“Leksyon 12 Materyal sa Pagpangandam sa Klase: Ang Pag-establisar sa Kawsa sa Zion,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 12 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 12 Materyal sa Pagpangandam sa Klase
Ang Pag-establisar sa Kawsa sa Zion
Si Propeta Joseph Smith mitudlo, “Maoy atong tinguha nga matukod ang Zion isip atong pinakamahinungdanon nga katuyoan” (Mga Pagtulun-an sa mga Presidente sa Simbahan: Joseph Smith [2007], 221). Samtang magtuon kamo niini nga materyal, pangitaa ang mga kamatuoran nga makatabang ninyo nga makasabut unsa ang Zion, nganong kinahanglan kitang magtukod og Zion, ug unsay inyong mahimo sa pagtabang niini nga paningkamot.
Seksyon 1
Unsay buot ipasabut sa pag-establisar sa Zion?
Niadtong Disyembre 1830 samtang si Joseph Smith nagtrabaho sa hubad sa Biblia, ang Ginoo mipadayag, sa narekord karon sa Moises 7, nga ang propeta sa Daang Tugon nga si Enoch nakatukod og usa ka siyudad nga gitawag og Zion.
Pagtuon agi og Pagpangandam alang sa Klase
Basaha ang Moises 7:18–21.
Tan-awa ang video “Teachings of Joseph Smith: Preparing for Zion” (1:42), o tun-i ang pamahayag ni Propeta Joseph Smith sa ubos:
Si Propeta Joseph Smith namahayag:
Ang pagtukod sa Zion mao ang katuyoan nga nakapaikag sa katawhan sa Dios sa matag panahon; … ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabut nga ilang giawit ug gisulat ug gipanagna kining atong panahon; … kita ang gikahimut-an nga mga katawhan nga gipili sa Dios aron sa pagdala sa Ulahing mga adlaw nga kahimayaan; anaa ra kanato ang pagtan-aw niini, pag-apil ug pagtabang sa pagpalambo sa Ulahing mga adlaw nga kahimayaan.
Bisan asa nga dapit diin ang mga Santos nagpundok mao ang Zion, diin ang matag matarung nga lalaki [ug babaye] magtukod og dapit alang sa kasiguroan sa [ilang] mga anak. …
…Ang panahon nagkaduol na, diin ang tawo dili makakaplag og kalinaw gawas lamang diha sa Zion ug sa mga stake niini. (Mga Pagtulun-an sa mga Presidente sa Simbahan: Joseph Smith [2007], 221)
Sa usa ka pagpadayag ngadto ni Propeta Joseph Smith, ang Ginoo mipahayag nga ang Zion nagpasabut usab sa “ang putli sa kasingkasing” (Doktrina ug mga Pakigsaad 97:21).
Si Elder D. Todd Christofferson sa Korum sa Napulog Duha ka mga Apostoles mitudlo:
Ang Zion usa ka lugar ug ingon man mga tawo. …
Ang Zion usa ka Zion tungod sa pamatasan, hiyas, ug pagkamatinud-anon sa iyang pagkanasudnon. … Kon atong itukod ang Zion diha sa atong mga panimalay, mga branch, mga ward, ug mga stake, … gikinahanglan nga (1) mahimong maghiusa sa usa ka kasingkasing ug usa ka hunahuna; (2) aron mamahimo, sa tinagsa ug sa dinaghan, nga usa ka balaan nga katawhan; ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga nga mahitabo—ang Zion moabut lamang kon kini mahitabo. …
Mahimo kitang usa sa kasingkasing ug usa sa hunahuna samtang kita sa tinagsa nagbutang sa Manluluwas diha sa sentro sa atong mga kinabuhi ug mosunod niadtong Iyang gitudlo sa pagpangulo kanato. (D. Todd Christofferson, “Dali na Diri sa Zion,” Liahona, Nob. 2008, 37–38)
Alang sa dugang nga impormasyon mahitungod sa mga kinaiya sa katawhan nga sama sa Zion, tan-awa sa 4 Nephi 1:1–4, 15–18.
Pamalandong agi og Pagpangandam alang sa Klase
Sa unsa nga paagi nga ang pagbutang sa Manluluwas sa sentro sa akong kinabuhi ug sa pagsunod sa mga lider sa Simbahan makatabang nako nga mahimong sama sa katawhan nga gihulagway sa Moises 7:18 ug Doktrina ug mga Pakigsaad 97:21?
