Leksyon 19 Materyal sa Magtutudlo

Katubsanan sa mga Patay

Si Propeta Joseph Smith mitudlo nga usa sa labing dako nga mga responsibilidad nga gihatag sa Dios sa mga Santos sa Ulahing mga Adlaw mao ang pagtabang sa pagtubos sa mga patay (tan-awa sa Mga Pagtulun-an sa mga Presidente sa Simbahan: Joseph Smith [2007], 575). Kini nga leksyon gihimo aron sa pagtabang sa mga estudyante nga makasabut ug makapaambit ngano nga ang katubsanan sa mga patay usa ka importante kaayo nga bahin sa plano sa Dios ug sa pagpadugang sa ilang tinguha nga mas hingpit nga moapil sa family history ug sa tulumanon sa templo.

Mga Sugyot alang sa Pagtudlo

Ang Ginoo mipadayag sa doktrina sa katubsanan sa mga patay pinaagi ni Propeta Joseph Smith.

Ipakita ang gisukip nga imahe ug ipasabut nga kini naghulagway ni Alvin Smith nga nagbaba sa iyang manghud nga lalaki, nga si Joseph, human sa operasyon sa tiil ni Joseph. Dapita ang mga estudyante sa pag-istorya gikan sa ilang pagpangandam sa klase unsay ilang nahibaloan mahitungod sa mga pagbati ni Joseph alang sa iyang igsoon nga si Alvin ug kon unsay nahitabo ni Alvin.

• Unsa ang gisugyot sa usa ka Presbyterian nga ministro ngadto sa pamilyang Smith diha sa haya ni Alvin?

• Unsa kahay inyong bation nga makadungog niini nga mga pulong kon kamo sakop sa pamilya ni Joseph?

Pahinumdumi ang mga estudyante nga ang mga pulong sa ministro nagpakita sa pagtuo, sumala sa gitudlo sa Bag-ong Tugon, nga ang bunyag importante alang sa kaluwasan (tan-awa sa Juan 3:5). Hangyoa ang mga estudyante sa pagribyu sa panan-awon ni Joseph Smith niadtong 1836 kabahin sa celestial nga gingharian nga narekord sa Doktrina ug mga Pakigsaad 137:1, 5–8, nga mangita unsay nakat-unan ni Joseph Smith mahitungod sa iyang igsoon nga si Alvin. Dapita ang mga estudyante sa pag-report sa unsay ilang nakit-an.

• Unsa nga mga kamatuoran mahitungod sa plano sa kaluwasan ang gitabang niini nga pagpadayag para mapahiuli o mahatagan og katin-awan? Unsa kaha ang mga hunahuna ug mga pagbati ni Joseph sa dihang iyang nakat-unan kini nga mga kamatuoran?

Ipasabut nga upat ug tunga ka tuig human nakita ang panan-awon bahin ni Alvin didto sa celestial nga gingharian, si Joseph mitudlo sa mga Santos sa Nauvoo kabahin kon sa unsang paagi nga ang usa ka tawo sama ni Alvin kinsa wala mabunyagi niini nga kinabuhi maluwas sa gingharian sa Dios. Ang Propeta mipaila sa doktrina sa bunyag alang sa mga patay atol sa usa ka sermon sa haya niadtong Agosto 15, 1840 (tan-awa sa Church History Topics, “Baptism for the Dead,” ChurchofJesusChrist.org).

Dapita ang mga estudyante sa pagbasa nga magpares o sa gagmay nga mga grupo sa kinutlo gikan sa sulat ni Vilate Kimbal nga makita sa seksyon 1 sa materyal sa pagpangandam. Dayon ipakita ang mosunod nga mga pangutana (makita usab sa seksyon 1 sa materyal sa pagpangandam), ug dapita ang mga estudyante sa paghisgot niini:

• Unsa kaha ang makapahimo sa katubsanan sa mga patay nga “usa ka mahimayaon nga doktrina”?

• Unsa ang ikatudlo niini nga doktrina sa usa ka tawo mahitungod sa kinaiya ug mga tinguha sa Langitnong Amahan ug sa Iyang Anak, nga si Jesukristo?

Dapita ang usa ka estudyante sa pagbasa og kusog sa mga pagtulun-an ni Propeta Joseph Smith nga narekord sa Doktrina ug mga Pakigsaad 128:15. Hangyoa ang klase sa pagsunod, nga mangita kon ngano nga ang pag-apil sa buhat sa pagtubos sa mga patay importante kaayo alang kanato.

