Leksyon 22 Materyal sa Magtutudlo

Dinaghan nga Kaminyoon

Ang kaminyoon tali sa usa ka lalaki ug usa ka babaye mao ang balaod sa Ginoo gawas kon mosugo Siya og lahi (tan-awa sa Jacob 2:27–30). Pinaagi sa pagpadayag, ang Ginoo misugo ni Propeta Joseph Smith sa pagsunod sa dinaghan nga kaminyoon ug sa pagtudlo niini ngadto sa unang pipila ka mga miyembro sa Simbahan. Ang dinaghan nga kaminyoon nagpadayon sa Simbahan hangtud ang Ginoo mipahayag pinaagi sa pagpadayag nga kinahanglan nga hunungon na sa mga Santos ang pagbuhat niini (tan-awa sa Opisyal nga Pahayag 1). Kini nga leksyon gihimo aron malig-on ang panghimatuod sa mga estudyante nga si Joseph Smith ug ang unang mga miyembro sa Simbahan naglihok ubos sa direksyon sa Ginoo sa dihang nagbuhat sila sa dinaghan nga kaminyoon. Makatabang usab kini nga ang mga estudyante mas makasalig sa hingpit sa Ginoo samtang maningkamot sila sa pagsunod sa Iyang kabubut-on ug sa pagpangita og mga tubag sa ilang mga pangutana.

Mga Sugyot alang sa Pagtudlo

Ang Ginoo mipadayag sa buhat sa dinaghan nga kaminyoon.

Ipakita ang mosunod nga pamahayag ni Presidente Russell M. Nelson:

Ang Dios kanunay nga misugo sa Iyang mga anak sa pakigsaad sa pagbuhat sa lisud nga mga butang. (Russell M. Nelson, “Barug isip Tinuod nga mga Milenyal,” Liahona, Okt. 2016, 49)

• Unsa ang pipila sa “lisud nga mga butang” nga gisugo sa Dios nga buhaton sa mga miyembro sa Simbahan? (Mahimo usab nimo nga ilista ang mga tubag diha sa pisara. Dapita ang mga estudyante sa paghunahuna sa ilang personal nga pagkamasulundon niini nga mga sugo sa kinatibuk-an nga leksyon.)

• Ngano kaha nga ang Dios misugo sa Iyang mga anak sa pakigsaad sa pagbuhat niining mga butanga?

Itudlo nga alang sa daghan sa unang mga Santos sa Ulahing mga Adlaw, usa sa labing lisud nga mga rekisitos gikan sa Dios mao nga sila mosunod sa baruganan sa dinaghan nga kaminyoon. Pahinumdumi ang mga estudyante nga sayo sa tuig 1831, si Joseph Smith nag-ampo aron makasabut ngano nga ang pipila ka karaang mga propeta ug mga hari sa Israelite nagbuhat sa dinaghan nga kaminyoon (tan-awa sa ulohan sa seksyon bersikulo 1 sa Doktrina ug mga Pakigsaad 132).

Dapita ang usa ka estudyante sa pagbasa og kusog sa Doktrina ug mga Pakigsaad 132:34–37. Hangyoa ang klase sa pagsunod, nga mangita kon giunsa pagtubag sa Ginoo ang mga pangutana sa Propeta.

• Ipakita ang mosunod nga pangutana: Ngano nga si Abraham nakigminyo ni Hagar isip usa sa dinaghan nga asawa?

• Sumala sa mga bersikulo 36–37, unsa nga baruganan ang gitudlo sa Ginoo ni Joseph Smith mahitungod sa pagkamasulundon sa Iyang mga sugo? (Human makatubag ang mga estudyante, isulat ang mosunod nga kamatuoran diha sa pisara: Kon kita andam nga mosunod sa bisan unsa nga mga sugo sa Ginoo, “giisip kini nga matarung ngari [kanato].”)

• Sa unsa nga paagi nga ang sugo sa Ginoo ngadto ni Abraham sa pagsakripisyo ni Isaac matandi ngadto sa Iyang sugo ngadto ni Joseph Smith ug sa unang mga Santos sa paghimo sa dinaghan nga kaminyoon?

Ipasabut nga human gipadayag sa Ginoo ang baruganan sa dinaghan nga kaminyoon ngadto ni Joseph Smith, Siya misugo sa Propeta sa pagsunod niini nga baruganan ug sa pagtudlo niini ngadto sa uban.

Ipakita ang mosunod nga pamahayag ug dapita ang usa ka estudyante sa pagbasa niini og kusog:

“Sumala ni Helen Mar Kimball, mipahayag si Joseph Smith nga “ang pagbuhat niini nga baruganan mao ang pinakalisud nga pagsulay sa mga Santos sa ilang hugot nga pagtuo.” Bisan kon kini mao ang usa sa “pinakagrabe” nga mga pagsulay sa iyang kinabuhi, mipamatuod siya nga kini usab mao ang “usa sa labing dako nga mga panalangin.” (“Plural Marriage in Kirtland and Nauvoo,” Gospel Topics, topics.ChurchofJesusChrist.org)

• Unsa ang mga pagbati ni Joseph Smith sa pagbuhat sa dinaghan nga kaminyoon sa dihang una kining gipahibalo? (Kon gikinahanglan, iparibyu sa mga estudyante ang pamahayag ni Sister Eliza R. Snow sa seksyon 2 sa materyal sa pagpangandam.)

