Leksyon 5 Materyal sa Magtutudlo

Ang Pagtungha sa Basahon ni Mormon

Ang pagtungha sa Basahon ni Mormon nahitabo sa milagrosong paagi. Kini nga leksyon makatabang sa mga estudyante nga mas makasabut sa unsa nga paagi gihubad ang Basahon ni Mormon “pinaagi sa gasa ug gahum sa Dios” (Doktrina ug mga Pakigsaad 135:3). Ang mga estudyante mamalandong usab ug mahatagan og oportunidad sa pagpakigbahin sa ilang pagsaksi sa katinuod sa Basahon ni Mormon.

Mga Sugyot alang sa Pagtudlo

PAGPALAMBO SA ATONG PAGTUDLO UG PAGKAT-ON

Pagtudlo alang sa pagkakabig. Si Presidente Henry B. Eyring mitudlo: “Kinahanglan natong patas-an ang atong mga panan-aw. Kinahanglan gayud nga atong lihukon ang anaa kanunay natong mga tumong: pag-enroll, kanunay nga pagtambong sa klase, paggradwar, pagkahibalo sa mga kasulatan, ang pagsinati nga mobati sa Espiritu Santo nga nagmatuod sa kamatuoran. Dugang pa, kinahanglan gayud nga puntiryahon nato ang pagmisyon ug ang templo. Apan ang mga estudyante nagkinahanglan pa og daghan sa panahon nga sila atong mga estudyante. …

“Ang lunsay nga ebanghelyo ni Jesukristo kinahanglan gayud nga motuhop ngadto sa mga kasingkasing sa mga estudyante pinaagi sa gahum sa Espiritu Santo. … Ang atong tumong kinahanglan gayud nga sila makabig sa tinuoray sa gipahiuli nga ebanghelyo ni Jesukristo samtang anaa pa sila uban kanato” (“We Must Raise Our Sights” [komperensya sa Church Educational System mahitungod sa Basahon ni Mormon, Ago. 14, 2001], 2).

Ang Basahon ni Mormon miabut “pinaagi sa gasa ug gahum sa Dios.”

Ipakita ang usa ka litrato ni Moroni nga naglubong sa mga palid.

Hangyoa ang mga estudyante sa paghulagway unsay ilang nahibaloan mahitungod sa unsay nahitabo diha sa litrato. Mahimo usab nga mangutana ka unsa sa ilang hunahuna ang nahibaloan ni Moroni mahitungod sa epekto sa rekord ngadto sa umaabut nga mga henerasyon.

Dapita ang mga estudyante sa pagbasa sa Mormon 8:12–16, nga mangita unsay gitudlo ni Moroni mahitungod sa pagtungha sa Basahon ni Mormon.

• Unsa ang gustong klaruhon ni Moroni mahitungod sa pagtungha sa Basahon ni Mormon?

Ipakita ang mosunod nga pamahayag ni Joseph Smith nga maoy kanunay niyang gibalik-balik kon pangutan-on kabahin sa hubad sa Basahon ni Mormon:

Gihubad nako ang Basahon ni Mormon pinaagi sa gasa ug gahum sa Dios. (Joseph Smith, sa James Palmer, Journal, 75, Church History Library, The Church of Jesus Christ of Latter-day Saints, Salt Lake City, Utah)

Dapita ang mga estudyante sa pagpakigbahin unsay ilang nadiskobrehan diha sa materyal sa pagpangandam mahitungod sa kon sa unsang paagi ang Basahon ni Mormon miabut “pinaagi sa gasa ug gahum sa Dios.” (Kon gikinahanglan, awhaga ang mga estudyante sa pagribyu sa seksyon 1 sa materyal sa pagpangandam.) Mahimo usab nga imo silang dapiton sa pagpangutana og bisan unsa gikan sa ilang pagtuon mahitungod sa paghubad sa Basahon ni Mormon.

