Leksyon 16 Materyal sa Magtutudlo

Ang Templo sa Kirtland ug ang mga Yawe sa Priesthood

Gimandoan sa Ginoo ang mga Santos sa pagtukod og usa ka templo sa Kirtland, Ohio, ug misaad nga Siya motuga kanila og gahum gikan sa kahitas-an” (Doktrina ug mga Pakigsaad 95:8). Kini nga leksyon motabang sa mga estudyante sa paghunahuna kon unsaon kaha nila pagsunod sa mas hingpit nga paagi ang mga sugo sa Ginoo kalabut ngadto sa templo. Kini motabang usab kanila sa pagpasabut sa kamahinungdanon sa mga yawe sa pagkapari nga gipahiuli didto sa Templo sa Kirtland.

Mga Sugyot alang sa Pagtudlo

Mitabang ang Ginoo sa mga Santos sa pagtuman sa Iyang mando sa pagtukod sa Templo sa Kirtland.

Dapita ang mga estudyante sa paghunahuna mahitungod og usa ka butang ang Ginoo, pinaagi sa Iyang mga sulugoon, mihangyo sa mga miyembro sa Simbahan sa pagbuhat nianang ingon og malisud o makasanap. Hangyoa ang pipila ka mga estudyante sa pagpakigbahin og ehemplo ngadto sa klase.

Ipakita ang hulagway sa Templo sa Kirtland. Pahinumdumi ang mga estudyante nga sa Disyembre 1832 ang Ginoo mimando sa mga Santos sa pagtukod og “usa ka balay sa Dios” sa Kirtland (Doktrina ug mga Pakigsaad 88:119).

Ipasabut nga kapin sa lima ka mga bulan human sa mando sa Ginoo, ang mga lider ug mga miyembro sa Simbahan sa gihapon wala pa misugod sa pagtukod sa templo. Basaha ang Doktrina ug mga Pakigsaad 95:1–3 isip usa ka klase, mangita alang sa unsay gisulti sa Ginoo mahitungod sa paglangan sa mga Santos sa pagtukod sa templo.

• Ngano kaha nga ang dili pagtukod sa templo mahimong hunahunaon nga usa ka “mabug-at kaayo nga sala”? (bersikulo 3; tan-awa usab sa bersikulo 6).

• Sa unsa nga mga paagi kaha nga ang pagpanton sa Ginoo sa mga Santos tungod sa wala pagtukod sa templo usa ka timaan sa Iyang gugma alang kanila? (tan-awa sa bersikulo 1).

Dapita ang mga estudyante sa pagbasa sa Doktrina ug mga Pakigsaad 95:8, mangita sa usa ka rason nga ang Ginoo gusto nga tukuron ang usa ka templo sa Kirtland.

Ipasabut nga ang pagtuga nagpasabut sa paghatag og gasa sa usa ka tawo. Ang pagtuga nga gipamulong diha sa Doktrina ug mga Pakigsaad 95 naglakip og mga gasa sa espiritwal nga kahibalo ug gahum. Ang tulumanon sa pagtuga sa templo ingon nga gibuhat karon wala ipadayag hangtud sa 1842 didto sa Nauvoo, Illinois.

Dapita ang usa ka estudyante sa pagbasa og kusog sa Doktrina ug mga Pakigsaad 95:11–12.

• Unsa nga baruganan ang atong makat-unan gikan sa saad sa Ginoo ngadto sa mga Santos diha sa bersikulo 11? (Gamit sa mga pulong sa mga estudyante, pagsulat og usa ka baruganan diha sa pisara nga susama sa mosunod: Samtang kita naninguha sa pagsunod sa mga sugo sa Ginoo, Siya mohatag kanato og gahum sa pagtuman sa iyang kabubut-on.)

• Ngano kaha nga kining saad gikan sa Ginoo nahimo nga kahupay ngadto sa mga Santos sa Kirtland? (Tan-awa ang pahayag ni Eliza R. Snow sa seksyon 1 sa materyal sa pagpangandam.) Unsaon kaha niining baruganan nga mahimong kahupayan nganha kanimo sa imong kinabuhi karon?

• Unsa ang pipila ka mga sakripisyo ang gihimo sa mga Santos aron sa pagsunod sa mando sa Ginoo sa pagtukod og Templo sa Kirtland? (Kon gikinahanglan, awhaga ang mga estudyante sa pagribyu sa seksyon 1 sa materyal sa pagpangandam.)

• Giunsa sa Ginoo paghatag og gahum ug panabang ngadto sa mga Santos sa pagtukod sa Templo sa Kirtland?

Dapita ang mga estudyante sa pagribyu sa pahayag ni Presidente Thomas S. Monson diha sa seksyon 1 sa materyal nga pagpangandam ug sa paghunahuna mahitungod sa mosunod: Sa unsang paagi ang mga Santos karon nagtabang sa pagtukod sa mga templo? Unsa nga matang sa mga sakripisyo ang akong gibuhat kalabut sa pagsimba diha sa templo?

• Ngano kaha ang sakripisyo kasagaran sumpay ngadto sa mga panalangin sa templo?

PAGPALAMBO SA ATONG PAGTUDLO UG PAGKAT-ON

Hatagi og panahon ang mga estudyante nga maghunahuna. Kon ang mga estudyante hatagan og panahon sa pagpamalandong sa mga kasinatian sa pagpuyo sa ebanghelyo ni Jesukristo, ang Espiritu Santo makatabang sa pagdala og mga panumduman ngadto sa ilang mga hunahuna. Usahay ang pagtipon niini nga pamaagi sa pagdapit sa mga estudyante sa pagrekord sa ilang mga hunahuna sa dili pa makigbahin niini makagiya ngadto sa mas makahuluganong mga tubag ug mas dakong pag-andam sa pagpakigbahin.

