Leksyon 18 Materyal sa Pagpangandam sa Klase

Kababayen-an nga mga Santos sa Ulahing mga Adlaw ug ang Relief Society

Sa dihang naghisgot mahitungod sa Relief Society, si Propeta Joseph Smith namahayag, “Ang Simbahan wala gayud maorganisar sa hingpit hangtud ang mga kababayen-an na-organisar” (Mga Pagtulun-an sa mga Presidente sa Simbahan: Joseph Smith [2007], 545). Hunahunaa ang mensahe niini nga pamahayag nga gipadala ngadto sa kalibutan mahitungod sa dapit sa kababayen-an diha sa Simbahan sa Ginoo. Samtang kamo magtuon niini nga mga materyal, pamalandunga unsa ka importante ang buhat sa kababayen-an nga mga Santos sa Ulahing mga Adlaw ug ang Relief Societ sa gipahiuli nga Simbahan ni Jesukristo.

Seksyon 1

Sa unsa nga paagi nga ang kababayen-an nga Santos sa Ulahing Adlaw motukod sa gingharian sa Dios?

Si Elder James E. Talmage sa Korum sa Napulog Duha ka mga Apostoles sa makausa miingon, “Ang pinakabantugan nga manlalaban sa kalibutan alang sa mga babaye ug sa pagkababaye mao si Jesukristo” (sa Anak nga mga Babaye sa Akong Gingharian [2011], 3).

Si Presidente M. Russell Ballard sa Korum sa Napulog Duha ka mga Apostoles mitudlo:

Ang atong mga sister kanunay nga importante sa buhat sa Ginoo. Ang matinud-anon nga mga babaye maisugon nga naghago sa kawsa sa kamatuoran ug pagkamatarung sugod sa wala pa ang pundasyon niini nga kalibutan. … Ang atong dispensasyon wala mawad-i og mga bayaning babaye. (M. Russell Ballard, “Women of Righteousness,” Ensign, Abr. 2002, 69)

Si Emma Smith, ang asawa ni Propeta Joseph Smith, nagsilbi nga usa ka ehemplo sa usa ka babaye nga Santos sa Ulahing mga Adlaw kinsa nakatuman og usa ka importante nga tahas sa Pagpahiuli. Sa usa ka pagpadayag ngadto ni Joseph Smith, gihisgutan sa Ginoo nga si Emma usa ka “pinili nga babaye” (Doktrina ug mga Pakigsaad 25:3). Samtang magbasa kamo sa pipila niini nga pagpadayag, ikonsiderar ang pagmarka sa mga responsibilidad ug tambag nga gihatag sa Ginoo ngadto ni Emma. Timan-i nga sa bersikulo 16 ang Ginoo mipahayag nga ang Iyang tambag nga gihatag ngadto ni Emma alang usab sa matag usa kanato.

Pagtuon agi og Pagpangandam alang sa Klase

Basaha ang Doktrina ug mga Pakigsaad 25:5–7, 10–11, 13, 15–16.

Sila si Emma ug Joseph nag-antus og daghang mga pagsulay sa panahon sa ilang panag-uban. Sila usab nakahatag og dakong kahupayan ug kalipay sa usag usa. Matinud-anon sa iyang calling, si Emma usa ka dakong kahupayan ngadto ni Joseph, nag-awhag ug naghupay kaniya sa mga panahon sa mga pagpanggukod ug mapait nga mga pagsulay. Namalandong sa usa ka panahon sa dihang si Emma mibisita kaniya samtang siya nagtago gikan sa peligro, ang Propeta misulat, “Ania na usab siya, bisan sa pinakabag-o nga kasamok, walay kahadlok, malig-on, walay pagkausab, mahigugmaon nga Emma” (“Journal, Disyembre 1841–Disyembre 1842,” 135, josephsmithpapers.org).

Si Emma nagserbisyo sa makadiyot isip tigsulat ni Joseph, nagtabang sa paghubad sa Basahon ni Mormon. Sa iyang tibuok kinabuhi maisugon siyang mipamatuod sa Basahon ni Mormon. Sa hapit na siya mamatay iyang gisultihan ang iyang anak nga lalaki: “Ang akong pagtuo mao nga ang Basahon ni Mormon tinuod nga balaan—Wala akoy bisan gamay nga pagduha-duha niini” (Emma Smith, in “Last Testimony of Sister Emma,” Saints’ Herald, Okt. 1, 1879, 290). Masulundon sa sugo sa Ginoo, si Emma mihimo usab sa unang libro sa himno sa Simbahan.