Hangyoa ang mga sakop sa klase sa pagkonsiderar sa mga ehemplo ni Abraham ug Joseph Smith.

• Unsa ang gipadayag sa pagkaandam sa pagsunod sa unang mga Santos sa maong lisud nga mga sugo mahitungod sa ilang kinaiya ug hugot nga pagtuo?

Ipasabut nga daghan sa unang mga Santos mihatag og deskripsyon sa pakigbisog nga ilang nasinati sa dihang ang dinaghan nga kaminyoon gipahibalo ngadto kanila. Dapita ang mga estudyante sa pagpakigbahin unsa ang ilang nahinumduman gikan sa mga istorya nga ilang gitun-an sa seksyon 3 sa materyal sa pagpangandam.

Ipakita ang mosunod nga istorya gikan ni Phebe Woodruff, asawa ni Presidente Wilford Woodruff. Dapita ang usa ka estudyante sa pagbasa niini og kusog:

Sa dihang unang gitudlo ang baruganan sa dinaghan nga kaminyoon ako naghunahuna nga kini ang labing dautan nga butang nga akong nadunggan sukad. … Hinoon, sa higayon nga nakombinser ko nga nagsugod kini isip usa ka pinadayag gikan sa Dios pinaagi ni Joseph, ug nasayud nga siya usa ka propeta, hugtanon akong mihangyo sa akong Langitnong Amahan diha sa mainiton nga pag-ampo, nga magiyahan sa husto nianang importante kaayo nga higayon sa akong kinabuhi. Ang tubag miabut. Gihatagan og kalinaw ang akong hunahuna. Nasayud ko nga kabubut-on kadto sa Dios. (Phebe Woodruff, sa Edward Tullidge, The Women of Mormondom [1877], 413)

• Sa unsa nga paagi nga ang ehemplo ni Phebe nakatabang sa usa ka tawo karon kinsa nakigbisog sa pagsunod sa usa ka sugo gikan sa Dios? Sa unsa nga paagi nga ang iyang ehemplo makatabang sa usa ka tawo kinsa adunay mga pangutana mahitungod sa pagbuhat sa dinaghan nga kaminyoon sa unang mga Santos?

Dapita ang usa ka estudyante sa pagbasa og kusog sa Mga Proverbio 3:5–6 ug hangyoa ang klase sa pagsunod ug sa pagpangita og usa ka baruganan nga may kalabutan sa mga kasinatian niining unang mga Santos.

• Unsa nga baruganan ang atong makat-unan gikan niini nga tudling ug sa kasinatian sa unang mga Santos? (Gamit ang mga pulong sa mga estudyante, isulat sa pisara (o ipakita) ang usa ka baruganan nga susama sa mosunod: Kon mosalig kita sa Ginoo uban sa atong tibuok kasingkasing ug dili mosalig sa atong kaugalingong pagsabut, nan Siya mogiya sa atong mga kinabuhi.)

Pangutan-a ang mga estudyante sa mosunod:

• Unsa kaha ang gipasabut alang sa usa ka tawo kinsa nabalaka mahitungod sa gibuhat sa kaniadto bahin sa dinaghan nga kaminyoon sa pagsalig sa Ginoo uban sa iyang kasingkasing ug dili lamang mosalig sa iyang kaugalingong pagsabut?

Ipasabut nga komon alang sa mga miyembro sa Simbahan nga adunay mga pangutana o mga kabalaka mahitungod sa dinaghan nga kaminyoon. Ang Dios wala mopadayag ug wala magkinahanglan sa Iyang mga anak karon nga masabtan ang mga detalye sa dinaghan nga kaminyoon. Hinoon, ang tanang mga Santos gisaaran nga sila makaangkon og saksi nga si Joseph Smith mao ang propeta sa Dios kinsa nakadawat og mga sugo ug pagpadayag gikan Kaniya ug nga si Joseph matinud-anong nagsunod sumala sa mga sugo sa Ginoo.

PAGPALAMBO SA ATONG PAGTUDLO UG PAGKAT-ON

Makatabang ka sa mga estudyante sa pagtubag sa lisud nga mga pangutana. Ang paghatag sa mga estudyante og husto nga impormasyon ug pagtabang kanila nga makakita og kasaligan nga mga tinubdan makatabang nila sa paghunahuna mahitungod sa mahagitong mga hilisgutan ug sa pagpasabut niini sa saktong paagi. Kon ang mga estudyante gusto nga makat-on pa og dugang mahitungod sa pagbuhat sa dinaghan nga kaminyoon sa unang kasaysayan sa Simbahan, dapita sila sa pagtuon sa mainampoong paagi sa dugang nga mga kapanguhaan nga nakalista sa “seksyon nga Gusto pa ba Mo og Dugang?” sa materyal sa pagpangandam.

