb. 29, 2012, newsroom.ChurchofJesusChrist.org)

Sa pagtapos sa leksyon, dapita ang mga estudyante sa paghunahuna (o paggamit), base sa unsay ilang nakat-unan karon, unsaon kaha nila pagtubag kon pangutan-on sila nganong ang Simbahan wala mo-orden og mga lalaki nga kaliwat og itum nga Afrikano ngadto sa pagkapari sulod sa usa ka panahon. Hatagi og importansya nga kini angay sa pagpasabut ngadto sa uban nga kita wala makahibalo kon nganong ang pagkapari ug templo nga mga pagdili misugod. Hinoon, kita makahimo sa pagpakigbahin ug pagpamatuod sa mga kamatuoran nga kita nahibalo, lakip niadto nga nahisgutan karon.

Alang sa Sunod nga Higayon

Ipasabut ngadto sa mga estudyante nga agi og pagpangandam alang sa sunod nga klase, sila magtuon unsa ang gitudlo sa mga propeta, sa karaan ug sa karon, mahitungod sa padulngan sa Ang Simbahan ni Jesukristo sa mga Santos sa Ulahing mga Adlaw. Awhaga ang mga estudyante sa pag-anha nga andam sa paghisgot sa mga paagi nga sila makatabang sa buhat sa Ginoo sa kaluwasan sa katapusan nga mga adlaw.