Leksyon 8 Materyal sa Magtutudlo

Ang Organisasyon sa Simbahan ni Jesukristo

Pinaagi ni Propeta Joseph Smith, ang Ginoo miorganisar sa Iyang Simbahan pag-usab dinhi sa yuta. Kini nga leksyon makatabang sa mga estudyante sa pagpasabut unsay nakapahimo sa Ang Simbahan ni Jesukristo sa mga Santos sa Ulahing mga Adlaw nga mao “lamang ang tinuod ug buhi nga Simbahan” (Doktrina ug mga Pakigsaad 1:30). Ang mga estudyante motino usab unsaon nila nga makaapil sa hingpit sa gipahiuli nga Simbahan sa Ginoo.

Mga Sugyot alang sa Pagtudlo

Ang Ginoo mipahiuli sa Iyang Simbahan pinaagi ni Propeta Joseph Smith.

Dapita ang mga estudyante sa paghunahuna nga sa dihang midapit sila og higala nga motambong sa simbahan, siya mitubag: “Ang Simbahan maayo, apan sa akong pagtuo ako mamahimong maayo nga tawo bisan wala ang organisado nga relihiyon. Kitang tanan adunay atong kaugalingong dalan ngadto sa Dios, di ba?”

• Unsa ang pipila ka sayop nga mga pagsabut nga nakapugong sa inyong higala sa pagsabut sa bili sa Simbahan sa Ginoo?

Tuguti ang mga estudyante sa paghisgot sulod sa pipila ka minuto sa gagmay nga mga grupo unsaon nila sa pagpasabut niini nga higala ngano nga ang Ginoo miestablisar og usa ka simbahan dinhi sa yuta. (Awhaga ang mga estudyante sa paggamit unsay ilang nakat-unan gikan sa pagtuon sa materyal sa pagpangandam.)

Ipakita ang gilakip nga mga imahe sa panimalay ni Peter Whitmer Sr. sa Fayette, New York. Dapita ang mga estudyante sa paghinumdom unsay ilang gitun-an sa seksyon 1 sa materyal sa pagpangandam sa paghulagway unsay nahitabo sa panimalay sa Whitmer sa adlaw nga ang Simbahan naorganisar.

Isip usa ka klase, basaha ang Ang mga Artikulo sa Hugot nga Pagtuo 1:6, nga mangita unsay gisulat ni Joseph Smith makausa mahitungod sa organisasyon sa Simbahan ni Jesukristo. Kon gikinahanglan, mahimo nimong ipasabut nga ang “mga ebanghelista” masabut usab nga mga patriyarka ug “mga pastor” ug tigdumalang mga opisyal, sama sa mga bishop.

• Unsa nga mga kamatuoran ang atong makat-unan gikan niini nga pamahayag? (Usa ka kamatuoran nga atong makat-unan mao nga ang Simbahan sa Ginoo sa ulahing mga adlaw giorganisar sama sa panahon ni Jesus.)

Dapita ang usa ka estudyante sa pagbasa og kusog sa ikaduhang parapo sa pamahayag ni Brother Tad R. Callister sa seksyon 2 sa materyal sa pagpangandam, nga nagsugod sa mga pulong “Kon dunay motandi sa blueprint …”

Ipakita ang mosunod nga mga pakisayran sa kasulatan. Dapita ang mga estudyante sa pagpili og usa o daghan pa niini nga hilom nga basahon, mangita unsay gipadayag niini mahitungod sa organisasyon, mga binuhatan, ug mga pagtulun-an sa Simbahan sa Manluluwas sa Bag-ong Tugon.

• Mateo 16:18–19

• Mateo 28:16–19

• Lucas 9:1–2; 10:1–2

• Mga Buhat 8:14–17

• Mga Taga-Efeso 2:19–20

• Mga Taga-Efeso 4:11–15

• Santiago 5:14–15

• 1 Mga Taga-Corinto 15:29

Pahinumdom: Kini nga kalihokan wala himoa nga komprehensibo o mogahin og daghang oras. Tuyo lang niini ang pagtabang sa mga estudyante sa pag-ila kon sa unsa nga paagi nga ang gipahiuli nga Simbahan sa Ginoo gisunod sa Iyang karaang Simbahan.

• Unsa ang mga pagkasusama nga inyong nakita tali sa orihinal nga Simbahan ni Kristo ug sa Simbahan sa atong panahon? Ngano nga importante nga makahibalo nga ang Simbahan sa Ginoo karon giorganisar sumala sa sumbanan sa Iyang karaang Simbahan?

Ipasabut nga mga usa ka tuig ug tunga human ang Simbahan naorganisar, ang Ginoo mitudlo mahitungod sa pagkatalagsaon sa Iyang gipahiuli nga Simbahan. Dapita ang mga estudyante sa pagbasa og hilum sa Doktrina ug mga Pakigsaad 1:30, nga mangita sa unsay gipahayag sa Ginoo.

• Giunsa sa paghulagway sa Ginoo ang Iyang Simbahan diha sa bersikulo 30? (Tabangi ang mga estudyante sa pagpangita sa mosunod nga pamahayag sa doktrina: Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga simbahan dinhi sa yuta.)