Dapita ang mga estudyante sa pagribyu unsay ilang nakat-unan gikan sa mga pamahayag nila ni Joseph Smith ug Elder Neal A. Maxwell sa katapusan sa seksyon 1 sa materyal sa pagpangandam. (Mahimo nimong dapiton ang usa ka estudyante sa pagbasa og kusog niini nga mga pamahayag.)

• Ngano kaha nga kita kinahanglan nga mas magpakabana sa “sulod sa basahon” kay sa “proseso sa atong pagkadawat niini”?

Ang Dios misaad nga ang mga indibidwal makadawat og makapanghimatuod nga saksi sa Basahon ni Mormon.

Pangutan-a ang mga estudyante kon pila kanila ang gustong makakita sa bulawan nga mga palid nga sila mismo ug ngano.

• Ngano kaha nga wala man pamatud-i sa Ginoo ang katinuod sa Basahon ni Mormon pinaagi sa pagtugot nga ipakita ang mga palid ug ubang mga artifact [ginama sa karaang panahon] ngadto sa kalibutan?

Dapita ang mga estudyante sa pagbasa sa Doktrina ug mga Pakigsaad 5:3, 6–7, nga mangita ngano nga si Joseph wala mopakita sa mga palid niadtong nagkinahanglan og ebidensya. Tuguti nga ang mga estudyante maoy mopasabut unsa ang gitudlo sa mga bersikulo.

Ipasabut nga kini nga pagpadayag gihatag ngadto ni Joseph isip resulta sa pagpangayo ni Martin Harris og usa ka saksi nga si Joseph adunay bulawan nga mga palid. Si Martin higala ni Joseph ug adunay pinansyal nga kapasidad sa pagtabang sa pagmantala sa Basahon ni Mormon kon mahubad na kini. Ang asawa ni Martin, nga si Lucy, misang-at og reklamo ngadto sa lokal nga maestrado, sa pasangil nga si Joseph nangilad sa iyang bana ug sa uban aron makakwarta. Niadtong Marso 1829 si Martin miadto sa Harmony, Pennsylvania, sa pagpangayo ni Joseph Smith og ebidensya nga anaa gayud ang mga palid.

Dapita ang mga estudyante sa pagbasa sa Doktrina ug mga Pakigsaad 5:11–15, nga mangita sa usa ka paagi nga ang Ginoo moestablisar sa kamatuoran sa Basahon ni Mormon. Hangyoa ang mga estudyante sa pagpasabut unsay ilang nakat-unan gikan niini nga mga bersikulo.

Ipasabut nga ang Ginoo mipadayag nga si Martin Harris mahimong usa sa Tulo ka Saksi kon siya “moluhod” ug “magpaubos sa iyang kaugalingon diha sa gamhanan nga pag-ampo ug hugot nga pagtuo” (Doktrina ug mga Pakigsaad 5:24). Paglabay sa tulo ka bulan gidapit ni Joseph si Martin Harris sa pag-apil nila ni Oliver Cowdery ug David Whitmer sa pagpangita sa espesyal nga saksi nga gisaad sa Ginoo.

Ipakita ang litrato ni Joseph Smith ug ang Tulo ka mga Saksi gikan sa materyal sa pagpangandam, ug hangyoa ang klase sa paghinumdom unsa ang nahitabo sa dihang kini nga mga lalaki nag-ampo alang sa saksi sa mga palid.

• Unsay gibati ni Joseph mahitungod sa Tulo ka mga Saksi nga nakakita sa mga palid? (Kon gikinahanglan, iparibyu sa mga estudyante ang istorya ni Lucy Mack Smith nga anaa sa materyal sa pagpangandam.)

• Sa unsa nga paagi nga ang pagpamatuod sa Tulo ka mga Saksi nalig-on nga gani wala gayud sila molimud sa ilang pagsaksi, bisan sa dihang ang matag usa kanila mipalayo sa Propeta ug sa Simbahan?

