“Leksyon 10 Materyal alang sa Pagpangandam sa Klase: Pagsunod sa Buhi nga mga Propeta sa Ginoo,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 10 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 10 Materyal sa Pagpangandam sa Klase
Pagsunod sa Buhi nga mga Propeta sa Ginoo
Hunahunaa kon unsa kaha ka lahi ang inyong kinabuhi kon wala ang impluwensya ug mga pagtulun-an sa buhi nga mga propeta. Samtang kamo magtuon, ikonsiderar kon sa unsa nga paagi nga ang pagsunod sa mga propeta sa Ginoo makahatag og mas dako nga giya ug mga panalangin sa inyong kinabuhi.
Seksyon 1
Sa unsa nga paagi nga ang pagpili sa pagsunod sa mga propeta sa Ginoo makapanalangin sa akong kinabuhi?
Sa adlaw nga ang Simbahan ni Jesukristo naorganisar, ang Ginoo mipadayag nga si Propeta Joseph Smith “pagatawgon nga manalagna, tighubad, propeta, apostol ni Jesukristo, anciano [elder] sa simbahan” (Doktrina ug mga Pakigsaad 21:1).
Ang Ginoo dayon mihatag og sugo ngadto sa mga Santos mahitungod sa pagsunod sa Iyang propeta ug mihulagway sa mga panalangin nga moabut kon sila mobuhat sa ingon.
Pagtuon agi og Pagpangandam alang sa Klase
Basaha ang Doktrina ug mga Pakigsaad 21:4–6.
Sa misunod nga tuig ang Ginoo misubli sa pagpasabut sa koneksyon tali sa Iyang tingog ug sa tingog sa Iyang mga propeta. Sa usa ka pagpadayag nga nagsilbi nga pasiuna alang sa Basahon sa mga Sugo, nga sa wala madugay nahimo nga Doktrina ug mga Pakigsaad, ang Ginoo mitudlo pag-usab nga “bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.” (Doktrina ug mga Pakigsaad 1:38).
Si Elder Ulisses Soares sa Korum sa Napulog Duha ka mga Apostoles mipamatuod:
Ang pagkaadunay mga propeta usa ka timaan sa gugma sa Dios alang sa Iyang mga anak. Ipahibalo nila ang mga saad ug ang tinuod nga kinaiyahan sa Dios ug kang Jesukristo ngadto sa Ilang katawhan. …
Pinaagi sa pagsunod [sa mga propeta sa Ginoo], mas sadya ang atong kinabuhi ug minus ang kakomplikado, ang atong mga kalisdanan ug mga suliran mas sayon nga mapas-an, ug mamugna nato ang espiritwal nga taming libut kanato nga mosalipud kanato sa mga pag-atake sa kaaway sa atong panahon. (Ulisses Soares, “Ang mga Propeta Mamulong pinaagi sa Gahum sa Balaang Espiritu,” Liahona, Mayo 2018, 99)
Pamalandong agi og Pagpangandam alang sa Klase
Sa unsa nga paagi nga ang inyong kinabuhi napanalanginan pinaagi sa pagsunod sa mga pagtulun-an ug tambag sa mga propeta?
Seksyon 2
Sa unsa nga paagi nga ako makadawat sa mga pulong sa mga propeta sa Ginoo pinaagi sa “pagpailub ug pagtuo” (Doktrina ug mga Pakigsaad 21:5)?
Usahay, makamatikod mo nga lisud ang pagdawat ug pagsunod sa tambag ug mga pagtulun-an sa mga propeta sa Ginoo. Tingali kini mahitabo kon kamo wala makasabut sa hingpit sa katarungan sa unsay ilang mga nasulti. O ang ilang mga pagtulun-an nasumpaki sa nabantog nga mga opinyon ug mga binuhatan sa katilingban o sa inyong kaugalingong personal nga mga panglantaw ug mga tradisyon sa pamilya.
Si Elder Neil L. Andersen sa Korum sa Napulog Duha ka mga Apostoles mihatag sa mosunod nga tambag ug saad:
Ayaw katingala kon usahay ang inyong personal nga mga panglantaw dili kanunay nga mahiangay sa mga pagtulun-an sa propeta sa Ginoo. Mga gutlo kini sa pagkat-on, sa pagpaubos, kon moluhod kita aron mag-ampo. Matinud-anon kitang magpadayon, nga mosalig sa Dios, nga nasayud nga moabut ang panahon nga makadawat kita og dugang nga espiritwal nga katin-awan gikan sa atong Langitnong Amahan. …
… Akong nabantayan nga samtang mainampuon kong nagtuon sa mga pulong sa propeta sa Dios ug sa mainampingon, uban sa pagpailub, sa espiritwal nga paagi mipahiangay sa akong kabubut-on ngadto sa iyang dinasig nga mga pagtulun-an, ang akong pagtuo diha ni Ginoong Jesukristo kanunay nga milambo. Kon mopili kita sa pagbaliwala sa iyang tambag ug motino nga mas nasayud kita, ang atong pagtuo mag-antus ug ang atong mahangturong panglantaw dili na klaro. Mosaad ako kaninyo nga kon magpabilin mo nga determinado sa pagsunod sa propeta, ang inyong pagtuo sa Manluluwas molambo. (Neil L. Andersen, “Ang Propeta sa Dios,” Liahona, Mayo 2018, 26–27)
Si Sister Carol F. McConkie, kinsa miserbisyo isip unang magtatambag sa Kinatibuk-ang Kapangulohan sa Young Women, mitudlo:
Samtang mosunod, mosuporta, ug manghimatuod kita sa mapanagnaong pulong, nagsaksi kita nga kita dunay pagtuo nga mapainubsanong monunot sa kabubut-on, kaalam, ug panahon sa Ginoo.