Aron mapalawman ang panabut sa mga estudyante niini nga kamatuoran, mahimo kamong mohangyo sa klase sa paghisgot sa pipila sa mosunod nga mga pangutana. Awhaga ang mga estudyante sa pagribyu ug paghunahuna mahitungod sa unsay ilang nakat-unan gikan sa seksyon 2 sa materyal sa pagpangandam atol sa panaghisgutan.

• Unsaon nga kamo magmainampingon apan walay kahadlok nga mopasabut unsay gipasabut sa giingon nga kini nga Simbahan “mao lamang ang tinuod ug buhi nga simbahan sa ibabaw sa tibuok yuta”?

• Unsa ang nakahimo niini nga “buhi” nga simbahan? (Makatabang ang pagpakita og usa ka butang nga buhi, sama sa tanom, ug hangyoa ang mga estudyante sa paghulagway sa mga kinaiya sa usa ka buhi nga butang itandi sa butang nga walay kinabuhi o patay.)

• Ngano kaha nga importante nga masabtan nga samtang ang mahangturong mga kamatuoran sa ebanghelyo sa Manluluwas wala mausab, ang Simbahan nagpadayon sa pagtubo ug pagpahaum pinaagi sa pagpadayag gikan sa Ginoo?

• Unsa nga mga kasinatian ang nakatabang ninyo aron mahibalo nga Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga Simbahan?

Ang Simbahan sa Ginoo nakapahimo sa mga panalangin sa ebanghelyo nga anaa alang sa tanan.

Ipakita ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Dapita ang usa ka estudyante sa pagbasa niini og kusog:

Angay nga mohunong kadali aron sa paghunahuna nganong si Jesukristo mipili sa paggamit og usa ka simbahan, Iyang Simbahan, … sa pagtuman sa Iyang buhat ug buhat sa Iyang Amahan. (“Nganong Anaa ang Simbahan,” Liahona, Nob. 2015, 108)

• Ngano kaha nga si Jesukristo mipili sa paggamit og usa ka simbahan, Iyang Simbahan, sa pagtuman sa Iyang buhat ug buhat sa Iyang Amahan?

Isip tibuok klase, basaha ang Moroni 6:3–6 ug Doktrina ug mga Pakigsaad 43:8–9, nga mangita sa pipila ka mga katuyoan ug mga panalangin nga moabut pinaagi sa pagkamiyembro ug pagserbisyo sa Simbahan sa Ginoo. Hangyoa ang mga estudyante sa pagpakigbahin unsay ilang nakat-unan gikan niini nga mga tudling.

Hatagi og mubo nga panahon ang mga estudyante sa pagribyu og kadiyot sa mga pamahayag gikan ni Elder Christofferson ug Sister Bonnie L. Oscarson gikan sa seksyon 3 sa materyal sa pagpangandam.

• Unsa nga mga pagtulun-an niini nga mga pamahayag ang makahuluganon kaayo kaninyo? (Human motubag ang mga estudyante, ipakita ang mosunod nga kamatuoran: Ang Ginoo miorganisar sa Iyang Simbahan aron kita matabangan nga moduol ngadto Kaniya, modawat sa hingpit nga mga panalangin sa ebanghelyo, ug makabaton og mga oportunidad sa pagpangalagad ngadto sa uban.)

Hangyoa ang mga estudyante sa paghunahuna mahitungod sa matag elemento niini nga kamatuoran. Dapita ang mga estudyante sa pagpakigbahin kon sa unsa nga paagi nila nakita kini nga kamatuoran nga natuman sa ilang kaugalingong kinabuhi. Mahimo kang mangutana og pipila ka follow-up nga mga pangutana sama niini:

• Unsa ang “hingpit nga mga panalangin” sa ebanghelyo sa Ginoo?

• Unsa ang tahas sa Simbahan sa pagtabang kaninyo nga mas mahisama sa inyong Langitnong Amahan?

Hatagi ang mga estudyante og panahon sa pagpamalandong ug pagrekord sa ilang mga hunahuna mahitungod sa mosunod nga pangutana:

• Sa unsa nga mga paagi nga ako aktibong makaapil diha sa Simbahan ug sa pagtabang sa pagtuman sa mga katuyoan niini?

Human sa igong panahon, ikaw mahimong mangutana sa mga estudyante unsay ilang nakat-unan karon nga makatabang nila sa pagtubag sa mga pangutana sa usa ka higala sama sa gihisgutan diha sa senaryo nga gihulagway diha dapit sa sinugdanan sa leksyon. Mahimo nimong tapuson pinaagi sa pagpamatuod sa mga kamatuoran nga gitudlo sa leksyon.

Alang sa Sunod nga Higayon

Ipasabut nga tungod sa Pagpahiuli sa ebanghelyo, kita makasabut og mas daghan pa mahitungod sa kinaiya sa Manluluwas ug sa maulaong sakripisyo kay ni bisan kinsa sulod sa dul-an sa 2,000 ka mga tuig. Hangyoa ang mga estudyante sa paghunahuna mahitungod sa mga panalangin sa pagpaduol ngadto sa ilang Manluluwas, nga si Jesukristo. Dapita sila sa pagpalawom sa ilang pagsabut ug pagtuo diha Kaniya pinaagi sa mainampingong pagtuon sa materyal sa pagpangandam alang sa sunod nga klase.