Dapita ang mga estudyante sa pagbasa sa Doktrina ug mga Pakigsaad 5:15–16 ug Moroni 10:3–5, nga mangita kon sa unsa nga paagi nga ang tanang tawo makaangkon og saksi sa katinuod sa Basahon ni Mormon. Samtang ang mga estudyante mopasabut unsay ilang nakat-unan gikan niini nga mga kasulatan, tabangi sila sa pag-ila sa baruganan nga susama sa mosunod: Ang Ginoo mopakita sa katinuod sa Basahon ni Mormon pinaagi sa Espiritu Santo ngadto sa tanang kinsa nagtinguha og saksi.

• Sa unsa nga paagi nga ang usa ka saksi gikan sa Espiritu Santo matandi sa pisikal nga ebidensya, sama sa pagkakita sa mga palid o pagbaton og hingpit nga kahibalo sa tanang mga detalye sa paghubad sa Basahon ni Mormon?

Dapita ang usa ka estudyante sa pagbasa og kusog sa mosunod nga istorya gikan ni Brother Tad R. Callister, kanhi Kinatibuk-ang Presidente sa Sunday School:

Usa sa akong suod ug utokan nga higala mibiya sa Simbahan sa usa ka panahon. Bag-ohay lang siya nga misulat nako bahin sa iyang pagbalik: “Sa sinugdanan, ganahan ko nga ang Basahon ni Mormon mapamatud-an ngari nako sa historikal, sa hiyograpikal, sa pinulongan, ug sa kultural nga paagi. Apan sa dihang giusab nako ang akong pag-focus sa unsay gitudlo niini mahitungod sa ebanghelyo ni Jesukristo ug sa Iyang makaluwas nga misyon, nagsugod ko pagbaton og pagpamatuod sa katinuod niini. Usa ka adlaw samtang nagbasa sa Basahon ni Mormon sa akong kwarto, mihunong ko kadali, miluhod, ug mihatag og kinasingkasing nga pag-ampo ug klarong mibati nga ang Langitnong Amahan mihunghong sa akong espiritu nga ang Simbahan ug ang Basahon ni Mormon tinuod gayud. Ang akong tulo ka tuig og tunga nga pag-imbestigar pag-usab sa Simbahan midala nako pabalik sa hingpit ug sa makapakumbinser nga paagi ngadto sa kamatuoran niini.”

Kon ang usa ka tawo mogahin og panahon nga mapaubsanong mobasa ug mamalandong sa Basahon ni Mormon, sama sa gihimo sa akong higala, ug maminaw sa malumong mga bunga sa Espiritu, nan siya sa katapusan makadawat sa gitinguha nga pagsaksi.

Ang Basahon ni Mormon usa sa bililhong mga gasa sa Dios ngari kanato. (Tad R. Callister, “Gamhanang Saksi sa Dios: Ang Basahon ni Mormon,” Liahona, Nob. 2017, 109)

• Unsa nga mga kasinatian ang nakatabang ninyo nga makahibalo nga ang Basahon ni Mormon tinuod? (Hatagi ang mga estudyante og oportunidad sa pagpakigbahin unsa ang ilang gisulat sa ilang materyal sa pagpangandam sa katapusan sa seksyon 2.)

Tapusa pinaagi sa pagpakigbahin sa imong pagpamatuod nga, bisan wala kita makakita sa mga bulawan nga mga palid, bisan wala kita sa dihang ang Basahon ni Mormon gihubad, makabasa ug makatuon kita sa basahon ug makaangkon og espirituhanong saksi alang sa atong kaugalingon nga kini sa pagkatinuod pulong sa Dios.

Alang sa Sunod nga Higayon

Dapita ang mga estudyante sa pagkonsiderar ngano nga ang mga kritiko sa Simbahan sa Ginoo agresibong mipuntariya sa Basahon ni Mormon. Awhaga ang klase sa pagtuon sa materyal sa pagpangandam alang sa sunod nga klase, mangita kon unsaon nila nga madugangan ang ilang abilidad sa pagpanalipod sa Basahon ni Mormon.