Mosunod kita sa mapanagnaong pulong bisan kon kini ingon og dili resonable, hasol, ug lisud. Sumala sa mga sumbanan sa kalibutan, ang pagsunod sa propeta mahimong dili popular, sayop, ug dili madawat sa politikanhon ug sosyal nga paagi. Apan ang pagsunod sa propeta kanunayng husto. …
Kon kita mosunod sa mga pulong sa mga propeta, atong gitukod ang atong mga panimalay ug kinabuhi diha sa siguradong tukuranan, “sa lig-on nga sukaranan sa atong Manunubos, kinsa mao si Kristo, ang Anak sa Dios” [Helaman 5:12]. (Carol F. McConkie, “Pagpuyo sumala sa mga Pulong sa mga Propeta,” Liahona, Nob. 2014, 77, 79)
Ang mosunod nga ehemplo gikan sa kasaysayan sa Simbahan makatabang sa paghulagway unsay gipasabut sa pagdawat sa mga pulong sa buhi nga mga propeta sa Ginoo pinaagi sa pagpailub ug pagtuo. Sa paghisgot sa panan-awon sa mga gingharian sa himaya, nga karon narekord sa Doktrina ug mga Pakigsaad 76, si Presidente Brigham Young misaysay:
Sa dihang gipadayag sa Dios ngadto ni Joseph Smith ug Sidney Rigdon nga dihay usa ka dapit nga giandam alang sa tanan, sumala sa kahayag nga ilang nadawat ug sa ilang pagsalikway sa dautan ug pagbuhat og maayo, dako kini nga pagsulay alang sa kadaghanan, ug ang uban mibiya sa kamatuoran tungod kay ang Dios dili mopadala sa mga pagano ug mga masuso ngadto sa walay katapusan nga silot, apan adunay dapit sa kaluwasan, sa tukmang panahon, alang sa tanan, ug mopanalangin sa matinuoron ug mahiyason ug matinud-anon, bisan og sila nasakop sa bisan unsa nga simbahan o wala. Bag-o kini nga doktrina niini nga henerasyon, ug daghan ang wala modawat niini. (Mga Pagtulun-an sa mga Presidente sa Simbahan: Brigham Young [1997], 337)
Si Brigham Young mismo naglisud sa pagsabut niini nga doktrina sa sinugdanan. Miingon siya: “Ang akong mga tradisyon mao, nga sa dihang ang Panan-awon miabut og una ngari kanako, kini supak gayud ug sukwahi sa akong kanhiay nga edukasyon. Miingon ako, Hulat og kadiyut. Wala ko kini isalikway; apan wala ako makasabut niini. … [Kinahanglan] akong maghunahuna ug mag-ampo, mobasa ug maghunahuna, hangtud nga akong mahibaloan ug hingpit nga masabtan kini sa akong kaugalingon” (sa Journal of Discourses, 6:281).
Hisguti sa Uban ug Pag-andam sa Pagpakigbahin diha sa Klase
Ikonsiderar ang pagpakigbahin uban sa usa ka sakop sa pamilya o higala unsay inyong nakat-unan mahitungod sa pagsunod sa mga propeta sa Ginoo pinagi sa pagpailub ug pagtuo. Dayon pangutana, “Unsay nakatabang nimo sa pagsunod sa mga propeta sa Ginoo pinaagi sa pagpailub ug pagtuo?” Tambong sa klase nga andam nga mopakigbahin sa unsay inyong nakat-unan.
Seksyon 3
Unsa ang tahas sa mga propeta sa pagtudlo nako sa tinuod nga doktrina?
Sa sayong bahin sa kasaysayan sa Simbahan, si Joseph Smith nagtinguha sa tabang sa Ginoo kabahin sa mga miyembro sa Simbahan kinsa nailad sa bakak nga doktrina.
[Pipila ka bulan human maorganisar ang Simbahan, si Joseph Smith] nakahibalo nga si Hiram Page, usa sa Walo ka mga Saksi [sa Basahon ni Mormon] ug teacher sa Aaronic nga Pagkapari, misugod sa pagtinguha og mga pagpadayag alang sa simbahan pinaagi sa iyang gihunahuna nga usa ka bato sa manalagna. Daghang mga Santos … mituo nga kini mga pagpadayag gikan sa Dios.
