Leksyon 1 Materyal sa Magtutudlo

Pasiuna sa Pagpahiuli

Gitapos ni Ginoong Jesukristo ang Dakong Apostasiya sa dihang Iyang gipahiuli ang Iyang ebanghelyo ug giorganisar ang Iyang Simbahan pag-usab dinhi sa yuta. Human makaapil niini nga leksyon, ang mga estudyante kinahanglan makahimo sa pag-ila sa kamot sa Ginoo sa mga panghitabo nga nag-una sa Pagpahiuli ug makapasabut sa panginahanglan sa kamatuoran nga itudlo pag-usab ngadto sa mga anak sa Dios sa atong kapanahunan.

Pahibalo: Kon posible, kontaka ang mga estudyante nga nagparehistro alang niini nga kurso sa dili pa ang unang adlaw sa klase ug dapita sila sa pagbasa sa materyal sa pagpangandam alang sa leksyon 1 sa dili pa motambong sa klase. Kon dunganon nimo pagtudlo ang leksyon 1 ug 2, dapita ang mga estudyante sa pagtuon usab sa materyal alang sa leksyon 2.

Mga Sugyot alang sa Pagtudlo

Ipakita sa mga estudyante kinsa wala pa mapamilyar sa materyal sa pagpangandam kon unsaon sa pag-access niini sa elektronic nga paagi. Mahimo usab nga ikaw mohatag og mga kopya nga papel ngadto sa mga estudyante nga walay mga electronic device.

PAGPALAMBO SA ATONG PAGTUDLO UG PAGKAT-ON

Pangandam uban sa paghunahuna sa mga estudyante. Samtang nangandam ka sa pagtudlo, hunahunaa kon unsa ang imong gipanghinaot nga bation ug buhaton sa mga estudyante ug unsay imong gipanghinaot nga mausab sa ilang kinabuhi isip resulta sa leksyon ug sa kurso. Sa mainampoong paagi ikonsiderar ang mga panginahanglan sa imong mga estudyante ug paminaw sa direksyon sa Espiritu samtang ikaw mangandam. Si Elder Jeffrey R. Holland sa Korum sa Napulog Duha ka mga Apostoles mitudlo sa mga magtutudlo nga “ang estudyante dili usa ka sudlanan nga pun-on; ang estudyante usa ka kalayo nga pasigahon” (“Angels and Astonishment,” Church Educational System training broadcast, Hunyo 12, 2019).

Tungod sa Dakong Apostasiya ang Pagpahiuli sa ebanghelyo gikinahanglan.

Dapita ang usa ka estudyante sa pagbasa og kusog sa pasiuna sa materyal sa pagpangandam sa leksyon 1.

Pagpakita og usa ka buhi nga tanom ug patay o himatyon nga tanom (o patay nga sanga nga gitisok sa gamayng yuta). O ipakita ang gisukip nga mga imahe kon walay makuha nga tinuod nga mga tanom.

• Ngano kaha nga kini nga mga tanom managlahing tan-awon sa usag usa? Unsa nga matang sa analohiya mahitungod sa atong kaugalingong espirituhanong kondisyon ang atong mahimo gamit niini nga mga tanom?

Ipasabut nga ang usa ka propeta sa Daang Tugon nga ginganlan og Amos mipasidaan sa dautang mga tawo sa Israel nga sila makasinati og kagutom. Dapita ang mga estudyante sa pagbasa sa Amos 8:11–12, nga mangita kon unsa nga matang sa kagutom ang gipasidaan ni Amos.

Dapita ang mga estudyante sa pagsiksik sa seksyon 1 sa materyal sa pagpangandam, nga mangita kon unsay nawala panahon sa Dakong Apostasiya. Ipareport sa mga estudyante kon unsay ilang nakit-an.

Ipakita sa mga estudyante ang video “Dispensations: The Pattern of Apostasy and Restoration” (6:52). Dapita ang mga estudyante sa paghunahuna samtang sila magtan-aw kon unsa ang gitudlo kanato mahitungod sa Langitnong Amahan niining matang sa apostasiya ug pagpahiuli nga gipakita sa video.

• Unsa kaha ang gitudlo niini nga matang sa apostasiya ug pagpahiuli ngari kanato mahitungod sa Langitnong Amahan?

• Ngano nga ang dispensasyon sa kahingpitan sa mga panahon lahi kay sa laing dispensasyon? Unsa ang inyong mga hunahuna o mga pagbati mahitungod sa pagpuyo niining panahona?

Ang Ginoo miandam og paagi alang sa Pagpahiuli sa ebanghelyo.

Ipakita ang mosunod nga kamatuoran: Ang Ginoo miandam og paagi alang sa Pagpahiuli sa ebanghelyo.