• Sumala niini nga bersikulo, ngano nga importante nga kita mopahigayon sa makaluwas nga mga ordinansa alang sa mga patay? (Ang mga estudyante tingali makakita og pipila ka mga kamatuoran, lakip sa mosunod: Kon wala ang makaluwas nga mga ordinansa sa ebanghelyo, ang atong mga katigulangan kinsa namatay nga walay ebanghelyo dili makauswag ngadto sa kahimayaan. Ang kaluwasan sa atong namatay nga mga katigulangan importante sa atong kaugalingong kaluwasan.)

• Sa unsa nga mga paagi sa inyong hunahuna nga ang kaluwasan sa atong mga katigulangan “gikinahanglan ug importante” sa atong kaugalingong kaluwasan?

Isip kabahin sa inyong panaghisgot, ipakita ang mosunod nga pamahayag ni Presidente Russell M. Nelson, ug dapita ang usa ka estudyante sa pagbasa niini ug kusog:

Samtang ang buhat sa templo ug sa family history adunay gahum sa pagpanalangin niadtong anaa sa pikas tabil, kini adunay sama nga gahum sa pagpanalangin sa mga buhi. Kini adunay makapalunsay nga impluwensya niadtong nagbuhat niini. Sila sa pagkatinuod nagtabang aron mahimaya ang ilang mga pamilya.

Kita mahimaya kon kita makapuyo uban sa atong mga kaliwatan didto sa presensya sa Labawng Makagagahum nga Dios. (Russell M. Nelson, “Mga Henerasyon Nasumpay diha sa Gugma,” Liahona, May 2010, 93–94).

Si Joseph F. Smith nakakita og panan-awon bahin sa katubsanan sa mga patay.

Ipasabut nga bisan human sa kamatayon ni Propeta Joseph Smith, ang Ginoo nagpadayon sa pagpadayag sa mga kamatuoran “pagtulun-an human sa laing pagtulun-an” (Doktrina ug mga Pakigsaad 98:12) mahitungod sa Iyang plano sa katubsanan sa mga patay. Niadtong 1918, si Presidente Joseph F. Smith nakadawat og panan-awon bahin sa katubsanan sa mga patay.

• Unsa ang mga kasinatian ni Presidente Joseph F. Smith ug mga panghitabo sa kalibutan nga nakapahimo niini nga panan-awon nga tukma sa panahon? (Awhaga ang mga estudyante sa paggamit kon unsay ilang nakat-unan gikan sa seksyon 2 sa materyal sa pagpangandam.)

Pahinumdumi ang mga estudyante nga panahon kadto samtang si Presidente Smith namalandong sa maulaong sakripsiyo ni Jesukristo ug sa mga pagtulun-an ni Apostol Pedro kabahin sa pagbisita sa Manluluwas ngadto sa kalibutan sa espiritu nga diha kaniya ang iyang panan-awon (tan-awa sa Doktrina ug mga Pakigsaad 138:1–11). Dapita ang mga estudyante sa pagbasa og hilum sa Doktrina ug mga Pakigsaad 138: 28–34, 57 nga mangita kon unsay gibuhat sa Manluluwas sa Iyang mubo nga pagbisita sa kalibutan sa espiritu ug ang epekto niini.

• Sa unsa nga paagi nga ang mga kamatuoran niini nga tudling sa kasulatan makatabang kanato nga mas makasabut sa plano sa Langitnong Amahan alang sa Iyang mga anak?

Ipasabut og maayo ang mga pulong nga “puli nga bunyag” (bersikulo 33). Ipasabut nga ang puli nangahulugan nga pagbuhat isip halili sa laing tawo.

Dapita ang mga estudyante sa pagbasa og kusog sa pamahayag ni Elder D. Todd Christofferson nga makita sa seksyon 3 sa materyal sa pagpangandam. Hangyoa ang klase sa pagpangita unsay gitudlo ni Elder Christofferson mahitungod sa puli nga buhat sa kaluwasan nga atong ipahigayon sa templo alang sa atong patay na nga mga sakop sa pamilya.