Si Emma mitudlo pinaagi sa ehemplo: “Sa New York, nanahi siya og mga saput alang sa upat ka mga misyonaryo nga gitawag sa pagsangyaw sa ebanghelyo. … Sa Kirtland, nakig-uban siya og trabaho sa ubang mga babaye sa pagpangolekta og mga habol, pagkaon, ug mga sapot alang sa mga nangmartsa sa Zion’s Camp nga dad-on ngadto sa naglisud nga mga Santos sa Missouri. Mitabang siya sa pag-andam og mga pagkaon ug paghimo og mga [sinina] alang sa mga trabahante nga nagtukod sa Templo sa Kirtland. Midawat siya og daghang trabahador sa templo isip mga kasera nga siya ug si Joseph kinahanglang matulog sa salog. Sa unang mga adlaw sa Nauvoo, gihalad niya ang daghan niyang panahon ug atensyon sa pag-atiman sa daghang mga biktima sa malaria nga nagtolda sa gawas sa iyang panimalay sa mga tampi sa Suba sa Mississippi. Niini ug ubang mga paagi, iyang gihulagway ang pag-alagad nga gihatag sa daghang mga sister sa iyang panahon” (Mga Pagtulun-an: Joseph Smith, 544).

Pamalandong agi og Pagpangandam alang sa Klase

Paghunahuna og usa ka sulundon nga babaye nga inyong nailhan kinsa migamit sa iyang impluwensya, tingog, ug mga abilidad sa paghimo og makahuluganong mga kontribusyon sa pagtukod sa gingharian sa Dios. Sa unsa nga paagi siya nagtukod sa gingharian sa Dios sa atong panahon?

Seksyon 2

Unsa ang talagsaon mahitungod sa organisasyon sa Relief Society?

Niadtong tingpamulak sa 1842, ang mga Santos nakigbisog bisan sa ilang kakabus sa pagtukod sa Templo sa Nauvoo. Daghan sa mga sister nagtinguha nga makahimo og daghan sa pagtabang. Gipangulohan nila ni Sarah Kimball ug Margaret Cook, ang grupo sa mga sister nagpundok aron sa pagsulat og konstitusyon ug mga lagda ug mga sumbanan alang sa bag-ong kapunongan sa mga babaye sa pagpanahi og mga sinina alang sa mga trabahante sa templo. Sa dihang mikonsulta sila ni Propeta Joseph Smith, miingon siya kanila nga ang ilang konstitusyon mao “ang labing nindot nga sukad iyang nakita” (Mga Pagtulun-an: Joseph Smith, 543). “Apan,” miingon siya, “kini dili mao ang inyong gusto. Sultihi ang mga sister nga ang ilang mga halad gidawat sa Ginoo, ug siya adunay butang nga mas maayo alang kanila. … Gidapit ko silang tanan sa pagpakigkita nako ug sa pipila sa mga kaigsoonan … ug akong i-organisar ang mga babaye ubos sa pagkapari subay sa sumbanan sa pagkapari” (sa Anak nga mga Babaye sa Akong Gingharian, 12). Si Eliza R. Snow nahinumdom nga si Joseph Smith mitudlo sa Relief Society nga “ang sama nga organisasyon diha na sa karaan nga simbahan” (sa Anak nga mga Babaye sa Akong Gingharian, 8).

Si Sister Julie B. Beck, kanhi Kinatibuk-ang Presidente sa Relief Society, mitudlo unsay buot ipasabut sa pag-organisar subay sa sumbanan sa pagkapari:

Ang Relief Society talagsaon tungod kay naorganisar kini sunod sa “sumbanan sa pagkapari” [Joseph Smith, kinutlo sa Sarah M. Kimball, “Auto-biography,” Woman’s Exponent, Sept. 1, 1883, 51]. … Naglihok kita sa pamaagi sa pagkapari—nga nagpasabut nga kita magtinguha, modawat, ug molihok subay sa pagpadayag; mohimo og mga desisyon diha sa mga konseho; ug atong hatagan og pagtagad ang pag-amuma sa mga indibidwal nga tagsa-tagsa. Ang atoa mao ang katuyoan sa pagkapari sa pag-andam sa atong mga kaugalingon alang sa mga panalangin sa kinabuhing dayon pinaagi sa paghimo ug pagtuman sa mga pakigsaad. Busa, sama sa atong mga kaigsoonan nga naghupot sa pagkapari, ang atoa mao ang buhat sa kaluwasan, pagserbisyo, ug mahimong balaan nga mga tawo. (Julie B. Beck, “Usa ka Sagrado nga Buluhaton,” Liahona, Nob. 2009, 110)

Si Presidente Dallin H. Oaks sa Unang Kapangulohan dugang nga mihatag og gibug-aton nga ang buhat sa Relief Society himoon pinaagi sa awtoridad sa pagkapari:

Sa pakigpulong ngadto sa Relief Society, si Presidente Joseph Fielding Smith, nga nianang higayona Presidente sa Korum sa Napulog Duha ka mga Apostoles, miingon niini: “Samtang ang mga sister wala [maordinahi ngadto] sa Priesthood] Pagkapari … wala kana magpasabut nga ang Ginoo wala mohatag nila og awtoridad. … Makasulti kamo uban sa awtoridad, kay ang Ginoo mihatag ninyo og awtoridad.” Miingon usab siya nga ang Relief Society “[gi]hatagan og gahum ug awtoridad sa paghimo og daghang dagkong mga butang. Ang buhat nga ilang gihimo gibuhat pinaagi sa balaang awtoridad” [“Relief Society--An Aid to the Priesthood,” Relief Society Magazine, Ene. 1959, 4–5]. …

… Bisan kinsa nga naglihok diha sa katungdanan [office] o tawag nga nadawat gikan sa tawo nga naghupot sa mga yawe sa pagkapari naggamit sa awtoridad sa pagkapari sa paghimo sa iyang gisangun nga mga katungdanan. (Dallin H. Oaks, “Ang mga Yawe ug Awtoridad sa Priesthood Liahona, Mayo 2014, 50–51)

Seksyon 3

Sa unsa nga paagi nga ang mga babaye ug ang Relief Society makatabang sa pagtuman sa mga katuyoan sa Dios ug sa Iyang Simbahan?

Ang unang miting sa Relief Society gihimo niadtong Marso 17, 1842, sa ibabaw nga lawak sa Red Brick Store ni Joseph Smith sa Nauvoo, Illinois. Si Emma napili ug gipaluyohan isip presidente sa bag-ong organisasyon. Si Joseph mibarug ug mipasabut nga kini mao ang katumanan sa deklarasyon sa Ginoo nga si Emma mao ang “usa ka pinili nga babaye, kinsa Ako mitawag” (Doktrina ug mga Pakigsaad 25:3). Sa wala madugay ang Propeta miingon: “Kini nga society modawat og panudlo pinaagi sa kapunongan nga gitukod sa Dios—pinaagi sa tawo nga gitudlo sa pagpangulo—ug ako karon mohatag sa yawe nganha kaninyo sa ngalan sa Dios, ug kini nga society maglipay ug ang kahibalo ug panabut modagayday sukad niini nga panahon” (sa Anak nga mga Babaye sa Akong Gingharian, 17).

Si Sister Emma Smith mipahayag nga ang tanang mga babaye sa Simbahan magtinabangay sa paghimo og “butang nga dili ordinaryo” (“Joseph Smith’s Teachings about Priesthood, Temple, and Women,” Gospel Topics, topics.ChurchofJesusChrist.org). Samtang kamo magtuon sa mosunod nga mga pamahayag, ikonsiderar ang pagmarka kon unsa ang importante kaninyo mahitungod sa mga katuyoan ug misyon sa Relief Society.