Dapita ang mga estudyante sa pagporma og gagmay nga mga grupo ug dayon magpuli-puli sa pagbasa sa seksyon 2 sa materyal sa pagpangandam, mangita kon unsa nga mga panghitabo ang nag-andam alang sa Pagpahiuli sa ebanghelyo. (Kon kadaghanan sa imong mga estudyante nakabasa na sa materyal sa pagpangandam sa wala pa ang klase, mahimo nimo silang dapiton sa pag-summarize sa sulod sa seksyon 2.) Ipakita ang mosunod nga mga pangutana, ug hatagi og panahon ang matag grupo sa paghisgot niini.

• Sa unsa nga paagi ang Ginoo miandam sa paagi nga mahitabo ang Pagpahiuli?

• Unsay atong makat-unan mahitungod sa Ginoo kon giunsa Niya pag-andam ang agianan alang ni Joseph Smith ug sa Pagpahiuli?

Ang mga estudyante makahimo og aktibong tahas sa ilang pagkat-on sa ebanghelyo.

Ipakita ang lista sa mga ulohan sa leksyon alang sa kurso (makita nimo kini sa talaan sa mga sulod). Ipasabut nga kini nga kurso mopokus sa pasiuna nga mga panghitabo, doktrina, ug kasulatan sa Pagpahiuli, ingon man usab sa pakigpulong sa malisud nga mga hilisgutan nga usahay motumaw diha sa kasaysayan sa Simbahan. Ikonsiderar ang pagdapit sa mga estudyante sa pagbasa sa lista sa umaabut nga mga leksyon ug sa pagpakigbahin sa klase kon unsa nga mga hilisgutan nga gusto nila nga makat-unan pag-ayo. Timan-i ang ilang mga tubag aron ikaw makahibalo unsa nga leksyon ang hatagan og dugang nga gibug-aton atol sa kurso.

Ipasabut nga ang materyal sa pagpangandam usa ka importante nga bahin niini nga kurso ug makapalambo sa personal nga pagkat-on sa ebanghelyo sa estudyante ug makatabang nila sa pag-andam nga makahimo og makahuluganong kontribusyon atol sa klase.

Aron matabangan ang mga estudyante nga makasabut sa mga panalangin nga moabut tungod sa kasinatian sa pagpangandam alang sa matag klase, ipakita ang mosunod nga pamahayag ni Elder Kim B. Clark sa Seventy:

Kon tinud-anay kamong magtinguha nga makat-on og maayo, kon ang inyong kasingkasing ug hunahuna andam modawat sa pagkat-on, ug kon lihukon ninyo kana nga tinguha, ang Ginoo mopanalangin kaninyo. Kon buhaton ninyo ang inyong bahin—mag-ampo diha sa hugot nga pagtuo, mangandam, magtuon, aktibong moapil, ug mobuhat sa inyong labing maayo—ang Espiritu Santo motudlo kaninyo, mopalambo sa inyong kapasidad sa pagbuhat sa unsay inyong nakat-unan, ug motabang kaninyo nga mamahimo kon unsay gusto sa Ginoo nga kamo mamahimo. (Kim B. Clark, “Pagkat-on alang sa Tibuok Kalag,” Liahona, Aug. 2017, 33)

Dapita ang mga estudyante sa pagpamalandong pag-ayo kon unsaon nila sa pagtubag kining mosunod nga mga pangutana:

• Sa unsa nga paagi nga ang sinsero nga pag-apil niini nga kurso makatabang sa akong espirituhanong pagtubo?

• Andam ba ako nga mobayad sa bili sa pagtuon sa akong kaugalingon sa dili pa ang klase aron ako moabut nga andam nga makat-on pa og dugang? Kanus-a, diha sa akong iskedyul ako mopasalig nga mohimo sa akong personal nga pagtuon ug pagpangandam nga usa ka prayoridad?

Ikonsiderar ang pag-awhag sa mga estudyante nga irekord ang ilang mga tumong kalabut niini nga mga pangutana. Mahimo usab nimo nga hisgutan sa tibuok klase unsaon nila sa pagtabang ang usag usa nga moabut nga andam nga makat-on pa og dugang. (Ang mga ideya mahimong maglakip sa paghimo og mga grupo sa klase sa pagpadala og text, mga grupo sa pagtuon, mga paagi sa pagpahinumdom sa usag usa sa ilang mga tumong, o mga paagi sa pagpanaghisgot diin mapakigbahin nila ang mga panabut gikan sa ilang pagtuon.)

Alang sa Sunod nga Higayon

Ipasabut ngadto sa mga estudyante nga ang materyal sa pagpangandam alang sa sunod klase naglakip sa mga porsyon sa personal nga istorya ni Propeta Joseph Smith sa iyang Unang Panan-awon. Dapita ang mga estudyante sa pagkonsiderar unsay posible natong makat-unan gikan sa nagkalain-laing mga istorya ingon man usab sa kaimportante sa atong kaugalingong mga pagpamatuod sa katinuod sa Unang Panan-awon.