Si Joseph nasayud nga siya nag-atubang og usa ka problema. Ang mga pagpadayag ni Hiram migamit sa pinulongan sa kasulatan. Kini naghisgot sa pagkatukod sa Zion ug sa pagkaorganisar sa simbahan, apan usahay kini misukwahi sa Bag-ong Tugon ug sa mga kamatuoran nga gipadayag sa Ginoo pinaagi ni Joseph.
Dili sigurado kon unsay angayang buhaton, nagpulaw si Joseph sa pag-ampo usa ka gabii, nangayo og giya. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 111)
Agig tubag sa mga pag-ampo ni Joseph Smith, ang Ginoo mihatag sa pagpadayag nga narekord sa Doktrina ug mga Pakigsaad 28, nga miklaro sa talagsaong tahas ni Joseph isip Propeta sa Simbahan.
Pagtuon agi og Pagpangandam alang sa Klase
Basaha ang Doktrina ug mga Pakigsaad 28:2, 7.
Ang Ginoo mipahayag usab nga ang mga butang nga gisulat ni Hiram Page dili sa Dios (tan-awa sa Doktrina ug mga Pakigsaad 28:11). Sa wala madugay human gihatag kini nga pagpadayag, “ang mga Santos misalikway sa mga pagpadayag ni Hiram ug nagkahiusa sa pagpaluyo ni Joseph isip ang bugtong tawo nga makadawat og pagpadayag alang sa simbahan” (Mga Santos, 1:112).
Tungod kay ang buhi nga mga propeta sa Ginoo naghupot sa mga yawe sa pagdawat og pagpadayag alang sa Simbahan, sila usab adunay responsibilidad sa pagtudlo ug pagklaro sa doktrina alang sa mga miyembro sa Simbahan. Si Elder D. Todd Christofferson sa Korum sa Napulog Duha ka mga Apostoles mitudlo:
Sa Simbahan karon, sama sa karaan, ang pag-establisar sa doktrina ni Kristo o pagkorihir sa doktrinal nga mga sayop nagkinahanglan sa balaang pagpadayag ngadto sa gitugahan sa Ginoo sa apostolikanhong awtoridad. …
Duna silay katungod, ang gahum, ug awtoridad sa pagpahayag sa hunahuna ug kabubut-on sa Dios ngadto sa katawhan, ubos sa tanang gahum ug awtoridad sa Presidente sa Simbahan. …
Unsaon sa Manluluwas sa pagpadayag sa Iyang kabubut-on ug doktrina ngadto sa mga propeta, manalagna, ug tigpadayag? Siya mohimo niini pinaagi sa mga sinugo o Siya mismo. Mamulong Siya sa kaugalingon Niyang tingog o sa tingog sa Espiritu Santo … (tan-awa sa 1 Nephi 17:45; Doktrina ug mga Pakigsaad 9:8). Siya mismo motudlo sa Iyang mga sinugo sa tinagsa o diha sa council (tan-awa sa 3 Nephi 27:1–8). …
… Kinahanglang hinumduman nga dili tanang pahayag nga gihimo sa usa ka lider sa Simbahan, kaniadto o karon, maglangkob gayud og doktrina. Nasabtan na sa Simbahan nga ang pahayag nga himoon sa usa ka lider sa usa ka okasyon sagad magrepresentar sa personal, bisan maayo ang tuyo, opinyon, wala magpasabut nga opisyal kini nga para gayud sa tibuok Simbahan. (D. Todd Christofferson, “Ang Doktrina ni Kristo,” Liahona, Mayo 2012, 86–88)
Si Elder Andersen mipasabut nga ang tinuod nga doktrina gitudlo nga makanunayon sa pinili sa Ginoo, nga buhi nga mga propeta:
Pipila ang magduhaduha sa ilang pagtuo kon makakaplag sila og pamahayag sa usa ka lider sa Simbahan mga dekadang milabay nga daw sukwahi [dili tukma] sa atong doktrina. Adunay importanteng baruganan nga nagdumala sa doktrina sa Simbahan. Ang doktrina gitudlo sa tanang 15 ka mga sakop sa Unang Kapangulohan ug Korum sa Napulog Duha. Wala kini gitago sa usa ka walay klaro nga paragraph sa usa ka pakigpulong. Ang tinuod nga mga baruganan kanunay nga gitudlo ug sa kadaghanan. Ang atong doktrina dili lisud pangitaon. (Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 41)
Pamalandong agi og Pagpangandam alang sa Klase
Unsa nga mga panalangin ang miabut sa inyong kinabuhi samtang kamo nagsunod sa mga pagtulun-an ug tambag sa mga propeta sa Ginoo sa atong panahon?