Zina D. H. Young, kanhi Kinatibuk-ang Presidente sa Relief Society, nahinumdom:

Ang Relief Society … unang naorganisar … sa paghatag og temporal nga mga panalangin ngadto sa mga kabus ug timawa: ug sa paghatag og kadasig ngadto sa maluyahon, ug pagpugong sa mga masalaypon, ug alang sa mas maayo nga paglambo, ug paggamit sa mga pagbati sa kalooy ug gugma sa babaye, nga siya makabaton og oportunidad nga makaangkon og espirituhanong kalig-on, ug gahum sa paghimo og mas dakong kaayohan diha sa buhat sa katubsanan sa tawhanong pamilya. (“First General Conference of the Relief Society,” Woman’s Exponent, Abr. 15, 1889, 172)

Si Sister Beck mitudlo:

Si Joseph Smith miingon nga ang mga babaye niini nga Simbahan giorganisar aron makahatag og “kahupayan sa mga kabus, sa timawa, sa biyuda ug sa ilo, ug alang sa paghimo sa tanang mabination nga mga katuyoan” [sa History of the Church, 4:567] ug “dili lamang sa paghupay sa mga kabus, apan sa pagluwas sa mga kalag” [sa History of the Church, 5:25]. Kana nga paningkamot sa kahupayan dugang nga gipasabut ni Elder John A. Widstoe isip “kahupayan gikan sa kakabus, kahupayan gikan sa sakit; kahupayan gikan sa pagduha-duha, kahupayan gikan sa pagka-ignorante—kahupayan gikan sa tanang babag … kalipay ug kalamboan. …” [Evidences and Reconciliations, arr. G. Homer Durham, 3 vols. in 1 (1960), 308]

… Pinaagi sa Relief Society kita magbansay ingon nga mga disipulo ni Kristo. Kita magkat-on unsay Iyang buot nga atong makat-unan, kita magbuhat unsay Iyang buot ipabuhat kanato, ug kita mahimo unsay Iyang buot nga kita mahimo. (Julie B. Beck, “Unsay Labing Maayo nga Mahimo sa Santos sa Ulahing mga Adlaw nga Babaye: Barug nga Lig-on ug Dili Matarug,,” Liahona, Nob. 2007, 111, 109)

Si Presidente Spencer W. Kimball mipasabut ngano ang mga lalaki ug mga babaye kinahanglang makasabut sa mga katuyoan ug gahum sa Relief Society:

Adunay gahum niiini nga organisasyon [sa Relief Society] nga wala pa magamit sa hingpit sa paglig-on sa mga panimalay sa Zion ug pagtukod sa Gingharian sa Dios—gani kini dili magamit sa hingpit hangtud ang mga sister ug ang priesthood [mga lalaki] makasabut sa kaimportante sa panan-awon sa Relief Society. (Spencer W. Kimball, sa Anak nga mga Babaye sa Akong Gingharian, 168–7; italiko gidugang)

Pamalandong agi og Pagpangandam alang sa Klase

Unsa ang mabuhat sa kababayen-an ug kalalakin-an aron mobati sila og kahinam sa panan-awon sa Relief Society ug magtambayayong sa pagtabang aron matuman ang mga katuyoan niini?

Gusto pa ba Mo og Dugang? (Opsyonal)

Unsa ang gitudlo ni Joseph Smith mahitungod sa mga babaye ug awtoridad sa pagkapari?

Ang artikulo “Joseph Smith’s Teachings about Priesthood, Temple, and Women” (Gospel Topics, topics.ChurchofJesusChrist.org) naghulagway sa mga pagtulun-an ni Joseph Smith mahitungod sa mga babaye ug awtoridad sa pagkapari.

Asa ako makakita og makadasig nga mga istorya sa matinud-anong mga babaye nga Santos sa Ulahing mga Adlaw?

Suhira ang Women of Conviction koleksyon sa history.ChurchofJesusChrist.org alang sa mga istorya sa matinud-anong mga babaye nga Santos sa Ulahing mga Adlaw sa tibuok kalibutan.

Ang basahon nga Anak nga mga Babaye sa Akong Gingharian naglakip usab og pipila ka mga istorya sa matinud-anong mga babaye ug sa ilang buhat sa Relief Society.

Isip usa ka ehemplo, mahimo kamong magsugod niini nga istorya bahin sa Presidente sa Relief Society nga si Belle Spafford, kinsa mipakita og impluwensya sa Relief Society ngadto sa laing mga tinuohan.

Sa unsa nga paagi nga si Emma giisip nga “usa ka pinili nga babaye”?

Tan-awa sa video “An Elect Lady” (5:18) aron makat-on pa og dugang mahitungod sa kon ngano nga ang Ginoo mipasidungog ni Emma niini nga tawag [title].