Seksyon 2
Unsay nahitabo sa mga Santos sa Missouri kinsa naningkamot sa pagtukod sa Zion?
Usa ka tuig human sa organisasyon sa Simbahan, ang Ginoo mipili sa Independence, Lalawigan sa Jackson, Missouri, isip “ang tunga-tunga nga dapit” (Doktrina ug mga Pakigsaad 57:3) sa Zion diin ang mga Santos magpundok ug magtukod sa balaan nga siyudad sa Zion, gipasabut usab kini isip ang Bag-ong Jerusalem (tan-awa sa Doktrina ug mga Pakigsaad 45:64–66; 57:1–3).
Ang mapa sa plano alang sa Siyudad sa Zion giandam ubos sa direksyon ni Propeta Joseph Smith ug gipadala ngadto sa mga Santos didto sa Missouri kaniadtong Hunyo 1833, uban sa mga planong arkitektura alang sa unang templo sa Zion.
Ubos sa direksyon sa Propeta, ang unang mga miyembro sa Simbahan misulay sa pag-establisar og usa ka siyudad sa Zion sa Lalawigan sa Jackson apan naglisud sa pagpalambo og maayong mga relasyon uban sa mga lumulupyo didto. Ang walay pagkasinabtanay kabahin sa mga isyu sa relihiyon, pagkaulipon, politika, ug sa nagkadaghan nga populasyon sa mga Santos nakaagni sa daghan nga ubang mga lumulupyo sa Lalawigan sa Jackson nga manawagan alang sa pagpapahawa sa mga Santos gikan sa lalawigan.
Niadtong Hulyo 20, 1833, ang manggugubot nga mga lumulupyo sa Lalawigan sa Jackson, mikompronta sa mga lider sa Simbahan sa usa ka miting sa korte ug namugos nga sirad-an sa mga Santos ang ilang buhatan nga imprintahanan ug tindahan ug mobiya sa lalawigan. Ang mga lider sa Simbahan nagdumili, mao nga ang manggugubot nga panon miguba sa buhatan sa imprintahanan sa Simbahan ug mibutang og alkitran ug mga balahibo kang Bishop Edward Partridge ug miyembro sa Simbahan nga si Charles Allen. Paglabay sa tulo ka adlaw, ang manggugubot nga panon mihulga og dugang nga kagubot. Tungod kay napugos, ang lokal nga mga lider sa Simbahan miuyon nga mobiya sa lalawigan sa pagkasunod nga tingpamulak. Bisan pa niana, sa dihang ang mga lider ug mga miyembro sa Simbahan nakahukom nga magpabilin ug makig-away alang sa ilang mga katungod atol sa tinglarag niadtong 1833, ang kagubot nagpadayon.
Si Parley P. Pratt miistorya:
Mga grupo sa bangis nga mga tawo nagbahis-bahis sa lalawigan sa bisan asang direksyon; misulod og mga balay nga walay kahadlok, … gipanghadlok ang mga babaye ug mga bata, ug nanghulga sa pagpatay kanila kon dili sila molayas diha-diha dayon. …
… Ang mga babaye ug mga bata nanglayas sa bisan asang direksyon. Usa ka pundok sa usa ka gatus ug singkwenta ka tawo milayas ngadto sa lapad nga kasagbutan, diin nahisalaag sila sulod sa pipila ka adlaw, kasagaran walay pagkaon; ug walay bisan unsa gawas sa bukas nga kawanangan [kalangitan] nga ilang kapasilongan. Ang ubang mga grupo nanglayas padulong sa Suba sa Missouri. Atol sa pagkatibulaag sa mga kababayen-an ug sa mga bata, may mga pundok nga nagpangita sa kalalakin-an, gipamusil ang uban, gipanggapos ug gipanglapdusan ang uban, ug ang uban ilang gigukod daghang milya ang gilay-on. …
Ang kabaybayunan [sa Suba sa Missouri] sa kilid sa tabukanan nagsugod ang linya sa mga sakayan nga adunay mga lalaki, mga babaye ug mga bata, mga pagkaon, mga karwahe, mga karton, mga suplay, ug uban pa, samtang ang sakayan padayon sa paghakot. … Gatusan ka mga tawo ang nakita sa matag direksyon, ang uban anaa sa mga tolda ug ang uban anaa sa gawas libut sa mga daob, samtang kusog nga mibundak ang ulan. Ang mga bana nangita hain ang ilang mga asawa, ang mga asawa nangita hain ang ilang mga bana; mga ginikanan sa ilang mga anak, ug mga anak sa ilang mga ginikanan. Ang uban mapalad nga nakaeskapo kauban sa ilang pamilya, mga kinahanglanon sa panimalay, ug ubang mga suplay; samtang ang uban walay kasayuran sa gidangatan sa ilang mga higala, ug nawad-an sa tanan nilang mga gikinahanglan. …
… Ang matag sakop sa [among] katilingban gipalayas gikan sa lalawigan, ug ang mga umahan sa mais gipangdaot ug gipangguba; ang mga pundo nga trigo gipangsunog, ang mga gamit sa panimalay gipangkawat, ug ang gipalambo nga mga kabtangan gipangguba ang tanan. (Autobiography ni Parley Parker Pratt, ed. Parley P. Pratt Jr. [1938], 101–3)
C. C. A. Christensen (1831–1912), Ang mga Santos Giabug gikan sa Lalawigan sa Jackson, Missouri, c. 1878, tempera diha sa muslin nga panapton, 77 ¼ x 113 ka pulgada. Brigham Young University Museum of Art, gasa sa mga apo ni C.C.A. Christensen, 1970.