• Unsaon ninyo sa pag-summarize ang usa ka baruganan nga atong makat-unan gikan sa mga pagtulun-an ni Elder Christofferson? (Ang mga estudyante tingali makakita og baruganan nga susama sa mosunod: Kita nagpamatuod kang Jesukristo ug sa Iyang Pag-ula kon kita moapil sa buhat sa pagtabang nga matubos ang patay na nga mga sakop sa atong pamilya.)

• Sa unsa nga paagi nga ang pag-apil sa buhat sa pagtubos sa atong mga patay usa ka pagpakita sa atong pagpamatuod ni Jesukristo ug sa Iyang Pag-ula?

• Sa unsang paagi nga ang pag-apil sa family history ug tulumanon sa templo makatabang nga kita mas mahisama sa Manluluwas?

Ang mga propeta sa Ginoo nagsaad og dagkong mga panalangin niadtong kinsa motabang sa pagtubos sa mga patay.

Isulat ang mosunod nga dili kompleto nga baruganan diha sa pisara: Sa akong pag-apil sa family history ug sa tulumanon sa templo …

Ipakita ang pipila sa mga panalangin sa buhat sa family history ug sa templo nga gipasabut ni Elder Dale G. Renlund sa iyang pakigpulong. Ikonsiderar ang pagsulat sa mga panalangin nga makita sa mga estudyante diha sa ubos sa pamahayag nga naa sa pisara.

• Hain sa gisaad nga mga panalangin ang importante kaayo kaninyo ug ngano?

• Unsa ang pipila ka mga paagi nga kamo ug ang inyong pamilya nakaapil sa family history sa pagserbisyo sa templo? Unsa nga mga panalangin ang inyong nasinati sa pagbuhat sa ingon?

Mahimo nimong dapiton ang mga estudyante sa paghunahuna og usa ka tawo nga ilang mahangyo sa pagtudlo nila sa paghimo sa family history. Kon ang pipila ka mga estudyante hanas na sa paghimo sa family history, dapita sila sa pagtudlo sa ilang kauban diha sa klase. Kon itugot sa panahon, mahimo usab nga ipakita nimo sa mga estudyante ang website sa family history sa ChurchofJesusChrist.org/family-history ug awhaga sila sa pagsusi niini nga site alang sa dugang nga mga ideya kon unsaon aron mas makaapil sa family history.

PAGPALAMBO SA ATONG PAGTUDLO UG PAGKAT-ON

Buhata ang espirituhanong mga pag-aghat. Kon ang doktrina sa ebanghelyo o usa ka baruganan sa ebanghelyo makat-unan apan wala gamita, ang pagkat-on dili kompleto. Atong magamit ang atong nakat-unan sa ebanghelyo kon kita modawat sa kamatuoran diha sa atong kasingkasing ug dayon molihok sumala niana nga kamatuoran. Dapita ang mga estudyante sa pagsunod sa espirituhanong mga pag-aghat nga ilang nadawat pinaagi sa paggamit sa mga kamatuoran sa ebanghelyo nga ilang nakat-unan.

Ipaambit ang mosunod nga pamahayag ni Presidente Russell M. Nelson:

Dapiton ko kamo sa pagkonsiderar sa mainampuong paagi unsa nga matang sa sakripisyo, ug ilabi na sa sakripisyo sa panahon, ang inyong mahimo aron makatrabaho pa og dugang sa buhat sa family history ug sa templo niining tuiga. (Russell M. Nelson, RootsTech Family Discovery Day—Opening Session 2017, ChurchofJesusChrist.org)

Tapusa pinaagi sa pagdapit sa mga estudyante nga mainampuong mamalandong ug dayon sa pagsulat kon unsang piho nga mga sakripisyo ang ilang pagahimoon o piho nga mga lakang ang ilang pagabuhaton aron mas hingpit nga makaapil sa family history ug tulumanon sa templo.

Alang sa Sunod nga Higayon

Pagpakita og imahe sa templo. Ipasabut nga sukad sa karaang mga panahon, ang Ginoo misugo sa Iyang katawhan sa pagtukod og mga templo. Ang mga propeta sa Ulahing mga Adlaw mitudlo nga ang labing importante nga mga panalangin sa ebanghelyo madawat diha sa mga templo sa Ginoo. Dapita ang mga estudyante sa pagtuon sa materyal sa pagpangandam alang sa sunod nga leksyon ug moabut nga andam nga mohisgot sa unsa nga paagi nga ang Ginoo mopanalangin kanato pinaagi sa mga ordinansa sa templo ug pagsimba sa templo.