Paghatag og panahon alang sa mga estudyante sa paghunahuna (ug tingali sa pagsulat) mahitungod sa (1) mga sakripisyo nga ilang nahimo kalabut ngadto sa templo, (2) mga panalangin nga ila nang nadawat gikan sa templo, ug (3) unsa ang ilang mabuhat aron mas makugihong mosunod sa mga mando sa Ginoo kalabut ngadto sa templo.

Gidawat sa Ginoo ang Templo sa Kirtland, ug ang mga yawe sa pagkapari gitugyan ngadto ni Joseph Smith ug Oliver Cowdery.

Mubo nga Sulat: Magtuon ang mga estudyante sa Doktrina ug mga Pakigsaad 109, sa pagpahinungod nga pag-ampo alang sa Templo sa Kirtland, diha sa leksyon 20.

Ipasabut nga pinaagi sa mga sakripisyo sa mga Santos ug sa panabang sa Ginoo, ang Templo sa Kirtland nahuman ug dayon gipahinungod sa Marso 27, 1836. Ang pagtuga sa Ginoo og gahum miabut isip usa ka resulta sa pagkamasulundon sa mga Santos sa pagtukod sa templo.

• Unsa ang pipila ka mga pagpakita ang nasinati sa mga Santos atol sa pagpahinungod sa Templo sa Kirtland? (Awhaga ang mga estudyante sa paghinumdom unsay ilang nakat-unan sa seksyon 2 sa materyal sa pagpangandam.)

Ipasabut nga human sa usa ka semana, ang Manunubos ug ubang langitnong mga mensahero mipakita ngadto ni Joseph Smith ug Oliver Cowdery diha sa templo. Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 110.

Ipakita ang mosunod nga mga hulagway:

Basaha ang Doktrina ug mga Pakigsaad 110:1–10 uban sa klase, mangita alang sa mga paghulagway sa Manluluwas ug alang sa Iyang mensahe ngadto ni Joseph ug Oliver. Dapita ang mga estudyante sa pagpakigbahin kon unsa ang labing importante nganha kanila. Samtang ang mga estudyante makigbahin, hatagi sila og panahon sa paghisgot og mga pangutana sama sa mosunod:

• Unsa ang atong makat-unan mahitungod sa Ginoo gikan sa Iyang pagpakita ug sa mga pagtulun-an diha sa Iyang bag-ong gitukod nga balay?

• Unsa ang mga pulong ug mga saad sa Ginoo diha sa mga bersikulo 7–8 nga nagtudlo mahitungod sa pagkasagrado sa Iyang mga templo?

• Unsa ang epekto sa templo sa Kirtland diha sa tibuok kalibutan? (tan-awa sa mga bersikulo 9–10).

Dapita ang mga estudyante sa pagpakigbahin kon unsa ang ilang nahibaloan mahitungod sa ubang anghel nga mga manulunda nga mipakita didto sa Templo sa Kirtland. Mahimo nimong ipakita ang mosunod nga kamatuoran: Mipadala ang Ginoo og langitnong mga mensahero ngadto sa Templo sa Kirtland aron pagtugyan sa mga yawe sa pagkapari nga importante alang sa buhat sa kaluwasan.

Hangyoa ang mga estudyante sa pagpasabut usab sa mga yawe nga kining mga mensahero mitugyan ngadto ni Joseph ug Oliver. Patan-awa ang mga estudyante sa seksyon 2 sa materyal sa pagpangandam. Samtang ang mga estudyante nakigbahin, hunahunaa ang pagpakita sa mga ngalan Moises, Elias, ug Elijah uban sa kaubang mga yawe.

• Sa unsang mga paagi kita napanalanginan karon tungod sa mga yawe sa pagkapari nga gitugyan didto sa Templo sa Kirtland?

Ipakita ang mosunod nga pamahayag ni Presidente Joseph Fielding Smith, ug dapita ang usa ka estudyante sa pagbasa niini og kusog:

Ang Templo sa Kirtland naghupot og linain nga dapit diha sa mga kasaysayan sa pagtukod og templo. Dili kini sama sa ubang mga templo. Gitukod kini una sa tanan alang sa pagpahiuli sa mga yawe sa awtoridad. (Joseph Fielding Smith, Doctrines of Salvation, comp. Bruce R. McConkie [1955], 2:242)

Hunahunaa ang pagpakigbahin og ehemplo mahitungod sa usa ka piho nga paagi nga ang mga yawe nga gitugyan didto sa Templo sa Kirtland mipanalangin sa imong kinabuhi. Ipamatuod nga ang mga yawe sa pagkapari nga gitugyan ngadto ni Propeta Joseph Smith ug ni Oliver Cowdery gihuptan ug gigamit karon sa matag miyembro sa Unang Kapangulohan ug sa Napulog Duha ka mga Apostoles ubos sa pagdumala sa Presidente sa Simbahan.

Alang sa Sunod nga Higayon

Ipasabut nga agi og pagpangandam alang sa sunod nga klase, ang mga estudyante makabaton og oportunidad sa pagtuon og usa sa labing malisud nga mga yugto sa kasaysayan sa Simbahan, sa dihang ang mga Santos misinati og mga pagsulay, pagpanggukod, ug pagbudhi. Dapita ang mga estudyante sa pagtuon sa materyal sa pagpangandam ug sa pag-anha sa klase nga andam sa pagpakigbahin og mga baruganan nga makatabang kanila sa pag-atubang og oposisyon ug kalisud uban ang hugot nga pagtuo sa Dios.