Kapin sa 1,000 ka mga Santos gipalayas sa Lalawigan sa Jackson, ug kapin sa 200 sa ilang mga balay gipangsunog.
Seksyon 3
Unsa ang nagpugong sa mga Santos sa pag-establisar sa Zion didto sa Lalawigan sa Jackson, Missouri?
Sa mga bulan human sa mapintas nga pagpapahawa sa mga Santos gikan sa Lalawigan sa Jackson, ang Ginoo mipadayag ngadto ni Propeta Joseph Smith sa mga rason nga Siya mitugot nga gukuron ug abugon ang Iyang mga Santos gikan sa mga yuta ug mga panimalay. Samtang magtuon kamo sa mosunod nga mga tudling sa kasulatan gikan sa Doktrina ug mga Pakigsaad 101 ug 105, pangitaa kon unsa nga mga aksyon ug mga kinaiya ang nakapugong sa mga Santos sa pag-establisar sa Zion didto sa Lalawigan sa Jackson, Missouri.
Pagtuon agi og Pagpangandam alang sa Klase
Basaha ang Doktrina ug mga Pakigsaad 101:2–3, 6–8 ug Doktrina ug mga Pakigsaad 105:3–6.
Irekord ang Inyong mga Hunahuna
Pinaagi sa pagbasa niini nga mga kasulatan, markahi o ilista ang mga aksyon ug mga kinaiya nga gikinahanglan sa Ginoo sa mga tawo sa ulahing mga adlaw kinsa nagtinguha sa pag-establisar sa Zion.
Seksyon 4
Unsa ang kaugmaon sa Zion?
Si Elder Christofferson mitudlo nga sa atong pag-establisar sa Zion, kita nag-andam sa atong kaugalingon ug sa kalibutan sa pagdawat sa Manluluwas sa Iyang Ikaduhang Pag-anhi:
Mahinungdanon alang sa pagbalik sa Ginoo, mao ang presensya sa mga tawo diha sa yuta nga naandam na sa pagdawat Kaniya atol sa Iyang pag-anhi. …
Sa karaang panahon, ang Dios mikuha sa matarung nga dakbayan sa Zion ngadto sa Iyang kaugalingon. Ug usab, sa ulahing mga adlaw usa ka bag-ong Zion ang mosugat sa Ginoo sa iyang pagbalik. …
Samtang naningkamot kita nga magmakugihon sa pagpalig-on sa Zion, lakip sa atong bahin diha sa panagpundok sa pinili sa Ginoo ug sa pagtubos sa patay, kinahanglan mohunong kita aron mohinumdom nga buhat kini sa Ginoo ug Siya ang naghimo niini. …
Kining mahinungdanon ug katapusan nga dispensasyon nagmakanunayon sa pagtubo—ang Zion diha sa yuta, gihiusa sa Zion gikan sa kahitas-an atol sa mahimayaong pagbalik sa Manluluwas. … Atong buhaton ang pagpalig-on sa Zion aron mapadali kana nga adlaw. (D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 82–84)
Pamalandong agi og Pagpangandam alang sa Klase
Unsay inyong gihimo sa pagtabang sa pagtukod sa Zion agi og pagpangandam alang sa Ikaduhang Pag-anhi sa Ginoo? Unsa pay inyong mabuhat?