Dapita ang mga estudyante sa pagkonsiderar sa mga panahon sa ilang kinabuhi sa dihang sila misalig sa Ginoo ug sa usa ka lisud nga sugo—o sa dihang sila kinahanglan nga “dili mosalig sa [ilang] kaugalingong salabutan” samtang sila mangita og mga tubag sa lisud nga mga pangutana. Mahimo kang modapit og pipila ka estudyante sa pagpakigbahin sa ilang mga kasinatian. Pangutan-a sila giunsa sa Ginoo paggiya ang ilang mga dalan.

Ikonsiderar ang paghatag sa mga estudyante og panahon sa paghunahuna mahitungod sa ilang relihiyoso o personal nga mga pangutana. Hangyoa ang mga estudyante sa pagpamalandong kon unsay ilang mabuhat sa pagpangita og mga tubag o kasiguroan mahitungod niini nga mga pangutana, sa pagsalig sa Ginoo, ug pagsalig Kaniya. Mahimo nilang irekord ang ilang mga hunahuna sa usa ka journal o mag-ampo alang sa panabang sa Ginoo aron makahibalo unsaon nga makalihok inubanan sa pagtuo.

Ang Ginoo mipadayag sa pipila ka rason alang sa buhat sa dinaghan nga kaminyoon.

Ipasabut nga dili nato masabtan ang tanang mga katuyoan sa Dios sa pagpahibalo sa dinaghan nga kaminyoon niini nga dispensasyon, apan Siya mihatag nato og pipila sa Iyang mga rason. Pananglitan, ang Ginoo mitudlo ni Propeta Joseph Smith nga ang pagbuhat usa ka bahin sa pagpahiuli sa “tanan nga mga butang” gikan sa nangaging mga dispensasyon (tan-awa sa Doktrina ug mga Pakigsaad 132:40, 45).

Dapita ang usa ka estudyante sa pagbasa og kusog sa Jacob 2:30, ug hangyoa ang klase sa pagpangita og laing rason nga gihatag sa Ginoo sa pagsugo sa Iyang katawhan sa pagbuhat sa dinaghan nga kaminyoon. Dapita ang mga estudyante sa pagreport sa unsay ilang nakit-an. (Ang mga estudyante kinahanglan molakip sa ilang mga tubag nga ang sugo gihatag isip paagi sa pagdugang sa gidaghanon sa mga bata nga matawo sa pakigsaad sa ebanghelyo. Niining paagiha, ang katawhan sa Ginoo “mopasanay og binhi” ngadto Kaniya.)

Itudlo nga ang mga paningkamot sa unang mga Santos sa pagsunod niini nga sugo “[mi]resulta sa pagkatawo sa daghang mga anak diha sa mga panimalay sa matinud-anong mga Santos sa Ulahing mga Adlaw” (“Plural Marriage and Families in Early Utah,” Gospel Topics, topics.ChurchofJesusChrist.org).

Sa wala madugay ang Ginoo mipadayag nga ang mga Santos sa Ulahing mga Adlaw kinahanglang mohunong sa pagbuhat og dinaghan nga kaminyoon.

Dapita ang usa ka estudyante kinsa nagtuon sa materyal sa pagpangandam (seksyon 2) sa pag-istorya unsay nakaingon sa paghunong sa dinaghan nga kaminyoon sa gipahiuli nga Simbahan.

• Unsaon ninyo sa pagpasabut sa gibarugan sa Simbahan karon bahin sa dinaghan nga kaminyoon ngadto sa usa ka tawo?

Dapita ang pipila ka estudyante sa pagpuli-puli og pagbasa og kusog gikan sa una ug sa ikapito nga parapo sa “Excerpts from Three Addresses by President Wilford Woodruff regarding the Manifesto,” nga gisundan sa Opisyal nga Pahayag 1.

• Unsa ang gitudlo ni Presidente Woodruff sa mga Santos? (Ang mga estudyante kinahanglan nga moila sa kamatuoran susama sa mosunod: Ang Ginoo dili gayud motugot sa Presidente sa Simbahan nga mopahisalaag sa Simbahan.)

• Sa unsa nga paagi nga kini nga kamatuoran makaapekto sa paagi sa atong personal nga pagsanong sa tambag ug mga pagtulun-an sa buhi nga propeta sa Ginoo?

Tapusa pinaagi sa pagpakigbahin sa imong pagpamatuod nga si Propeta Joseph Smith ug ang ubang unang mga lider sa Simbahan tinuod nga mga propeta sa Dios kinsa masulundon nga misunod ug mitudlo sa mga sugo sa Ginoo ngadto sa mga Santos sa Ulahing mga Adlaw.

Alang sa Sunod nga Higayon

Ipasabut ngadto sa mga estudyante nga samtang magtuon sila alang sa sunod nga klase, makabaton sila og oportunidad sa pagkat-on mahitungod sa mga detalye nga naglibut sa kamatayon nila ni Joseph ug Hyrum Smith. Awhaga ang mga estudyante sa pag-anha sa klase nga andam nga mohisgot sa ilang mga hunahuna sa unsay nahimo ni Joseph Smith isip propeta sa Dios.